Menjʉɔ te lí 9 - Eka Eswhī

¹ Cɔʼ Ndém mbáte táa, á tɔ́ŋ ezi ntaŋ, meŋ jʉ́ɔ taʼ cɔʼ saŋ á fhó á lephū ŋgwhʉ̄ á esī atsetsáʼ, mɛ́ yá á kí á lelɔk ntsɔ́ʼ nchu apeŋte, á mbū yí.

² Cɔʼ saŋ mɛ́t, á tsɔ́ʼ nchu apeŋte mɛ́t, ŋghī mmók é fhó éwú ŋkɔ́ʼ páʼ, ezi é kɔ́ʼɔ ánɛ mía mía lekʉŋ yīi, a tshií ánɛ mía mmók lā. Ŋ́kɔ́ʼ épúp, ŋ́kápte lezēk nu, ejʉʼ é pú eséŋ lɛ cʉʉ́ʉ́.

³ Ŋgím é fhó á ntē ŋghī mɛ́t ntó, ḿbú njhʉ́ ŋgɔŋ esī atsetsáʼ. Mɛ́ yá mete á mbū pɔ́p, á lelɔk ntsók epuɔ, páʼ meŋgá esī é ndo esī atsetsáʼ, ńtsókte epuɔ lā.

⁴ Mɛ́ tswi á mbū pɔ́p ŋ́gɛ, ndɛ́ʼ pɔ́ ghʉ anu tepɔŋ ánɛ mvēŋ á ndo esī atsetsáʼ, tɛ mbɔɔ ánɛ methʉ́, tɛ ŋkó azō tsem zīi á eswī. Ŋ́gɛ pɔ́ enéŋ ŋgʉɔ̄ʼ áa ánɛ epuɔ menɔŋ pīi, ayiŋne Ndém á té á mvhɔ eshhʉ̄ pɔ́p ɔ́.

⁵ Mɛ́ té tswī á mbū ŋgím mɛ́t ŋ́gɛ, pɔ́ ezwhíte epuɔ mɛ́t ɛ́. Mɛ́ tswi ŋghʉ̄ áa lɛ, pɔ́ enéŋ ŋgeŋge á athū pɔ́p, tɛ a eláʼ ŋgɔ́ mesaŋ métáa. Ŋgeŋge zīi, pɔ́ néŋɛ á athū pɔ́p, é gɔ́ páʼ ŋgeŋge zīi, ŋiŋ a kúɔ́ éwú, á afʉʼ zīi ŋgá esī, e é tsók á yí lā.

⁶ Á láʼ egɔ́ ánɛ meleʼé mɛ́t, epuɔ menɔŋ e efāʼ meshhʉ̄ á lelɔk ŋkwhʉ́, épiŋ le jʉɔ́, ésé á wɔ́p á lekwhʉ̄, lewhʉ̄ a epiŋ ŋkʉ̄ á wɔ́p kʉʉ.

⁷ Ŋgím mɛ́t é gɔ́ páʼ melʉ́ɔ́ pīi, mɛ́ mbɛ́tte á lelɔk ndʉɔ́ʼ ncu lā. Ethū tsɔ́p é gɔ́ páʼ, pɔ́ ntɔ̄ʼ acɔʼ lefɔ, mɛ́ lɔk á gɔ́ɔl tɛ́ ncūŋte lā. Alá eshhʉ̄ zɔ́p á gɔ́ páʼ, alá eshhʉ̄ epuɔ menɔŋ lā.

⁸ Ntsɔʼ zɔp é gɔ́ páʼ, ntsɔʼ menzwí lā. Mesɔŋ mɔ́p é gɔ́ páʼ, mesɔŋ njhʉnjhʉ meŋgēm lā.

⁹ Agaŋne zɔ́p á gɔ́ páʼ, kʉ́ʼɛ́ ncu a pɛnneé éwú, mɛ́ lɔk atʉɛ́ tɛ́ ncūŋte lā. Pɔ́ nɔŋ ŋghíɛ, membap mɔ́p é zwɛnnɛ páʼ ŋghi mekéléek ncu pīi, melʉ́ɔ́ tɛ nzánɛ é si eshuŋɔ ndɔ̄kɔ ŋgʉ̄ɔ mé ndʉɔ́ʼ ncu lā.

¹⁰ Pɔ́ wɛ esáŋ, eseŋ é gɔ́ éwú páʼ esáŋ meŋgá esī lā. Mete á lelɔk mmāʼ ŋgeŋge á athū epuɔ menɔŋ, tɛ á gɔ́ mesaŋ métáa, é gɔ́ á ntē asáŋ zɔ́p mɛ́t.

¹¹ Efɔ wɔp á gɔ́ cɔʼ Sɛ́ta, lezēŋ tsí é gɔ́ lɛ Abadɔŋ mé ashuŋne Eble, ŋ́gɔ́ lɛ Apoliɔŋ mé ashuŋne Glɛk. Abadɔŋ ká Apoliɔŋ á si ndɔ̄kɔ ndʉ́ɛ́ ŋ́gɛ, Ŋgaŋ‑Atāk.

¹² Mvhɔ ŋgʉɔ̄ʼ é tɔ́k, emɔ̄ʼ meŋgʉɔ̄ʼ mɛ́mbīa é zéŋ nzɛ́t ŋgɔ̄ á eshʉʼɛ̄.

