Menjʉɔ te lí 3 - Eka Eswhī

Akɛtte zīi Yɛɛ́so a túɔ́ á mbū alúŋ epuɔ Yɛɛ́so á tésɔŋ Saadɛs

¹ Tí á mbū cɔʼ Ndém yīi, a cʉtɛ alúŋ epuɔ Yɛɛ́so zīi, á tésɔŋ Saadɛs ŋ́gɛ: «Ŋiŋ yīi a wɛɛ̄ ezwakne esambīa tsīi, é faʼa á mbū Ndém, ńzéŋ ŋgwɛ̄ mecɔʼ saŋ esambīa, a á si ndʉ́ɛ́ ŋ́gɛ: Meŋ á si nzhɛ́ɛ mefaʼ mú. Epuɔ é si ndʉ́ɛ́ ŋ́gɛ o ó nte, káʼā mbɔ o lē ŋkhwʉ́.

² Te zéŋ ndí, kúʼte á méŋ agáʼ lefɛ̄ nnɛ̄t yīi, a á ntē wu, ńcʉ́ʼɛ ŋgɔ̄ áa ŋkwhʉ́ɛ, tɛ a etē. Meŋ ndʉ́ɛ́ épúp melaʼ mīi, meŋ ka jʉ́ɔ, mefaʼ mú, é gɔ́ mbɔŋ tɛ mbɔŋ, á mvhɔ Ndém ga á.

³ Púp, kímte ashuŋne Ndém zīi, mɛ́ le ziʼné á wú, mbɔɔ ntií zīi, o le lɔ̄k njúʼ, ńzīŋ páʼ á si ndʉ́ɛ́ épúp, ŋ́gɔ̄ nnɛ̄t ju, ŋ́gwáʼ atswhī tepɔŋ jú. O líi, mbɔ meŋ a veŋne, éshʉʼ páʼ ntsɔ́ŋ lā, tɛ o ó le zhɛ́ á afʉʼ zīi, meŋ á shʉʼ ɛ́

⁴ Meŋ ké ndʉ́ɛ́ páʼa, emɔ̄ʼ epuɔ é gɔ́ á tésɔŋ Saadɛs, mbɔ pɔ́ kɛ te néŋ nchʉ́ ánɛ menzhó mɔ́p ɔ́. Pek a pɔ́p é shʉʼ egɔ́ nnɔ, pɔ́ ezwík mefhɔ́ menzhó, melaʼ mīi, pɔ́ kuūʼ pīi, pɔ́ gɔ ezwík.

⁵ Púp, ŋiŋ yīi a á lʉɔ́ʼ tɛ njhʉ́, a a shʉʼ ezwík azí mefhɔ́ menzhó. Meŋ te shʉʼ epíkte lezēŋ tsí á ntē aŋwaʼne nzēŋ epuɔ pīi, é wɛɛ̄ lenāŋ leswhī ɛ́. Meŋ a shʉʼ etswí ntāŋ yí, á mvhɔ Mɔʼɔ́ ga, mbɔɔ á mvhɔ mecɔʼ pí.

⁶ Ŋiŋ a wiɛ metuúŋ á lelɔk njúʼ ejʉʼ, á júʼ ajū mīi, Azwakne Ndém á si ndʉ́ɛ́, á mbū melúŋ epuɔ Yɛɛ́so. »

Akɛtte zīi, Yɛɛ́so a túɔ́ á mbū alúŋ epuɔ Yɛɛ́so á tésɔŋ Filadɛlfi

⁷ Tí á mbū cɔʼ Ndém yīi, a cʉtɛ alúŋ epuɔ Yɛɛ́so zīi, á tésɔŋ Filadɛlfi ŋ́gɛ: «Ŋiŋ yīi a fhɔ́ɔ á mbū Ndém, ŋ́gɔ́ á ŋgaŋ anuúne, ŋ́gwɛ̄ á kí Efɔ Ndavít, ŋ́gɔ́ á ŋiŋ yīi a tsɔ́ʼɔ, ŋiŋ a á le kɛ̄ɛ, ŋ́kɛ̄, ŋiŋ a á le tsɔ́ʼ, a á si ndʉ́ɛ́ ŋ́gɛ:

