Tíit 2 - Eka Eswhī

Anu zīi Tíit a pɔŋteé á lezīʼne á mbū mezwiŋ epuɔ

¹ Ŋ́ké ŋgɔ́ mé wu, mbɔ o pɔŋteé á lezīʼne epuɔ anu ánɛ Yɛɛ́so ndeŋ ndeŋ.

² Zíʼne á mbū mezwiŋ epuɔ ŋ́gɛ, pɔ́ pɔŋteé á leghʉ akɔ̄ lɛ́, ŋ́kuʼne kuʼne. Ŋ́gɛ pɔ́ pɔŋteé á leghʉ, tɛ mɛ́ wuʼte á wɔ́p efʉʼ metsem. Ŋ́gɔ́ epuɔ pīi pɔ́ saáŋ anu, tɛ́ ŋghʉ̄. Ŋ́gɔ́ epuɔ pīi pɔ́ kwaāʼ efɛ́ nnɛ̄t zɔp ŋgyá á mbū Yɛɛ́so. Ŋ́gɔ́ epuɔ pīi pɔ́ kɔɔ̄ŋ epuɔ tɛ ntsékne. Ŋ́gɔ́ efʉʼ metsem, ŋ́kāk ete á leziŋ á nzem Ndém.

³ Ndeŋ ndeŋ épúp, zíʼne á mbū wɔnzwí pīi pɔ́ é tswhí á légɛ, pɔ́ pɔŋteé á lenāŋ páʼ, Ndém a á si ŋkɔ̄ŋɔ. Ndɛ́ʼ pɔ́ sɛ́ʼ epuɔ, ndɛ́ʼ pɔ́ néŋ nnɛ̄t zɔp ánɛ meluʼ. Á mbɔŋ ŋ́gɛ pɔ́ ezíʼne epuɔ atswhī mbɔŋ.

⁴ Pɔ́ ezíʼne wɔnzwí pīi pɔ́ zɛɛ́t ndāa ŋgyā á lekɔŋ melō pɔ́p, mbɔɔ ewɔŋkhʉ̄ pɔ́p.

⁵ Ńzíʼne á wɔ́p á leghʉ akɔ̄ lɛ́ ŋkuʼne kuʼne. Á legɔ̄ wɔnzwí pīi, awɔ́ lɛ́ a zhɛɛ́ áa ndaʼ ndō yi. Á legɔ̄ wɔnzwí pīi, pɔ́ tuŋneé ŋgyā zɔp. Á legɔ̄ wɔnzwí pīi, pɔ́ wɛɛ̄ atswhī mbɔŋ. Éwɔnzwí pīi pɔ́ nɔɔ̄ŋ nnɛ̄t á esī á mvhɔ melō pɔ́p. Pɔ́ egɔ́ ntií epuɔ jʉɔ mɛ́t, tɛ́ ŋiŋ a á le ashuŋne Ndém wák.

Anu zīi Tíit a pɔŋteé á lezīʼne á mbū ŋgwɛso

⁶ Zéŋɛ nzíʼne epɔ̄ ŋgwɛso azɔ́p, á lesāŋ anu tɛ́ ŋghʉ̄.

⁷ Tɛ á láʼa ŋgɔ́ á akɔ̄ lɛ́. Gɔ́ efʉʼ metsem, ŋgɔ́ á ŋiŋ yīi, mɛ́ gɔ epɛ́ efʉʼ á leghʉ mefaʼ membɔŋ ánɛ yí. Ajū mīi o zíʼnɛ epuɔ, a egɔ́ á kwaʼ azi, Ndém a á si ŋkɔ̄ŋɔ. O piŋ ŋgē ezíʼne, ńzhɛ́ ajū mīi o zíʼnɛ.

⁸ Ashuŋne jú a egɔ́ ndeŋ ndeŋ, áshuŋne zīi mɛ́ gɔ le éwú ŋak. Tɛ́ epuɔ pīi é lʉʼɛ á levēŋ anu Yɛɛ́so, é le jʉ́ɔ anu tepɔŋ zīi, pɔ́ gɔ eshúŋ ánɛ pímpɛ ɛ́, ńcʉ́ʼɛ ntāpne tapne.

