Bijdwz It 2 - Gij Baujcingq Moq Caeuq Geij Bonj Gij Baujcingq Daeuzdaeuz

^1-3 Yiengq, giqyienz faenhsou gaenq rox bouxcawj raeuz doiq faenhsou ndei lo, [1]faenhsou couh mbouj wnggai guh gij doegsieb he, yaeuh vunz he, gyajcang guh ndei he, rahoengz vunz bangjlaih vunz he lo, [2]dauq ij gaenj ranxranx hwj hag rox gij vah Cangqdiq cij deng, gaenj ranxranx luj lwgnding yienghmwnq ij gw gij nauq daxmeh de, yienghneix couh ndaej maj hung baenz vunz, couh dwg naeuz ndaej gouq lo.

Aen gunghdenq Cangqdiq lix hih rin

⁴ Faenhsou ij wnggai gaep haeuj bouxcawj raeuz Yehsuh Gihduz, aenvih de dangq dwg lix hih rin; gannaeuz vunz vwt de yiem de lah, hoeng, Cangqdiq dauq yawj de dij, senj de ma guh ngauq rin mbouj ndaej noix he.

⁵ Faenhsou gaep haeuj de, caemh bienqbaenz ngauq rin lix he, Cangqdiq caemh aeu ma hwnq aen ranz hawj Hoenzsaenz bonjfaenh de. Faenhsou caemh guh goengjsae dajbwiz hwj daeuj swqhaeuh Cangqdiq, caiq dunghgoq Yehsuh Gihduz hwj guh gij hab'eiq habhoz Cangqdiq he ma dajbwiz soengq hawj de.

⁶ Cingq luj ndaw Singqgingh ndaw de sij naeuz: Yawj veiq! Gou youq Cizanh coengq ngauq rin he, couh dwg soj senj hih ceiq dijbauj hih ngauq rin gok ranz mbouj ndaej noix he. Sinq de baengh de hih vunz gaengjdingq mbouj saetmuengh.

⁷ Sojhij doiq faenhsou doenghheij sinq de hih vunz ma gangj, Gihduz, ngauq rin neix dwg dijbauj hih, hoeng, doiq doenghheij mbouj sinq de hih vunz ma gangj, Gihduz, ngauq rin neix couh dangq luj youq ndaw Singqgingh ndaw de soj sij naeuz hih: Doenghheij canghranz dajcaep yiem de vwt de he, seizneix dauq dwg ngauq rin gok ranz mbouj ndaej noix he.

⁸ Ndaw de vanzlij caiq sij naeuz: Ngauq rin neix dwg hawj vunz daemjndoet he, caemh dwg hawj vunz daemjndoet laemx he. Gij vunz daemjndoet laemx dwg aenvih gyoengqde mbouj sinq gij vah Cangqdiq; gij neix dwg Cangqdiq dih cawjeiq hih.

⁹ Hoeng, faenhsou caeuq gyoengqde mbouj doxdoengz. Faenhsou dwg Cangqdiq soj senj hih minzcuz, dwg gij vunz aen guek de he, dwg guh Cangqdiq goengjvuengz dih goengjsae dajbwiz he, dwg gvi haeuj Cangqdiq he. Cangqdiq senj faenhsou dwg hawj faenhsou daj ndaw laep ok daeuj haeuj ndaw rongh sagsag de bae cenzgangj gij ndei raixcaix de.

¹⁰ Doenghbaez faenhsou mbouj baenz guxmaz minzcuz, hoeng, seizneix dauq dwg gij vunz Cangqdiq lo; doenghbaez faenhsou mbouj ndaej daengz hojsik, hoeng, seizneix dauq ndaej daengz Cangqdiq dih hojsik.

Guh bouxhoiq Cangqdiq

¹¹ Cinhngaiq dih gak boux beixnuengx hax, faenhsou dwg vunz hek camqciz doz youq lajmbwn he; gou gienq faenhsou wnggai haed aen ndang bonjfaenh. Gaejyungh vih aen ndang bonjfaenh hwj siengjmuengh gij yalw ndaengndwet he, aenvih cungj yalw siengjmuengh neix cungj dwg caeuq hoenzsaenz bonjfaenh doxngig hih.

