Menjʉɔ te lí 8 - Eka Eswhī

Mɔ́ Njʉnjhʉ a á ega ŋŋɛ́ʼɛ elɛ ánɛ ajʉʼ mbáte esambīa

¹ Mɔ́ Njʉnjhʉ á ŋɛ́ʼɛ elɛ, ánɛ ajʉʼ mbáte esambīa, ejʉʼ é pú ŋkwhʉ́ á athʉ́ lephū lɛ léḿḿḿ, tɛ ŋgɔ́ ajūɔ atsém njhʉ̄.

² Meŋ jʉ́ɔ mecɔʼ Ndém esambīa pīi, é gɛ ntshítɛ á mvhɔ yí, mɛ́ yá mentaŋ esambīa á mbū pɔ́p.

³ Mmɔʼ cɔʼ Ndém, á shʉʼ ntshí á lezēŋ ajʉʼ nnɔɔ̄ŋ‑epɔʼ, ŋ́gwɛ̄ á atūʼ, mɛ́ lɔk á gɔ́ɔl tɛ́ ncūŋte, á gɔ́ á lelɔk ntɔ̄ á aŋsaŋ. Mɛ́ yá alamńda á mbū yí tɛ á zá, á púte meswiŋte epuɔ Ndém ntsem éwú, ńtɔ̄ ánɛ ajʉʼɛ nnɔɔ́ŋ‑epɔʼ, mɛ́ lɔk á gɔ́ɔl tɛ́ ncūŋte. Ńtɔ̄ épúp, á mvhɔ akɔʼ lefɔ, ńdɔk ŋgūʼte á Ndém.

⁴ Ŋghī alamńda pɔ́ meswiŋte epuɔ Ndém, é fhó á mbū cɔʼ Ndém, ŋ́kɔ́ʼ mé mvhɔ Ndém.

⁵ Cɔʼ Ndém á lɛ ntswíʼ atūʼ á lelɔk ntɔ̄ á aŋsaŋ, éfhó á ajʉʼɛ nnɔɔ́ŋ‑epɔʼ, ḿbɛ́ mmók nnéŋ éwú tɛ é ló, ḿmāʼ á ndo esī atsetsáʼ. Mɛ́ lɛ njúʼ lefaŋ á levɛ̄tte, ńjúʼ meŋghi, ńjʉ́ɔ meŋŋí mbeŋ, esī atsetsáʼ é pú ncʉ̄ʼne.

Ŋghi mvhɔ mentaŋ ntokó

⁶ Mecɔʼ Ndém esambīa, ŋ́gwɛ̄ mentaŋ esambīa, é nɔŋ mbɛ́ttɛ nnɛ̄t efāʼa á letɔ̄ŋ.

⁷ Ŋgaŋ mvhɔ á tɔ́ŋ ezi ntaŋ. Mewɛ pɔ́ mmók, éswāŋte ánɛ metshi, é whʉ á ndo esī atsetsáʼ. Ndo esī atsetsáʼ é gap nnɛ̄t nzhɛ tɛ́t, taʼ nzhɛ á pú eshhʉ́. Taʼ nzhɛ methʉ́ á pú eshhʉ́. Mvēŋ eswī ntsem é pú eshhʉ́ azí.

⁸ Cɔʼ Ndém mbáte pīa á tɔ́ŋ ezi ntaŋ. Mɛ́ maʼ emɔ̄ʼ mía azō á ntē mía ntshi, á gɔ́ páʼ mía lekwɛ̄t yīi, a á si eshhʉ́ɛ lā. Mía ntshi á gap nnɛ̄t nzhɛ tɛ́t, taʼ nzhɛ á sɛt nnɛ̄t ncʉ́ʼ metshi.

⁹ Ajʉɔ tsem zīi á naáŋ á ntshi, á gap nnɛ̄t nzhɛ tɛ́t, taʼ nzhɛ á pú ŋkwhʉ́. Memɛtúa ntshi é gap nnɛ̄t nzhɛ tɛ́t, taʼ nzhɛ á pú ndákne.

¹⁰ Cɔʼ Ndém mbáte tɛ́t á tɔ́ŋ ezi ntaŋ, emɔ̄ʼ mía mía cɔʼ saŋ, ńnɔŋ ŋkhʉ́ɛ páʼ ŋkaʼ yīi, mɛ́ é kók lā, á fhó á lephū ŋgwhʉ̄ ánɛ mesāʼ‑ntshi, mbɔɔ ánɛ taʼ nzhɛ ntshi, mbɔ ntshi é gap nnɛ̄t nzhɛ ntɛ́t.

¹¹ Lezēŋ cɔʼ saŋ mɛ́t é gɔ́ lɛ Absɛŋte, ńdɔkɔ ŋ́gɛ awhiɛ́‑mecɔp. Taʼ nzhɛ ntshi mɛ́t á cʉ́ʼɛ ŋgwhī gwhii. Epuɔ tɛ nzáne pīi pɔ́ é nú, é kwhʉ́te, melaʼ mīi é le gɔ́ mbɔ é cʉ́ʼ mecɔp.

¹² Cɔʼ Ndém mbáte lekua á tɔ́ŋ ezi ntaŋ, lezēk nu é gap nnɛ̄t nzhɛ tɛ́t, taʼ nzhɛ á sɛt nnɛ̄t eséŋ. Lezēk saŋ é gap nnɛ̄t nzhɛ tɛ́t, taʼ nzhɛ á sɛt nnɛ̄t eséŋ. Mecɔʼ saŋ é gap nnɛ̄t nzhɛ tɛ́t, taʼ nzhɛ á sɛt nnɛ̄t eséŋ. Taʼ, taʼ nzhɛ ánɛ meŋkaʼ muɔ mɛ́t, á pú eséŋ páʼā, ezokó é gap nnɛ̄t meleŋ njhʉ̄ nzhɛ tɛ́t, taʼ nzhɛ á sɛt nnɛ̄t eséŋ, á zéŋ ŋgɔ́ ndeŋ ndeŋ épúp ánɛ etsōʼ.

¹³ Meŋ zɛ́t ncʉ̄ cʉʉ, ńjʉ́ɔ emɔ̄ʼ gó nzwi, á nɔŋ ŋghíɛ tɛ athʉ́ léée, ńjúʼ á nɔŋ esáʼa mé ŋghi teté ŋ́gɛ: «Mecɔʼ Ndém métɛ́t, é zɛɛ́t ŋgɔ̄ á ntɔ́ŋ emɔ́p mentaŋ. Meshhʉ̄ tepɔŋ, é si ŋgɔ́ epuɔ pīi, pɔ́ naáŋ á ndo esī atsetsáʼ. Pɔ́ é meshhʉ̄ tepɔŋ, pɔ́ é si ŋgɔ́ á kwaʼ meshhʉ̄ tepɔŋ. »