Menjʉɔ te lí 5 - Eka Eswhī

Anu aŋwaʼne pɔ́ anu Mɔ́ Njhʉnjhʉ

¹ Meŋ zéŋ njʉ́ɔ aŋwaʼne ánɛ apū ete ŋiŋ yīi, a á nnáŋ ánɛ akɔʼ lefɔ, mbɔ mɛ́ ntí azō á nzem ntē éwú, pɔ́ nzem apɛ́. Aŋwaʼne mɛ́t á gɔ́ ŋkɛ́tte kɛtté, mbɔ mɛ́ ndɔ̄k elɛ ŋgyɛ̄t ejʉʼ esambīa.

² Meŋ zéŋ njʉ́ɔ á táʼ cɔʼ Ndém, mete é gɔ́ ánɛ yí, á lé mé ŋghi teté ŋ́gɛ: «Awɔ́ a gɔ ekūuʼ á yí á leŋɛ̄ʼte elɛ, ŋ́kɛ́ʼte á aŋwaʼne ē?»

³ Ŋiŋ á piŋ te éwú á athʉ́ lephū, mbɔɔ á ndo esī atsetsáʼ, mbɔɔ á nzem esī yīi, a gɔ ekūuʼ á yí á lekɛ̄ʼte aŋwaʼne mɛ́t, tɛ ntɔ́ŋ ɔ́.

⁴ Meŋ jʉ́ɔ épúp, ńdā tɛʼ, melaʼ mīi mɛ́ ka jʉ́ɔ á ŋiŋ yīi, a gɔ ekūuʼ á lekɛ̄ʼte aŋwaʼne mɛ́t, tɛ ntɔ́ŋ ɔ́.

⁵ Tɛ́ mmɔʼ mɔ́ ndʉɛ, á lé mé meŋ ŋ́gɛ: «Te zéŋ ndā. Jʉ́ɔ́, ŋiŋ yīi mɛ́ tɔ́ŋɔ á yí lɛ na te maʼ, ánɛ atseŋ ŋgyā Yúda, ámɔ̄ʼ atɔ̄p ánɛ ndhu Efɔ Ndavít, a á lʉɔ́ʼ tɛ njhʉ́. A kuūʼ á yí á leŋɛ̄ʼte elɛ ánɛ mejʉʼ esambīa muɔ, ŋ́kɛ́ʼte á aŋwaʼne mɛ́t. »

⁶ Meŋ zéŋ njʉ́ɔ á Mɔ́ Njʉnjhʉ, á tshí á legʉ̄ŋ akɔʼ lefɔ, melák meféŋ mīi, mɛ́ le lɔ̄k nzwhí á yí, é gɔ́ ánɛ yí, mena pwɔ̄ lekua pɔ́ epɔ̄ melʉɛ é tʉɔ́ʼte á yí. Mendɔ̄ŋ é gɔ́ á athū Mɔ́ Njʉnjhʉ mɛ́t esambīa, á wɛ menēk esambīa. Menēk esambīa mɛ́t é gɔ́ ezwakne esambīa tsīi, é faʼa á mbū Ndém, mbɔ Ndém a le tó á ndo esī atsetsáʼ ejʉʼ tsem.

⁷ Mɔ́ Njʉnjhʉ mɛ́t á tshóte nnɛ̄t mé lezēŋ ŋiŋ yīi, a á nnáŋ ánɛ akɔʼ lefɔ lā, á lɔk apū ete ŋgyá aŋwaʼne á mbū yí, á tswí.

⁸ Ńtswí aŋwaʼne mɛ́t épúp, mena lekua pwɔ̄, ŋ́ghʉ̄ epɔ̄ melʉɛ ntsɔp lekua mé megēm mbīa pwɔ̄, é tswíʼte, ŋ́ŋɔ́ʼne tɛ ethū tsɔ́p é pfeŋ esī á mvhɔ Mɔ́ Njhʉnjhʉ mɛ́t. Awíɛ awíɛ á wɛ akékwɛlé mbɔɔ mendɔ̄ŋ meluʼ á mbū yí. Mendɔ̄ŋ é gɔ́ mbɔ mɛ́ le lɔ̄k á gɔ́ɔl tɛ́ ncūŋte, alamńda á gɔ́ á ntē éwú tɛ ndó, ńdɔk ŋgɔ́ meswiŋte epuɔ Ndém.

