Menjʉɔ te lí 21 - Eka Eswhī

Lephū leswhī mbɔɔ esī atsetsáʼ eswhī

¹ Á tɔ́k épúp, meŋ zéŋ njʉ́ɔ lephū leswhī, mbɔɔ esī atsetsáʼ eswhī. Mbɔ mvhɔ lephū, pɔ́ mvhɔ esī atsetsáʼ, e é mi, mía ntshi á zéŋ te azí zɛ́t.

² Ńjʉ́ɔ á tésɔŋ Ndém, á Yelósalɛm eswhī, á fhó á lephū, á lezēŋ Ndém esóʼo, ŋ́gɔ́ páʼ nzwí ŋge yīi, a á tswiŋ nnɛ̄t zi, ńdɔkɔ nzwíʼtɛ á ndō yi lā.

³ Meŋ zéŋ júʼ mmɔʼ ŋghi teté, é fhó á ajʉʼ akɔʼ lefɔ, ńdé ŋ́gɛ: «Awuɔ yīi Ndém a á ghʉ lenaŋá tsí, á nnɔ epuɔ menɔŋ lāa. A a cʉ́ʼɛ enáŋa áa á tsetsɛlɛ pɔ́p. Epuɔ menɔŋ e ecʉ́ʼ á alāʼ zí, a egɔ́ á Ndém wɔp, ŋ́gɔ́ á nnɔ pɔ́p

⁴ ńtsíʼne ntshi nnēk zɔ́p ntsem. Lewhʉ̄ a á le zɛ́t. Ŋiŋ a á le zéŋ lewhʉ̄ ndā a. Ŋiŋ a á le zéŋ ŋgāʼtɛ ɛ́. Ŋiŋ a á le zéŋ ŋgʉɔ̄ʼ njʉ́ɔ ɔ́. Mbɔ mezwiŋ menu, é mi. »

⁵ Ŋiŋ yīi a naáŋ ánɛ akɔʼ lefɔ, a á lé ŋ́gɛ: «Awuɔ yīi meŋ gɔ á ŋghʉɛ́ ajūɔ tsem leswhī leswhī la. » Ḿbiŋ ndé mé meŋ ŋ́gɛ: «Tí ŋ́gɛ, meshuŋne muɔ é si ŋgɔ́ anuúnē, ŋ́gɔ́ á ajʉʼ éwú ŋgɔ́ épúp. »

⁶ Ńzéŋ ndé mé meŋ ŋ́gɛ: «Á pú nzōko. Meŋ á si ŋgɔ́ á Alfa, ŋ́gɔ́ á Omega, ńdɔkɔ ndʉ́ɛ́ nzií, ńzéŋ ŋgɔ́ nzokó. Ŋiŋ yīi, nzi ntshi é si nzáŋa á yí, meŋ a yá á yí ntshi ndémndēm yīi, é fhɔ́ɔ ánɛ lesaʼá‑ntshi ntúɔ́, ŋ́ghʉ̄ɛ mɛ́ taa á lezēŋ Ndém, a enú.

⁷ Ŋiŋ yīi a á lʉɔ́ʼ tɛ njhʉ́, meŋ a shʉʼ eyá á yí ntshi wuɔ mɛ́t, égɔ́ á Ndém yi, a egɔ́ á méŋ ga.

⁸ Ḿbiŋ ŋgɔ́ mé epuɔ pīi pɔ́ cɔ̄ʼe, ŋ́gɔ́ mé wɔ te júʼ‑nchu Ndém, ŋ́gɔ́ mé epuɔ pīi athū zɔ́p á lē mbék, ŋ́gɔ́ mé wɔ zwhíte‑epuɔ, ŋ́gɔ́ me megaŋ agā, ŋ́gɔ́ mé megaŋ lekaŋ, ŋ́gɔ́ mé wɔ wuʼte‑mesī, mbɔɔ wɔ táŋ‑mela metsem, mbɔ azɔ́p ajʉʼ á ntē mía mía mmók meka yīi, é si ŋgīʼnɛ. Wɔ́p á legɔ̄ á ntē mmók ega mɛ́t, a á si ŋgɔ́ á wɔ́p á lezēŋ ŋkwhʉ́ emɔ̄ʼ legʉɔ. »