⁸ Meŋ á si nzhɛ́ɛ mefaʼ mú, ńnɔŋ nzhɛ́ɛ á légɛ, o wɛɛ̄ áa méŋ agáʼ mete, táʼ, ŋ́ké nnɔ̄ŋ nzīŋɛ páʼ ashuŋne zá á si ndʉ́ɛ́ épúp, o te gá puŋne. Awuɔ yīi meŋ á tsɔ́ʼ mmɔʼ nchu ŋgyā á mvhɔ wu lāa, ŋiŋ a piŋɛ ŋgɔ́, a á le kɛɛ.

⁹ Meŋ á si eswīŋɛ nnɔ epuɔ pīi, é wuʼtɛ á Sɛ́ta á mbū wu. Epuɔ puɔ mɛ́t, é si ndʉ́ɛ́ ŋ́gɛ, pɔ́ é epuɔ Yúda, ḿbiŋ te epiɛ́ ɛ́. Pɔ́ lʉ́ɛ́ épúp páʼā, ńdɔkɔ ntáŋa mela. Meŋ a shʉʼ etshóne á wɔ́p, pɔ́ eshʉʼ ntswíʼte á esī á mvhɔ wu, ŋ́ŋɔ́ʼne tɛ athū zɔ́p a epfēŋ esī. A etsīa épúp, pɔ́ ezhɛ́ á légɛ meŋ kɔɔ̄ŋ á wú.

¹⁰ Páʼ o ke kāk ete, nzīŋ páʼ ashuŋne zá á si nzɛ́ttɛ lā, meŋ méŋwɛ̄t azá, meŋ a shʉʼ ekápte á wú á afʉʼ zīi, ŋgʉɔ̄ʼ e whʉɛ á esī atsetsáʼ ntsem, ńtátɛ epuɔ menɔŋ lā.

¹¹ Á cʉ́ʼ ŋgʉɔ mbīa, meŋ eshʉ̄ʼ. Lefɛ̄ nnɛ̄t yīi o wɛɛ̄, kúʼtɛ tɛ e etē, tɛ ŋiŋ a á le kūʼ á levɛ̄ne á wú, á leta á lezēŋ Ndém ɛ́.

¹² Ŋiŋ yīi a á lʉɔ́ʼ tɛ njhʉ́, meŋ eghʉ̄, a ecʉ́ʼ páʼ ntɔ̄ lā, ánɛ Mía Ŋgyā Ndém ga. A á le láʼ mbú éfhó éwú tɛ ntúɔ́ ɔ́. Meŋ etí lezēŋ Ndém ga, á mbe nnɛ̄t yí. Ńtí lezēŋ Yelósalɛm eswhī, á tésɔŋ Ndém ga á mbe nnɛ̄t yí. Yelósalɛm wuɔ mɛ́t, a fhɔ́ɔ á athʉ́ lephū, á lezēŋ Ndém ga. Ńzéŋ ntí lezēŋ leswhī tsá, á mbe nnɛ̄t yí.

¹³ Ŋiŋ a wiɛ metuúŋ á lelɔk njúʼ ejʉʼ, á júʼ ajū mīi, Azwakne Ndém á si ndʉ́ɛ́, á mbū melúŋ epuɔ Yɛɛ́so. »

Akɛtte zīi Yɛɛ́so a túɔ́ á mbū alúŋ epuɔ Yɛɛ́so á tésɔŋ Laodisɛ

¹⁴ Tí á mbū cɔʼ Ndém yīi, a cʉtɛ alúŋ epuɔ Yɛɛ́so zīi, á tésɔŋ Laodisɛ ŋ́gɛ: «Ŋiŋ yīi lezēŋ tsí lɛ Á épúp, á kwaʼ ŋiŋ yīi a tswii á légɛ, anu Ndém á anuúne. Á ŋiŋ yīi Ndém a le lɔ̄k á yí tɛ́ nnɔ̄ŋ ŋgɔŋ, a á si ndʉ́ɛ́ ŋ́gɛ:

