Geiq Dwzbaijyienz 8 - Gij Baujcingq Moq Caeuq Geij Bonj Gij Baujcingq Daeuzdaeuz

^1-2 Gajlaeng, miz gij vunz aiq Cangqdiq yawjnaek Cangqdiq he couh dawz Swhdizfanj bae moek. Gyoengqde caemh gikheiq siengsim de ngaiz vunz dub rai. [1]Daj ngoenz mwnq hwnj, Yehluqsajlaengj dih gyauqveiq cungj souh daengz bwkhaih youqgaenj raixcaix. Cawz doengh boux dwzbaijyienz he ok, miz haujlai lwgsae cungj faensanq bae daengz Youzdaiq caeuq Sajmajliqyaq gak dieg.

Saujloz haih gyauqveiq

³ Yiengq Saujloz ijsiengj cawz youq Yehluqsajlaengj dih gyauqveiq. De couh ndij hoh ndij hoh bae lieb, lieb yawj mwnqlaw miz lwgsae doxcomz hih couh gaemh lwgsae; mboujguenj vunzsai vunzbaz, cungj ngaiz gaemh dawz rag bae gyaeng haeuj ndaw lauz bae.

Ndei siuhsiz cenz bae daengz Sajmajliqyaq

⁴ Hoeng, doenghheij lwgsae faensanq bae daengz gak dieg hih doenghheij lwgsae mwnq, gyoengqde vanzlij ndaej dauqcawq bae cenz gij ndei siuhsiz Cangqdiq.

⁵ Yiengq Feihliq bae daengz dieg Sajmajliqyaq dih aen singz he le, couh gaihcij cenzgangj byawz dwg Gihduz.

⁶ Gyoengq vunz mwnq cungj dingq de gangj hwj diemzmih bae, caemhcaiq raen de guh gij saeh ndaej cingqmingz Cangqdiq dih gienzveih gaenq fazveih he. Gajlaeng gyoengqde couh dingq gij vah de.

⁷ Mwhde gij vunz mwnq miz haujlai vunz ngaiz fangz doz, cungj caemh ndaej boenq okma lo; gij fangz ngaiz boenq okma mwnq hemq vauxvaux. Yiengq caemh miz haujlai vunz gyad, vunz ha vej cungj caemh ndaej yw ndei lo.

⁸ Couh yienghneix, aen singz mwnq hih vunz cungj angq hwj nauhyied foenxfoenx bae.

Boux rox doeng loengh sae loengh he dingq gij ndei siuhsiz Yehsuh

⁹ Yiengq youq aen singz mwnq miz boux he, gij coh de heuh Sihmaenz. De senqsi cix youq aen singz mwnq guh suenqmingh, doeng loengh sae loengh, hawj gij vunz mwnq raen geizheih ij rai bae. De caemh gag haenh naeuz bonjfaenh de ak raixcaix,

¹⁰ guh hwj gij vunz mwnq mboujguenj bouxlaux lwgngez cungj dingq de gaen de. Gyoengqde cungj naeuz: “Boux vunz neix couh dwg Cangqdiq dih akak rengzrengz.” (Gij akak rengzrengz neix, gyoengqde caemh heuh guh ‘Veijdaq.’)

¹¹ Aenvih de baenx geijlwh bi doxdaeuj cungj dwg youq mwnq suenqmingh, doeng loengh sae loengh, hawj vunz raen geizheih ij rai, sojhij gyoengq vunz cungj sinq de dingq de.

¹² Hoeng daengj daengz gyoengq vunz dingq daengz Feihliq cenzgangj aen guek Cangqdiq dih ndei siuhsiz, rox daengz Yehsuh Gihduz dwg byawz he le, gyoengqde couh sinq de soj gangj he; mboujguenj vunzsai vunzbaz cungj sijlij.

¹³ Gajlaeng daiqlienz Sihmaenz bonjfaenh de cungj sinq lo, caemh sijlij lo. De sinq le, couh siengzseiz gaen youq henz ndang Feihliq, caemh raen Feihliq guh gij geizmiuj dih saeh, guh hawj de raen geizheih ij rai cix beiqfug ij rai.

