Geiq Dwzbaijyienz 2 - Gij Baujcingq Moq Caeuq Geij Bonj Gij Baujcingq Daeuzdaeuz

Hoenzsaenz Cangqdiq roengz ma

¹ Youq ngoenz aen ciet Ujcwnz ngoenz mwnq, gyoengq lwgsae youq ndaw ranz doxcomz.

² Sawqmwh miz sing yiengj daj gwnzmbwn cenz roengzdaeuj, caenh luj raq rumz hung he dwk foxfox ci haeuj aen ranz gyoengq lwgsae youq mwnq bae. Gij sing mwnq cenz baenx cenz ranz.

³ Caemh miz gij luj duj feiz yienghmwnq, sanq roengz gwnz ndang gak vunz bae.

⁴ Gajlaeng gak vunz cungj miz Hoenzsaenz Cangqdiq doz youq gwnz ndang; gak vunz couh ciuq Hoenzsaenz Cangqdiq hawj gyoengqde gangj cungj vah lawz gyoengqde couh gangj cungj vah lawz.

⁵ Mwhmwnq, youq Yehluqsajlaengj miz haujlai Youzdaiq vunz aiq Cangqdiq yawjnaek Cangqdiq he daj ciqgyaiq gak dieg daeuj.

⁶ Gyoengqde dingqri sing yiengj le, cungj caezgya ok daeuj doxcomz. Yiengq gyoengqde couh dingqri gyoengq lwgsae gak vunz gag gangj cungj vah mbouj doxdoengz he, hoeng gyoengq vunz bouxboux cungj gag dingqri gij vah bonjdeih bonjfaenh, couh raen geizheih ij rai bae.

⁷ Gyoengqde raen yienghneix le, couh naeuz: “Yawj veiq, gangj gij vah neix hih vunz mbouj dwg Gyahliqliq vunz maz?

⁸ Geizheih! Gyoengqraeuz gak vunz guxmaz cungj gag dingqri gyoengqde gangj gij vah raeuz daj lij iq cix gangj hih vah hax?

⁹ Gyoengqraeuz dineix miz Baqdizyaq vunz, Majdaiq vunz, Hijlanz vunz, caeuq youq Meijsojbuqdazmijyaq hah, youq Youzdaiq hah, youq Gyahbaqdohgyah hah, youq Baenjduh hah, youq Yaqsiqyaq hah,

¹⁰ youq Fozlijgyah hah, youq Bangzfeihliqyaq hah, youq Ngaihgiz hah, caeuq youq gaenh Gujliqnaiq dih Liqbijyaq dieg hih vunz hah. Vanzlij miz daj Lozmaj daeuj dih Youzdaiq vunz caeuq linghvaih aen minzcuz gaep haeuj Youzdaiqgyauq hih vunz hah,

¹¹ caemh miz Gwzlijdwz vunz caeuq Yaqlahbwz vunz. Miz baenx lai daj mbouj doengz hih deixfueng daeuj hih cungj dingqri gyoengq vunz yungh gij vah bonjdeih gyoengqraeuz ma gangj ma haenh naeuz Cangqdiq dih veijdaq!”

¹² Gyoengqde bouxboux cungj doeksaet geizheih hwj boux yawj boux naeuz: “Ndaek gijn'x dwg gijmaz iqswh gaenq lo?”

¹³ Yiengq caemh miz mbangj hih vunz engqgya lengxriu gyoengq lwgsae naeuz: “Gyoengq vunz gyoengqn'x, dwg gw laeuj fiz hih lah!”

Bijdwz doiq gyoengq vunzlai gangj vah

¹⁴ Couh youq mwhneix, Bijdwz caeuq cib'it boux dwzbaijyienz doih de couh ndwn hwnjdaeuj. De sing sang hwnjdaeuj doiq gij vunzlai naeuz: “Youzdaiq vunz caeuq youq Yehluqsajlaengj sojmiz hih vunz hax, cingj faenhsou yaek rwz hwj dingq gou naeuz sou ni gij neix dwg gijmaz iqswh bax.

¹⁵ Couh dwg naeuz gyoengq vunz neix gaenhbaenj mbouj luj faenhsou naemj hih yienghmwnq gw laeuj fiz, aenvih seizneix cijmboujgoq ngamq dwg doengxhaet gouj diemjcung hwj mah.

¹⁶ Gizsaed hax, seizneix faenhsou soj yawjraen hih ngamqluj Yozwj boux cenz gij vah Cangqdiq neix youq ndaw Singqgingh ndaw de sij goq, naeuz:

¹⁷ Cangqdiq naeuz: ‘Youq mwh lajmbwn ijvanh daengz ngoenz gatsat he, gou ij dawz Hoenzsaenz gou nyok hawj lajmbwn sojmiz hih vunz. Gij lwg faenhsou ij ndaej dingq daengz Cangqdiq gangj vah, caiq dawz Cangqdiq gangj hih vah gangj naeuz vunz ni; gij hauxseng faenhsou ij ndaej raen Cangqdiq yienh okdaeuj hih doenghgij he; gij vunz laux faenhsou ij fangxngwnzloq raen Cangqdiq hawj gyoengqde rox dih saeh.

