Geiq Dwzbaijyienz 18 - Gij Baujcingq Moq Caeuq Geij Bonj Gij Baujcingq Daeuzdaeuz

Baujloz youq Gohlimzdoh

¹ Gij saeh neix goq le, Baujloz couh daj Yajdenj ok ma, bae Gohlimzdoh Singz.

² Youq mwnq, de roeb daengz boux heuh Yaqgihlah dih Youzdaiq vunz he; de dwg youq Baenjduh Saengj seng he, hoeng aenvih goengjvuengz Lozmaj Gwzlaujdiuh mingqlingq gij vunz Youzdaiq ij buen ok Lozmaj Singz bae, sojhij de duenh gaxgonq couh daiq mehyah de Bwzgihlah daj dieg Iqdaqliq daeuj daengz Gohlimzdoh youq.

³ Doiq gvanjbaz neix cungj dwg guh cangqbungz gw he. Aenvih Baujloz caemh dwg guh gij hong neix, sojhij de couh louz roengzma caeuq gyoengqde itheij youq itheij guh hong.

⁴ Yiengq moix daengz ngoenz ngoenzyietbaeg, Baujloz cungj bae Youzdaiq veiqdangz caeuq gij vunz daujlwnq, gienq gij vunz Youzdaiq caeuq gij vunz Hihlaz, muengh gyoengqde sinq Yehsuh.

⁵ Mwh Sihlah caeuq Dizmohdaiq daj Majgizdoenq daeuj hih mwhde, Baujloz yungh sojmiz hih cizgyenh ma yiengq gij vunz Youzdaiq cenzgangj Cangqdiq dih ndei siuhsiz, cingqmingz Yehsuh dwg Gihduz he.

⁶ Hoeng, gij vunz Youzdaiq mbouj danhcij naeuz fanjdeiq de, vanzlij gangj gij vah gvatgvat sauqsauq he ma lengx de. Sojhij, de couh bongx gij boenqcingh gwnz buh de, doiq gyoengqde naeuz: “Gij coih faenhsou gag gvi hawj faenhsou aeu lo, caeuq gou mij maz gvanhaeh. Daj ngoenz neix hwnj, gou couh ij bae lingh aen minzcuz lo.”

⁷ Baujloz yienghneix naeuz le, couh daj veiqdangz mwnq ok ma bae daengz ndaw ranz boux heuh Dizdoh-Youzswqduh he. Aen ranz de dwg caeuq veiqdangz gekleiz he, de caemh dwg boux baiq Cangqdiq he.

⁸ Yiengq, gannaeuz Baujloz lizgaih aen veiqdangz mwnq lah, hoeng, Gihliqswhbuq, boux veiqdangz daeuzdaeuz mwnq, caeuq gij vunz ndaw ranz de cungj sinq Yehsuh Bouxcawj lo. Gajlaeng miz haujlai Gohlimzdoh vunz dingq Baujloz gangj le, caemh sinq Yehsuh, caemh sijlij lo.

⁹ Yiengq miz ngwnz he, Yehsuh hawj Baujloz luj fangxngwnzloq yienghmwnq. Youq ndaw loq de Yehsuh doiq de naeuz: “Baujloz, mwngz gaej lau; mwngz caenhrox bae cenzgangj sat lo. Gaejyungh lau, gaejyungh dingz;

¹⁰ miz gou caeuq mwngz youq. Mij'z vunz gamj doengh mwngz law, aenvih aen singz neix miz haujlai vunz dwg gij vunz gou.”

¹¹ Gajlaeng Baujloz youq aen singz mwnq youq bi buenq, youq mwnq son vunz, son gvanhhih Cangqdiq dih ndei siuhsiz.

¹² Yiengq daengz mwh Gyahliuz dang Yaqgaihyaq Saengj dih saengjcangj hih mwhde, gij vunz Youzdaiq doxyuk hwnjdaeuj gung Baujloz, dawz de bae fazdingz,

¹³ gauq de naeuz: “Boux vunz neix daeuj yungx vunz, hawj vunz mbouj ciuq fazliz bae baiq Cangqdiq.”

¹⁴ Baujloz dingq gyoengqde yienghneix naeuz le, cijngamq ijvanh hoi bak gangj, hoeng Gyahliuz couh doq doiq gij vunz Youzdaiq naeuz: “Doenghheij vunz Youzdaiq faenhsou hax, hauhnaeuz faenhsou gauq de miz loek cixnaeuz miz gij yiemzcungq dih coih nex, gou swhmboujyienz dingq faenhsou,

¹⁵ hoeng, faenhsou soj gauq hih cijmboujgoq dwg gij fazliz faenhsou dih saek gawq vah saek cih saw lah. Faenhsou gag gaijgyez bax! Gou mbouj caeuq faenhsou leix gij saeh neix law.”

