Geiq Dwzbaijyienz 10 - Gij Baujcingq Moq Caeuq Geij Bonj Gij Baujcingq Daeuzdaeuz

Bijdwz caeuq Gohnizliuz

¹ Youq aen singz Gaijsajliqyaq miz boux he, gij coh de heuh Gohnizliuz, dwg Lozmaj gywnhdeiq Iqdaqliq yingz dih lienzcangj.

² De dwg boux vunz aiq Cangqdiq yawjnaek Cangqdiq he; de siengzseiz bang vunz gungz, siengzseiz haenh Cangqdiq gouz Cangqdiq. De baenx cenz ranz cungj dwg gingqcungh Cangqdiq he.

³ Miz ngoenz he yaquj daihgaiq sam diemjcung yienghneix, de caenh lujnaeuz fangxngwnzloq yienghmwnq yawjraen bouxcai Cangqdiq daeuj heuh de naeuz: “Gohnizliuz!”

⁴ Gohnizliuz raen yienghneix le, lau hwj cimyawj de cam naeuz: “Aex goengjau, miz maz saeh lah?” Yiengq bouxcai han de naeuz: “Cangqdiq gaenq dingqri mwngz haenh de gouz de lo, caemh ndaejgeiq mwngz haenj bang vunz gungz he.

⁵ Seizneix mwngz ij baij vunz bae Yozbaq, bae mwnq cingj boux heuh Sihmaenz-Bijdwz he daeuj.

⁶ De youq laeng boux gyahgungh naeng doenghduz he youq, gij coh de heuh Sihmaenz he, aen ranz de dwg youq henz haij he.”

⁷ Gajlaeng, doiq de gangj vah hih bouxcai mwnq bae le, de couh heuh song bouxhoiq caeuq boux siengzseiz gaen henz ndang de hih boux bing aiq Cangqdiq yawjnaek Cangqdiq he daeuj,

⁸ naeuz gyoengqde ni de ngamqngamq roeb raen gijmaz. Naeuz sat le, couh baij gyoengqde bae Yozbaq lo.

⁹ Gyoengqde bae hih ngoenz daixngeih, mwh gyoengqde bae ijvanh daengz Yozbaq hih mwhde, daihgaiq daengz gyangjngoenz cingq, Bijdwz hwnj gwnz dingj laeuz de youq hih mwnq bae haenh Cangqdiq gouz Cangqdiq.

¹⁰ Gajlaeng de roxnginh dungxiek, siengj gw haeux, hoeng de youq hih ranz mwnq gyoengqde cijngamq cawj haeux, cawj mijyaengz ndaej haem. Couh youq mwhneix, de lujnaeuz ra ok rongxrib yienghmwnq,

¹¹ yawjraen aen mbwn hoi luj aen dou, miz ndaek gij he luj vangq boiq yienghmwnq, seiq gok de cug hwj, daj gwnzmbwn duengq roengzdaeuj daengz lajdoem.

¹² Ndaw de coux miz gak cungj doenghduz: miz duz byaij hih, duz vuenz hih, duz roeg mbin hih cungj miz.

¹³ Caemh miz sing doiq de naeuz: “Bijdwz, dawz doenghduz neix gaj hwj gw bae.”

¹⁴ Hoeng Bijdwz dauq naeuz: “Bouxcawj gou hax, gijn'x mbouj ndaej law! Gou coengzlaiz mbouj gw goq doenghgij mbouj hab gw hih doxgaiq goq.”

¹⁵ Gij sing mwnq caiq doiq de naeuz: “Cangqdiq naeuz ndaej hab gw hih, mwngz mbouj ndaej naeuz de mbouj hab gw.”

¹⁶ De yienghneix lienzdaemh sam mbat luj ra ok rongxrib yienghmwnq raen gij doxgaiq caeuq miz sing doiq de gangj. Gajlaeng gij doxgaiq mwnq couh sou hwnj gwnzmbwn bae lo.

¹⁷ Yiengq youq mwh Bijdwz lij ngeix loekloek mbouj rox de luj ra ok rongxrib yienghmwnq yawjraen hih dwg gijmaz iqswh hih mwhde, Gohnizliuz baij daeuj hih vunz couh cimh daeuj daengz bakdou Sihmaenz lo.

¹⁸ Gyoengqde youq bakdou hemq cam naeuz: “Veix! Miz mbouj miz boux heuh Sihmaenz-Bijdwz he youq dineix youq hah?”

