Menjʉɔ te lí 22 - Eka Eswhī

¹ Cɔʼ Ndém á zéŋ ntswī á gá mmɔʼ mía ntshi yīi, é ghʉɛ mɛ́ taa á lezēŋ Ndém, é nɔŋ ŋwāŋnɛ páʼ ŋglaási lā. Ńnɔŋ efhɔ́ɔ ánɛ akɔʼ Lefɔ Ndém, pɔ́ Mɔ́ Njʉnjhʉ ntúɔ́.

² Ńcúu á tsetsɛlɛ mía mía mɛnzhɛ tésɔŋ. Athʉ́ zīi á ghʉɛ mɛ́ gɔ́ɔ éwú, á tshí á legʉ̄ŋ ntshi mɛ́t ŋkɔʼɔ́ epīa, mbɔ á gɛ nzémɛ ŋgʉɔ ntsɔp pīa mé legēm ánɛ taʼ ŋguʼ, ńdɔkɔ ndʉ́ɛ́ á taʼ legʉɔ ánɛ taʼ saŋ. Mɛ́ lɔɔ̄k mefho methʉ́ muɔ mɛ́t, tɛ́ ntɛ̄ epuɔ menɔŋ á ŋgɔŋ.

³ Ndɔ, e te e fú egɔ́ ánɛ tésɔŋ wuɔ mɛt ɛ́. Akɔʼ Lefɔ Ndém, pɔ́ Mɔ́ Njhʉnjhʉ, á fú enáŋa egɔ́ áa éwú. Wɔ júʼ‑nchu Ndém, e enáŋa ŋgyáa á lepɛ á mbū yí.

⁴ Ńnɔŋ njʉ́ɔ eshhʉ̄ yí, lezēŋ tsí e egɔ́ nti tií, á mvhɔ eshhʉ̄ pɔ́p.

⁵ Etsōʼ e é le zɛ́t, ŋiŋ a á le zéŋ ntsá á yí á lejʉ̄ɔ ŋkaʼ yīi, é fhɔ́ɔ ánɛ láam á. A á le zéŋ ntsá á yí á lejʉ̄ɔ ŋkaʼ yīi, é fhɔ́ɔ ánɛ lezēk nu ú. A egɔ́ épúp melaʼ mīi, Atsyapuɔ Ndém a a lɔk ŋkaʼ yí, ékɛʼɛ á wɔ́p. Púp, pɔ́ a pɔ́p e egɔ́ mefɔ á meŋguʼ meŋguʼ.

Lepiŋ nzem Yɛɛ́so

⁶ Cɔʼ Ndém, á zéŋ ndé á mbū meŋ ŋ́gɛ: «Meshuŋne muɔ, é ajʉʼ éwú ŋgɔ́ épúp, ŋ́gɔ́ á anuúnē. Atsyapuɔ Ndém páʼ a le yá Azwakne zí á mbū metswi‑ŋke pí lā, a le tó á cɔʼ yi á mbū wɔ júʼ‑nchu yí ŋ́gɛ, a eshʉʼ ntswī á wɔ́p ajū mīi, a pɔŋteé á leshʉʼ, tɛ á cʉʼɛ́ eshʉʼ shʉʼe. »

⁷ Cɔʼ Ndém, á zéŋ ndé ŋ́gɛ: «Yɛɛ́so a á si ndʉ́ɛ́ ŋ́gɛ: awuɔ yīi, meŋ cʉʼɛ́ eshʉʼ eshʉʼ lā. Eshhʉ̄ mbɔŋ á si ŋgɔ́ á ŋiŋ yīi, a á si nzīŋɛ páʼ ŋke wuɔ yīi, Ndém a le tswī á ntē aŋwaʼne jʉɔ, é si ndʉ́ɛ́ épúp. »

⁸ Meŋ Jáaŋ, meŋ nde júʼ menu mɛ́t, ńzéŋ njʉ́ɔ. Ńjúʼ, ńzéŋ njʉ́ɔ épúp, ńtswíʼte á mekhu cɔʼ Ndém yīi, a ke nɔ̄ŋ ntswii á gá menu mɛ́t, ŋ́ŋɔ́ʼne tɛ athū zá á pfeŋ esī, ŋ́gɔ̄ á ŋguʼté á yí.

⁹ Tɛ́ á lé mé meŋ ŋ́gɛ: «Ndɛ́ʼ o eghʉ̄ʉ épúp. Meŋ á azá ŋgaŋ afaʼ Ndém páʼ wu, mbɔɔ páʼ epɔ̄ memía pú, métswi‑ŋke Ndém, mbɔɔ páʼ epuɔ pīi pɔ́ ziīŋ páʼ menu mīi, é ntē aŋwaʼne ega, é si ndʉ́ɛ́ épúp. Ndém, tɛ́ o pɔŋteé á lewuʼte á yí. »

¹⁰ Cɔʼ Ndém, á zéŋ ndé á mbū meŋ ŋ́gɛ: «Ndɛ́ʼ o eféŋ ŋke yīi, Ndém a á tswi á ntē aŋwaʼne jʉɔ, á ntsem, melaʼ mīi njhʉ̄ zīi, menu mɛ́t é gʉɔ mé mbūɔ̄, e é páte.