Anu zīi Tíit a pɔŋteé á lezīʼne á mbū meŋkwa

⁹ Lé á mbū meŋkwa ŋ́gɛ, pɔ́ pɔŋteé á lejūʼ nchu memɔʼɔ́ pɔ́p, ánɛ ajūɔ tsem. Ŋ́gɛ pɔ́ eghʉ̄ afaʼ, tɛ a epɔ̄ŋ memɔʼɔ́ pɔ́p. Ḿbá á wɔ́p á lelʉʼ anu, á nchu pɔ́p.

¹⁰ Ŋ́gɛ ndɛ́ʼ pɔ́ jʉ etsō memɔʼɔ́ pɔ́p. A cʉ́ʼɛ épúp, pɔ́ gɔ́ efʉʼ metsem, ńtswī á légɛ, pɔ́ é epuɔ pīi, mɛ́ gɔ etém nzem ŋgyá mé pɔ́p. Pɔ́ eghʉ̄ épúp, tɛ́ epuɔ e wuʼte ashuŋne zīi, ḿpɛ ezíʼnɛ ánɛ Ndém yímpɛ, Ŋghʉɛ‑mɛ́‑tswɛ́t, ńnáte.

Alāʼ zīi á azi Ndém

¹¹ Epuɔ Yɛɛ́so e ezīŋ páʼ meŋ á lé lā, melaʼ mīi Ndém a ke tswī á mbū epuɔ menɔŋ ntsem á légɛ, yí é si ŋgɔ́ á ŋiŋ mbɔŋ té mmɔʼ, ŋ́kūʼ á yí á leghʉ, ŋiŋ tsem á tswɛ́t.

¹² Ńtswī á yímpɛ épúp páʼā, ńdɔkɔ eshúŋɔ á yímpɛ ŋ́gɛ, ḿpɛ pɔŋteé á lewāʼ atʉɛ́‑athū zímpɛ, ńzéŋ ŋgwáʼ akwaŋte zīi, á ghʉɛ, ḿpɛ tshíɛ ntē yímpɛ ánɛ tsitsi ŋgɔŋ wuɔ. Ŋ́gwáʼ épúp, ńcʉ́ʼɛ ndɔ̄kɔ áa azhɛ̄‑anu, mbɔɔ ndeŋ ndeŋ, mbɔɔ leziŋ páʼ Ndém a á si ŋkɔ̄ŋɔ, tɛ́ nnáŋa á ŋgɔŋ ega ayáʼa.

¹³ Pɛ enáŋ épúp, ńdɔk nzwíʼte á mbɔŋ ajū mīi, ḿpɛ é si nzhɛ́ɛ á légɛ ḿpɛ e láʼ ewɛ. Ńdɔk nzwíʼte aleʼé zīi, Yɛɛ́so Klísto kwaʼ Ndém yímpɛ, ŋ́gɔ́ á Ŋghʉɛ‑mɛ́‑tswɛ́t, a a ghʉ, ḿpɛ e etshí lezēk ánɛ shʉ́shɔ́k yi.

¹⁴ A le puú ŋgyá athū nnɛ̄t zí, ńdɔk ncūʼ á yímpɛ ánɛ mefa mímpɛ ntsem, ńzéŋ ndɔk ésōk mefa ánɛ pímpɛ, tɛ ḿpɛ cʉ́ʼ á kwaʼ alāʼ zí. Álāʼ zīi, nzi leghʉ anu mbɔŋ e zaáŋ á wɔ́p.

¹⁵ Á páʼa ŋgɔ́ páʼ o pɔŋteé á leshūŋ épúp. Ŋ́gē eshúŋne elɔk esemte epuɔ, ká á lelɔk ncɔ́k á ŋiŋ, ńdɔ̄k mete Ndém. Te cʉ́ʼ ŋiŋ á wák á wú.