¹⁹ Bijdwz cungj lij ngeix mijyaengz doeng, vanzlij youq mwnq ngeix gij saeh ngamqngamq fatseng he dauqdaej dwg gijmaz iqswh hih mwhde, Hoenzsaenz Cangqdiq doiq de naeuz: “Aex, miz sam boux daeuj cimh mwngz lo.

²⁰ Mwngz vaiqdi hwnq, roengz maj gaen gyoengqde bae; gaejyungh ngeiz gijmaz, aenvih dwg gou baij daeuj he.”

²¹ Bijdwz dingq yienghneix le, couh majcangq roengz ma, doiq gij vunz daeuj cimh de mwnq naeuz: “Gou couh dwg boux faenhsou ij cimh he. Faenhsou daeuj cimh gou miz maz saeh hah?”

²² Gyoengqde han naeuz: “Dwg Gohnizliuz lienzcangj raeuz baij raeuz daeuj lah; de dwg boux youq ndaw lwgra Cangqdiq dwg boux vunz simndei simsoh he, dwg gingqcungh Cangqdiq he dih vunz. Sojmiz Youzdaiq vunz cungj haenh de naeuz de dwg vunz ndei. Miz boux bouxcai Cangqdiq he naeuz de, hawj de daeuj cingj mwngz bae laeng de; yienghmwnq de couh ndaej dingq mwngz gangj vah lo.”

²³ Bijdwz dingq gyoengqde yienghneix gangj le, couh cingj gyoengqde haeuj ranz bae, caemh hah gyoengqde youq haemh. Yiengq daengz ngoenz daixngeih, Bijdwz couh caeuq geij boux Yozbaq hih lwgsae gaen gyoengqde bae lo.

²⁴ Bae daengz ngoenz daixngeih, gyoengqde couh daengz Gaijsajliqyaq lo. Gohnizliuz caemh gaenq cingj doenghheij caencik beixnuengx caeuq baengzyoux daeuj daengj gyoengqde lo.

²⁵ Yiengq Bijdwz cijngamq baex bae daengz he, Gohnizliuz couh majcangq rumj goqdaeuj, couh bomz youq dangqnaj de baiq de sax de.

²⁶ Bijdwz raen yienghneix le, couh doq vax dawz de, naeuz: “Vaiq hwnq; gou caemh dwg vunz hih lah!”

²⁷ Bijdwz yienghneix naeuz le, couh doq caeuq Gohnizliuz gangj vah doq byaij haeuj ranz bae. De raen miz haujlai vunz youq ndaw ranz de doxcomz,

²⁸ couh doiq gyoengq vunz naeuz: “Faenhsou caemh rox, ciuq gij gveihdingq raeuz, Youzdaiq vunz mboujcwnj caeuq gij vunz linghvaih minzcuz he doxcwnz; hoeng, Cangqdiq gaenq naeuz gou lo, mboujguenj guxmaz vunz cungj ndaej, cungj mbouj ndaej yawj gyoengqde dwg gij vunz mbouj hab dep he.

²⁹ Sojhij faenhsou baij vunz bae cingj gou daeuj, gou cungj mbouj doi, couh daeuj lo. Yiengq seizneix gou daeuj lo, gou cam faenhsou, faenhsou vihmaz ij cingj gou daeuj dineix nej?”

³⁰ Gajlaeng Gohnizliuz han naeuz: “Couh dwg seiq ngoenz gaxgonq, daihgaiq yaquj sam diemjcung yienghneix, gou youq ndaw ranz haenh Cangqdiq gouz Cangqdiq. Sawqmwh miz boux he daenj buh myig myiengzmyiengz ndwn youq dangqnaj gou,

³¹ doiq gou naeuz: ‘Gohnizliuz, mwngz gouz Cangqdiq, Cangqdiq gaenq dingqri lo, de caemh ndaejgeiq mwngz bang vunz gungz soj guh hih ndeisaeh lo.

³² Mwngz ij baij vunz bae Yozbaq, bae cingj boux heuh Sihmaenz-Bijdwz he daeuj. De youq laeng boux gyahgungh naeng doenghduz he youq, gij coh de heuh Sihmaenz he, aen ranz de dwg youq henz haij he.’

³³ Sojhij gou couh majcangq baij vunz bae cingj mwngz daeuj. Seizneix mwngz daeuj lo, raeuz angq ij rai. Seizneix raeuz rox Cangqdiq cuqhiq daengz raeuz lo; raeuz couh siengj dingqdingq Cangqdiq soj raengq mwngz hih ij gangj naeuz raeuz ni hih.”