Yelósalɛm eswhī

⁹ Mmɔʼ cɔʼ Ndém, á nnɔ mecɔʼ Ndém esambīa pīi, pɔ́ ŋgwɛ̄ mendɔ̄ŋ esambīa á mbū pɔ́p, mezoknzem ŋgʉɔ̄ʼ esambīa, é gɔ́ á ntē éwú tɛ ndó, á shʉʼ eshúŋne á mbū meŋ, ńdé ŋ́gɛ: «Shʉʼɛ̄, meŋ etswī á wú á nzwí ŋge, á nzwí Mɔ́ Njʉnjhʉ. »

¹⁰ Azwakne Ndém á shʉʼ ŋkó ánɛ meŋ, cɔʼ Ndém á tswíʼ á gá, ńdɔk ŋgʉ̄ɔ mé ntsɔʼ mmɔʼ mía mía sisia lekwɛ̄t, ńtswī á gá á tésɔŋ Ndém, á Yelósalɛm, á nɔŋ efhɔ́ɔ á lephū, á lezēŋ Ndém esóʼo.

¹¹ Shʉ́shɔ́k Ndém á gɔ́ éwú ŋŋwāŋnɛ, ŋ́ŋwāŋne páʼ tɔ́ yīi, a teē nzwiŋ, mɛ́ tɔ́ŋ lɛ jáspe lā, éfók lɛ púú páʼ ŋglaási lā.

¹² Mbɔ mɛ́ le pɔ́ mmɔʼ mía mía akɛ, á kɔ́ʼ mé athʉ́ tɛʼ, ńdɔk ŋkɛ́ne. Menchu é gɔ́ ntsɔp pīa mé legēm. Taʼ cɔʼ Ndém, á tshí ánɛ ewiɛ́ nchu akɛ lɛ́. Menzēŋ etseŋ ŋgyā Islaɛl ntsɔp pīa mé legēm, é tíne ánɛ menchu akɛ mɛ́t.

¹³ Menchu akɛ mɛ́ntɛ́t, é gɔ́ á mbuʼ esaáʼ‑nu tésɔŋ. Menchu mɛ́ntɛ́t, é gɔ́ ánɛ mbuʼ ŋkɔŋ. Menchu mɛ́ntɛ́t, é gɔ́ á mbuʼ ntsēŋ. Emi mɛ́ntɛ́t, é gɔ́ á mbuʼ mbií‑nu.

¹⁴ Mbɔ mɛ́ le lɔ̄k memía metɔ́ ntsɔp pīa mé legēm, ńnɔ̄ŋ atseŋ akɛ tésɔŋ mɛ́t. Menzēŋ meziŋ‑ntō Mɔ́ Njʉnjhʉ ntsɔp pīa mé legēm, é tíne ánɛ metɔ́ mɛ́t.

¹⁵ Cɔʼ Ndém yīi, a á nnɔŋ eshúŋnɛ á mbū meŋ, á wɛ atsém ajū mīi, mɛ́ lɔkɔ mbíɛ́ efʉʼ azō, mbɔ mɛ́ le lɔ̄k á gɔ́ɔl tɛ ncūŋte, azō mɛ́t á gɔ́ páʼ taʼ akekaʼa lā, ŋ́gɔ̄ elɔk efʉʼ á tésɔŋ, mbɔɔ menchu akɛ, mbɔɔ akɛ tésɔŋ.

¹⁶ Tésɔŋ mɛ́t a lɛ meshhʉ̄ lekua, mmɔʼ eshhʉ̄ é té mmɔʼ tɔ́k. Cɔʼ Ndém á lɔk atsém ajū mwɔ̄ efʉ̄ʼ, á gɔ́ mekílo ntsāʼ pīa mé mekílo ŋkhʉ epīa. Meshhʉ̄ lekua pɔ́ lekɔ̄ʼ á athʉ́, é pú ŋgɔ́ áa ntāʼ ntshí.

¹⁷ Á fʉʼ akɛ, á kɔ́ʼ á athʉ́ memíta ntsɔp pīa megēm esambīa, mbɔ a á lɔk efʉʼ zīi, epuɔ menɔŋ é lɛɛ́ ndɔkɔ efʉ̄ʼɛ azō afʉʼ mɛ́t, tɛ́ efʉ̄ʼ.

¹⁸ Mɛ́ le lɔ̄k mmɔʼ ntií metɔ́ tee nzwiŋ, mɛ́ tɔ́ŋ lɛ jáspe, tɛ́ mbɔ́ akɛ mɛ́t. Ajuɔ tsem zīi á mbɔ pɔɔ́ á tésɔŋ mɛ́t, á nɔŋ ŋwāŋnɛ páʼ ŋglaási lā, mbɔ mɛ́ le lɔ̄k á mbɔŋ gɔ́ɔl tɛ́ mbɔ́.

