Menjʉɔ te lí 7 - Eka Eswhī

Cɔʼ Ndém a á ega ntshíɛ ayiŋne á mvhɔ eshhʉ̄ epuɔ Yɛɛ́so

¹ Á tɔ́k épúp, meŋ jʉ́ɔ mecɔʼ Ndém lekua é tshíte á ajʉʼ, á ndo esī atsetsáʼ meshhʉ̄ lekua, ńnɔŋ ntɛ́nnɛ efēm lekua tsīi, é ndo esī atsetsáʼ, tɛ amɔ̄ʼ afēm á le pú ntúʼ á ndo esī atsetsáʼ ká á ndo mía ntshi, ká ánɛ methʉ́ ɛ́.

² Meŋ zéŋ njʉ́ɔ mmɔʼ cɔʼ Ndém á fhó á mbuʼ esaáʼ‑nu, ḿbē, ŋ́gwɛ̄ ajū mīi Ndém yīi, a naáŋ nte, a lɔkɔ nnéŋɛ ayiŋne. Ńnɔŋ ndʉ́ɛ́ mé ŋghi teté á mbū mecɔʼ Ndém lekua pīi, Ndém a le yá mete á mbū pɔ́p, á lelɔk mbʉ́p ndo esī atsetsáʼ mbɔɔ mía ntshi, ŋ́gɛ:

³ «Ndɛ́ʼ pɛ epʉ́p ndo esī atsetsáʼ pɔ́ mía ntshi, mbɔɔ methʉ́, té gɔ́ yīi, pek é tshí á ayiŋne á mvhɔ eshhʉ̄ wɔ júʼ‑nchu Ndém yímpɛ. »

⁴ Meŋ júʼ nzwiŋ epuɔ pīi, mɛ́ é tshí á ayiŋne ánɛ pɔ́p, pɔ́ gɔ́ ntsāʼ ŋkhʉ mé ntsāʼ ntsɔp lekua mé megēm lekua. Éfhɔ́ɔ ánɛ etseŋ ŋgyā epɔ̄ Islaɛl ntsem.

⁵ Ńdɔk ŋgɔ́ á ŋiŋnɔŋ ntsāʼ ntsɔp pīa mé legēm, ánɛ atseŋ ŋgyā Yúda, éyi mɛ́ é tshí ayiŋne ánɛ pɔ́p. Ŋ́gɔ́ á ŋiŋnɔŋ ntsāʼ ntsɔp pīa mé legēm, ánɛ atseŋ ŋgyā Lwibɛn. Ŋ́gɔ́ á ŋiŋnɔŋ ntsāʼ ntsɔp pīa mé legēm, ánɛ atseŋ ŋgyā Ŋgáad.

⁶ Ŋ́gɔ́ á ŋiŋnɔŋ ntsāʼ ntsɔp pīa mé legēm, ánɛ atseŋ ŋgyā Asɛ́ɛ. Ŋ́gɔ́ á ŋiŋnɔŋ ntsāʼ ntsɔp pīa mé legēm, ánɛ atseŋ ŋgyā Nɛftali. Ŋ́gɔ́ á ŋiŋnɔŋ ntsāʼ ntsɔp pīa mé legēm, ánɛ atseŋ ŋgyā Manase.

⁷ Ŋ́gɔ́ á ŋiŋnɔŋ ntsāʼ ntsɔp pīa mé legēm, ánɛ atseŋ ŋgyā Simeɔŋ. Ŋ́gɔ́ á ŋiŋnɔŋ ntsāʼ ntsɔp pīa mé legēm, ánɛ atseŋ ŋgyā Levi. Ŋ́gɔ́ á ŋiŋnɔŋ ntsāʼ ntsɔp pīa mé legēm, ánɛ atseŋ ŋgyā Isakáa.

⁸ Ŋ́gɔ́ á ŋiŋnɔŋ ntsāʼ ntsɔp pīa mé legēm, ánɛ atseŋ ŋgyā Zabulɔŋ. Ŋ́gɔ́ á ŋiŋnɔŋ ntsāʼ ntsɔp pīa mé legēm, ánɛ atseŋ ŋgyā Yosɛ́p. Ŋ́gɔ́ á ŋiŋnɔŋ ntsāʼ ntsɔp pīa mé legēm, ánɛ atseŋ ŋgyā Bɛnjamɛŋ, épi mɛ́ le pú ntshí ayiŋne ánɛ pɔ́p.

