Menjʉɔ te lí 20 - Eka Eswhī

Anu ánɛ meŋguʼ ntsāʼ

¹ Meŋ zéŋ njʉ́ɔ taʼ cɔʼ Ndém, á fhó á athʉ́ lephū esóʼo, ŋ́gwɛ̄ á kí lelɔk ntsɔ́ʼ apeŋte á mbū yí, pɔ́ mmɔʼ mía mía tsyɛ́ɛn.

² Ŋ́gɔ̄ á na ntap ntap, ńdɔ̄k á tsyɛ́ɛn ŋkwɛ́t á yí, a a láʼ egɔ́ ŋkwɛ́t kwɛɛ́t, ánɛ meŋguʼ ntsāʼ. Na ntap ntap mɛ́t, mé si ŋgɔ́ nnū zīi, e le fhó tɛ efʉʼ mvhɔ, mɛ́ tɔ́ŋ á yí lɛ Sɛ́ta, mbɔɔ lɛ Ŋgaŋ Mbo.

³ Ŋkwɛ́t á yí épúp, ḿmāʼ á ntē apeŋte, ńtsɛ́t, ńdɔ̄k á kí ŋkɛ̄, ŋ́gɛ ndɛ́ʼ á zéŋ ŋghʉ̄, ŋgɔŋ ntsem é fa nzhɛ, tɛ meŋguʼ ntsāʼ e eláʼ ntɔ́k. Meŋguʼ ntsāʼ é tɔ́k épúp, mɛ́ enáʼ ŋkɛ́ʼɛ á yí, ánɛ méŋ agáʼ afʉʼ.

⁴ Á tɔ́k épúp, meŋ zéŋ njʉ́ɔ ekɔʼ lefɔ, epuɔ pīi pɔ́ nnáŋte éwú, mɛ́ yá mete á mbū pɔ́p, á lelɔk esáʼ epuɔ. Meŋ zéŋ njʉ́ɔ egega epuɔ pīi, mɛ́ le zaʼté ethū tsɔ́p melaʼ mīi, pɔ́ le kuʼté ashuŋne Ndém, ńnɔŋ eshúŋɔ á ŋiŋ yīi, Yɛɛ́so a ewiɛ́. Égega epuɔ pīi, pɔ́ lɛ te wūʼte á na mbɔɔ akeke zí í, ḿbiŋ te véŋ ŋ́gɛ, mɛ́ etshí á ayiŋne na, á mvhɔ eshhʉ̄ pɔ́p, mbɔɔ ánɛ apū zɔ́p ɔ́. Ndém á ghʉ, epuɔ puɔ mɛ́t, é zím ánɛ lewhʉ̄, pɔ́ a Klísto é sáʼ ŋgɔŋ, ánɛ meŋguʼ ntsāʼ.

⁵ E é si ŋgɔ́ mvhɔ lezīm ánɛ lewhʉ̄. Emɔ̄ʼ epuɔ pīi pɔ́ le kwhʉtéē, Ndém a lɛ te ghʉ̄ pɔ́ zím ánɛ lewhʉ̄ ɛ́, tɛ meŋguʼ ntsāʼ muɔ e eláʼ ntɔ́k.

⁶ Meshhʉ̄ mbɔŋ é si ŋgɔ́ epuɔ pīi, Ndém a á ghʉ pɔ́ zím ánɛ lewhʉ̄. Ánɛ mvhɔ lezīm ánɛ lewhʉ̄ jʉɔ mɛ́t, pɔ́ é si ŋgɔ́ epuɔ Ndém, pɔ́ té shʉʼ ezéŋ ekwhʉ́te emɔ̄ʼ legʉɔ ɔ́. Pɔ́ e shʉʼ egɔ́ éwɔ nnɔŋ‑epɔʼ Ndém, mbɔɔ epi Klísto. Pɔ́ a Klísto e esáʼ ŋgɔŋ, ánɛ meŋguʼ ntsāʼ mwɔ̄.

Sɛ́ta a á pú mbí

⁷ Meŋguʼ ntsāʼ mɛ́t e láʼ etɔ́k tɛ emi, mɛ́ ekɛ́ʼɛ á Sɛ́ta, éfhó á apeŋte efók á yí.