¹⁹ Mɛ́ le lɔ̄k metɔ́ tee nzwiŋ ntií ntsem, ńtswīŋ atseŋ akɛ jʉɔ mɛ́t. Mɛ́ le lɔ̄k á jáspe, ńtswīŋ mvhɔ tɔ́. Ńdɔ̄k á safíi, ńtswīŋ á tɔ́ mbáte pīa. Ńdɔ̄k á kalseduan, ńtswīŋ á tɔ́ mbáte tɛ́t. Ńdɔ̄k á emɛlɔɔde, ńtswīŋ á tɔ́ mbáte lekua.

²⁰ Ńdɔ̄k á saaduan, ńtswīŋ á tɔ́ mbáte táa. Ńdɔ̄k á kɔɔnalin, ńtswīŋ á tɔ́ mbáte ntokó. Ńdɔ̄k á klisolít, ńtswīŋ á tɔ́ mbáte esambīa. Ńdɔ̄k á bɛlil, ńtswīŋ á tɔ́ mbáte lefaá. Ńdɔ̄k á topāze, ńtswīŋ á tɔ́ mbáte levuʼɔ́. Ńdɔ̄k á klizopláze, ńtswīŋ á tɔ́ mbáte legēm. Ńdɔ̄k á yasɛ̄ŋte, ńtswīŋ á tɔ́ mbáte ntsɔp zɛ́mɔʼɔ́. Ńdɔ̄k á ametiste, ńtswīŋ á tɔ́ mbáte ntsɔp pīa.

²¹ Menchu akɛ ntsɔp pīa, é lɛ etók tshī ntsɔp pīa, á lɔk ŋgɔ́ mbɔ, mɛ́ le lɔ̄k á taʼ atók tshī, tɛ́ ncūŋte ewíɛ́ nchu lɛ́. Mía mía mɛnzhɛ yīi, a le tɔ́k á tésɔŋ, a le nɔ̄ŋ ŋŋwaŋnɛ páʼ ŋglaási lā, mbɔ mɛ́ le lɔ̄k á mbɔŋ gɔ́ɔl tɛ́ nchʉ̄.

²² Meŋ ké te á Mía Ŋgyā Ndém, á tésɔŋ mɛ́t jʉ́ɔ. Á gɔ́ páʼ, eyi Mía Ŋgyā Ndém a á si ŋgɔ́ á Atsyapuɔ, á Atsyantsɔp Ndém méŋwɛ̄t, ńzéŋ ŋgɔ́ á Mɔ́ Njʉnjhʉ.

²³ Lezēk nu, ká lezēk saŋ mé te pɔ́ŋ á lekɛʼɛ á tésɔŋ wuɔ mɛ́t ɛ́, shʉ́shɔ́k Ndém mé si ŋkɛ̄ʼɛ á yí, ŋkaʼ yí é gɔ́ á Mɔ́ Njʉnjhʉ.

²⁴ Ŋgɔŋ ntsem, e shʉʼ eziŋ ánɛ ŋkaʼ yí, mefɔ ŋgɔŋ ntsem e lɔ̄k lewūʼ tsɔ́p eshʉ̄ʼ mé éwú.

²⁵ Mɛ́ té ndáʼa aleʼé, ńtsɛ́tɛ menchu tésɔŋ wuɔ mɛ́t ɛ́, melaʼ mīi, nzém e te ndáʼa eséŋɛ éwú ú.

²⁶ Mɛ́ e fú enáŋa efhɔ́ɔ á ŋgɔŋ ŋgɔŋ, élɔkɔ lewūʼ pɔ́ mekuʼ, éshʉʼɛ éwú.

²⁷ Epe, é té ndáʼa ŋkúɔ́ á tésɔŋ ega mɛ́t ɛ́. Wɔ fʉʼte‑mele anu, mbɔɔ wɔ táŋ‑mela, é té ndáʼa ŋkúɔ́ azɔ́p éwú ú. Epuɔ pīi, mɛ́ lē ntī nzēŋ mɔ́p á ntē aŋwaʼne Mɔ́ Njʉnjhʉ, á nnɔ wɔ wɛ‑lenāŋ leswhī, mé e láʼ ekó éwú.