Bijdwz It 5 - Gij Baujcingq Moq Caeuq Geij Bonj Gij Baujcingq Daeuzdaeuz

Raengq gyauqveiq dih lingjdauj caeuq heij hauxseng he

¹ Gou dwg gyauqveiq dih lingjdauj, caemh dwg caenra raen Gihduz souh nanh he, caiq dwg ndaej yangjcouq de baezneix ij yienh okdaeuj hih veijdaq he. Gou gienq faenhsou gak boux gyauqveiq dih lingjdauj,

² faenhsou ij ciengx ndei gyoengq yiengz Cangqdiq gyau hawj faenhsou he, ij ciuq Cangqdiq dih cawjeiq guenj ndei gyoengqde; mbouj ndaej hozgwg, cix mbouj ndaej vih cienzcaiz, dauq ij dwg nyienh'eiq caensim hwj ciengx he cij deng.

³ Caemh mbouj ndaej dwg vih ij guenjciq gyoengqde, dauq dwg ij vih gyoengqde hwj guh ndei bangjyangq.

⁴ Yienghneix daengz Cangqdiq dih boux ciengxyiengz daeuzdaeuz, Yehsuh Gihduz, yienh okdaeuj hih mwhde, faenhsou gaengjdingq ndaej daengz gij cangjbyimj rongh sagsag yungjyenj mbouj rox gaeuq mbouj rox vaih he.

⁵ Caemh doxdoengz, gou seizneix gienq faenhsou doenghheij hauxseng he, faenhsou ij wnggai dingq doenghheij nienzgeij laux he. Hoeng, faenhsou daixgya mboujguenj bouxlaux hauxseng cungj mbouj ndaej gyauhngauq, ij rox doxbang, aenvih Cangqdiq fanjdeiq gyauhngauq hih vunz, doiq doenghheij mbouj gyauhngauq hih vunz haijliengh.

⁶ Sojhij faenhsou ij dingq ij fug akak rengzrengz dih Cangqdiq, mbouj ndaej gyauhngauq; yienghneix daengz mwhde, de gaengjdingq hawj faenhsou najrongh.

⁷ Faenhsou ij dawz sojmiz hih yousim simnyap gyau hawj Cangqdiq, aenvih de gvansim faenhsou.

⁸ Mboujgoq faenhsou ij siujsim, ij daezfuengz dizyinz fangzvuengz faenhsou; de luj duz guk iek maenj humxhumx dauqcawq byaij bae byaij dauq cimh vunz gyan gw he, de caemh dwg cauh baenz hawj vunz miz nanh he.

⁹ Faenhsou sinq Gihduz ij gyenhdingq hwj dijgangq goq de, aenvih faenhsou rox lajmbwn sojmiz sinq Gihduz hih gak boux beixnuengx cungj caemh doxdoengz ngaiz souh nanh, cungj caemh ij dijgangq de.

¹⁰ Hoeng, faenhsou souh goq duenh nanh he le, boux doiq vunz haijliengh raixcaix aiq vunz raixcaix dih Cangqdiq, couh dwg senj faenhsou, hawj faenhsou dunghgoq Gihduz ndaej yungjyenj najrongh dih Cangqdiq, gaengjdingq caenndang hawj faenhsou ndaej fuk hwnjdaeuj, hawj faenhsou sinqsim gyenhdingq, hawj faenhsou miz rengz mbouj doeknaiq, hawj faenhsou ndaej caep giek ndei.

¹¹ Muengh gienz akak rengzrengz yungjyungj yenjyenj gvi hawj Cangqdiq! Ahmaenz.

Ceiqhaeuq cam ndei caeuq hoh fuk

¹² Gou youq dineix gyenjdanh sij fung saenq dinj neix hawj Sihlah dawz bae hawj faenhsou. Sihlah boux beixnuengx neix gou yawj de dwg boux lauxsaed sinq ndaej goq he. Gou sij fung saenq neix dwg ij gienq faenhsou, caemh dwg ij cingqmingz Cangqdiq saedsaeh dwg aiq vunz doiq vunz haijliengh raixcaix he, sojhij, faenhsou bietdingh ij baengh de dih aiq hwj gyenhciz roengzbae mbouj doeknaiq mbouj bienq sim.

¹³ Vanzlij miz, youq Bahbijlwnz caeuq faenhsou doxdoengz dwg Cangqdiq senj hih gyauqveiq cam faenhsou ndei, caeuq dangq luj daeglwg gou hih Majgoj caemh cam faenhsou ndei.

¹⁴ Faenhsou caemh ij miz aiqsim hwj doxcam ndei. Muengh faenhsou gak boux gaep haeuj Gihduz hih vunz bingzan!