Geiq Dwzbaijyienz 25 - Gij Baujcingq Moq Caeuq Geij Bonj Gij Baujcingq Daeuzdaeuz

Baujloz cangqgauq daengz goengjvuengz Lozmaj

¹ Bohgyiuz-Feihswhduh dang saengjcangj ndaej sam ngoenz le, couh daj Gaijsajliqyaq bae Yehluqsajlaengj.

² Yiengq Yehluqsajlaengj hih doengh goengjsae dajbwiz he caeuq Youzdaiq vunz dih lingjdauj couh bae de mwnq gauq Baujloz, caemhcaiq gouz de,

³ hawj de daiq Baujloz daeuj Yehluqsajlaengj. Gyoengqde yienghneix gouz de dwg vih siengj youq dangjroen demq hwj gaj Baujloz.

⁴ Hoeng, Feihswhduh dauq han gyoengqde naeuz: “Baujloz seizneix vanzlij gyaeng youq Gaijsajliqyaq. Gou mbouj geijlwh caez couh ij dauq maj mwnq lo.”

⁵ De vanzlij naeuz: “Gij lingjdauj faenhsou ndaej gaen gou bae hah. Hauhnaeuz boux vunz mwnq miz maz mbouj deng hih, caemh ndaej youq mwnq gauq de hah.”

⁶ Feihswhduh youq Yehluqsajlaengj aiq youq miz bet ngoenz daengz cib ngoenz yienghneix, couh dauq maj Gaijsajliqyaq lo. Maj daengz daixngeih ngoenz, de couh gaihdingz, couh baij vunz bae daiq Baujloz daeuj.

⁷ Baujloz ngamq baex daeuj daengz he, doenghheij Youzdaiq vunz daj Yehluqsajlaengj daeuj hih couh humx goqbae, mwngz gawq gwh gawq, doeng an sae an gij coih youqgaenj he daeuj gauq de, hoeng cungj mij saek yiengh ndaej cingqmingz naeuz de famh coih.

⁸ Gajlaeng, Baujloz buek gyoengqde naeuz: “Mboujguenj dwg doiq Youzdaiq vunz dih fazliz cixnaeuz dwg doiq gunghdenq Cangqdiq cixnaeuz dwg doiq goengjvuengz Lozmaj, gou cungj mbouj famh gijmaz coih.”

⁹ Hoeng, Feihswhduh siengj bungj gij vunz Youzdaiq, couh cam Baujloz naeuz: “Mwngz nyienh'eiq bae Yehluqsajlaengj, youq mwnq dingq gou buenqgyez gij saeh neix lwi?”

¹⁰ Baujloz dingq le, han naeuz: “Seizneix cingq ndwn youq Lozmaj dih fazdingz gwnz de; dineix dwg gou wnggai souh daengz saemjbuenq dih deixfueng. Mwngz caemh gag rox, gou gaenhbaenj mbouj guh gijmaz doiq mbouj hwnj Youzdaiq vunz dih saeh.

¹¹ Hauhnaeuz gou guh gijmaz loek, famh gijmaz hab rai hih coih nex, gou cungj mbouj lau rai. Caiq hauhnaeuz gyoengqde gauq gou hih cungj mbouj miz saedsaeh hih, byawz caemh mbouj ndaej dawz gou gyau hawj gyoengqde. Gou ij yiengq goengjvuengz Lozmaj cangqgauq.”

¹² Feihswhduh dingq le, couh caeuq boux gaen henz ndang de cimciek, gajlaeng couh doiq Baujloz naeuz: “Ndaej hah! Giqyienz mwngz ij gyenhciz cangqsuq daengz goengjvuengz mwnq vwz, yiengq mwngz couh bae de mwnq bax.”

Feihswhduh dawz gij saeh Baujloz gangj naeuz Yaqgihbaq ni

¹³ Goq geij ngoenz le, Yaqgihbaq boux dang dieg neix hih daeuzdaeuz he caeuq dahnuengx de Bwznizgih bae Gaijsajliqyaq Singz, bae yawj Feihswhduh.

¹⁴ Song boux de bae mwnq geij ngoenz le, Feihswhduh couh dawz Baujloz dih saeh gangj naeuz Yaqgihbaq boux dang daeuzdaeuz neix ni. De naeuz: “Feihlizswh youq mwnqn'x gyaeng boux vunz he.

