Menjʉɔ te lí 6 - Eka Eswhī

Mɔ́ Njʉnjhʉ a á ega ŋŋɛ́ʼtɛ elɛ ejʉʼ ntokó

¹ Á tɔ́k épúp, meŋ zéŋ njʉ́ɔ á Mɔ́ Njʉnjhʉ, á ŋɛ́ʼɛ elɛ ánɛ mvhɔ ajʉʼ ánɛ mejʉʼ mwɔ̄ esambīa. Meŋ júʼ mvhɔ na ánɛ mena pwɔ̄ lekua, á lé mé ŋghi teté ŋ́gɛ: «Shʉʼɛ̄. » Ŋghi zi é nɔŋ nzwɛ̄nɛ, páʼ ŋghi lefaŋ lā.

² Meŋ zɛ́t ncʉ̄te cʉte, ńjʉ́ɔ á féfhɔ́ lʉ́ɔ́, ŋiŋ yīi a naáŋ á ndo éwú, á wɛ á kílɛ́, mɛ́ yá acɔʼ lefɔ á mbū yí. Á lɔk ŋgɔ́ á ŋiŋ yīi a á jhʉ́ ncu. Á gʉɔ, ńzéŋɛ ŋgɔ̄ á ntswiʼne ejhʉ́.

³ Mɔ́ Njʉnjhʉ á ŋɛ́ʼɛ elɛ, ánɛ páte mémpīa ajʉʼ, meŋ njúʼ páte mémpīa na á lé ŋ́gɛ: «Shʉʼɛ̄. »

⁴ Mmɔʼ lʉ́ɔ́ á lɛ ŋŋwāk, ḿbāŋ páʼ mmók lā. Mɛ́ yá mete á mbū ŋiŋ yīi, a á nnáŋ á ndo éwú, á lelɔk efók apwɛne á ndo esī atsetsáʼ, ŋ́gɛ epuɔ menɔŋ e ezwhíte mennɛ̄t mɔ́p. Mɛ́ zéŋ ŋgyá á mía ŋŋí ncu á mbū yí.

⁵ Mɔ́ Njhʉnjhʉ á ŋɛ́ʼɛ elɛ, ánɛ páte métɛ́t ajʉʼ, meŋ njúʼ páte métɛ́t na á lé ŋ́gɛ: «Shʉʼɛ̄. » Meŋ zɛ́t ncʉ̄te cʉte, ńjʉ́ɔ mmɔʼ sɛ́h lʉ́ɔ́, ŋiŋ yīi a á nnáŋ á ndo éwú, á wɛ á kílo á mbū yí.

⁶ Meŋ júʼ azō páʼ ŋghi ŋiŋ lā, é fhó á tsetsɛlɛ mena lekua pwɔ̄, ńnɔŋ ndʉ́ɛ́ ŋ́gɛ: «Mɛ́ e lɔk ŋkāp taʼ aleʼé alāʼ afaʼ, ézó á méŋ apií lɛ́si ká méŋ apū ŋgesáŋ. Ŋgɔ́ mé mevɛ̄t pɔ́ meluʼ, ndɛ́ʼ o pfēeŋ nzwiŋ. »

⁷ Mɔ́ Njʉnjhʉ á ŋɛ́ʼɛ elɛ, ánɛ páte lekua ajʉʼ, meŋ júʼ na mbáte lekua á lé ŋ́gɛ: «Shʉʼɛ̄. »

⁸ Meŋ zɛ́t ncʉ̄te cʉte, ńjʉ́ɔ mmɔʼ lʉ́ɔ́, mbe zi é séŋne, ŋiŋ yīi a á nnáŋ éwú, lezēŋ tsí é gɔ́ lɛ Lewhʉ̄, alāʼ mepfhō, á gɔ́ á nzem yí nzhɛ̄nɛ á yí. Mɛ́ gap esī atsetsáʼ nzhɛ lekua, ŋ́gyá mete á mbū pɔ́p ánɛ taʼ nzhɛ, á lelɔk ncu mbɔɔ afʉɔne mbɔɔ megɔ, mbɔɔ egaáʼ mena mbaʼ esī atsetsáʼ, ńzwhíte epuɔ menɔŋ éwú.