¹⁶ De yienghneix doiq gyoengqde gangj le, couh boenq gyoengqde okma.

¹⁷ Gajlaeng doenghheij Hihlaz vunz ndwn henz de engq gaemh dawz Sojdizniz boux Youzdaiq veiqdangz dih daeuzdaeuz he ma youq fazdingz doh de. Hoeng, Gyahliuz caemh ciuqyiengh mbouj leix mbouj langh.

Baujloz dauq ma dieg Siqliqyaq dih Anhdizah Singz

¹⁸ Baujloz vanzlij youq Gohlimzdoh youq duenh he, gajlaeng de couh caeuq Bwzgihlah, Yaqgihlah doiq gvanjbaz neix daj mwnq naengh ruz bae Siqliqyaq. Ij okdin bae hih mwhde, aenvih de gaxgonq doiq Cangqdiq baujcingq goq, sojhij couh youq Gyenhgwzlij Singz daeq raeuj; de yienghneix guh couh dwg naeuz Youzdaiq vunz guh baujcingq dih laehbeih.

¹⁹ Gyoengqde bae daengz Hijfuzsoj le, couh hwnj ruz ma. Baujloz couh biek song gvanjbaz mwnq, gag bae veiqdangz caeuq gij vunz Youzdaiq daujlwnq Cangqdiq dih ndei siuhsiz.

²⁰ Yiengq gyoengq vunzlai mwnq cungj hah de cingj de youq mwnq geij ngoenz, hoeng, de mbouj youq law.

²¹ De ij daj mwnq ok ma hih mwhde, doiq gyoengqde naeuz: “Hauhnaeuz Cangqdiq hawj gou dauq daeuj laeng faenhsou dineix nex, gou gaengjdingq caiq daeuj haem.” Couh yienghneix, de youhcaiq daj Hijfuzsoj naengh ruz bae lo.

²² Yiengq de bae daengz Gaijsajliqyaq le, couh hwnj hamq ma, bae Yehluqsajlaengj gyauqveiq yawj gyoengq lwgsae mwnq. Gajlaeng de cij dauq maj daengz Siqliqyaq dih Anhdizah Singz.

²³ Daengz Anhdizah Singz le, de youq mwnq youq duenh he, gajlaeng youhcaiq bae daixlingh mwnq, bae fueng Gyahlahdaiq caeuq fueng Fozlijgyah, byaij doengh fueng mwnq goqdoh, dauqcawq bae bang gyoengq lwgsae, hawj gyoengqde ij gyenhciz sinq Cangqdiq, yungjyenj mbouj bienq sim.

Yaqbohloz youq Hijfuzsoj caeuq youq Yaqgaihyaq Saengj

²⁴ Baujloz daj Hijfuzsoj ok ma le, miz boux Youzdaiq vunz heuh Yaqbohloz he daeuj daengz Hijfuzsoj. De dwg youq Yaqlizcanhdaq Singz seng he; de miz ndaek dungx saw he, goujcaiz caemh rem raixcaix. De doiq Singqgingh cungj cienfanh sugseg he.

²⁵ De gaenq miz vunz son de gvanhhih Yehsuh dih ndei siuhsiz lo, de caemh gig haenj, ndaw sim de caemh gig ndat, couh siengzseiz bae son vunz gvanhhih Yehsuh dih ndei siuhsiz, caemh dwg son ndaej deng. Hoeng, cijmboujgoq de caenhgag rox Yozhanq dih sijlij lah.

²⁶ Gannaeuz yienghneix lah, hoeng, de vanzlij dwg mbeihung hwj youq Youzdaiq veiqdangz gangj vah. Yiengq Bwzgihlah caeuq Yaqgihlah doiq gvanjbaz neix dingq de gangj le, rox de caenhgag rox Yozhanq dih sijlij lah, couh son de, hawj de engqgya lai rox gij saedsaeh Cangqdiq.

²⁷ Gajlaeng de siengj bae Yaqgaihyaq Saengj, yiengq gyoengq lwgsae Hijfuzsoj Singz caemh cihciz de, caiq sij saenq hawj Yaqgaihyaq hih lwgsae, cingj gyoengqde daih de. Couh yienghneix, de couh bae Yaqgaihyaq lo. De bae mwnq, doiq doenghheij vih miz Cangqdiq dih aiq hwj sinq Yehsuh hih vunz miz haujlai bangcoh,

²⁸ aenvih de gig sug Singqgingh, siengzseiz youq dangqnaj vunzlai buekhingz gij vunz Youzdaiq, yungh Singqgingh ma cingqmingz Yehsuh couh dwg Gihduz.