¹⁴ Yiengq youq Yehluqsajlaengj hih dwzbaijyienz dingq naeuz Sajmajliqyaq hih vunz cungj dingq gij vah Cangqdiq le, couh baij Bijdwz caeuq Yozhanq bae mwnq.

¹⁵ Song boux de baex bae daengz he le, couh vih gij vunz sinq mwnq hwj gouz Cangqdiq, ij hawj Hoenzsaenz Cangqdiq doz youq gwnz ndang gyoengqde,

¹⁶ aenvih Hoenzsaenz Cangqdiq mijyaengz hwnj gwnz ndang gyoengqde bae saek boux; gyoengqde caenhgag hij gij mingzhiq Yehsuh Bouxcawj neix ma sijlij lah.

¹⁷ Sojhij Bijdwz caeuq Yozhanq couh oemj fawz hwnj gwnz ndang gyoengqde bae gouz Cangqdiq, hawj Hoenzsaenz Cangqdiq hwnj gwnz ndang gyoengqde bae. Couh yienghneix, gyoengqde couh miz Hoenzsaenz Cangqdiq doz youq gwnz ndang gyoengqde lo.

¹⁸ Yiengq Sihmaenz raen song boux de oemj fawz le, gyoengq vunz mwnq couh doq ndaej miz Hoenzsaenz Cangqdiq lo. De raen yienghneix le, couh aeu ngaenz hawj song boux de,

¹⁹ doiq song boux de naeuz: “Hawj gij bonjsaeh neix hawj gou bax! Hawj gou caemh ndaej oemj fawz hawj byawz, byawz couh ndaej miz Hoenzsaenz Cangqdiq lo.”

²⁰ Bijdwz raen de yienghneix le, couh doiq de naeuz: “Mwngz caeuq gij ngaenz mwngz got rai bax! Mwngz gingqyienz luenh siengj, siengj aeu ngaenz ma cawx gij fuk Cangqdiq!

²¹ Mwngz mij'z faenh ndaej gaep gij hong gyoengqraeuz law, aenvih mwngz youq ndaw lwgra Cangqdiq dwg boux vunz simrwix he.

²² Sojhij mwngz ij daj ndaw sim nginh loek gaijgoq. Gaij gij doegsieb mwngz, gouz Cangqdiq; saekseiz de lij ndaej mienx ndaw sim mwngz dih gij siengjfap yalw mwngz.

²³ Gou yawj ndaej ok mwngz gag simnyap, ndaw sim mwngz cungj dwg rahoengz vunz he, caemh yawj ndaej ok mwngz cungj dwg ngaiz gij simdoeg simfwn mwngz gaemhanh mwngz cienfanh rem he.”

²⁴ Sihmaenz dingq le, couh gouz Bijdwz naeuz: “Cingj faenhsou bang gou gouz Cangqdiq, gouz de mbouj hawj doenghgij saeh faenhsou soj gangj hih dawz gou.”

²⁵ Couh yienghneix, Bijdwz caeuq Yozhanq youq mwnq guh cingqyinz, cenzgangj Cangqdiq dih ndei siuhsiz. Gajlaeng, song boux de couh maj Yehluqsajlaengj lo; gyoengqde itmienh maj, itmienh youq Sajmajliqyaq dih doenghheij mbanj he cenzgangj Cangqdiq dih ndei siuhsiz.

Aihsaiqngozbijyaq vunz sinq Yehsuh

²⁶ Miz ngoenz he, miz boux bouxcai Cangqdiq he doiq Feihliq naeuz: “Gou ij hawj mwngz bae fueng baixnamz; mwngz ij byaij diuz roen daj Yehluqsajlaengj daengz Gyahcaq dih diuz roen ndoi fwz mwnq.”