⁹ Mɔ́ Njʉnjhʉ á ŋɛ́ʼɛ elɛ, ánɛ ajʉʼ mbáte táa, meŋ jʉ́ɔ egega epuɔ pīi, mɛ́ le zwhité á wɔ́p melaʼ anu Ndém, mbɔɔ melaʼ páʼ pɔ́ le nɔ̄ŋ ntswii á légɛ, pɔ́ kuʼteé á Yɛɛ́so, é gɔ́ á atseŋ ajʉʼ nnɔɔ̄ŋ‑epɔʼ,

¹⁰ ńnɔŋ ŋgāʼtɛ mé ŋghi teté ŋ́gɛ: «Atsyapuɔ te alɔ́ʼ, ŋ́gɔ́ ndeŋ ndeŋ, o o láʼ enáŋ tɛ a egɔ́ páʼ lā, tɛ́ shʉʼ ezáʼ ntsaŋ, épʉʼ anu zīi wɔ náŋ á ndo esī atsetsáʼ, é le zwhité á wék melaʼ épúp é?»

¹¹ Mɛ́ yá á fhɔ́ nzhó á mbū awíɛ awíɛ á nnɔ pɔ́p, ńdé á mbū pɔ́p ŋ́gɛ: «Pɛ enáʼ nzéŋ ńzwíʼte á méŋ agáʼ afʉʼ, tɛ nnɔ epuɔ pīi, á si mbɔ́ŋtɛ á légɛ, mɛ́ ezwhíte á wɔ́p páʼ pɛ lā, e epō. Ńnɔ mesoó afaʼ pɛ́, mbɔɔ nnɔ epɔ̄ memía pɛ́ á nzem Yɛɛ́so. »

¹² Meŋ zɛ́t ncʉ̄te cʉte, ńjʉ́ɔ á Mɔ́ Njʉnjhʉ, á ŋɛ́ʼɛ elɛ ánɛ páte ntokó ajʉʼ, esī atsetsáʼ é pú ncʉ̄ʼne ménte. Lezēk nu é sɛt nnɛ̄t eséŋ páʼ aluŋɔ lewhʉ̄ lā. Lezēk saŋ é sɛt nnɛ̄t, ḿbāŋ páʼ metshi lā.

¹³ Mecɔʼ saŋ é fhó á athʉ́ lephū, ŋ́kemɛ mbwɛ̄t á esī, páʼ ntá athʉ́ te paŋ é kemɛ mbwɛ̄tɛ á esī á afʉʼ zīi, mía mía afēm a á si ncʉ̄ʼɛ athʉ́ lā.

¹⁴ Lephū é mi, páʼ apak aŋwaʼne zīi, mɛ́ zémtɛ lā. Mekwɛ̄t ntsem mbɔɔ elāʼ tsīi, ntshi é kɛnneé nnéŋ á esɔŋ, é fhó á ajʉʼ zīi é éwú, ŋgʉ̄ɔ azɔ́p, ḿbú mmī.

¹⁵ Mefɔ esī atsetsáʼ, memía epuɔ, mefɔ ncu, megaŋ ŋkāp, wɔ wɛ‑mete, epuʼ mbɔɔ wɔ náŋ á ŋga athū, epuɔ metsem é pú ndʉɔ́ne á ntē lewup tɔ́, mbɔɔ á mvuʼ memía metɔ́ á ndo mekwɛ̄t.

¹⁶ Ńnɔŋ ndʉ́ɛ́ á mbū mekwɛ̄t, mbɔɔ á mbū memía metɔ́ ŋ́gɛ: «Pɛ eswia eswɛ́t á wék, ḿbú efōko á wék, tɛ ŋiŋ yīi, a naáŋ ánɛ akɔʼ lefɔ, a á le pú nzéŋ á wék njʉ́ɔ ɔ́. Mɔ́ Njʉnjhʉ, a á le tswá á wék ŋgʉɔ athʉ́ lepé ɛ́.

¹⁷ Pek lʉ́ɛ́ páʼa melaʼ mīi, mía aleʼé zīi, pɔ́ gɔ á nzáŋ lɔ́ŋ, a á ndáʼ ŋkūʼ. Awɔ́ a gɔ epīiŋ mvūʼu u?»