Bijdwz It 1 - Gij Baujcingq Moq Caeuq Geij Bonj Gij Baujcingq Daeuzdaeuz

¹ Cinhngaiq dih gak boux beixnuengx hax, gou dwg Bijdwz, dwg Yehsuh Gihduz dih boux dwzbaijyienz he. Gou sij saenq hawj doenghheij Cangqdiq senj okdaeuj hih vih deuznanh hwj faensanq bae daengz Baenjduh hah, Gyahlahdaiq hah, Gyahbaqdohgyah hah, Yaqsiqyaq hah, Biqdeihniz hah doenghheij aen saengj neix doz youq hih lwgsae.

² Faenhsou dwg Cangqdiq Bohmbwn senqsi cix rox cix senjdingh okdaeuj hih lo; Hoenzsaenz de hawj faenhsou bienqbaenz boux hab'eiq habhoz Cangqdiq hwj dingq Yehsuh Gihduz, caiq baengh gij lwed Yehsuh Gihduz hwj hawj faenhsou guh gij vunz de. Muengh Cangqdiq doiq faenhsou haijliengh raixcaix, hawj faenhsou bingzan!

Muengh seiqseiz lix

³ Bouxcawj raeuz Yehsuh Gihduz dih Cangqdiq daxboh wnggai haenh hih! De hojsik gyoengqraeuz raixcaix; de dunghgoq bouxcawj raeuz Yehsuh Gihduz daj rai ndaej dauqlix hwj hawj gyoengqraeuz ndaej dauqyungz seng, hawj gyoengqraeuz ndaej miz saen hih mingh, hawj gyoengqraeuz miz muengh raixcaix,

⁴ hawj gyoengqraeuz ndaej ciep aeu gij saizcanj de louz youq gwnzmbwn mbouj rox naeuh mbouj rox lanh, mbouj rox siu, mbouj rox uq—cengh yupyup he.

⁵ Cangqdiq vih faenhsou sinq de hwj de couh yungh gij akak rengzrengz de ma baujhuq faenhsou, hawj faenhsou ndaej de soj cwnjbiq hih, couh dwg youq ngoenz gatsat yienh hawj gyoengqraeuz rox ndaej gouq dwg baenxlai dih ndei.

⁶ Sojhij faenhsou ij wnggai angq raixcaix, hoeng, cijmboujgoq seizneix faenhsou camqciz aiq ij roeb daengz gak cungj gaujniemq hwj roxnginh siengsim.

⁷ Faenhsou souh daengz gaujniemq dih muzdiz dwg ij cingqmingz faenhsou sinq Gihduz hih sim dwg cingqcaen, dwg beij gij gim dunghgoq feiz ma dizlenq okdaeuj hoeng vanzlij rox vaih hih, vanzlij dijbauj lah; yienghneix faenhsou daengz mwh Yehsuh Gihduz dauq daeuj hih mwhde, faenhsou couh ndaej haenh, ndaej najrongh, ndaej hawj vunz soenhcungq faenhsou lo.

⁸ Gannaeuz faenhsou mij raen goq Gihduz lah, hoeng, faenhsou dauq aiq de; gannaeuz seizneix faenhsou vanzlij mijyaengz ndaej raen de, hoeng, faenhsou dauq sinq de. Couh vih yienghneix, faenhsou ndaej najrongh caeuq angq hwj mbouj rox hih ij baenzlawz bae.

⁹ Caiq aenvih faenhsou sinq de baengh de hwj le, faenhsou dih hoenzsaenz couh ndaej gouq.

¹⁰ Yiengq gangj daengz Cangqdiq haijliengh gouq vunz, doenghbaez gyoengq boux cenz gij vah Cangqdiq cenzgangj ndaej gouq hih, gyoengqde doiq ndaej gouq caemh mbouj daiq rox geijlai, sojhij gyoengqde caemh nienx caemh faenhsiz goq.

¹¹ Couh dwg Hoenzsaenz Gihduz youq gwnz ndang boux cenz gij vah Cangqdiq hawj gyoengqde ndaej sien rox Gihduz ij ngaiz souh nanh caeuq gajlaeng ij ndaej najrongh hih, hoeng, mwhde gyoengqde gaenhbaenj mbouj rox ij daengz mwhlaw cixnaeuz baenzlaw fatseng gij saeh neix.

