Geiq Dwzbaijyienz 19 - Gij Baujcingq Moq Caeuq Geij Bonj Gij Baujcingq Daeuzdaeuz

Baujloz youq Hijfuzsoj

¹ Mwh Yaqbohloz cungj lij youq Gohlimzdoh Singz hih mwhde, Baujloz byaij bae daengz Hijfuzsoj, youq mwnq roeb daengz geij boux lwgsae.

² Yiengq de couh cam gyoengqde naeuz: “Faenhsou sinq Yehsuh mwhde, ndaej miz Hoenzsaenz Cangqdiq laq?” Gyoengqde dingq le han naeuz: “Mij ndaej hah; gyoengqraeuz cungj mijyaengz dingqri naeuz miz Hoenzsaenz Cangqdiq gij saeh neix goq haem hwx.”

³ Baujloz caiq cam naeuz: “Yiengq faenhsou sijlij dwg cungjlaw sijlij lah?” Gyoengqde caiq han naeuz: “Dwg Yozhanq cenzgangj dih sijlij.”

⁴ Gajlaeng Baujloz naeuz: “Yozhanq dih sijlij, dwg caenhgag naeuz vunz gaenq daj ndaw sim gaijgoq le guh dih sijlij lah, aenvih de vanzlij gag naeuz: ‘Lij miz daixlingh cungj sijlij haem; cungj sijlij neix couh dwg naeuz vunz sinq boux baezneix ij daeuj he guh dih sijlij.’ Boux mwnq couh dwg Yehsuh lo.”

⁵ Gyoengqde dingq daengz gij vah neix le, couh hij gij mingzhiq Yehsuh Bouxcawj ma sijlij.

⁶ Baujloz couh oemj fawz hwnj gwnz ndang gyoengqde bae; Hoenzsaenz Cangqdiq couh hwnj gwnz ndang gyoengqde bae. Gyoengqde gak vunz couh gag gangj cungj vah Hoenzsaenz Cangqdiq nyok hawj vunz gangj he, caemh vanzlij gangj gij Cangqdiq hawj gyoengqde gangj hih saeh.

⁷ Mbat neix sijlij hih itgungh miz cibngeih boux.

⁸ Baujloz bijlienz sam ndwen cungj dwg bae Youzdaiq veiqdangz mbeihung hwj caeuq vunz daujlwnq guek Cangqdiq dwg gijmaz, gienq gyoengq vunz, muengh gyoengq vunz sinq de gangj hih saeh.

⁹ Hoeng, miz mbangj hih vunz simgyeng nga'ngangq, mbouj sinq, vanzlij youq dangqnaj vunzlai sai gij ndei siuhsiz Cangqdiq. Gajlaeng Baujloz ganhseiq daiq gyoengq lwgsae daj mwnq ok ma, ngoenzngoenz bae aen gyangjdangz Deihlahnuz, bae mwnq daujlwnq Cangqdiq dih ndei siuhsiz.

¹⁰ Baujloz bijlienz yienghneix guh song bi baenxlai caez, hawj sojmiz youq Yaqsiqyaq hih vunz, mboujguenj vunz Youzdaiq haj cixnaeuz vunz Hihlaz, cungj ndaej dingq daengz Cangqdiq dih ndei siuhsiz.

Doengh daeglwg Swqgihvaj

¹¹ Cangqdiq dunghgoq Baujloz, hawj de guh gij saeh geizmiuj raixcaix he,

¹² guh hwj miz hih vunz daiqlienz de yungh goq hih sujbaq hah, bangjndang hah cungj dawz bae coengq hwnj gwnz ndang vunz bingh bae, gajlaeng gij vunz bingh caemh cingqgawq ndaej ndei hwj, fangz doz hih caemh cingqgawq ndaej boenq okma hwj.

¹³ Yiengq miz gij vunz dauqcawq bae boenq fangz hih Youzdaiq vunz, caemh siengj hij Yehsuh Bouxcawj dih mingzhiq ma boenq fangz. Gyoengqde bienqnaengz cungj haenj yiengq boux ngaiz fangz yak doz he naeuz: “Gou hij Baujloz cenzgangj hih Yehsuh dih mingzhiq ma mingqlingq mwngz ok ma!”