¹⁵ meŋ á si nzhɛ́ɛ mefaʼ mú. Meŋ á si nzhɛ́ɛ á légɛ, o te lōo, o te ŋwɛ̄ɛ. Meŋ á si ŋké ntsáa ŋ́gɛ, o elō, ká ŋ́gɛ, o eŋwɛ̄.

¹⁶ Páʼ o ké ntshí áa tsetsɛlɛ, o te lōo, o te ŋwɛ̄ɛ lā, meŋ a fhó á nchu meŋ ezáʼne á wú efóke.

¹⁷ O si ndʉ́ɛ́ ŋ́gɛ, o ó ŋgaŋ lewūʼ, ŋ́gɛ o lē ŋgwɛ azō tɛ á zá, ŋ́gɛ amɔ̄ʼ azō á té á mbū wu ŋkíŋɛ. O o si ndʉ́ɛ́ épúp páʼā, ŋ́ké ŋgɔ́ á ŋgaŋ ŋgʉɔ̄ʼ, ŋ́gɔ́ á te kuʼ ánɛ azō, ŋ́gɔ́ á mbūŋ, ŋ́gɔ́ á apií‑menēk, ńzéŋ ŋgɔ́ á atseŋ te nzhó.

¹⁸ Melaʼ épúp tɛ́, meŋ tékɛ á wú ŋ́gɛ, o eshʉ̄ʼ á mbū meŋ, ńzó á gɔ́ɔl yīi, mɛ́ é tɔ á mmók, ńtōk tɛ á ŋwaŋne, tɛ́ ndɔk ncʉ́ʼ á kwaʼ ŋgaŋ lewūʼ. Ńzó mefhɔ́ menzhó ndɔk ŋkápte mbe nnɛ̄t ju, tɛ́ esē é le zéŋ ŋkú á wú melaʼ mīi, o ó atseŋ te nzhó ɔ́. Ńzó afho, ńdɔk mbɛ́t menēk mú, ńzéŋ njʉ́ɔ ejʉʼ.

¹⁹ Meŋ cɔɔ́k epuɔ metsem pīi, meŋ kɔɔ̄ŋ á wɔ́p, ńtswá á wɔ́p mbɔɔ tswaá. Ké ŋkāk ete ánɛ lefɛ̄ nnɛ̄t, ŋ́gɔ̄ nnɛ̄t ju, ŋ́gwáʼ atswhī tepɔŋ jú.

²⁰ Awuɔ yīi meŋ tshií á nchu ŋgyā ŋkwáʼtɛ la, ŋiŋ a júʼɔ ŋghi za, ńtsɔ́ʼ nchu ŋgyā, mbɔ meŋ a kó á ŋgyā, pek yí e epúte etsō mpfɛ́t, a egɔ́ mé meŋ, meŋ egɔ́ mé yí.

²¹ Ŋiŋ yīi a á lʉɔ́ʼ tɛ njhʉ́, meŋ a shʉʼ eghʉ, pek yí e enáŋ ánɛ akɔʼ lefɔ zá, ńdeŋ ndeŋ páʼ, meŋ nde lʉɔ́ʼ azá tɛ njhʉ́, ŋ́gʉɔ ntswɛ́tte á Mɔʼɔ́ ga, ánɛ akɔʼ lefɔ zí, ńnáŋ azá éwú lā.

²² Ŋiŋ a wiɛ metuúŋ á lelɔk njúʼ ejʉʼ, á júʼ ajū mīi, Azwakne Ndém á si ndʉ́ɛ́, á mbū melúŋ epuɔ Yɛɛ́so. »