¹² Faenhsou caeuq doenghheij mbouj rox Cangqdiq hih vunz youq itheij hih ijaeu siujsim, gangj vah guh saeh cungj ij gangj gij hab gangj he, guh gij hab guh he, yienghmwnq couh ndaej hawj doenghheij bangjlaih faenhsou guh vaihsaeh hih raen faenhsou guh ndei le, daengz bouxcawj raeuz Yehsuh Gihduz dauq daeuj hih ngoenz mwnq couh haenh Cangqdiq.

¹³ Faenhsou ij vih bouxcawj raeuz hwj dingq aen seiqgyaiq neix sojmiz miz gienz he, mboujguenj dwg dang vuengz he haj

¹⁴ cixnaeuz dwg goengjvuengz baij daeuj fad vunz, cangjliq hawj vunz he,

¹⁵ aenvih Cangqdiq dih cawjeiq dwg ij hawj faenhsou guh ndaej deng hwj fung conghbak doenghheij vunz ngawzngad moengxcwenx he.

¹⁶ Gannaeuz faenhsou dwg boux swqyouz vunz he lah, hoeng, faenhsou dwg bouxhoiq Cangqdiq hah. Sojhij mbouj ndaej naemqnaeuz bonjfaenh dwg boux swqyouz vunz he hwj le couh ndaej seizbienh guh doenghgij doegsieb he.

¹⁷ Faenhsou dauq ij soenhcungq sojmiz hih vunz, ij aiq sojmiz sinq bouxcawj raeuz Yehsuh Gihduz hih beixbeix nuengxnuengx, ij yawjnaek Cangqdiq, caemh ij soenhgingq dang vuengz he.

Dingq caeuq naenxhoz naenxheiq

¹⁸ Yiengq gangj daengz faenhsou guh bouxhoiq hih, mboujguenj guxmaz cungj ij soenhcungq bouxcawj dingq bouxcawj, mbouj danhcij doiq boux soh boux simndei he yienghneix, doiq boux ged boux youqgaenj he caemh ij yienghneix.

¹⁹ Hauhnaeuz faenhsou vih liengzsim doiq ndaej hwnj Cangqdiq hwj souh daengz mbouj hab souh hih, hoeng ndaej naenxhoz naenxheiq hih, yiengq Cangqdiq dwg haenjheiq hih.

²⁰ Danghyienz, hauhnaeuz faenhsou vih guh loek hwj ngaiz doh ngaiz fad hwj caemh ndaej naenxhoz naenxheiq hih, cix ij miz maz haenh? Hoeng, hauhnaeuz faenhsou dwg vih guh ndeisaeh hwj ngaiz doh ngaiz fad caemh ndaej naenxhoz naenxheiq hih, yiengq aeu Cangqdiq ma yawj dwg haenjheiq hih.

²¹ Cangqdiq senj faenhsou dih muzdiz dwg ij hawj faenhsou yienghneix guh hih, aenvih Gihduz caemh vih faenhsou hwj ngaiz souh nanh, hawj faenhsou guh ndei bangjyangq, hawj faenhsou gaen de guh, hag de.

²² Gihduz de mij famh coih goq, caemh mij gangj gyajvah goq.

²³ De ngaiz vunz yug, mbouj boiz bak; ngaiz vunz haih, mbouj haep vunz, caenhgag dawz bonjfaenh gyau hawj gunghbingz gunghcingq saemjbuenq vunz dih Cangqdiq lah.

²⁴ De ngaiz ding hwnj gwnz gyaq cixcib bae rai, caenndang rap gij coih gyoengqraeuz, hawj gyoengqraeuz ndaej duet ok coih mbouj caiq ngaiz coih gaemhanh, hawj gyoengqraeuz ndaej goq cungj saenghhoz Cangqdiq haenjheiq he. Aenvih de soj souh hih sieng, faenhsou ndaej yw ndei lo.

²⁵ Faenhsou doenghbaez couh dangq duz yiengz ngaiz loengj roen he, hoeng, seizneix dauq ndaej ma daengz gvi haeuj boux ciengx faenhsou baujhuq hoenzsaenz faenhsou he.