Bijdwz It 4 - Gij Baujcingq Moq Caeuq Geij Bonj Gij Baujcingq Daeuzdaeuz

Vih Cangqdiq hwj goq saedceij

¹ Yiengq, giqyienz Gihduz souh nanh goq lo, faenhsou caemh ij wnggai caeuq de doxdoengz miz aen sim he cwnjbiq souh nanh, aenvih ngaiz souh nanh goq hih vunz gaenq caeuq coih doxbiek, duet ok coih lo.

² Faenhsou miz aen sim yienghneix, daj seizneix hwnj, faenhsou goq saedceij couh mbouj caiq ngaiz ciuq vunz dih baenjsingq, siengjmuengh hwj gaemhanh dawz lo; cij rox ciuq Cangqdiq dih cawjeiq hwj goq saedceij lah,

³ aenvih faenhsou doenghbaez caeuq doenghheij mbouj rox Cangqdiq hih vunz doxdoengz, dawz cizgyenh sai youq doenghheij saeh faenhsou haenj guh he bae, couh dwg guh gij yalw ndaengndwet, siengjmuengh, gw laeuj fiz, baenx gyoengq baenx raq gwgw angqangq rek ruxrux, simqciq baiq you, gij saeh dwgcaengz neix he.

⁴ Mboujgoq faenhsou seizneix mbouj caiq caeuq gyoengqde gaen gyoengqde haem lo. Yienghneix gyoengqde couh raen geizheih, couh riu faenhsou, yawj mbouj hwnj faenhsou lo.

⁵ Yiengq, doenghheij vunz neix, gyoengqde gaengjdingq ij yiengq boux saemjbuenq vunzlix caeuq vunzrai dih Cangqdiq gyauhdaiq.

⁶ Cingq vih yienghneix, Cangqdiq dih ndei siuhsiz caemh cenz hawj doenghheij seizneix gaenq rai hih; yienghneix, gyoengqde gannaeuz luj sojmiz hih vunz doxdoengz ngaiz souh daengz saemjbuenq hwj ngaiz rai lah, hoeng, seizneix gyoengqde dih hoenzsaenz dauq ndaej caeuq Cangqdiq itheij lix.

⁷ Sojmiz hih couh ij daengz gatsat lo, sojhij faenhsou ij siujsim ij baujciz daezsingj, gag rox haed bonjfaenh, yienghneix couh ndaej haemq ndei gouzhaenh Cangqdiq lo.

⁸ Ceiq cungqyauq hih dwg faenhsou ij caensim doxaiq, aenvih aiq ndaej nyiuz haujlai coih.

⁹ Faenhsou caemh ij haenj daih hek, mbouj ndaej naj ndaem ndetndet.

¹⁰ Faenhsou gak vunz cungj ndaej daengz Cangqdiq nyok hawj hih bonjsaeh, cijmboujgoq gak vunz ndaej hih mbouj doxdoengz; faenhsou ij ciuq Cangqdiq soj nyok hawj hih bae doxbang.

¹¹ Byawz miz caiz cenzgangj gij vah Cangqdiq hih, couh ij ciuq gij vah Cangqdiq bae gangj; byawz miz caiz ndaej bang vunz hih, couh ij yungh Cangqdiq nyok hawj hih rengz bae bang vunz. Yienghneix, couh ndaej hawj sojmiz hih dunghgoq Yehsuh Gihduz hwj ndaej hawj Cangqdiq najrongh lo. Muengh akak rengzrengz najrongh yungjyenj cungj dwg gvi hawj Cangqdiq! Ahmaenz.

Vih Gihduz hwj souh nanh hih najrongh lo

¹² Cinhngaiq dih gak boux beixnuengx hax, faenhsou gaejyungh vih roeb daengz nanh dih gaujniemq hwj geizheih, lujnaeuz yienghneix mbouj dwg cingqcangz he,

¹³ dauqfanj ij vih miz gihveiq luj Gihduz yienghmwnq souh nanh hwj angq cij deng. Yienghneix, daengz Gihduz najrongh hih mwhde, couh dwg Gihduz de dauq daeuj hih mwhde, faenhsou couh ndaej engqgya angq.

¹⁴ Sojhij, hauhnaeuz faenhsou vih gaen Gihduz hwj ngaiz vunz yug, ngaiz vunz yawjngawz hih, faenhsou couh miz fuk lo, aenvih yienghneix couh dwg naeuz veijdaq dih Hoenzsaenz Cangqdiq doz youq gwnz ndang faenhsou lo.

¹⁵ Mboujgoq, faenhsou mbouj wnggai vih gaj vunz, guxcaeg, guh doeg guh sieb cixnaeuz guenj henzsaeh hwj souh nanh.

¹⁶ Hoeng, hauhnaeuz faenhsou vih dwg gaep haeuj Gihduz hwj ngaiz souh nanh hih, gaejyungh saetnaj saetnyaenq, dauq ij vih dwg gaep haeuj Gihduz hwj haenh Cangqdiq cij deng,

¹⁷ aenvih Cangqdiq saemjbuenq vunz lajmbwn hih mwhde daengz lo. Ij saemjbuenq, couh ij daj gij vunz bonjfaenh Cangqdiq gaihcij saemjbuenq. Yiengq, hauhnaeuz daj gyoengqraeuz gaihcij saemjbuenq, doenghheij mbouj sinq Cangqdiq dih ndei siuhsiz hih vunz ij baenzlawz yiengh nej?

¹⁸ Ciuq ndaw Singqgingh ndaw de sij naeuz: Vunz ndei hih vunz mbouj yungzheih ndaej gouq hih, yiengq doenghheij mbouj gingqbaiq Cangqdiq hih caeuq miz coih hih vunz ij baenzlawz yiengh nej?

¹⁹ Sojhij, doenghheij Cangqdiq hawj souh nanh hih, ij gyenhciz guh ndeisaeh roengzbae, ij dawz bonjfaenh gyau hawj sinq ndaej goq hih cauh sojmiz hih Cangqdiq.