¹³ Cɔʼ Ndém mbáte ntokó, á tɔ́ŋ ezi ntaŋ. Meŋ júʼ emɔ̄ʼ ŋghi, é fhó ánɛ meshhʉ̄ lekua, á ajʉʼ nnɔɔ́ŋ‑epɔʼ zīi, á mvhɔ Ndém, mɛ́ lɔk a gɔ́ɔl tɛ́ ncūŋte.

¹⁴ Ŋghi mɛ́t, é lé mé cɔʼ Ndém mbáte ntokó yīi, a á ŋgwɛ̄ ntaŋ ŋ́gɛ: «Kɛ́ʼɛ mecɔʼ Sɛ́ta lekua pīi, mɛ́ lē ndɔk metsyɛ́ɛn ŋkwɛ́t á wɔ́p, pɔ́ gɔ́ á legʉ̄ŋ mía ntshi yīi mɛ́ tɔ́ŋɔ lɛ, Eflat. »

¹⁵ Mɛ́ kɛ́ʼɛ mecɔʼ Sɛ́ta mɛ́t lekua, mbɔ Ndém a le pɛtté á wɔ́p, ńdɔk nzwíʼte á afʉʼ zīi, pɔ́ e zwhíte á taʼ nzhɛ, ánɛ epuɔ ŋgɔŋ ntsem pīi, pɔ́ é gapte nnɛ̄t nzhɛ tɛ́t. Pɔ́ tshí, ńnɔŋ nzwíʼtɛ ŋguʼ mɛ́t, ńnɔŋ nzwíʼtɛ á saŋ mɛ́t, ńnɔŋ nzwíʼtɛ aleʼé mɛ́t, ńnɔŋ nzwíʼtɛ njhʉ̄ mɛ́t.

¹⁶ Meŋ júʼ mɛ́ shúŋ á gá ŋ́gɛ, nzwiŋ wɔ lʉɔ́ʼɔ pīi, pɔ́ lɔkɔ melʉ́ɔ́ nzīŋɛ, é ncuʼ ŋkhʉ pīa.

¹⁷ Meŋ ndɛ á ntē njʉ́ɔ te lí za mɛ́t, ńjʉ́ɔ melʉ́ɔ́, epuɔ pīi pɔ́ naŋteé éwú, é zwík mekʉ́ʼɛ́ ncu, é paŋ páʼ mmók lā, éséŋne páʼ mmɔʼ tɔ́ yīi a teē nzwiŋ lā. Éfókne páʼ meka lā. Ethū melʉ́ɔ́ é gɔ́ páʼ, ethū menjʉnjhʉ meŋgēm lā. Mmók mbɔɔ ŋghī pɔ́ meka, é nɔŋ efhɔ́ɔ á nchu pɔ́p ntúɔ́.

¹⁸ Mmók mbɔɔ ŋghī pɔ́ meka, écū mwɔ̄ tsɛ́ tɛ́t tsīi, é le fhó á nchu melʉ́ɔ́ ntó, é le nɔ̄ŋ mmaʼa ŋgʉɔ̄ʼ ánɛ epuɔ, ḿbík á taʼ nzhɛ, ánɛ epuɔ ŋgɔŋ ntsem pīi, pɔ́ é gap nnɛ̄t nzhɛ tɛ́t.

¹⁹ Melaʼ mīi, mete melʉ́ɔ́ é lɛ á nchu pɔ́p, ńzéŋ ŋgɔ́ ánɛ esáŋ tsɔ́p. Á gɔ́ páʼ esáŋ tsɔ́p é lɛ páʼ menū lā, ŋ́gwɛ̄ methū, ńzéŋ nnɔŋ ndɔ̄kɔ etsiɛ́ mmāʼa ŋgʉɔ̄ʼ ánɛ epuɔ.

²⁰ Ŋ́gɔ́ mé avuʼ epuɔ menɔŋ, épuɔ pīi meŋgʉɔ̄ʼ mwɔ̄ mɛ́ntɛ́t, é lɛ te á wɔ́p zwhí lā, pɔ́ lɛ te gɔ̄ nnɛ̄t zɔp, ńtó ánɛ melém pīi, pɔ́ le lɔ̄k mbū mɔ́p ncūŋte ɛ́. Pɔ́ le zɛ́t ntswiʼnɛ ŋgūʼtɛ áa mesī, mbɔɔ melém pīi, pɔ́ le lɔ̄k á gɔ́ɔl ká atʉɛ́ ŋkāp, ká mmɔʼ ntií atʉɛ́, ká metɔ́, ká methʉ́ tɛ́ ncūŋte. Melém puɔ mɛ́t, é gɔ le kūʼ á lejʉ̄ɔ ejʉʼ ɛ́, pɔ́ le kūʼ á lejūʼ ejʉʼ ɛ́, ńzéŋ le kūʼ á leziŋ ɛ́.

²¹ Pɔ́ té gɔ̄ nnɛ̄t zɔp, ńtshī á lezwhīte epuɔ néŋ, ńtó ánɛ lekaŋ, ńtó ánɛ agā, ńtó ánɛ etsɔ́ŋ ɔ́.