O. Daf 3 - Bibeli Mimọ

Adura Òwúrọ̀ fun Ìrànlọ́wọ́

Orin Dafidi nigbati o salọ niwaju Absalomu, ọmọ rẹ̀.

¹ OLUWA, awọn ti nyọ mi li ẹnu ti npọ̀ to yi! ọ̀pọlọpọ li awọn ti o dide si mi.

² Ọ̀pọlọpọ li awọn ti o nwi niti ọkàn mi pe, Iranlọwọ kò si fun u nipa ti Ọlọrun.

³ Ṣugbọn iwọ, Oluwa, li asà fun mi; ogo mi; ati olugbe ori mi soke.

⁴ Emi fi ohùn mi kigbe si Oluwa, o si gbohùn mi lati òke mimọ́ rẹ̀ wá.

⁵ Emi dubulẹ, mo si sùn; mo si ji; nitori ti Oluwa tì mi lẹhin,

⁶ Emi kì yio bẹ̀ru ọ̀pọlọpọ enia, ti nwọn rọ̀gba yi mi ka.

⁷ Dide Oluwa; gbà mi, Ọlọrun mi: nitori iwọ li o lù gbogbo awọn ọta mi li egungun ẹrẹkẹ; iwọ si ká ehin awọn enia buburu.

⁸ Ti Oluwa ni igbala: ibukún rẹ si mbẹ lara awọn enia rẹ.