Geiq Dwzbaijyienz 9 - Gij Baujcingq Moq Caeuq Geij Bonj Gij Baujcingq Daeuzdaeuz

Saujloz sinq Yehsuh

¹ Saujloz nej, Saujloz vanzlij dwg gangj doenghgij vah doegdoeg siebsieb he ma haep gyoengq lwgsae Yehsuh Bouxcawj. De bae cimh goengjsae dajbwiz hih boux daeuzdaeuz he,

² bae gouz boux de, hawj boux de sij mbaw bihcwnj he hawj de, hawj de bae Daqmajswqgwz Singz, bae gak aen veiqdangz bae dawz doenghgij ciuq Yehsuh byaij hih vunz he, mboujguenj vunzsai vunzbaz cungj gaemh bae daengz Yehluqsajlaengj bae.

³ Yiengq de ijvanh bae daengz Daqmajswqgwz hih mwhde, sawqmwh miz ndaek rag rongh myig myiengzmyiengz he daj gwnzmbwn ceq roengzdaeuj, ceq dawz de.

⁴ De couh doq ngaiz laemxdengx roengzbae, caemh doq dingqri miz sing doiq de naeuz: “Saujloz, Saujloz! Mwngz vihmaz ij haih gou?”

⁵ Gajlaeng Saujloz naeuz: “Goengjau, mwngz dwg byawz hax?” Gij sing mwnq han de naeuz: “Gou couh dwg mwngz haih dih Yehsuh hah.

⁶ Vaiq hwnq, vaiq hwnq haeuj singz bae! Swhmboujyienz miz vunz naeuz mwngz ni mwngz ij guh gijmaz.”

⁷ Caemh youq mwhneix, doengh boux gaen Saujloz bae hih doengh boux mwnq gan dingqri miz sing gangj lah, hoeng, yawj mij raen miz vunz. Yiengq, gyoengqde cungj lau hwj ndwn youq mwnq saemjsangjrangx aj bak loengjloengq gangj mbouj ok bak.

⁸ Saujloz dingqri yienghneix le, couh vaiqdi hwnq. De hwnq le, baex hoi ra he, laixlawz cehra de baenzlwh yawj engq yawj mij raen saek yiengh haem lo. Yiengq doengh boux gaen de bae mwnq raen de yienghneix le, couh ying fawz de bae Daqmajswqgwz Singz lo.

⁹ De sam ngoenz cungj mbouj ndaej raen saek yiengh, caemh gijmaz cungj mbouj gw.

¹⁰ Yiengq youq Daqmajswqgwz miz boux lwgsae heuh Yaqnaznizyaq he. Yehsuh hawj de caenh lujnaeuz fangxngwnzloq yienghmwnq, youq ndaw loq de heuh de naeuz: “Yaqnaznizyaq!” Yaqnaznizyaq han naeuz: “Aex, bouxcawj gou hax, gou youq dineix.”

¹¹ Yehsuh caiq naeuz: “Mwngz majcangq bae diuz gai heuh Gai Soh mwnq bae, bae laeng Youzdaq, laeng de cimh boux daj aen singz Daqsuq daeuj he. Boux de heuh Saujloz; de seizneix cingq gouz gou nex. Mwngz bae mwnq.

¹² Gou gaenq hawj boux de caenh lujnaeuz ra ok rongxrib yienghmwnq yawjraen mwngz, Yaqnaznizyaq, bae oemj fawz haeuj laeng de bae, hawj de ndaej dauqyungz yawjraen.”

¹³ Yiengq Yaqnaznizyaq han naeuz: “Bouxcawj hax, miz haujlai vunz naeuz gou ni goq, boux vunz mwnq youq Yehluqsajlaengj baenzlawz baenzlawz haih gij vunz mwngz.

¹⁴ De seizneix daeuj dineix; doengh goengjsae dajbwiz he caemh hawj gienz hawj de, hawj de daeuj gaemh sojmiz nginh mwngz dwg bouxcawj hih vunz nex.”

¹⁵ Hoeng Yehsuh engq han naeuz: “Mwngz caenhrox coengqsim bae sat lo, aenvih gou senj de daeuj swqhaeuh gou; gou ij hawj de youq doenghheij vunz linghvaih minzcuz he, doenghheij dang vuengz he, caeuq youq gij vunz Hijswzlez ndaw de cenzgangj gou dwg bouxlawz.

¹⁶ Gou caemh ij hawj de rox vih gou hwj ngaiz souh daengz geijlwh nanh.”

