Tíit 3 - Eka Eswhī

Páʼ epuɔ Yɛɛ́so é pɔŋteé á lenāŋ épúp

¹ Kímte á mbū epuɔ Yɛɛ́so metsem ŋ́gɛ, pɔ́ pɔŋteé á lejūʼ nchu wɔ sáʼ‑alāʼ, ńchu wɔ tɛ́ne‑alāʼ, ŋ́ghʉ̄ ajū mīi pɔ́ é si nzɛ́ttɛ. Ŋ́gɔ́ efʉʼ metsem, ntshí á leghʉ mefaʼ membɔŋ.

² Ŋ́gɛ, ndɛ́ʼ pɔ́ zɔ á ŋiŋ. Ŋ́gɛ pɔ́ epá mentsaŋ, ńtswī áa atswhī mbɔŋ á mbū epuɔ. Ŋ́gɔ́ epuɔ pīi pɔ́ é efʉʼ metsem, ḿbwɛ́ne á mbū epuɔ metsem.

³ Á lɛ amɔ̄ʼ afʉʼ, ḿpɛ gɔ́ wɔ ghʉ‑anu té sáŋ, ŋ́gɔ́ wɔ tʉɛ‑athū á mbū Ndém, ńnɔŋ efā nzhɛ. Mbɔ ntií ntiī ekwaŋte, mbɔɔ leziŋ páʼ mbé nnɛ̄t e é si ndʉ́ɛ́, e lē mbú njhʉ́ á yímpɛ. Ḿpɛ nɔŋ nzáa esɔ̄, ńnɔŋ esʉ́ɛ́ etsō epuɔ. Ńnɔŋ ŋghʉ̄ɛ mɛ́ paa á yímpɛ, ńnɔŋ mbānɛ mennɛ̄t mímpɛ.

⁴ Táʼ, Ndém, Ŋghʉɛ‑mɛ́‑tswɛ́t yímpɛ, á tswi apɔŋɔ́ ntē zí, mbɔɔ ŋkɔŋ zi ánɛ epuɔ menɔŋ,

⁵ ŋ́ghʉ̄ ḿpɛ etswɛ́t. A te gē eghʉ épúp, éfhó ánɛ mefaʼ membɔŋ mīi, ḿpɛ méŋwɛ̄t é lɔkɔ á ndeŋ ndeŋ ŋghʉ̄ɛ ɛ́. A le gē eghʉ épúp, éfhó ánɛ atsāmezeŋɛ zí zīi, a wɛɛ̄ ánɛ pímpɛ. A le fhó ánɛ páʼ a le sōk mefa mímpɛ, ńzápa ánɛ Azwakne Ndém, ŋ́ghʉ̄ ḿpɛ cʉ́ʼ epuɔ meswhī.

⁶ Ndém a le zapá ánɛ Yɛɛ́so Klísto, Ŋghʉɛ‑mɛ́‑tswɛ́t yímpɛ, éfūʼte Azwakne mɛ́t ánɛ pímpɛ té ndhʉ.

⁷ Ndém a lɛ́ ŋghʉ̄ɛ épúp páʼā, ŋ́gɛ ḿpɛ efhó ánɛ apɔŋɔ́ ntē te ndhʉ zí, ńcʉ́ʼ epuɔ ndeŋ ndeŋ, éfú ntā á lezēŋ yí, páʼ ḿpɛ gɛ nzwíʼtɛ épúp.

⁸ Anu zīi meŋ fhɔ́ɔ mé eshuúŋ wu lā, á ajʉʼ éwú, ŋ́gɔ́ épúp. Meŋ mbīiŋ nnɔ̄ŋ ŋkɔ̄ŋɔ ŋ́gɛ, o etswiʼne eshúŋ, ńzéŋ eshúŋ á mbū epuɔ, tɛ́ epuɔ metsem pīi, pɔ́ le fɛ́ nnɛ̄t ŋgyá á mbū Ndém, e etswiʼne nnéŋ á athū zɔ́p, á leghʉ mefaʼ membɔŋ, ńdɔk ŋgʉ̄ɔ mé mvhɔ. A egɔ́ épúp, ajū mīi o zíʼnɛ, a egɔ́ mbɔŋ, ńtswíte epuɔ metsem.

⁹ Pá aŋak ánɛ anu te methū, ḿbá menu ánɛ ndhu te mi wɔ maŋgānjʉʼ, ḿbá á letɔʼne ashuŋne, ḿbá meswaáŋ eshuŋne ánɛ mbé Ndém. Emuɔ menu mɛ́t é gɔ́ áa menu te athū, ḿbiŋ ŋgɔ́ éyi, é gɔ le ŋiŋ tswíte.

¹⁰ Ŋiŋ a nɔŋ mmāʼa mekɔŋ asɔpne ánɛ alúŋ epuɔ Yɛɛ́so, o etswɛ̄te á yí mvhɔ legʉɔ, á gɔ te júʼ, ńtswɛ̄te á yí ánɛ mbáte epīa, á gɔ te júʼ, o efhó á nnɔ efók á yí.

¹¹ O elɛ nzhɛ́ á légɛ, ntií ŋiŋ jʉɔ mɛ́t, a lē mbú efhó ánɛ mɛnzhɛ Ndém ntó, ŋ́gɔ́ á ŋgaŋ mefa. Yí méŋwɛ̄t a á si mbíɛ́ eyi kwáŋ atʉɛ́, ńnéŋɛ á ntɔ̄ŋ yí.

Atsaʼte mbɔɔ ntekné á lelɔk nzōko

¹² Meŋ ndɛ ntó á Aatemas ká Tishik á mbū wu, o elɛ ŋkāk ete ntswɛ́tte á gá á tésɔŋ Nikopolis. A á si ŋgɔ́ á tésɔŋ yīi, meŋ á kɔŋ á gá á lenāŋ éwú efʉʼ mbeŋ.

¹³ Lɛ ntswíte á Zenas á mbɔŋɔ́, á ntɔk‑nzem epuɔ á mvhɔ asāʼ, ánɛ leziŋ yi. Ńzéŋ ntswíte á Apolos tɛ pɔ́ é le kó á mɛnzhɛ leziŋ, ḿbúŋ azō ɔ́.

¹⁴ Zíʼne epuɔ pímpɛ á nzem Yɛɛ́so, á lenēŋ athū ŋghʉ̄ mefaʼ membɔŋ, ńdɔk ntswíte epuɔ pīi, anu á tshí ánɛ pɔ́p. Púp, ńdɔk ŋgɔ́ á athʉ́ zīi á zeém ntá.

¹⁵ Epuɔ Yɛɛ́so metsem pīi, pek a pɔ́p é ega, é si ntsāʼtɛ á wú. Tsaʼte epuɔ Yɛɛ́so metsem pīi, pɔ́ kɔɔ̄ŋ á wɔ́kɔ. Ŋ́gɛ Ndém a elɛ ŋghʉ̄ anu mbɔŋ té ndhʉ, ánɛ pɛ metsem.