Tíit 1 - Eka Eswhī

Atsaʼte

¹ Meŋ Pɔ́ɔl ŋgaŋ afaʼ Ndém, ŋ́gɔ́ á nziŋ‑ntō Yɛɛ́so Klísto, á leghʉ epuɔ pīi Ndém a le tsɔ́ʼ á wɔ́p, é fɛ́ nnɛ̄t ŋgyá á mbū yí, mbɔɔ á leghʉ pɔ́ zhɛ́ anuúnē ánɛ Yɛɛ́so, ńdɔk nnáŋ páʼ Ndém a á si ŋkɔ̄ŋɔ.

² Ŋ́gē enáŋ épúp, ńnɔŋ nzwíʼtɛ á lefū ntā á lezēŋ Ndém, páʼ a le laʼnē épúp, tɛ nzɛ́t áa te nɔŋ ŋgɔŋ. Ndém mɛ́t a te láte.

³ Njhʉ̄ e le náŋ tɛ ŋkūʼ, Ndém á zápa ánɛ ŋke yīi, a le tsekné mé meŋ, ŋ́ghʉ̄ mɛ́ zhɛ́ ashuŋne zí. Yí Ndém yímpɛ, Ŋghʉɛ‑mɛ́‑tswɛ́t, a le tswī me meŋ ŋ́gɛ, meŋ egʉɔ eshúŋ emɔ̄ʼ epuɔ anu zí.

⁴ Meŋ tíi páʼa, á mbū wu Tíit, kwaʼ méŋ ga, á nzem Yɛɛ́so, á ŋiŋ yīi pɔkɔ fɛɛ́ nnɛ̄t ŋgyá á mbū yí. Ŋ́gɛ Ndém Mɔʼɔ́, mbɔɔ Yɛɛ́so Klísto Ŋghʉɛ‑mɛ́‑tswɛ́t, e elɛ ŋghʉ̄ anu mbɔŋ té ndhʉ, á mbū wu, ŋ́ghʉ̄ o enáŋ mé apwɛne.

Páʼ Tíit a a tɛ́ne alúŋ epuɔ Yɛɛ́so épúp, á ŋgɔŋ Klɛt

⁵ Meŋ ndɛɛ́ ntshiɛ á wú néŋɛ á ŋgɔŋ Klɛt páʼā, ŋ́gɛ o ezɛ́t éwú mmākne á lepʉ̄ʼte afaʼ. Ńzéŋɛ efāʼa ŋ́gɛ, o efhó ánɛ menu mīi meŋ ke ziʼné á wú, ŋgʉ̄ɔ ánɛ ewiɛ́ tésɔŋ lɛ́, ńnéŋ epɔ̄ melʉɛ éwú.

⁶ Á pɔŋ ŋ́gɛ ewiɛ́ mɔ́ ndʉɛ lɛ́ yīi, o gɔ á nnéŋ á yí, a egɔ́ á ŋiŋ yīi, mɛ́ té si ndāʼa á yí í. Ŋ́gɔ́ á ŋiŋ yīi, a wɛɛ̄ áa taʼ menzwí. Ewɔŋkhʉ̄ pí é gɔ́ epuɔ pīi, pɔ́ fɛɛ́ nnɛ̄t ŋgyá á mbū Yɛɛ́so, éwɔŋkhʉ̄ pīi meziŋɛ́ mɔ́p é mbɔŋ, éwɔŋkhʉ̄ pīi pɔ́ juúʼ nchu memɔʼɔ́ pɔ́p.

⁷ Á mbɔŋ ŋ́gɛ, ntshi‑mvhɔ ánɛ alúŋ epuɔ Yɛɛ́so, á egɔ́ á ŋiŋ yīi, mɛ́ té si ndāʼa á yí í, melaʼ mīi a á si ŋgɔ́ á ŋiŋ yīi, a cʉtɛ mefaʼ Ndém. Ndɛ́ʼ á gɔ́ á ŋgaŋ aŋaʼne. Ndɛ́ʼ á gɔ́ ŋiŋ yīi, á gákne nzáŋ á lɔ́ŋ. Ndɛ́ʼ á gɔ́ núnú‑meluʼ. Ndɛ́ʼ á gɔ́ á ndhʉ‑mekwɛt. Ndɛ́ʼ á gɔ́ á ŋiŋ yīi, a fʉteē epuɔ tɛ́ ndɔk ŋgwɛ̄ ŋkāp.

⁸ Á mbɔŋ ŋ́gɛ a egɔ́ á ŋiŋ yīi, a zhɛɛ́ á lekōkne epuɔ. Ŋ́gɔ́ á ŋiŋ yīi a kɔɔ̄ŋ á leghʉ ajū mīi, á mbɔŋ. Ŋ́gɔ́ á ŋiŋ yīi, a saáŋ anu tɛ ŋghʉ̄. Ŋ́gɔ́ á ŋiŋ ndeŋ ndeŋ, á ŋiŋ yīi a á ŋiŋ Ndém. Ŋ́gɔ́ á ŋiŋ yīi, a zhɛɛ́ á lekūʼte mbe nnɛ̄t zi.