Alúŋ epuɔ Yɛɛ́so á si ŋgɔ́ á atʉtʉ epuɔ zīi, Ndém a le tsɔ́ʼē, éjʉʼ tsem

⁹ Ajɔ̄ mɛ́t á tɔ́k épúp, meŋ zɛ́t ncʉ̄te cʉte, ńjʉ́ɔ atʉtʉ epuɔ menɔŋ, á zá tɛ ŋgɔ́ yīi, ŋiŋ a gɔ le kūʼ á lesāŋ á. Éfhɔ́ɔ á ŋgɔŋ ŋgɔŋ, éfhɔ́ɔ ánɛ etseŋ ŋgyā ntsem, ánɛ elāʼ tsem, éwɔ shúŋ á ntií ntiī elāʼ. Pɔ́ pú ntshíte ajʉʼ, á mvhɔ akɔʼ lefɔ, mbɔɔ á mvhɔ Mɔ́ Njʉnjhʉ. Ḿmāʼ meféfhɔ́ menzhó, ŋ́gwɛ̄ ezāŋ menaʼ á mbū pɔ́p.

¹⁰ Ńnɔŋ esáʼa mé ŋghi teté ŋ́gɛ: «Ndém yímpɛ, ńnáŋ ánɛ akɔʼ lefɔ, mbɔɔ Mɔ́ Njʉnjhʉ, mé ghʉʉ̄ mɛ́ tswɛ́t. »

¹¹ Mecɔʼ Ndém ntsem pīi, é ntshíte ŋkɛ́nne akɔʼ lefɔ nnéŋ á esɔŋ, ŋ́kɛ́nne epɔ̄ melʉɛ, ŋ́kɛ́nne mena pwɔ̄ lekua, é tswíʼte á esī, ŋ́ŋɔ́ʼne á mvhɔ akɔʼ lefɔ, tɛ ethū tsɔ́p é pfeŋ esī, ŋ́gūʼte á Ndém.

¹² Ńnɔŋ ndʉ́ɛ́ ŋ́gɛ: «Á épúp, Ndém yímpɛ a á si ŋgɔ́ á ŋiŋ yīi, mɛ́ pɔŋteé á leyā lepɛ̄ á mbū yí, ŋ́gyá awuʼte á mbū yí. Ḿvéŋ á légɛ a á ŋgaŋ azhɛ̄‑anu, ésyákne á yí, ŋ́gyá mekuʼ mí. Ḿvéŋ ŋ́gɛ a á si ŋgɔ́ á ŋgaŋ mete, ŋ́gɔ́ á ŋgaŋ mbʉʼ. Ŋ́ghʉ̄ épúp, á meŋguʼ meŋguʼ. Á épúp. »

¹³ Mmɔʼ ŋiŋ á nnɔ epɔ̄ melʉɛ pwɔ̄, á tswí ashuŋne, ńzɛ́tte á gá ŋ́gɛ: «Epuɔ puɔ pīi, pɔ́ maāʼ mefhɔ́ menzhó lā, pɔ́ wɔ awɔ́, ḿbiŋɛ efhɔ́ɔ egɔ́?»

¹⁴ Meŋ tsɔ́ʼ á mbū yí ŋ́gɛ: «Ndi ga, wu mé si nzhɛ́ɛ. » Á zéŋ ndé mé meŋ ŋ́gɛ: «Pɔ́ é si ŋgɔ́ epuɔ pīi, pɔ́ fhɔ́ɔ á ntē mía mía ŋgʉɔ̄ʼ. Pɔ́ lē esok menzhó mɔ́p, ńnōʼ ánɛ metshi Mɔ́ Njʉnjhʉ, ńdɔk efók epe éwú, ŋ́gɛ e efók lɛ púúú.

¹⁵ Melaʼ épúp tɛ́ pɔ́ tshiteé á Mía Ŋgyā Ndém, á mvhɔ akɔʼ Lefɔ Ndém, ńnɔŋ ŋgyáa lepɛ á mbū yí, étsōʼ pɔ́ ezokó. Ŋiŋ yīi a naáŋ ánɛ akɔʼ lefɔ, a a shʉʼ elɔk ntap zi, ékápte á wɔ́p.

¹⁶ Nzi e é le zéŋ nzáŋ á wɔ́p ɔ́, agāk zɔ́p á le zéŋ eshhʉ́ ɛ́, nu a á le zéŋ mbáp á wɔ́p ɔ́, amɔ̄ʼ azō á le zéŋ ndō, tɛ ŋgɔ́ yīi, a gɔ etɔ̄ɔ á wɔ́p ɔ́.

¹⁷ Melaʼ mīi, Mɔ́ Njʉnjhʉ a tshií á lezēŋ akɔʼ lefɔ. A a shʉʼ egɔ́ á mpfɛnne wɔp, étsaŋ á wɔ́p elɔk egʉɔ mé lesaʼá‑ntshi tsīi, é ghʉɛ mɛ́ gɔ́ɔ éwú. Ndém a epú ntsíʼne ntshi nnēk mɔ́p. »