Geiq Dwzbaijyienz 16 - Gij Baujcingq Moq Caeuq Geij Bonj Gij Baujcingq Daeuzdaeuz

Baujloz senj Dizmohdaiq

¹ Yiengq Baujloz bae daengz Dwzbiq Singz le, caiq daj mwnq bae Luqswhdwz Singz. Youq mwnq miz boux lwgsae he, gij coh de heuh Dizmohdaiq, daxmeh de dwg sinq Yehsuh dih Youzdaiq vunz he, daxboh de dwg Hihlaz vunz he.

² Youq Luqswhdwz caeuq Hijgohnenq song aen singz neix dih lwgsae cungj haenh Dizmohdaiq.

³ Baujloz siengj daiq de itheij bae, hoeng vih mwnq dieg mwnq hih Youzdaiq vunz cungj rox daxboh de dwg Hihlaz vunz, sojhij Baujloz couh hawj de gozlij, gozlij le cij daiq de bae.

⁴ Gyoengqde cungj byaij goq gak mbanj gak singz bae cenz naeuz gij vunz ni youq Yehluqsajlaengj dih dwzbaijyienz caeuq gyauqveiq dih lingjdauj youq ndaw saenq soj sij goq dih doenghgij gveihdingq mwnq, cenz naeuz gyoengqde ni, hawj gyoengqde soenhsouj.

⁵ Gyoengqde yienghneix guh le, sawjhawj gak gyauqveiq dih vunz sinq Gihduz caemh gyenhdingq, vunz caemh yied ngoenz yied lai.

Baujloz bae Majgizdoenq

⁶ Hoeng, miz mbat he, Hoenzsaenz Cangqdiq engqgya lanz Baujloz gyoengqde, mbouj hawj gyoengqde youq Yaqsiqyaq Saengj cenzgangj Cangqdiq dih ndei siuhsiz. Sojhij gyoengqde couh gvax goq Fozlijgyah caeuq Gyahlahdaiq song mwnq dieg neix bae,

⁷ bae daengz dieg Meijsihyaq dih giemgyaiq, couh ijsiengj byaij haeuj Biqdeihniz Saengj bae lo. Hoeng Hoenzsaenz Yehsuh couh lanz gyoengqde, mbouj hawj gyoengqde haeuj bae.

⁸ Yiengq gyoengqde couh caiq byaij goq Meijsihyaq bae, bae daengz Dwzlozyaq Singz.

⁹ Couh youq ngwnz mwnq, Cangqdiq hawj Baujloz luj fangxngwnzloq yienghmwnq raen miz boux Majgizdoenq vunz he ndwn youq mwnq gouz de naeuz: “Gouz mwngz daeuj Majgizdoenq bang gyoengqraeuz bax!”

¹⁰ Yiengq Baujloz rox naeuz gij neix dwg Cangqdiq daezsingj de, hawj de bae Majgizdoenq cenzgangj Cangqdiq dih ndei siuhsiz he, sojhij gyoengqraeuz couh cwnjbiq bae Majgizdoenq lo.

Lijdijyaq sijlij

¹¹ Couh yienghneix, gyoengqraeuz couh daj Dwzlozyaq naengh ruz cizsez bae daengz aen dauj Sajmohdwzlah, daengz daixngeih ngoenz caiq bae daengz Nizyaqbohlij Singz.

¹² Daj mwnq hwnj hamq le, couh bae Feihlizbij Singz. (Feihlizbij Singz couh dwg Majgizdoenq Saengj dih Daixit Diqgih dih aen singz he, caemh dwg aen guek Lozmaj guenj he.) Gyoengqraeuz bae daengz mwnq le, youq mwnq youq geij ngoenz.

¹³ Yiengq daengz ngoenz ngoenzyietbaeg, gyoengqraeuz couh ok singz bae daengz henz dah he, aenvih gyoengqraeuz naemq mwnq aiq miz gij vunz Youzdaiq youq mwnq doxcomz haenh Cangqdiq gouz Cangqdiq. Gyoengqraeuz bae daengz le, couh raen miz gij vunzbaz he youq mwnq doxcomz; gajlaeng gyoengqraeuz couh naengh roengzma gaihcij doiq gyoengqde gangj gvanhhih Cangqdiq dih ndei siuhsiz.