⁹ Á mbɔŋ ŋ́gɛ a egɔ́ á ŋiŋ yīi, a neéŋ athū zí ánɛ ŋke mbɔŋ páʼ mɛ́ pɔɔ́ŋ á levēŋ, páʼ ḿpɛ zíʼnɛ ndeŋ ndeŋ épúp. Mɛ́ pɔŋteé á lenēŋ ntē, ánɛ ŋke mbɔŋ mɛ́t. A ghʉɛ épúp, mbɔ a gɔ ekūʼ á yí á lezīʼne epuɔ menu, ánɛ Yɛɛ́so. Ŋ́kūʼ á yí á letswi á légɛ, ashuŋne wɔ piŋne‑ŋke mbɔŋ, á gɔ́ áa anu tɛ athū.

Wɔ zíʼne‑anu zīi á té anu ú

¹⁰ Epuɔ tɛ nzáne, éwɔ teē‑athū, ŋ́gɔ́ éwɔ shúŋ‑anu té methū, ńdɔk mbɔ̄pte emɔ̄ʼ epuɔ. Mɛ́ tswhiī njʉ́ɔ ntií epuɔ jʉɔ mɛ́t, á nnɔ epuɔ Yúda pīi, pɔ́ le ncʉ́ʼ epuɔ Yɛɛ́so.

¹¹ Á si nzɛ́ttɛ ŋ́gɛ, o etsɛ́t nchu wɔ́p, melaʼ mīi pɔ́ é si ndɔ̄kɔ anu zīi pɔ́ zíʼnɛ epuɔ, ńtáktɛ atʉtʉ metseŋ ŋgyā. Ńzíʼnɛ anu zīi mɛ́ té pɔŋté á lezīʼne epuɔ ɔ́, ńdɔkɔ efāʼa ŋkāp.

¹² Mmɔʼ ŋiŋ a le fhó á nnɔ epuɔ Klɛt mɛ́t, ŋ́gɔ́ á ŋkém lʉɔ́ʼ, ńdé ŋ́gɛ: «Epuɔ Klɛt é gɔ́ áa wɔ táŋ‑mela efʉʼ metsem, ŋ́gɔ́ epiá‑mena, ŋ́gɔ́ melɔ́ŋ, ńdɛ ŋkɔ̄ŋ áa á wɔ́p á lepfɛ̄t azō. »

¹³ Anu zīi ŋkém lʉɔ́ʼ wuɔ mɛ́t a le léē, á gɔ́ áa anuúnē. Melaʼ épúp tɛ́, o pɔŋteé á lelɔk á lɔ́ŋ, tɛ́ eshúŋne á mbū pɔ́p efʉʼ metsem, ńzhɛ́ páʼ pɔ́ é kwaʼ efɛ́ nnɛ̄t eyá mé Yɛɛ́so.

¹⁴ Shúŋne á mbū pɔ́p, tɛ pɔ́ epíʼte menu mīi, epuɔ Yúda é yíŋtɛ, ŋ́gwáʼ, mbɔɔ mbé mīi epuɔ menɔŋ pīi, pɔ́ le fhó ánɛ anuúnē ntó, é néŋɛ.

¹⁵ Ajūɔ tsem á mbɔŋ, á mbū epuɔ pīi pɔ́ wɛɛ̄ ntē mbɔŋ, á mvhɔ Ndém. Ḿbiŋ ŋgɔ́ á mbū epuɔ pīi, epe é lē mpféŋ á wɔ́p, épuɔ pīi pɔ́ lʉʉ̄ʼ á wɔ́p á lefɛ̄ nnɛ̄t ŋgyá á mbū Yɛɛ́so, mbɔ ajūɔ mbɔŋ, á té mbū pɔ́p ɔ́, á cʉ́ʼɛ épúp, mbɔ akwaŋte zɔ́p á efʉʼ metsem, ńtshí áa leghʉ anu tepɔŋ, leghi tsɔ́p é zéŋ ntshí áa leghʉ anu tepɔŋ.

¹⁶ Pɔ́ é efʉʼ metsem, ḿvéŋ ŋ́gɛ pɔ́ é si nzhɛ́ɛ á Ndém. Efʉʉ́ʼ‑enu tsɔ́p, é piŋ nnɔ̄ŋ ntswī á légɛ pɔ́ té á yí zhɛ́. Pɔ́ ghʉʉ̄ ajū mīi mɛ́ e tóne á wɔ́p tóne, ŋ́gɔ́ megaŋ atʉɛ́‑athū á mbū Ndém, ŋ́gɔ́ epuɔ pīi, é zi te kūʼ á leghʉ anu mbɔŋ ɔ́.