¹⁴ Doenghgij vunz dauqcawq bae guh gij saeh neix he caemh miz caet daeglwg Swqgihvaj, boux Youzdaiq goengjsae dajbwiz neix.

¹⁵ Miz baez he, duz fangz yak engq doiq gyoengqde naeuz: “Gou rox Yehsuh, caemh rox Baujloz hah, hoeng, faenhsou dwg byawz nex?”

¹⁶ Gajlaeng boux ngaiz fangz yak doz mwnq couh diuq hwnjdaeuj uj gyoengqde ceihfug gyoengqde, uj hwj gyoengqde sieng gwnz sieng laj bae, buh cix lig hwj luklakrag liux, hawj gyoengqde loxgenz loxgangh daj ndaw ranz riq deuz hwj maetlaenq bae.

¹⁷ Gajlaeng youq Hijfuzsoj sojmiz hih Youzdaiq vunz caeuq Hihlaz vunz dingq daengz gij saeh neix le, cungj lau hwj ij rai bae. Daj mwhneix hwnj, gij coh Yehsuh, gij vunz couh mbouj caiq laizluenh yungh haeujbae lo.

¹⁸ Yiengq caemh miz haujlai sinq Yehsuh dih vunz cungj gag ok daeuj nginh bonjfaenh soj guh hih saeh.

¹⁹ Caemh miz haujlai goengdauh caeuq haujlai mehsien cungj dawz doenghgij saw gyoengqde bienqnaengz yungh he daeuj dong youq dangqnaj vunzlai hwj vueng. Gyoengqde yienghneix guh, caemhdangq naeuz baezneix mbouj caiq guh gij saeh neix haem lo. Gyoengqde vueng hih gij saw neix suenq hwnjdaeuj gijmaj dij hajfanh ngaenz.

²⁰ Couh yienghneix, Cangqdiq dih ndei siuhsiz cungj doenghingz, caemh hwng raixcaix.

²¹ Gij saeh neix goq le, Baujloz ndaw sim de gag gyezdingq ij bae Majgizdoenq caeuq Yaqgaihyaq song mwnq dieg neix, gajlaeng cij maj Yehluqsajlaengj. De vanzlij naeuz: “Gou maj daengz Yehluqsajlaengj le, caemh bietdingh ij bae Lozmaj.”

²² Couh yienghneix, de couh baij Dizmohdaiq caeuq Hijlahduh, song boux bang de he, bae Majgizdoenq. Bonjfaenh de vanzlij camqciz youq Yaqsiqyaq Saengj youq.

Hijfuzsoj Singz miz luenh

²³ Couh youq mwhneix, vih Cangqdiq dih ndei siuhsiz hwj Hijfuzsoj fatseng ciengz luenh he.

²⁴ Ciengz luenh neix couh dwg youz boux heuh Dijmijdiuh dih cangh dajdiz ngaenz he aux vunz nauh luenh he. De soqsingq cungj dwg diz gij yiengh aen miuh Yaqdijmij mehbuz neix he, de caemh hawj doenghgij vunz miz cungj dinfawz neix hih seng'eiq ndei raixcaix.

²⁵ Couh vih yienghneix, Dijmijdiuh couh heuh gij gunghyinz de caeuq gij vunz doengzhangz de daeuj, doiq gyoengqde naeuz: “Gak boux hax, faenhsou caemh rox, gyoengqraeuz cungj dwg gauq gij seng'eiq neix fatcaiz he.

²⁶ Seizneix faenhsou gaenq dingqri caemh yawjraen boux Baujloz neix mbouj danhcij naeuz youq Hijfuzsoj, simqciq baenx cenz Yaqsiqyaq, de doeng gangj sae gangj coemx vunz, naeuz gijmaz: ‘Vunz cauh hih cwnz, mbouj dwg caen hih cwnz,’ gangj hwj miz haujlai vunz cungj sinq lo.