¹⁵ Mbat gaxgonq gou bae Yehluqsajlaengj, doenghheij Youzdaiq goengjsae dajbwiz he caeuq doengh boux Youzdaiq vunz gangj vah couh baenz he gauq boux de, caemh gouz gou hawj gou buenq de miz coih.

¹⁶ Hoeng, gou doiq gyoengqde naeuz: ‘Ciuq Lozmaj vunz dih fazliz, mijyaengz ndaej caeuq boux gauq de mwnq doiqcingq, caeuq mijyaengz miz gihveiq ndaej bonjfaenh gag buek haem, couh mbouj ndaej buenq hawj boux de miz coih.’

^17-18 “Gajlaeng miz geij boux Youzdaiq vunz gaen gou ma doiqyungz daez gij saeh de. [18b]Gou naemqnaeuz miz gijmaz daixsaeh lah, [17b]hawj gou daengz daixngeih ngoenz couh vaiqdi gaihdingz, mingqlingq hawj vunz daiq boux de okdaeuj. [18a]Gizsaed, gyoengqde gauq hih, gaenhbaenj mbouj dwg gijmaz daixsaeh,

¹⁹ cijmboujgoq dwg gvanhhih gyoengqde dih funghsuz vaenqdiz caeuq gvanhhih boux gij coh heuh Yehsuh hih boux neix. Boux de gaenq rai lo, hoeng, de dauq naeuz boux de vanzlij lix.

²⁰ Doiq gij saeh neix, gou gaenhbaenj mbouj rox ij baenzlaw guh. Yiengq gou couh cam boux de, yawj de nyienh mbouj nyienh'eiq bae Yehluqsajlaengj, bae mwnq dingq saemjbuenq gij saeh neix.

²¹ Hoeng, boux de gouz gou, hawj gou louz de roengzma. De siengj hawj goengjvuengz Lozmaj saemjbuenq. Sojhij gou couh mbouj coengq de, daengj seizlaw cij gam de bae daengz goengjvuengz Lozmaj mwnq.”

²² Yaqgihbaq dingq le, doiq Feihswhduh naeuz: “Gou siengj dingqdingq boux de gangj vah.” Yiengq Feihswhduh han naeuz: “Ndaej hah, ngoenzcog mwngz couh daeuj dingq bax.”

Baujloz youq dangqnaj Yaqgihbaq baij dauhleix

²³ Couh yienghneix, daengz ngoenz daixngeih, Yaqgihbaq caeuq dahnuengx de Bwznizgih, caeuq geij boux gywnhguenh caeuq ndaw singz mwnq dih doengh boux miz gienz he bae daengz lijdangz. Gyoengqde haeuj bae hih mwhde, cungj cienfanh nauhyied he. Yiengq Feihswhduh couh mingqlingq hawj Baujloz haeuj bae.

²⁴ Baujloz haeuj bae le, Feihswhduh couh naeuz: “Yaqgihbaq goeng'ak caeuq dineix hih gak boux hax, cingj faenhsou yawj boux vunz neix bax. De couh dwg boux sojmiz Youzdaiq vunz youq Yehluqsajlaengj caeuq youq dineix yiengq gou gauq de hih caeuq gouz gou hawj gou buenq de rai hih boux neix lo.

²⁵ Hoeng gou caz mbouj raen de famh gijmaz hab rai dih coih hah, caiq gyacangq de yiengq goengjvuengz Lozmaj cangqgauq hah, sojhij gou gyezdingq gam de bae.

²⁶ Cijmboujgoq gou mbouj miz boux vunz neix dih gijmaz saizliuq ndaej gyau hawj goengjvuengz Lozmaj hah, sojhij gou daiq de daeuj daengz dangqnaj faenhsou, dwzbez dwg daengz dangqnaj Yaqgihbaq goeng'ak neix, muengh dunghgoq gak boux mbat neix simjcaz ndei le, ndaej miz giqdij saizliuq cangqbauq goengjvuengz.

²⁷ Fanjcingq ciuq gou ma yawj, gam soengq vunzfamh, mbouj miz giqdij saizliuq dwg mbouj hab hih.”