Geiq Dwzbaijyienz 4 - Gij Baujcingq Moq Caeuq Geij Bonj Gij Baujcingq Daeuzdaeuz

Bijdwz caeuq Yozhanq ngaiz saemj

¹ Couh youq mwh Bijdwz caeuq Yozhanq vanzlij doiq gij vunzlai gangj vah hih mwhde, sawqmwh miz doengh boux guh dajbwiz he caeuq boux guenj gunghdenq Cangqdiq dih daeuzdaeuz he, vanzlij miz doenghheij gaep haeuj Sajduhgaih baij hih vunz he, goq song boux de mwnq daeuj.

² Aenvih song boux de doiq gyoengq vunzlai gangj gvanhhih Yehsuh hawj vunzrai ndaej dauqlix dih saeh, sojhij gyoengqde couh aeuqheiq hwj ij rai bae.

³ Sojhij couh daeuj gaemh dawz song boux de, dawz song boux de gyaeng haeuj ndaw lauz bae. Aenvih mwhde gaenq mbwn laep lo, couh gyaeng gyoengqde daengz ngoenz daixngeih.

⁴ Yiengq, gannaeuz song boux de ngaiz gyaeng hwnjdaeuj lah, hoeng, doenghheij vunz ndaej dingq song boux de gangj vah goq hih, miz haujlai vunz cungj sinq lo. Gajlaeng sojmiz sinq hih vunz, gyacangq gaxgonq sinq hih haengzbaengzlaengz miz hajcien vunz.

⁵ Daengz ngoenz daixngeih, doengh boux Youzdaiq vunz dang daeuzdaeuz he caeuq doengh boux vunz gangj vah couh baenz he caeuq doengh boux fazliz cenhgyah he, doenghheij vunz neix, cungj youq Yehluqsajlaengj doxcomz.

⁶ Youq mwnq caemh vanzlij miz Yaqnaq boux goengjsae dajbwiz daeuzdaeuz he, caeuq Gaihyaqfaz, Yozhanq, Yaqlizcanhdaq doengh goengjsae dajbwiz neix, caeuq doenghheij caencik goengjsae dajbwiz daeuzdaeuz neix cungj caemh youq mwnq.

⁷ Gyoengqde couh daiq Bijdwz caeuq Yozhanq song boux de daeuj, saemjcam naeuz: “Faenhsou baengh byawz ndaej gij rengz neix, hij gij mingzhiq byawz daeuj guh gij saeh neix?”

⁸ Hoeng mwhneix Hoenzsaenz Cangqdiq doz youq gwnz ndang Bijdwz hwj rim bae; de couh han gyoengqde naeuz:

⁹ “Doenghheij goeng'ak faenhsou hax, hauhnaeuz ngoenzneix dwg vih gij saeh raeuz yw ndei boux vunz gyad neix caeuq de baenzlawz ndaej ndei hih gij saeh ndei neix hwj daeuj saemjcam raeuz nex,

¹⁰ gou naeuz sou caeuq naeuz gij vunz Hijswzlez, ndwn youq dangqnaj faenhsou hih boux vunz neix, de ndaej ndei hih gij neix, cungj dwg gvi hawj Nazsajlwz vunz Yehsuh Gihduz hih. Yehsuh Gihduz boux neix ngaiz faenhsou dawz de ding hwnj gwnz gyaq cixcib bae haihrai, hoeng, Cangqdiq gaenq hawj de ndaej dauqlix lo.

¹¹ Gangj daengz Yehsuh boux vunz neix, ndaw Singqgingh ndaw de caemh sij naeuz goq naeuz: De dwg doenghheij canghranz faenhsou vwt hih hengxdiuz; seizneix gaenq bienqbaenz aen ranz hih diuz gangqloz he lo.

¹² Miz de, vunz cij ndaej gouq. Cawz de ok, mij saek boux ndaej gouq vunz, aenvih Cangqdiq mij hawj saek boux youq lajmbwn hawj raeuz ndaej baengh de ma hwj ndaej gouq.”

¹³ Yiengq youq mwnq sojmiz hih vunz raen Bijdwz caeuq Yozhanq cungj baenxlai mbeihung, caemhcaiq rox naeuz song boux de baenjlaiz mij'z maz vaenzvaq he dih vunz le, cungj raen geizheih ij rai, couh rox daengz song boux neix dwg gaen goq Yehsuh he.

¹⁴ Caiq yawjraen boux vunz gyad yw ndei mwnq gaen song boux de le, couh mij vah gangj haem lo.

¹⁵ Gajlaeng gyoengqde couh hawj song boux de daj mwnq gyoengqde doxcomz mwnq ok ma. Hawj song boux de ok ma le, gyoengqde couh doxcimciek hwj

¹⁶ naeuz: “Gyoengqraeuz ij baenzlawz doiq song boux neix nej? Aenvih gyoengqde mingzmingz guh ok gij geizmiuj hih saeh he lo—youq Yehluqsajlaengj hih vunz bouxboux cungj rox liux lo—raeuz mbouj ndaej laih hih nej.

¹⁷ Hoeng hoengjlau gij saeh neix yied cenz yied gvangq nej, gyoengqraeuz ij haephaep gyoengqde cij ndaej, haep mbouj hawj gyoengqde caiq hij gij coh Yehsuh ma doiq vunz gangj vah lo.”

¹⁸ Gyoengqde yienghneix cimciek le, caiq hawj Bijdwz caeuq Yozhanq doiqyungz haeuj daeuj, couh haep song boux de, haep naeuz mboujguenj baenzlawz, cungj mbouj ndaej caiq hij gij coh Yehsuh ma doiq vunz gangj vah caeuq son vunz laem lo.