¹⁸ Daengz mwhmwnq, gou ij dawz gij Hoenzsaenz gou nyok hawj doenghheij hoiq gou, mboujguenj hoiq vunzsai cixnaeuz hoiq vunzbaz, hawj gyoengqde cungj ndaej dingq daengz gou gangj vah, caiq dawz gou gangj hih vah gangj naeuz vunz ni.

¹⁹ Youq gwnzmbwn gou ij yienh gij geizmiuj he; youq lajdeih gou ij guh gij gingjdoengh he, couh dwg miz lwed, miz feiz, miz oenq.

²⁰ Gyangjngoenz ij bienq amq fubfub; aen ndwen ij hoengz luj lwed. Youq ngoenz gig rongh gig veijdaq hih bouxcawj daeuj saemjbuenq hih ngoenz mwnq cihsenz, doenghgij saeh neix cungj ij fatseng.

²¹ Daengz mwhmwnq, sojmiz gouz bouxcawj hih vunz cungj ndaej gouq.’”

²² Bijdwz gangj daengz dineix le, de caiq naeuz: “Gak boux Hijswzlez vunz hax, cingj faenhsou dingq gou naeuz! Cangqdiq, vih ij cingqmingz Mbanj Nazsajlwz vunz dih Yehsuh, couh hawj de youq faenhsou mwnqneix guh doenghgij geizmiuj hih saeh he hwj ndaej cingqmingz Cangqdiq dih gienzveih gaenq fazveih he lo; doenghgij neix faenhsou caemh gaenq rox hih lo.

²³ Cangqdiq caemh senqsi cix rox gij saeh ij fatseng he lo. De couh ciuq gij cawjeiq bonjfaenh de ma hawj vunz dawz Yehsuh gyau hawj faenhsou; gajlaeng faenhsou couh dunghgoq gij vunz yawj gij fazliz Cangqdiq mbouj hwnj rwz he ma dawz de ding hwnj gwnz gyaq cixcib bae, haih de rai.

²⁴ Hoeng, Cangqdiq dauq hawj de daj rai ndaej duet okdaeuj, ndaej dauqlix, aenvih rai mbouj ndaej guenjciq de.

²⁵ Gangj daengz de, Daqveiq goengjvuengz neix vanzlij youq ndaw Singqgingh dawz gij vah de sij okdaeuj naeuz: Gou siengzseiz raen Cangqdiq youq dangqnaj gou, youq baixgvaz gou raeuz gou, hawj gou ndwn ndaej gaenj.

²⁶ Vih yienghneix hwj aen sim gou cix angq, bak cix diemz, ndangdaej cix youq ndaej onj,

²⁷ aenvih mwngz gaengjdingq mbouj dawz gij hoenzsaenz gou louz youq ndawlaep, caemh mbouj hawj boux gvi haeuj mwngz ndang naeuh.

²⁸ Mwngz gaenq yinx diuz roen ndaej miz mingh he hawj gou lo; miz mwngz yawjnaek gou, hawj gou sim'angq ij rai.”

²⁹ Bijdwz vanzlij caiq naeuz: “Gak boux beixnuengx hax, gvanhhih Daqveiq boux cojgoeng neix dih saeh, gou saedsaeh naeuz sou ni, de gaenq rai lo, cixcaemh moek lo, aen ndang de cixcaemh naeuh lo; aen moh de daengz seizneix vanzlij youq.

³⁰ Hoeng, de dwg boux cenz gij vah Cangqdiq he; de caemh rox Cangqdiq yiengq de baujcingq goq, baujcingq ij daj doengh daih gajlaeng de dingh boux he daeuj swnj de guh vuengz.

³¹ De caemh ndaej rox daengz Cangqdiq giqvaq ij guh hih saeh, sojhij gangj daengz Gihduz dauqlix, de naeuz: De mbouj ngaiz louz youq ndawlaep, caemh mbouj ngaiz ndang naeuh.

³² “Yehsuh boux neix, Cangqdiq gaenq hawj de dauqlix lo; gyoengqraeuz cungj dwg cingqyinz, ndaej cingqmingz gienh saeh neix.

³³ Seizneix Yehsuh gaenq naengh youq Cangqdiq dih mbiengj baixgvaz de lo, naengh mwnq ceiq ndei ceiq miz naj he. De ciep aeu gij Cangqdiq daxboh de, soj baujcingq he, couh dwg ciep aeu Hoenzsaenz Cangqdiq coengq roengzdaeuj hawj vunz, couh dwg faenhsou seizneix soj yawjraen hih soj dingqri hih.”