¹⁷ Yaqnaznizyaq dingq Yehsuh yienghneix naeuz le, couh ciuq de gangj hih yienghmwnq bae guh lo. De couh haeuj bae daengz aen ranz Youzdaq, couh oemj fawz hawj Saujloz, doiq de naeuz: “Saujloz beixnuengx hax, mwh mwngz daeuj dineix hih mwhde, youq dangjroen yienh hawj mwngz raen dih Yehsuh Bouxcawj hax, de baij gou daeuj, hawj gou daeuj hawj mwngz dauqyungz yawj ndaej raen, vanzlij hawj Hoenzsaenz Cangqdiq hawj mwngz rim bae.”

¹⁸ Yaqnaznizyaq yienghneix doiq Saujloz naeuz le, cehra Saujloz couh doq miz ndaek gij luj gyaepbya he daj cehra de doek okdaeuj, yiengq cehra de couh doq yawj ndaej raen boiz lo. Yawj ndaej raen le, de couh sijlij lo.

¹⁹ Couh yienghneix, gajlaeng Saujloz gw haeux le, aen ndangdaej de couh dauqfuk boiz lo. Gajlaeng de youq Daqmajswqgwz gaen gij lwgsae mwnq youq duenh he.

Saujloz youq Daqmajswqgwz cenzgangj gij vah Cangqdiq

²⁰ De youq mwnq hih duenh cizgyenh mwnq, de bae gak aen veiqdangz cenzgangj gij saeh Yehsuh, cenz naeuz Yehsuh dwg lwg Cangqdiq.

²¹ Sojmiz dingq de gangj vah hih vunz cungj raen geizheih ij rai, couh naeuz: “Ox! Boux neix mbouj dwg youq Yehluqsajlaengj bwkhaih gij vunz sinq Yehsuh hih maz? De daeuj dineix, caemh mbouj dwg ij gaemh gyoengq vunz sinq mwnq bae gyau hawj doengh goengjsae dajbwiz hih maz?”

²² Couh daj mwhneix hwnj, Saujloz yied gangj yied ndaej cingqmingz Yehsuh dwg Gihduz, Cangqdiq baij daeuj dih vuengz, gangj hawj Daqmajswqgwz dih Youzdaiq vunz ngoemxngwd mij vah gangj bae.

Saujloz ndaej duet ok gij vunz Youzdaiq

²³ Yiengq gij vunz Youzdaiq mbouj fug Saujloz buekhingz gyoengqde. Gij saeh neix goq duenh he le, gyoengqde couh doxyuk hwj ijsiengj gaj Saujloz.

²⁴ Gyoengqde vih ij gaj Saujloz, ngwnzngoenz cungj souj youq doenghheij baksingz he hwj, hoeng, gij yimhmaeuz gyoengqde ngaiz Saujloz rox.

²⁵ Gajlaeng miz haemh he, gyoengq lwgsae Saujloz couh aeu loz ma daj conghcang gwnz ciengz duengq Saujloz ok rog ciengz bae, hawj de deuz.

Saujloz youq Yehluqsajlaengj

²⁶ Saujloz ndaej deuz okma le, de bae daengz Yehluqsajlaengj, siengj caeuq gyoengq lwgsae mwnq, gaep gyoengq lwgsae mwnq, hoeng, gyoengq lwgsae mwnq cungj mbouj leixlangh de, cungj lau de ij rai, cungj mbouj sinq naeuz de caemh dwg lwgsae Yehsuh.

²⁷ Caenhgag miz boux lwgsae heuh Bahnazbah he leix de, daiq de bae cimh gyoengq dwzbaijyienz, bae gangj naeuz gyoengqde ni de youq dangjroen baenzlaw raen Yehsuh, Yehsuh baenzlawz doiq de naeuz, youq Daqmajswqgwz baenzlawz mbeihung hwj hij gij mingzhiq Yehsuh ma cenzgangj Cangqdiq dih ndei siuhsiz cungj gangj naeuz gyoengqde ni liux.

²⁸ Couh yienghneix, Saujloz daj mwhmwnq hwnj couh caeuq Yehluqsajlaengj hih lwgsae miz laizvangj,

²⁹ caemh youq mwnq mbeihung hwj hij gij mingzhiq Yehsuh ma gangj vah. De caemh siengzseiz caeuq gij vunz gangj Hihlaz vah dih Youzdaiq vunz cix gangj cix doxeuq lwnh gvanhhih Cangqdiq dih ndei siuhsiz, hoeng gyoengq vunz mwnq dauq ijsiengj gaj de.