¹² Hoeng, Hoenzsaenz de hawj gyoengqde rox gyoengqde soj cenz hih ndei siuhsiz gaenhbaenj mbouj dwg vih gyoengqde aen nienzdaiq mwnq, dauq dwg vih faenhsou aen nienzdaiq neix hih lah. Seizneix de daj gwnzmbwn baij Hoenzsaenz de daeuj hawj vunz cenz gij ndei siuhsiz neix naeuz faenhsou ni. Gij ndei siuhsiz neix baenxlai ndei, daiqlienz bouxcai Cangqdiq cungj siengj rox cingsuj.

Goq hab'eiq habhoz Cangqdiq dih saenghhoz

¹³ Sojhij, faenhsou ij singqsag guh ndei cwnjbiq, wnggai miz sinqsim, mbouj doeknaiq hwj muengh daengj daengz Yehsuh Gihduz dauq daeuj hih mwhde doiq faenhsou haijliengh.

¹⁴ Faenhsou ijaeu luj gij lwg Cangqdiq yienghmwnq naeuzdingq; mbouj ndaej luj doenghbaez yienghmwnq ngawzngad, moengxcwenx gijmaz cungj mbouj rox hwj siengj guh gijmaz couh guh gijmaz.

¹⁵ Dauqfanj ij guh gij saeh mij gijmaz ndaej diudik he, cingq luj senj faenhsou dih Cangqdiq de dwg boux ndei liuxliux mij gijmaz ndaej diudik he.

¹⁶ Couh vih yienghneix, ndaw Singqgingh ndaw de sij naeuz: Faenhsou ij guh boux mij gijmaz ndaej diudik he, aenvih gou dwg boux ndei liuxliux mij gijmaz ndaej diudik he.

¹⁷ Hauhnaeuz faenhsou cwng Cangqdiq—couh dwg boux ciuq gak vunz soj guh hih ma gunghbingz gunghcingq saemjbuenq vunz dih Cangqdiq—heuh guh boh lo, yiengq, faenhsou camqciz doz youq lajmbwn hih vunz couh ij wnggai siujsim, mbouj ndaej guh gij saeh daekcoih Cangqdiq he,

¹⁸ aenvih faenhsou caemh rox, faenhsou ndaej cueg, ndaej duet ok dajlwh cojgoeng faenhsou cix cenz roengzdaeuj hih mij dij saek haux cienz hih cungj saenghhoz mwnq, mbouj dwg baengh doenghgij rox naeuh rox lanh hih gim hah, ngaenz hah ndaej cueg ndaej duet ok hih,

¹⁹ dauq dwg baengh Gihduz dijbauj dih lwed lah; gij lwed de couh luj gij lwed duz yiengzlwg ndei ndwtndwt giencangq he.

²⁰ Yiengq, couh vih gij neix hwj Cangqdiq daj cauh mbwn cauh deih cihsenz cix gyezdingq senjdingh Gihduz lo, hoeng, vih faenhsou hwj de dauj youq ciqgyaiq dih duenh gatsat de, couh dwg seizneix, cij yienh okdaeuj lah.

²¹ Faenhsou dunghgoq de hwj sinq boux hawj de daj rai ndaej dauqlix caiq hawj de ndaej najrongh dih Cangqdiq; sojhij faenhsou sinq caeuq miz muengh dungjdungj cungj dwg Cangqdiq.

²² Yiengq, giqyienz faenhsou dingq saedsaeh ciuq saedsaeh hwj ndaej bienqbaenz boux mij'z coih cingqcaen rox aiq vunz he lo, faenhsou couh ij luj beixnuengx caemh nginz caemh rag yienghmwnq caensim caen'eiq doxaiq.

²³ Faenhsou wnggai yienghneix guh, aenvih Cangqdiq hawj faenhsou ndaej doiqyungz seng, ndaej doiqyungz miz mingh. Faenhsou ndaej doiqyungz seng, ndaej miz saen dih mingh, mbouj dwg daj rox rai hih, miz lwed miz noh hih vunz seng hih, dauq dwg daj gij vah Cangqdiq miz mingh hih yungjyenj mbouj rox cied hih ndaej miz saen dih mingh lah.

²⁴ Cingq luj ndaw Singqgingh ndaw de sij naeuz: Famz miz lwed miz noh hih dungjdungj cungj luj go nyaengq; sojmiz hih ing'yungz cungj luj duj va nyaengq. Nyaengq rai, va caemh loenq;

²⁵ caenhgag gij vah Cangqdiq cij yungjyenj mbouj rox cied, cij seiqseiz miz. Gij vah neix couh dwg soj cenz hawj faenhsou hih ndei siuhsiz lo.