²⁷ Ciuq yienghneix roengzbae, gou yawj hax, mbouj danhcij naeuz gyoengqraeuz guh hangz neix hih vunz ngaiz vunz yawjngawz, daiqlienz aen miuh veijdaq dih Yaqdijmij mehbuz neix cungj caemh ngaiz bienqbaenz mbouj dij saek haux cienz. Mehbuz neix youq Yaqsiqyaq caeuq lajmbwn gak dieg, vunz cungj baiq de, hoeng baezneix gij najrongh de ij bienqbaenz najmomj lo.”

²⁸ Gyoengq vunz baex dingq de yienghneix gangj he le, couh hujheiq dengxdengx hwj hemq naeuz: “Hijfuzsoj vunz dih Yaqdijmij mehbuz vanqseiq hwx!”

²⁹ Gajlaeng baenx cenz singz cungj luenh yobyob liux. Gyoengq vunz couh gaemh dawz song boux gaen Baujloz daeuj hih Majgizdoenq vunz Gaihyouz caeuq Yaqlijdazguj. Gaemh dawz le, couh nyoengx haeuj ndaw giqyenq bae.

³⁰ Baujloz raen yienghneix le, couh siengj haeuj bae, hoeng, gyoengq lwgsae mbouj hawj de haeuj bae.

³¹ Caemh miz Yaqsiqyaq hih geij boux dang daeuz he, dwg gij baengzyoux Baujloz, caemh baij vunz daeuj byah Baujloz, mbouj hawj de haeuj bae, daiq veizyiemj lai.

³² Couh youq mwhneix, giqyenq cungj luenh yobyob, vunz hemq yuxyux, gak vunz gak hemq. Miz haujlai vunz gaenhbaenj mbouj rox bonjfaenh vihmaz ij daeuj dineix doxcomz.

³³ Caemh youq mwhneix, miz gij vunz Youzdaiq he nyoengx boux heuh Yaqlizcanhdaq he, nyoengx de bae dangqnaj bae, aenvih gij vunz Youzdaiq siengj hawj de bang gyoengqde doiq gyoengq vunzlai gangj gij saeh neix caeuq gyoengqde mij maz gvanhaeh. Yiengq boux de couh vadvad fawz ijsiengj doiq gyoengq vunz gangj vah.

³⁴ Hoeng, gyoengq vunzlai engq rox de dwg Youzdaiq vunz, couh mbouj siengj dingq de gangj vah, couh caezgya hemq naeuz: “Hijfuzsoj dih Yaqdijmij mehbuz vanqseiq hwx!” yienghneix hemq hwx hemq baenx song diemjcung caez.

³⁵ Gajlaeng, aen singz mwnq hih cuhgiq ok daeuj naeuz hawj gij vunz dingh roengzma. De naeuz: “Gak boux Hijfuzsoj dih vunz hax! Byawz mbouj rox Hijfuzsoj Singz dwg hen caeuq baujhuq aen miuh Yaqdijmij caeuq hen dajlaeng Caeuqswh doek roengzdaeuj hih mehbuz neix nex?

³⁶ Yiengq, giqyienz gij saeh neix bouxboux cungj rox hoh vwz, faenhsou couh wnggai dingh roengzma, gaejyungh luenh nauhsaeh.

³⁷ Faenhsou daiq song boux neix daeuj dineix; song boux de mij caeg aeu gij doxgaiq ndaw miuh hah, caemh mij luenh gangj mehbuz gyoengqraeuz dih vaihvah hah.

³⁸ “Hauhnaeuz Dijmijdiuh cangh diz ngaenz caeuq doenghheij doengzhangz de ij gauq guxmaz vunz, swhmboujyienz miz ngoenz gaihdingz he, caeuq miz saemjbuenqguenh hah; gyoengqde ndaej doxdoiqcingq hah.

³⁹ Hauhnaeuz faenhsou miz maz saeh ij cam hih, ndaej bae mwnq bienqnaengz gaihveiq he gaijgyez hah.

⁴⁰ Luj ngoenzneix hih nauhsaeh, gaenhbaenj mij maz laizyouz. Gyoengqraeuz cungj lau gij vunz Lozmaj naemqnaeuz gyoengqraeuz fanjdeiq gyoengqde hwx, gyoengqraeuz caemh mij banqfaz ndaej yiengq gyoengqde gaijyiz.”

⁴¹ De gangj sat doenghgij vah neix le, couh hawj gij vunz sanq maj lo.