¹⁴ Yiengq, mwnq miz boux vunzbaz he, gij coh de heuh Lijdijyaq, dwg Deihyajdeihlah Singz vunz he, dwg guh dajhai boiq aeuj gw he. De soqlaiz cungj dwg baiq Cangqdiq. Cangqdiq hawj de cuqhiq dingq Baujloz gangj vah, caemh hawj de sinq de gangj hih vah.

¹⁵ Gajlaeng de caeuq ndaw ranz de cungj sijlij. Sijlij le, de couh doiq gyoengqraeuz naeuz: “Hauhnaeuz faenhsou yawjhwnj gou nex, couh cingj faenhsou bae laeng gou youq bax!” De caenhrox yienghneix hah, caenhrox hah hawj gyoengqraeuz bae laeng de youq.

Baujloz caeuq Sihlah ngaiz gyaeng haeuj ndaw lauz bae

¹⁶ Yiengq miz baez he, gyoengqraeuz ij bae henz dah, mwnq haenh Cangqdiq gouz Cangqdiq mwnq, bae daengz dangjroen roeb dahhoiq ngaiz fangz doz he. De cenznaengz gauq fangz hawj de ndaej rox doeng suenq sae suenqmingh hwj ndaej baenx haujlai ngaenz ma hawj bouxcawj de.

¹⁷ De itmienh gaen gyoengqraeuz, itmienh hemq vauxvaux naeuz: “Gyoengq vunz neix dwg gyoengq hoiq gienz akak rengzrengz dih Cangqdiq he, dwg daeuj cenz gij ndaej gouq dih siuhsiz he!”

¹⁸ De bijlienz geij ngoenz cungj yienghneix hemq, hemq hwj Baujloz cungj roxnginh simnyap ij rai bae. Gajlaeng Baujloz couh veq dauqlaeng ma yug duz fangz mwnq naeuz: “Gou hij Yehsuh Gihduz dih mingzhiq ma mingqlingq mwngz daj gwnz ndang de ok ma!” Baujloz yienghneix naeuz le, duz fangz mwnq couh doq daj gwnz ndang de ok ma lo.

¹⁹ Yiengq bouxcawj dahhoiq mwnq rox naeuz baezneix mbouj caiq ndaej doenghgij cienz neix haem lo le, couh hujheiq dengxdengx hwj rag dawz Baujloz caeuq Sihlah, rag song boux de bae daengz gvangjcangz cimh goeng'ak.

²⁰ Rag song boux de bae daengz Lozmaj fazguenh mwnq le, gauq naeuz: “Gyoengq vunz neix dwg Youzdaiq vunz he; gyoengqde daeuj dineix daujluenq ciqnganh,

²¹ senhcenz gij laehbeih Lozmaj raeuz gimqcij he, gyoengqraeuz caemh mbouj hengz hih laehbeih he!”

²² Yiengq gij vunzlai henz de dingqri de yienghneix gangj le, couh humx hwnjdaeuj cieng song boux de. Yiengq fazguenh couh majcangq mingqlingq hawj vunz bok gij buh song boux de, hawj vunz aeu faexbien ma fad song boux de.

²³ Fad song boux de donq he le, caiq dawz song boux de gyaeng haeuj ndaw lauz bae, caiq hawj boux guenj gyenhyuz he guenj song boux de rem hwj.

²⁴ Boux guenj gyenhyuz mwnq caemh dingq fazguenh raengq, couh dawz song boux de gyaeng haeuj ndaw lauz caengz ceiq baixndaw he bae, vanzlij caiq aeu benj ma ding gyaq gab ha hwj, hen hwj cienfanh rem he.

²⁵ Yiengq daihgaiq daengz gyangjngwnz, Baujloz caeuq Sihlah song boux de gouz Cangqdiq, ciengq go haenh Cangqdiq. Gij vunzfamh ndaw de caemh yaek rwz hwj dingq song boux de gangj, dingq song boux de ciengq.