¹⁹ Hoeng, Bijdwz caeuq Yozhanq dauq han naeuz: “Faenhsou gag ngeix yawj, youq dangqnaj Cangqdiq, raeuz ij dingq Cangqdiq hajx cixnaeuz dingq faenhsou?

²⁰ Gyoengqraeuz doiq bonjfaenh raeuz soj yawjraen soj dingqri hih, mbouj ndaej naeuz haep bak redrwd cang ngoemx hwj mbouj gangj hih nej.”

^21-22 Bijdwz caeuq Yozhanq mboujguenj gyoengqde baenzlaw haep, song boux de vanzlij dwg ciuq saedsaeh han gyoengqde. Yiengq gyoengqde mbouj fug, vanzlij dwg haep song boux de, hoeng gyoengqde siengj mbouj ok gijmaz banqfaz ma fad song boux de. Gajlaeng couh swhswh coengq song boux de lo, [22]aenvih youq mwnq sojmiz hih vunz cungj vih boux vunz gyad daiqseng baenz gyad baenx seiqcib lai bi mwnq hoeng vanzlij ndaej yw ndei hih gij saeh geizmiuj neix hwj [21b]haenh Cangqdiq.

Gyoengq lwgsae caezsim haenh Cangqdiq gouz Cangqdiq

²³ Bijdwz caeuq Yozhanq baex coengq okma he le, couh majcangq maj daengz gyoengq vunz bonjfaenh mwnq bae, gangj naeuz gyoengq vunz ni doengh goengjsae dajbwiz caeuq doenghheij vunz gangj vah couh baenz he soj gangj hih vah cungj gangj naeuz gyoengqde ni liux.

²⁴ Gyoengq vunz dingq le, couh caezgya sing sang hwj haenh Cangqdiq gouz Cangqdiq, naeuz: “Bouxcawj hax, mwngz cauh liux mbwnmbwn deihdeih haijhaij caeuq sojmiz hih;

²⁵ mwngz yungh Hoenzsaenz mwngz ma hawj bouxhoiq mwngz, cojgoeng raeuz Daqveiq naeuz goq naeuz: Doenghheij daixlingh aen minzcuz hujheiq gyoengqraeuz dengxdengx mij yungh, siengj haih gyoengqraeuz caemh mij yungh.

²⁶ Lajmbwn hih vuengz cungj doxyuk hwnjdaeuj, doenghheij gaem gienz he caemh doxcomz youq itheij, ij gung Cangqdiq caeuq de dinghlaeb hih vuengz.

²⁷ “Gij vah neix ngoenzneix cingqgawq lingz raixcaix. Hihliz goeng'ak neix caeuq Bijlahdoh goeng saengjcangj neix youq aen singz neix caeuq doenghheij linghvaih aen minzcuz he caeuq doenghheij Hijswzlez vunz doxgaep hwnjdaeuj ij gung mwngz dinghlaeb dih bouxhoiq mwngz Yehsuh.

²⁸ Hoeng, gyoengqde ndaej guh daengz hih cungj dwg doenghgij mwngz soj cangjguenj soj giqvaq hih saeh lah.

²⁹ Bouxcawj hax, gyoengqde haep gyoengqraeuz. Seizneix raeuz gouz mwngz gyenhciq gyoengqde, hawj raeuz, bouxhoiq mwngz, miz mbei ndaej gamj cenz gij ndei siuhsiz mwngz.

³⁰ Caemh gouz mwngz iet gij fawz mwngz okdaeuj yw bingh, caiq gouz mwngz hawj raeuz ndaej hij gij mingzhiq bouxhoiq mwngz Yehsuh ma guh gij geizmiuj hih saeh he hwj ndaej cingqmingz mwngz dih gienzveih gaenq fazveih he.”

³¹ Gyoengqde ngamq gouz sat, sawqmwh gyoengqde youq mwnq gouz Cangqdiq haenh Cangqdiq hih mwnq dieg mwnq doenghdwd hwnjdaeuj. Couh yienghneix, gyoengqde bouxboux cungj doz miz Hoenzsaenz Cangqdiq. Gajlaeng gyoengqde couh mbeihung hwnjdaeuj cenzgangj Cangqdiq dih ndei siuhsiz,

^32-33 gyoengq dwzbaijyienz caemh miz rengz ndaej cingqmingz Yehsuh Bouxcawj ndaej dauqlix, Cangqdiq caemh soengq fuk hawj gak boux lwgsae lai hux lai. [32]Mwhde sojmiz hih lwgsae cungj dwg caezsim hih. Mij vunz naeuz faen mwngz faen gou hih saeh; miz doxgaiq cungj dwg doxcaeuq yungh he.

Mbouj faen mwngz gou

³⁴ Gyoengqde caemh mij saek boux naeuz noix gijmaz mbouj miz, aenvih gyoengqde bouxlawz miz ranz miz reih hih cungj hai hwj dawz gij ngaenz daeuj

³⁵ gyau hawj gyoengq dwzbaijyienz, gyoengq dwzbaijyienz caemh ciuq gak vunz ij yungh hih faen hawj gak vunz.

³⁶ Yiengq miz boux he heuh Yozswz; gyoengq dwzbaijyienz heuh de heuh Bahnazbah. (‘Bahnazbah’ dwg ‘gujliq vunz’ dih iqswh.) De dwg Caiqbujluqswh dih Liqveiq vunz he.

³⁷ De caemh miz gaiq reih he, de caemh dawz gaiq reih neix hai hwj dawz gij ngaenz daeuj gyau hawj gyoengq dwzbaijyienz.