Feihlizbij Saw 3 - Gij Baujcingq Moq Caeuq Geij Bonj Gij Baujcingq Daeuzdaeuz

Ndaej rox Gihduz dwg ceiq dijbauj hih

¹ Ceiqhaeuq, gak boux beixnuengx hax, faenhsou wnggai vih miz bouxcawj raeuz hwj vuenheij. Gou caemh mbouj lau mazfanz hwj caiq doiqyungz daez daengz gij saeh gaxgonq gou daez goq hih, mienxndaej faenhsou miz saeh.

² Faenhsou ij daezfuengz doenghheij guh doeg guh sieb luj mavangh yienghmwnq hih gyoengqde naeuz guxmaz ij doeng gvej sae gvej gozlij cij ndaej hih doenghheij vunz mwnq.

³ Gizsaed cingqcaen gozlij hih mbouj dwg gyoengqde nej, dauq dwg gyoengqraeuz lah, aenvih gyoengqraeuz baengh Hoenzsaenz Cangqdiq hwj baiq Cangqdiq, vih miz Gihduz hwj haenh, mbouj dwg baengh ndangnoh hwj guh hab'eiq habhoz Cangqdiq hih nej.

⁴ Yiengq, hauhnaeuz miz vunz naemqnaeuz baengh bonjfaenh ndangnoh hwj ndaej guh daengz hab'eiq habhoz Cangqdiq nex, gou engqgya ndaej lo,

⁵ aenvih gou seng okdaeuj ndaej bet ngoenz couh gozlij lo, couh dwg seng okdaeuj couh dwg Hijswzlez vunz, dwg haeuj Benqyajminj cuz he, dwg cingqcaen Hihbwzlaiz vunz seng he. Ciuq Youzdaiq vunz dih fazliz ma naeuz, gou dwg Fazliqcaiq vunz hih.

⁶ Yiengq ciuq gou yienzlaiz dwg Fazliqcaiq vunz he ma gangj, gou dwg cizgiz hih; doenghbaez gou bwkhaih gyauqveiq goq. Ciuq Mohsih fazliz ma gangj, gou dwg mij maz diudik hih.

⁷ Doenghbaez famzsoj doiq gou miz yungh hih, seizneix gou vih Gihduz hwj dungjdungj yawj dangq dwg mij'z yungh hih.

^8-9 Mbouj danhcij naeuz yienghneix, gou vanzlij vih Gihduz hwj dawz sojmiz hih cungj dangq dwg coem mij yungh he, aenvih gou dawz rox bouxcawj raeuz Yehsuh Gihduz ma dangq dwg ceiq dijbauj hih. [8c]Vih ij ndaej Gihduz [9a]caeuq ndaej hawj vunz rox gou dwg gaep haeuj de hwj [8b]gou dawz sojmiz hih cungj dangq dwg lahgiz vwt deuz liux. [9b]Gou seizneix ndaej gaep haeuj de, mbouj dwg baengh soenhsouj Mohsih dih fazliz hwj gag ndaej bienqbaenz mij coih hih nej, dauq dwg baengh sinq Gihduz hwj ndaej youq ndaw lwgra Cangqdiq suenq dwg mij'z coih hih lah.

¹⁰ Seizneix gou muengh ndaej rox Gihduz caeuq ndaej caenndang rox gij akak rengzrengz dauqlix de, caemh muengh ndaej luj de yienghmwnq souh nanh, yienghmwnq ngaiz rai.

¹¹ Yienghneix couh hawj gou ndaej luj de yienghmwnq daj rai ndaej dauqlix lo.

Roengzrengz yiengq muzbiuh riq bae

¹² Gou yienghneix muengh, mbouj dwg naeuz gou gaenq ndaej lo, cixnaeuz gaenq ndaej bienq ndei liuxliux lo; gou vanzlij vih ij ndaej daengz cangjbyimj hwj roengzrengz roengzbae, aenvih Yehsuh Gihduz gaenq ndaej daengz gou ma dangq guh cangjbyimj lo.

¹³ Gak boux beixnuengx hax, gou rox gou mijyaengz ndaej gij cangjbyimj gou hih, cijmboujgoq, gou miz yiengh he gaenq ndaej lo, couh dwg gou gaenq dawz doenghbaez sojmiz hih vwt bae lumz bae, caenhrox roengzrengz roengzbae lah.

¹⁴ Gou vih ij ndaej cangjbyimj hwj roengzrengz; gij cangjbyimj neix dwg Cangqdiq dunghgoq Yehsuh Gihduz hwj daj gwnzmbwn heuh gou hwnj bae ndaej seiqseiz lix hih.

¹⁵ Sojhij gyoengqraeuz ndaw de doenghheij vunz senqsi cix rox gij saedsaeh Cangqdiq, rox ndaej laeg he hih vunz, cungj ij miz yienghneix siengjfap. Cungjsuenq naeuz mbouj miz yienghneix dih siengjfap, Cangqdiq caemh gaengjdingq hawj faenhsou rox hih.

¹⁶ Hoeng, mboujguenj baenzlawz, doiq doenghheij saedsaeh gyoengqraeuz gaenq rox hih, gyoengqraeuz couh wnggai ciuq bae guh.

¹⁷ Gak boux beixnuengx hax, faenhsou wnggai roengzrengz hag gou, ciuq gou hih yienghmwnq bae guh, caemh ij gaen ij hag doenghheij vunz hag gou ciuq gou bae guh he.

¹⁸ Gou vihmaz ij yienghneix naeuz faenhsou, dwg aenvih miz haujlai vunz gag naeuz bonjfaenh de dwg haeuj gij vunz Gihduz he, hoeng, gyoengqde mbouj sinq Gihduz vih vunz rap coih hwj ngaiz ding rai youq gwnz gyaq cixcib hih gij saedsaeh neix, fanjdeiq gij saedsaeh neix. Gij saeh neix gou doenghbaez siengzseiz naeuz sou ni; seizneix gou vanzlij riuz raemxra hwj caiq daezsingj faenhsou mbat haem.

¹⁹ Gou naeuz doengh cungj vunz neix, gyoengqde cungj dwg yawjnaek aen dungx bonjfaenh, yawj aen dungx bonjfaenh dangq caencwnz, dawz saetnaj saetnyaenq ma dangq najrongh, siengj hih cungj dwg aen seiqgyaiq neix hih saeh. Gyoengqde baezneix gaengjdingq ij ngaiz satsoq.

²⁰ Hoeng, gyoengqraeuz dwg guek gwnzmbwn hih vunz, caemh dwg daengj bouxcawj gouq raeuz dih Yehsuh Gihduz daj mwnq dauq daeuj.

²¹ De ij yungh gij akak rengzrengz ndaej guenjciq sojmiz he ma hawj aen ndangnoh rox naeuh gyoengqraeuz bienqbaenz luj aen ndang bonjfaenh de yienghmwnq ndei ndwtndwt rongh sagsag.