Bijdwz Ngeih 3 - Gij Baujcingq Moq Caeuq Geij Bonj Gij Baujcingq Daeuzdaeuz

Bouxcawj baujcingq dauq daeuj

¹ Cinhngaiq dih gak boux beixnuengx hax, gou seizneix sij daixngeih fung saenq hawj faenhsou. Gou sij hih song fung saenq cungj dwg daezsingj faenhsou, gujliq faenhsou, hawj faenhsou swhsiengj gyenqgangh,

² hawj faenhsou ndaejgeiq boux cenz gij vah Cangqdiq sien rox sien gangj goq hih vah caeuq gij mingqlingq bouxcawj gouq vunz hawj dwzbaijyienz cenz hawj faenhsou he.

³ Ceiq cungqyauq hih dwg faenhsou bietdingh ijaeu rox, ij ngeix daengz seiqgyaiq hih ngoenz gatsat, ij miz gij vunz ngaiz ndangnoh guenjciq he ok daeuj lengxriu faenhsou

⁴ naeuz: “Yehsuh mbouj dwg baujcingq goq ij dauq daeuj maz; de youq mwnqlaw? Cojgoeng raeuz gaenq rai lo, hoeng, sojmiz hih mbouj dwg cungj dwg caeuq ngamq cauh mbwn cauh deih hih doxdoengz maz?”

⁵ Gyoengqde yienghneix naeuz dwg guqiq lumz daj gaihcij cix dwg Cangqdiq yungh gij vah bonjfaenh de ma cauh mbwn cauh deih he, caiq hawj gij dieg daj ndaw raemx loh okdaeuj he,

⁶ gajlaeng caiq yungh gij vah bonjfaenh de ma hawj lajmbwn sojmiz hih cungj ngaiz raemx dumh byaeu liux hih gij saedsaeh neix he.

⁷ Hoeng, gyoengqde wnggai rox, seizneix dih mbwn deih caemh dwg baengh gij vah Cangqdiq hwj ndaej louz daengz seizneix. Daengj daengz doenghgij vunz mbouj yawjnaek Cangqdiq he ngaiz saemjbuenq, ngaiz byaeu hih ngoenz mwnq, mbwn deih couh ij ngaiz feiz gyemz byaeu liux bae.

⁸ Hoeng, cinhngaiq dih gak boux beixnuengx hax, faenhsou gaejyungh lau doenghgij vunz mwnq lengxriu naeuz bouxcawj raeuz mijyaengz dauq daeuj; miz gienh saeh he faenhsou ijaeu ndaejgeiq, couh dwg: aeu bouxcawj raeuz ma yawj, ngoenz he couh dangq luj cien bi, cien bi couh dangq luj ngoenz he.

⁹ Bouxcawj raeuz gaenhbaenj mbouj luj doenghheij vunz mwnq siengj hih yienghmwnq dohdoh lahlah mbouj doiqyienh de soj baujcingq hih; gizsaed dauq dwg de nyiuz faenhsou, naenxsim daengj, muengh sojmiz hih vunz cungj nginh loek gaijgoq hwj ndaej gouq ndaej mienx coih hwj mij saek boux ngaiz satsoq lah.

¹⁰ Mboujgoq, bouxcawj raeuz dauq daeuj hih ngoenz mwnq, couh luj bouxcaeg sawqmwh daeuj daengz yienghmwnq. Mwhde aen mbwn couh yiengj ndaek sing hung he couh byaeu liux, gwnzmbwn sojmiz hih cungj ngaiz feiz coemh siu liux. Diqgiuz caeuq gwnz diqgiuz sojmiz hih cungj ngaiz feiz coemh byaeu liux.

¹¹ Giqyienz sojmiz hih cungj ij luj yienghneix ngaiz byaeu liux vwz, yiengq faenhsou guh vunz couh ij wnggai guh gij hab'eiq habhoz Cangqdiq he, yawjnaek Cangqdiq he hwj

¹² muengh daengj daengz ngoenz Cangqdiq dingh hih ngoenz mwnq, aenvih ngoenz mwnq Cangqdiq gaengjdingq ij hawj aen mbwn daiqlienz aen mbwn gwnz de sojmiz hih cungj ij ngaiz feiz gyemz byaeu liux yungz liux siu liux.

¹³ Hoeng, gyoengqraeuz soj muengh hih couh dwg Cangqdiq soj baujcingq goq hih: de ij nyok hawj raeuz aen mbwn moq caeuq aen diqgiuz moq youq mwnq cungj dwg vunz mbouj famh coih he.

¹⁴ Sojhij cinhngaiq dih gak boux beixnuengx hax, giqyienz faenhsou muengh daengj doenghgij saeh neix, couh ij wnggai roengzrengz hawj faenhsou mij maz loek, mij maz ndaej diudik he, mij naeuz mboujeiqseiq he hwj caeuq Cangqdiq doxhuz.

¹⁵ Vanzlij ijaeu rox, bouxcawj raeuz hozraez naenxsim daengj couh dwg ij hawj vunz miz gihveiq ndaej gouq, couh luj gyoengqraeuz cinhngaiq dih Baujloz boux beixnuengx neix, de yungh Cangqdiq soj nyok hawj dih coengjmingz sij saenq naeuz faenhsou yienghmwnq.

¹⁶ De sij dih moix it fung saenq cungj dwen daengz gij saeh neix. Ndaw saenq de miz hih hoj rox, yiengq doenghheij vunz mbouj miz ciqsiz geijlai he simfouz he lijgaij goq daixlingh gok bae he, cingq luj gyoengqde luenh lijgaij Singqgingh dih gizdah mwnq ityiengh. Doengh cungj vunz neix couh dwg gag ra rai he.

¹⁷ Sojhij cinhngaiq dih gak boux beixnuengx hax, giqyienz faenhsou gaenq sien rox doenghgij saeh neix lo, couh ij wnggai siujsim, mienxndaej ngaiz gij vunz vaih guh loek he yaeuh faenhsou, hawj faenhsou byaij haeuj mbouj wnggai byaij he bae, hawj faenhsou sinq Gihduz gyenhdingq bienqbaenz mbouj gyenhdingq.

¹⁸ Dauqfanj faenhsou dauq ij yied ngoenz yied luj bouxcawj gouq raeuz Yehsuh Gihduz yienghmwnq haijliengh, caemh ij yied ngoenz yied rox de. Muengh de yungjyenj najrongh! Ahmaenz.