Bijdwz cenzgangj Cangqdiq dih ndei siuhsiz

³⁴ Couh yienghneix, Bijdwz couh gaihcij doiq gyoengq vunz mwnq gangj vah. De naeuz: “Seizneix gou saedsaeh rox, Cangqdiq mbouj dwg yawj vunz guh saeh.

³⁵ Cijaeu dwg soenhgingq de, guh saeh guh gij cingqheiq he, mboujguenj dwg aen guekgyalawz dih vunz, aen minzcuzlawz dih vunz, de cungj haenj.

³⁶ Aenvih de hawj gij vunz Hijswzlez rox dih ndei siuhsiz couh dwg: Yehsuh Gihduz hawj sojmiz minzcuz hih vunz ndaej caeuq Cangqdiq doxhuz; boux Yehsuh neix couh dwg bouxcawj sojmiz hih.

³⁷ Dajlwh guh sijlij dih Yozhanq senhcenz sijlij le, gij siuhsiz neix daj Gyahliqliq gaihcij cenz, cenz baenx cenz Youzdaiq Saengj; gij saeh neix faenhsou cungj rox.

³⁸ Faenhsou caemh rox, Mbanj Nazsajlwz vunz dih Yehsuh, Cangqdiq baenzlawz hawj Hoenzsaenz Cangqdiq doz youq gwnz ndang de, caeuq soengq bonjsaeh hawj de, hawj de bae gak dieg bae guh ndeisaeh. De yw ndei doenghheij vunz ngaiz fangzvuengz gaemhanh he, aenvih Cangqdiq caeuq de youq.

³⁹ “Gyoengqraeuz dwzbaijyienz cungj dwg de youq ndaw gij dieg Youzdaiq vunz caeuq Yehluqsajlaengj Singz soj guh hih saeh dih cingqyinz. Gyoengq vunz mwnq engq dawz de ding hwnj gwnz gyaq cixcib bae rai.

⁴⁰ Hoeng daengz daixsam ngoenz Cangqdiq hawj de ndaej dauqlix, vanzlij yienh hawj vunz raen;

⁴¹ cijmboujgoq dwg yienh hawj gyoengqraeuz doengh boux Cangqdiq senqsi cix senj okdaeuj guh cingqyinz dih vunz raen lah, couh dwg doengh boux youq de dauqlix le, ndaej caeuq de doxcaeuq gw hih vunz raen lah, mbouj dwg guxmaz vunz cungj ndaej raen law.

⁴² De raengq raeuz hawj raeuz bae cenzgangj gij ndei siuhsiz de, cingqmingz de dwg Cangqdiq laebdingh guh boux saemjbuenq vunzlix caeuq vunzrai dih saemjbuenqguenh he.

⁴³ Sojmiz hih boux cenz gij vah Cangqdiq cungj guh de dih cingqyinz; gyoengqde naeuz Cangqdiq vih de hwj couh mienx gij coih doengh boux famz sinq de hih vunz.”

Hoenzsaenz Cangqdiq daeuj daengz linghvaih aen minzcuz

⁴⁴ Bijdwz vanzlij gangj doenghgij vah neix hih mwhde, Hoenzsaenz Cangqdiq couh hwnj gwnz ndang gyoengq vunz daeuj dingq mwnq bae lo.

⁴⁵ Yiengq doengh boux lwgsae gaen Bijdwz daj Yozbaq daeuj hih Youzdaiq vunz raen Hoenzsaenz Cangqdiq hwnj gwnz ndang gij vunz linghvaih minzcuz he bae le, cungj raen geizheih ij rai bae,

⁴⁶ aenvih gyoengqde dingqri doenghgij vunz mwnq gangj cungj vah Hoenzsaenz Cangqdiq hawj vunz gangj he ma haenh Cangqdiq, haenh Cangqdiq veijdaq.

⁴⁷ Gajlaeng, Bijdwz naeuz: “Caeuq raeuz doxdoengz ndaej miz Hoenzsaenz Cangqdiq lo, lij miz byawz ndaej laengz gyoengqde sijlij nej?”

⁴⁸ De yienghneix gangj le, couh hawj gyoengqde vih Yehsuh Gihduz hwj sijlij. Gajlaeng gyoengq vunz mwnq vanzlij gouz Bijdwz youq laeng gyoengqde mwnq lai youq geij ngoenz haem.