⁸ A ezéŋ ŋgʉɔ ŋghʉ̄, epuɔ ŋgɔŋ meshhʉ̄ lekua e efā nzhɛ. Mɛ́ tɔɔ́ŋ epuɔ mɛ́t lɛ Gɔ́ɔk mbɔɔ lɛ Magɔ́ɔk. A a shʉʼ ecúʼte á wɔ́p, á legʉɔ ndʉɔ́ʼ ncu. Nzwiŋ wɔ́p, é zaneé páʼ mvem asaŋasáŋá, á legʉ̄ŋ ntshi lā.

⁹ Meŋ jʉ́ɔ, pɔ́ pú njhʉ́ esī atsetsáʼ ntsem, ḿbú ŋkɛ́nne á tésɔŋ epuɔ Ndém, á tésɔŋ yīi, Ndém a kɔ̄ɔŋ. Táʼ, mmɔʼ mmók é piŋ efhó á lephū, ḿbú mbík á wɔ́p.

¹⁰ Ŋ́gɔ́ mé Sɛ́ta, á ŋiŋ yīi a á nɔŋ ŋghʉ̄ɛ pɔ́ faa nzhɛ, mɛ́ tshóne á yí mmāʼ á ntē mía mía mmók meka, á lezēŋ na pɔ́ ntaŋ‑mela ŋ́gɛ, yí é ntswi‑ŋke Ndém. Pɔ́ e náŋ enáŋa éwú á ntē ŋgeŋge, étsōʼ pɔ́ ezokó á lemiʼɛ.

Ndém a á ega nzáʼa ntsaŋ

¹¹ Á tɔ́k épúp, meŋ jʉ́ɔ mmɔʼ mía mía féfhɔ́ akɔʼ lefɔ, mbɔɔ ŋiŋ yīi a naáŋ éwú. Esī atsetsáʼ pɔ́ lephū é pú mmī á mvhɔ yí, tɛ mɛ́ té zéŋ njʉ́ɔ ɔ́.

¹² Meŋ zéŋ njʉ́ɔ epuɔ pīi, pɔ́ lē ŋkwʉ́te, mémía epuɔ mbɔɔ epuɔ pīi é mɛɛ̄ emɛ ŋgɔ́, pɔ́ tshíte á ajʉʼ, á mvhɔ akɔʼ lefɔ mɛ́t, ńjʉ́ɔ mɛ́ ŋáʼa membúʼ aŋwaʼne. Ńzéŋ jʉ́ɔ mɛ́ ŋáʼa mmɔʼ lepúʼ aŋwaʼne, é gɔ́ etsi, mɛ́ le tí nzēŋ epuɔ pīi, pɔ́ wɛɛ̄ lenāŋ leswhī éwú. Mɛ́ fhó ánɛ mefaʼ awíɛ awíɛ mīi, a le ghʉ̄ʉ̄, mɛ́ tí á ntē meŋwaʼne, tɛ́ nzáʼ ntsaŋ zi.

¹³ Epuɔ pīi, ntshi é le lɔ̄k á wɔ́p, pɔ́ zéŋ efhó á ntshi ntóte. Lewhʉ̄ á tsɔ́ʼ epuɔ pīi, pɔ́ lē ŋkwhʉ́te. Alāʼ mepfhō, á tsɔ́ʼ epuɔ pīi pɔ́ lē ŋkwhʉ́te. Mɛ́ fhó ánɛ mefaʼ awíɛ awíɛ, ńzáʼ ezi ntsaŋ.

¹⁴ Mɛ́ maʼ á lewhʉ̄ pɔ́ apwɛt, á ntē mía mía mmók. Lemaʼ á wɔ́p, á ntē mía mía mmók mɛ́t, a á si ŋgɔ́ á lezēŋ ŋkwhʉ́ mmɔʼ legʉɔ.

¹⁵ Mɛ́ le zéŋ mbú ḿmāʼ á ŋiŋ ntsem yīi, lezēŋ tsí é lɛ te nti tií á ntē aŋwaʼne nzēŋ epuɔ pīi, pɔ́ wɛɛ̄ lenāŋ leswhī ɛ́, á ntē mía mía mmók.