³⁴ Bijdwz vanzlij caiq naeuz: “Gou daxbaenh ngamqngamq daez daengz dih doenghgij vah senqsi gangj goq caeuq youq ndaw Singqgingh ndaw de sij miz hih doenghgij neix mbouj dwg naeuz Daqveiq bonjfaenh de gag ceij bonjfaenh de naeuz law, aenvih Daqveiq gaenhbaenj mbouj ndaej ciep hwnj mbwn bae. Hoeng, de gan naeuz: Cangqdiq doiq bouxcawj gou naeuz: ‘Naengh youq baixgvaz gou,

³⁵ daengj gou dawz gij dizyinz mwngz bienqbaenz aen daengq mwngz.’

³⁶ Sojhij, sojmiz hih Hijswzlez vunz hax, faenhsou ijaeu rox, boux ngaiz faenhsou ding rai youq gwnz gyaq cixcib dih Yehsuh, Cangqdiq gaenq laeb de guh bouxcawj raeuz, baij de daeuj guh vuengz raeuz lo.”

³⁷ Gyoengq vunzlai dingq Bijdwz gangj doenghgij vah neix le, ndaw sim cungj mbouj onj, lujnaeuz miz cax ndaemq youq ndaw de nwih. Yiengq gyoengqde couh doiq Bijdwz caeuq doenghheij dwzbaijyienz he naeuz: “Beixnuengx hax, gyoengqraeuz ij baenzlaw guh nej?”

³⁸ Gajlaeng Bijdwz han gyoengqde naeuz: “Faenhsou gak vunz cungj ij daj ndaw sim nginh loek gaijgoq, caemh ij nginh Yehsuh Gihduz hwj sijlij; yienghmwnq gij coih faenhsou couh ndaej mienx lo, caemh ndaej miz Hoenzsaenz Cangqdiq soengq hawj he lo,

³⁹ aenvih Cangqdiq soj baujcingq hih dwg ij soengq hawj faenhsou caeuq doengh daih gajlaeng faenhsou. Mbouj danhcij naeuz yienghneix, daiqlienz doenghheij vunz youq gyae'gyae he, fanjcingq sojmiz bouxcawj raeuz Cangqdiq ij heuh daeuj he hih vunz cungj ndaej.”

⁴⁰ Gajlaeng Bijdwz vanzlij gangj baenx haujlai gvanhhih Yehsuh dih saeh, caemh doiq gyoengq vunz naeuz: “Seiqgan seizneix daiq yienjcik yienjgienq lai lo; faenhsou ij singqsag hwnjdaeuj, mbouj ndaej gag cimh rai!”

⁴¹ Couh youq ngoenz mwnq, doenghheij vunz sinq de soj gangj hih caemh sijlij hih daihgaiq miz samcien vunz. Couh yienghneix, ngoenz mwnq miz baenx lai vunz gaep haeuj gyoengq lwgsae bae.

⁴² Gajlaeng gyoengq vunz cungj dwg caensim dingq gyoengq dwzbaijyienz son gyoengqde, caemh cungj dwg doxcomz doxbang, cungj dwg doxcomz euj menqbauh gw vih ij gijnenq Yehsuh, cungj dwg doxcomz haenh Cangqdiq gouz Cangqdiq.

Itheij goq saedceij

⁴³ Gajlaeng, gyoengq dwzbaijyienz caiq guh baenx haujlai geizmiuj dih saeh hwj ndaej cingqmingz Cangqdiq dih gienzveih gaenq fazveih he lo, guh hwj gyoengq vunzlai cungj lau ij rai bae.

⁴⁴ Hoeng gyoengq vunz sinq he cungj caemh ciuqyiengh dwg doxcomz youq itheij, miz gijmaz cungj dwg doxcaeuq gw, doxcaeuq yungh.

⁴⁵ Gyoengqde vanzlij dawz reih hah, gyadangq hah hai bae, dawz gij ngaenz faen hawj gak vunz, caemh dwg ciuq gak vunz ij yungh hih faen hawj gyoengqde.

⁴⁶ Gyoengqde ngoenzngoenz cungj youq gunghdenq Cangqdiq doxcomz, caemh bae ndaw ranz gak vunz doxcomz doxcaeuq gw, gak vunz cungj haijliengh raixcaix. Gyoengqde yienghneix guh, gak vunz cungj roxnginh sim'angq.

⁴⁷ Gyoengqde caemh siengzseiz haenh Cangqdiq. Gij vunz mwnq raen gyoengqde yienghneix le, bouxboux cungj haenj gyoengqde, yawjhwnj gyoengqde. Yehsuh Bouxcawj caemh hawj doenghheij vunz sinq de le ndaej gouq he, hawj doenghheij vunz neix gaep haeuj gyoengqde, hawj gyoengqde yied ngoenz yied miz vunz lai.