³⁰ Gajlaeng gyoengq lwgsae rox gij saeh neix le, couh daiq de bae Gaijsajliqyaq Singz, gajlaeng caiq hawj de bae Daqsuq Singz.

³¹ Gajlaeng, Youzdaiq hah, Gyahliqliq hah, Sajmajliqyaq hah, gak dieg dih gyauqveiq cungj bingzdingh ndaej duenh he. Gyauqveiq caemh cungj dwg gig soenhgingq Cangqdiq, caemh cungj dwg ndaej daengz Hoenzsaenz Cangqdiq dih bangcoh ndaej laeb hwnjdaeuj, gij vunz caemh yied ngoenz yied lai hwnjdaeuj lo.

Bijdwz yw vunz gyad

³² Caiq gangj daengz Bijdwz, Bijdwz de dauqcawq byaij dauqcawq bae. Miz baez he, de bae daengz dieg Cahlwnz aen mbanj Lijdaq, bae mwnq yawj gij vunz Cangqdiq.

³³ Youq mwnq de nyangz boux vunz gyad he, gij coh de heuh Hijnizyaq. Boux de gaenq gyad ninz youq gwnz congz baenx bet bi lo.

³⁴ Bijdwz raen le, couh doiq de naeuz: “Hijnizyaq, Yehsuh Gihduz yw mwngz ndei lo. Hwnq bax! Hwnq soujsib doxgaiq bax!” Bijdwz yienghneix naeuz le, de couh majcangq hwnq hwnjdaeuj.

³⁵ Gajlaeng sojmiz youq Mbanj Lijdaq dih vunz cungj yawjraen de ndaej byaij, simqciq baenx cenz dieg Cahlwnz hih vunz cungj caemh yawjraen de ndaej byaij le, couh sinq Yehsuh Bouxcawj lo.

Bijdwz hawj vunzrai ndaej dauqlix

³⁶ Youq Yozbaq Singz miz boux lwgsae vunzbaz he, gij coh de heuh Daqbijdaq, fanhyiz daengz Hihlaz vah nex, couh dwg Dohgyah. De siengzseiz haenj bang vunz gungz, haenj guh ndeisaeh.

³⁷ Hoeng liuh mbouj daengz mwhneix de ngaiz bingh hwj rai lo. Gij vunz ndaw ranz de dawz gij seihaiz de swiq cengh le, couh coengq de youq aen fungh gwnz laeuz.

³⁸ Aenvih Yozbaq Singz liz Mbanj Lijdaq mbouj geijlwh gyae, yiengq youq Yozbaq dih doenghheij lwgsae mwnq dingq naeuz Bijdwz youq Lijdaq le, couh baij song boux bae cimh de, gouz de naeuz: “Cingj mwngz vaiqdi bae gyoengqraeuz mwnq bax.”

³⁹ Bijdwz dingq le, couh majcangq gaen gyoengqde bae. Bijdwz ngamq baex bae daengz he, gyoengqde couh majcangq daiq de hwnj laeuz bae. Yiengq youq mwnq sojmiz hih mehmaiq cungj gvaengz Bijdwz hwj daej, doq daej doq hawj Bijdwz yawj Dohgyah gaxgonq nyib hawj gyoengqde hih buh baixndaw caeuq buhdox.

⁴⁰ Gajlaeng Bijdwz hawj gyoengqde ok rog bae. Gyoengqde ok bae le, de couh gvih roengzma gouzcam Cangqdiq. Gouz le, couh veq ndang goqma doiq boux vunzrai mwnq naeuz: “Daqbijdaq! Hwnq!” Bijdwz baex naeuz yienghneix he le, boux de couh doq hoi ra, couh doq yawjraen Bijdwz, couh majcangq doq naengh hwnjdaeuj.

⁴¹ Yiengq Bijdwz couh byaij goqbae raeuz de hwnq, caiq heuh gyoengq lwgsae caeuq doengh mehmaiq mwnq haeuj daeuj, hawj gyoengqde yawj Dohgyah, boux vunz ndaej dauqlix neix.

⁴² Gajlaeng gij siuhsiz neix cenz baenx cenz Yozbaq, caemh miz baenx haujlai vunz cungj sinq Yehsuh Bouxcawj lo.

⁴³ Daj mwhmwnq, Bijdwz youq Yozbaq youq duenh cizgyenh he, youq laeng boux gyahgungh naeng doenghduz he, boux de heuh Sihmaenz, youq laeng de youq.