¹¹ Ŋiŋ yīi, a te si nnáŋa ndeŋ ndeŋ páʼ Ndém a á si ŋkɔ̄ŋɔ, a etswiʼne nnáŋ épúp, ńdɔk ŋgʉ̄ɔ mé mvhɔ mbōo. Ŋiŋ yīi epe é lē mpféŋ á yí, a etswiʼne ndɔ̄k epe, nnáŋ mbōo. Táʼ, ŋiŋ yīi a á si nzīŋɛ ndeŋ ndeŋ, páʼ Ndém a á si ŋkɔ̄ŋɔ, a etswiʼne nnáŋ épúp, ńdɔk ŋgʉ̄ɔ mé mvhɔ. Ŋiŋ yīi a á ŋiŋ Ndém, a etswiʼne ndɛ̄tne ánɛ Ndém, ńdɔk ŋgʉ̄ɔ mé mvhɔ. »

¹² Yɛɛ́so, a á si ŋké ndʉ́ɛ́ ŋ́gɛ: «Awuɔ yīi meŋ cʉʼɛ́ eshʉʼ shʉʼe lāa. Ége eshʉʼ épúp, éwɛ ntaŋá, éfhó ánɛ afaʼ awiɛ́ awiɛ́, tɛ́ e yá eyí.

¹³ Meŋ á si ŋgɔ́ á Alfa, ŋ́gɔ́ á Omega, ńdɔkɔ ndʉ́ɛ́ mvhɔ, ŋ́gɔ́ nzem, ńdɔkɔ ndʉ́ɛ́ nzií, ŋ́gɔ́ nzokó. »

¹⁴ Eshhʉ̄ mbɔŋ, a á si ŋgɔ́ á ŋiŋ yīi, a á si esōko menzhó mí, e elá, tɛ ŋgɔ́ yīi, a gɔ́ elɔ̄ɔk nchu ŋkāʼ, ŋ́kó á ntē tésɔŋ, ńjhʉ́ ntá athʉ́ zīi, é ghʉɛ mɛ́ gɔ́ɔ éwú.

¹⁵ Ŋ́ké ŋgɔ́ mé megaŋ epe, mbɔɔ megaŋ lekaŋ, mbɔɔ megaŋ agā, mbɔɔ wɔ zwhíte‑epuɔ, mbɔɔ wɔ wuʼte‑mesī, mbɔɔ ŋiŋ ntsem yīi, a kɔɔ̄ŋ á letāŋ mela, tɛ ndɔ̄k emiɛ́ tɛ́ nnáŋ, pɔ́ ezɛ́t á nzem apɛ́ tésɔŋ.

¹⁶ Yɛɛ́so á zéŋ ndé ŋ́gɛ: «Meŋ nde tó á cɔʼ ga ŋ́gɛ, a eshʉʼ ntswī ŋke wuɔ, á mbū pɛ pīi, pɛ é ntē meŋgyā alúŋ epuɔ Yɛɛ́so. Meŋ á si ŋgɔ́ atɔ̄p, ánɛ ndhu Ndavít. Ŋ́gɔ́ á cɔʼ saŋ yīi, a ŋwaŋnɛ, ḿbhʉ́ɛ melanjhʉ̄. »

¹⁷ Azwakne Ndém, pɔ́ nzwí ŋge é si ndʉ́ɛ́ ŋ́gɛ: «Shʉʼɛ̄. » Ŋiŋ yīi a á si njúʼɔ ajʉɔ anu, a elé azí ŋ́gɛ: «Shʉʼɛ̄. » Ŋiŋ yīi agāk zí á si eshhʉ́ɛ, a eshʉ̄ʼ. Ŋiŋ yīi a á kɔŋ, a eshʉʼ ntswí ntshi ndémndēm, éyi é ghʉɛ mɛ́ gɔ́ɔ éwú, ńnú.

Lelɔk ŋkwɛ́t methū

¹⁸ Meŋ Jáaŋ, meŋ á si ntswɛ̄tɛ á ŋiŋ ntsem yīi, a á júʼ ŋke yīi, Ndém a á tswi á ntē aŋwaʼne jʉɔ ŋ́gɛ, ŋiŋ a tswiʼnɛ azō éwú, mbɔ Ndém a a láʼ etswiʼne ŋgeŋge zīi, mɛ́ é ghíte á ntē aŋwaʼne ega, ánɛ ŋgeŋge zi.

¹⁹ Ŋiŋ a piŋɛ ntswɛ́tte azō, ánɛ ŋke yīi, Ndém a á tswi á ntē aŋwaʼne jʉɔ, mbɔ Ndém a a láʼ ekú ezí ntá athʉ́ zīi, é ghʉɛ mé gɔ́ɔ éwú, ékú azí ajʉʼ á ntē tésɔŋ Ndém. Mɛ́ é ghíte á tésɔŋ, pɔ́ athʉ́ mɛ́t, á ntē aŋwaʼne ega.

²⁰ Ŋiŋ yīi a á si ntswīi ŋ́gɛ, menu mɛ́t é anuúnē, a á si ndʉ́ɛ́ ŋ́gɛ: «Kwaʼ anuúnē, meŋ cʉʼɛ́ eshʉʼ shʉʼe. » Á épúp, shʉʼɛ̄ mé Atsyapuɔ Yɛɛ́so.

²¹ Ŋ́gɛ Atsyapuɔ Yɛɛ́so a elɛ ŋghʉ̄ anu mbɔŋ té ndhʉ, ánɛ epuɔ Ndém metsem.