⁹ Mena lekua mɛ́t pɔ́ epɔ̄ melʉɛ, é nɔŋ nzɔ̄pɔ azɔp eswhī ndʉ́ɛ́ ŋ́gɛ: «O kuūʼ á wú á letswī aŋwaʼne, ŋ́ŋɛ́ʼte elɛ, melaʼ mīi, mɛ́ le zwhí á wú, o elɔ̄ɔk metshi mú, ńcūʼ epuɔ ŋgyá á mbū Ndém. Épuɔ ánɛ aziɛ́ atseŋ ŋgyā lɛ́, épuɔ pīi é shúŋɔ tɛ mbɔɔ aziɛ́ alāʼ lɛ́, épuɔ elāʼ ntsem, épuɔ ŋgɔŋ ntsem.

¹⁰ Ńdɔ̄k á wɔ́p ŋghʉ̄ mefɔ, ŋ́gɔ́ wɔ nɔŋ‑epɔʼ, ŋ́gɛ pɔ́ efāʼ á mbū Ndém yímpɛ, ésáʼ epuɔ menɔŋ á esī atsetsáʼ. »

¹¹ Meŋ jʉ́ɔ atʉtʉ mecɔʼ Ndém, ńjúʼ ŋghi zɔp, pɔ́ gɔ́ mentsāʼ tɛ nzáne, tɛ ŋgɔ́ yīi mɛ́ gɔ le sáŋ. Ńtshí ŋkɛ́ne akɔʼ lefɔ, mbɔɔ mena pwɔ̄ pɔ́ a epɔ̄ melʉɛ.

¹² Pɔ́ nɔŋ nzɔ̄pɔ mé ŋghi teté ŋ́gɛ: «Mɔ́ Njʉnjhʉ, páʼ mɛ́ le zwhí á yí lā, a kuūʼ yīi mɛ́ gɔ evéŋ mete mí. Ḿvéŋ ŋ́gɛ a á ŋgaŋ lewūʼ, ŋ́gɔ́ á ŋgaŋ azhɛ̄‑anu, ŋ́gwɛ̄ mbʉʼ. Ŋ́gɔ́ á ŋiŋ yīi, mɛ́ pɔŋteé á leyā mekuʼ á mbū yí, ŋ́gūʼte á yí, ŋ́gyá lepɛ á mbū yí. »

¹³ Meŋ zéŋ njúʼ, ajūɔ tsem zīi Ndém a le ghʉ̄ʉ̄, á lephū, mbɔɔ á esī atsetsáʼ, mbɔɔ á nzem esī, mbɔɔ á ntē mía ntshi, ájuɔ tsem zīi á ŋgɔŋ, á nɔŋ nzɔ̄pɔ azɔp ŋ́gɛ: «Mɛ́ esyákne, ŋ́gyá mekuʼ, ŋ́gūʼte, ŋ́gyá á lesāʼ ŋgɔŋ á mbū ŋiŋ yīi, a naáŋ ánɛ akɔʼ lefɔ, mbɔɔ á mbū Mɔ́ Njʉnjhʉ. Ŋ́ghʉ̄ épúp á meŋguʼ meŋguʼ. »

¹⁴ Mena pwɔ̄ lekua é nɔŋ mbwɛ̄tɛ ŋ́gɛ: «Á épúp, epɔ̄ melʉɛ é tswíʼte, ŋ́ŋɔ́ʼne tɛ ethū tsɔ́p é pfeŋ esī, ŋ́gūʼte á Ndém pɔ́ Mɔ́ Njʉnjhʉ. »