²⁷ Yiengq Feihliq caemh dingq gij vah de, couh okdin bae lo. Bae le, liuh mbouj daengz youq buenqroen nyangz boux Aihsaiqngozbijyaq vunz he; de dwg youq Aihsaiqngozbijyaq laeng Ganqdaqgih boux nijvangz neix guh guenj canghguq ngaenz he, de caemh dwg boux miz gienz ak dih daiqgyenh he. De bae Yehluqsajlaengj, bae gunghdenq Cangqdiq baiq Cangqdiq

²⁸ dauq ma daengz buenqroen. De gag youq gwnz ci bonjfaenh de doeg bonj saw boux cenz gij vah Cangqdiq Hijcaiqyaq sij dih bonj saw mwnq.

²⁹ Yiengq Hoenzsaenz Cangqdiq doiq Feihliq naeuz: “Mwngz goq bae dep aen ci mwnq.”

³⁰ Feihliq dingq le, couh riq goqbae dep aen ci mwnq, couh dingqri boux daiqgyenh mwnq youq ndaw ci doeg bonj saw boux cenz gij vah Cangqdiq Hijcaiqyaq sij dih bonj saw mwnq. Yiengq de couh cam boux de naeuz: “Mwngz doeg hih bonj saw neix hax, doeg rox gij iqswh de lwi?”

³¹ Boux daiqgyenh mwnq dingq le, han naeuz: “Mij'z vunz son gou; gaenhbaenj mbouj rox.” De yienghneix gangj le, couh cingj Feihliq hwnj aen ci de bae, caeuq de naengh.

³² Gizsaed de doeg hih duenh saw neix cingq dwg: De luj duz yiengz ngaiz vunz ying bae gaj he, caemh luj duz yiengzlwg ngaiz vunz dawz ma daet fwn, mbouj ae mbouj o he.

³³ De ngaiz vunz yawjngawz; mij vunz bang de gangj vah. Gangj daengz doengh daih gajlaeng, de mij'z faenh, aenvih de youq lajmbwn couh ij satsoq lo.

³⁴ Gajlaeng boux daiqgyenh mwnq cam Feihliq naeuz: “Cingj mwngz naeuz gou ni, boux cenz gij vah Cangqdiq gangj hih duenh vah neix dwg ceij bouxlawz? Dwg ceij bonjfaenh de hajx cixnaeuz ceij heijvunz?”

³⁵ Feihliq dingq de yienghneix cam le, couh daj duenh Singqgingh neix gaihcij gangj naeuz de ni gvanhhih Yehsuh dih siuhsiz.

³⁶ Couh yienghneix, Feihliq doq bae doq gangj naeuz de ni. Gajlaeng ngamqluj bae daengz mwnq he miz raemx, boux de couh naeuz: “Aeq, yawj veiq! Mwnq miz raemx hwj; gou ndaej mbouj ndaej youq mwnq sijlij hax?”

³⁷ [Feihliq han de naeuz: “Hauhnaeuz mwngz cingqcaen sinq nex, ndaej hah.” Boux de couh doq naeuz: “Gou sinq, gou sinq Yehsuh Gihduz dwg lwg Cangqdiq.”]

³⁸ De yienghneix naeuz le, couh hawj dingz ci. Song boux de couh roengz raemx bae; Feihliq couh bang de sijlij.

³⁹ Ndaej le, song boux de daj ndaw raemx hwnj ma hih mwhde, Hoenzsaenz Cangqdiq daiq Feihliq bae lo; daiqgyenh yawj mij raen de haem lo. Gajlaeng boux daiqgyenh neix vanzlij dwg giqcuz ganjroen, caemh dwg doq bae doq angq fwngjfwngq.

⁴⁰ Yiengq Feihliq nej, Hoenzsaenz Cangqdiq daiq de bae le, gajlaeng de cij rox bonjfaenh de youq Yaqsojduh Singz. Yiengq de couh ndij mbanj ndij singz bae cenzgangj Cangqdiq dih ndei siuhsiz, itcig daengz de bae daengz Gaijsajliqyaq Singz.