²⁶ Sawqmwh miz deihdoengh, lienz mwnq deihgei gyenhyuz cungj doengh fwenxfwenx bae. Yaepyet he heij dou gyenhyuz cungj hoi liux, doenghheij lienh lienh gyoengq vunzfamh he cungj caemh gag luet liux.

²⁷ Gajlaeng boux guenj gyenhyuz mwnq singj le, raen heij dou cungj hoi liux lo; yiengq de naemqnaeuz gyoengq vunzfamh cungj deuz liux hoh lah. De couh yot cax okdaeuj siengj gag ndaemq bonjfaenh rai.

²⁸ Ngamqluj mwhneix Baujloz raen; de couh doq hemq naeuz: “Mbouj ndaej sienghaih bonjfaenh! Gyoengqraeuz cungj lij youq dineix.”

²⁹ Boux guenj gyenhyuz mwnq dingq le, couh heuh vunz dawz daeng goq daeuj, couh haeuj ndaw gyaeng vunzfamh mwnq bae, ndang saenz dedded hwj bomz youq dangqnaj Baujloz caeuq Sihlah.

³⁰ Gajlaeng de couh daiq song boux de okma, youhcaiq cam naeuz: “Goengjau hax, gou ij baenzlawz guh cij ndaej gouq hax?”

³¹ Yiengq song boux de han naeuz: “Sinq Yehsuh Bouxcawj neix; mwngz caeuq ndaw ranz mwngz couh ndaej gouq lo.”

³² Gajlaeng song boux de vanzlij gangj gij ndei siuhsiz Cangqdiq naeuz de caeuq ndaw ranz de ni.

³³ Haemh mwnq boux guenj gyenhyuz mwnq caemh bang song boux de swiq gij baksieng gwnz ndang gyoengqde. Gajlaeng boux de caeuq ndaw ranz de couh majcangq sijlij lo.

³⁴ De youhcaiq cingj song boux de bae ndaw ranz de, hawj song boux de gw haeux. De caeuq ndaw ranz de hih vunz cungj angq raixcaix, aenvih gyoengqde cenz ranz cungj sinq Cangqdiq lo.

³⁵ Daengz haet daixngeih daihcaeux, Lozmaj fazguenh baij gingjcaz bae naeuz: “Dawz song boux vunz mwnq coengq lo bax!”

³⁶ Gajlaeng, boux guenj gyenhyuz mwnq couh naeuz Baujloz ni naeuz: “Fazguenh baij gingjcaz daeuj naeuz hawj coengq faenhsou lo. Mbat neix faenhsou ndaej ok gyenhyuz lo, ndaej seizbienh bae lo.”

³⁷ Hoeng, Baujloz dauq doiq boux de naeuz: “Nwjhwh ndaej baenxlai bienxngeiz hwj! Gyoengqraeuz dwg Lozmaj vunz; gyoengqde cungj mbouj cimhraen raeuz miz maz coih haem, couh youq dangqnaj vunzlai doh gyoengqraeuz lo, caiq dawz raeuz gyaeng haeuj ndaw lauz daeuj. Seizneix siengj caegcaeg coengq gyoengqraeuz—nwjhwh miz yiengh saeh neix hwj! Raeuz mbouj ok maj hah, cizfeih gyoengqde cinhswq daeuj coengq gyoengqraeuz vwi!”

³⁸ Doengh boux gingjcaz mwnq dingq le, couh bae naeuz fazguenh ni. Fazguenh dingq naeuz Baujloz caeuq Sihlah dwg Lozmaj vunz le, cungj lau hwj ij rai,

³⁹ couh vaiqdi bae ndaw lauz, swnh semxsemh hwj gouz song boux de, daiq song boux de okma, caemhcaiq gouz song boux de, gouz gyoengqde mbouj caiq youq aen singz mwnq youq haem lo.

⁴⁰ Yiengq song boux de ok ma le, couh maj daengz ndaw ranz Lijdijyaq, gujliq gyoengq vunz sinq Yehsuh mwnq, gajlaeng couh bae daixlingh aen singz lo.