Menjʉɔ te lí 4 - Eka Eswhī

Ntií zīi mɛ́ lɔɔ̄k ŋguʼte á Ndém á athʉ́ lephū

¹ Meŋ nde jʉ́ɔ ecʉɔ etsō mɛ́t tɛ é mi, ńzéŋ njʉ́ɔ, taʼ nchu ŋgyā é tsɔ́ʼɔ ntshí á athʉ́ lephū, ŋghi zīi meŋ nde zī nté njhʉ̄ njúʼ á leshūŋne á mbū meŋ, ézi e le nɔ̄ŋ nzwɛnɛ páʼ ŋghi ntaŋ lā, é lé mé meŋ ŋ́gɛ: «Pʉ́ɛ́ eshʉ̄ʼ mé ega, meŋ etswī á wú ajū mīi, á gʉɔ me mbátɛ. »

² Azwakne Ndém á lɛ eshʉ̄ʼ ŋkó ánɛ meŋ. Meŋ ndɛ njʉ́ɔ, akɔʼ lefɔ á tshí á lephū, ŋiŋ á náŋ ánɛ akɔʼ mɛ́t,

³ ŋ́wāŋne páʼ metɔ́ tee nzwiŋ pīi, mɛ́ tɔ́ŋɔ lɛ jáspe mbɔɔ lɛ saaduan lā. Nnū ŋgēm é kɛ́nne á akɔʼ lefɔ mɛ́t nnéŋ á esɔŋ, ńnɔŋ ŋwāŋnɛ lɛ sɛ́t, páʼ tɔ́ tee nzwiŋ yīi, mɛ́ tɔ́ŋɔ lɛ emɛlɔɔde lā.

⁴ Emɔ̄ʼ mekɔʼ lefɔ ntsɔp lekua mé megēm mbīa, é kɛ́nne akɔʼ mɛ́t nnéŋ á esɔŋ. Epɔ̄ melʉɛ ntsɔp lekua mé megēm mbīa, é náŋte éwú, ńzwík mefhɔ́ menzhó. Acɔʼ lefɔ á gɔ́ á athū pɔ́p, mɛ́ lɔk á gɔ́ɔl tɛ́ ncūŋte.

⁵ Ŋŋí mbeŋ pɔ́ meŋghi epuɔ mbɔɔ lefaŋ, é nɔŋ efhɔ́ɔ ánɛ akɔʼ lefɔ mɛ́t ntúɔ́. Meláam esambīa é tshíte á mvhɔ akɔʼ lefɔ mɛ́t, ńnɔŋ ŋkhʉ́ɛ, ńdūɔ́ lɛ swaŋ swaŋ swaŋ, ŋ́gɔ́ ezwakne esambīa tsīi é faʼa á mbū Ndém.

⁶ Emɔ̄ʼ mía ntshi, ńdáne lɛ kwɛ́t, ŋ́gɔ́ páʼ apak ajʉɔ‑eshhʉ̄ lā, á gɔ́ á mvhɔ akɔʼ lefɔ mɛ́t. Emɔ̄ʼ mena lekua, ŋ́gwɛ̄ menēk á mvhɔ pɔ́ nzem, é gɔ́ á tsetsɛlɛ, ńtʉɔ́ʼte á akɔʼ lefɔ mɛ́t.

⁷ Mvhɔ na, á gɔ́ páʼ njhʉnjhʉ meŋgēm lā. Páte mémpīa, á gɔ́ páʼ mɔ́ ndō efɔŋ lā. Eshhʉ̄ páte métɛ́t, é gɔ́ páʼ eshhʉ̄ ŋiŋnɔŋ lā. Páte lekua, á gɔ́ páʼ gó nzwi yīi, a á si ŋghíɛ lā.

⁸ Ewiɛ́ na lɛ́, á nnɔ mena lekua pwɔ̄, a le wɛ̄ membap ntokó, menēk é gɔ́ ánɛ nzem ŋkɔŋ mbɔɔ ánɛ nzem ntsēŋ. Pɔ́ nɔŋ nzɔ̄pɔ ezokó pɔ́ etsōʼ té ká ŋ́gɛ: «Atsyapuɔ Ndém, Atsyantsɔp, a á te alɔ́ʼ, a á te alɔ́ʼ, a á te alɔ́ʼ. A á si ŋgɔ́ á ŋiŋ yīi, a le zī ŋgɔ́, á ŋiŋ yīi a éwú, ńzéŋ ŋgɔ́ á ŋiŋ yīi a a láʼ ezéŋ eshʉʼe. »

⁹ Mena é le nɔ̄ŋ nzɔpɔ efʉʼ metsem, ńdɔkɔ ŋgūʼtɛ á ŋiŋ yīi, a naáŋ ánɛ akɔʼ lefɔ, á ŋiŋ yīi a á nte, á meŋguʼ meŋguʼ. Ńzɔ̄pɔ, ńdɔkɔ ŋgyáa mekuʼ á mbū yí, ńdɔkɔ esyáknɛ á yí.

¹⁰ Ŋ́gē ezɔp épúp, epɔ̄ melʉɛ pwɔ̄ ntsɔp lekua mé megēm mbīa é tswíʼte, ŋ́ŋɔ́ʼne tɛ ethū tsɔ́p é pfeŋ esī, ńdɔkɔ ŋgūʼtɛ á ŋiŋ yīi, a á nte, á meŋguʼ meŋguʼ, ńnɔŋ mmāʼtɛ ecɔʼ lefɔ tsɔ́p á mvhɔ akɔʼ lefɔ, ńnɔŋ ndʉ́ɛ́ ŋ́gɛ:

¹¹ «Atsyapuɔ Ndém wek, o kuūʼ yīi mɛ́ gɔ eyá mekuʼ á mbū wu, ŋ́gūʼte á wú, ḿvéŋ mete mú, melaʼ mīi wu mé le ghʉ̄ etsō tsem. Wu mé le kɔ̄ŋ ŋ́gɛ, e egɔ́ éwú, ńdɛ ŋghʉ̄. »