Menjʉɔ te lí 2 - Eka Eswhī

Akɛtte zīi, Yɛɛ́so a túɔ́ á mbū alúŋ epuɔ Yɛɛ́so á tésɔŋ Efɛze

¹ Tí á mbū cɔʼ Ndém yīi, a cʉtɛ alúŋ epuɔ Yɛɛ́so zīi, á tésɔŋ Efɛze ŋ́gɛ: «Ŋiŋ yīi a wɛɛ̄ mecɔʼ saŋ esambīa ánɛ apū ete zí, ńnɔŋ nzīŋɛ á tsetsɛlɛ etsō esambīa tsīi, mɛ́ le lɔ̄k á gɔ́ɔl tɛ́ ncūŋte, mɛ́ tshíɛ meláam éwú, a á si ndʉ́ɛ́ ŋ́gɛ:

² Meŋ á si nzhɛ́ɛ mefaʼ mú, ńnɔŋ nzhɛ́ɛ ŋgʉɔ̄ʼ zīi, o ó si njʉ́ɔ éwú, ńnɔŋ nzhɛ́ɛ páʼ o ó si ŋkāka ete ánɛ mefaʼ mɛ́t. Ńnɔŋ nzhɛ́ɛ páʼ, o gɔ le véŋ á légɛ, pɛ a wɔ fʉʼte‑menu tepɔŋ, e enáŋ á. O ke zwíʼ epuɔ pīi, pɔ́ é si ŋ́gɛ pɔ́ é meziŋ‑ntō, mbiŋ nzī te epiɛ́ ɛ́, ńjʉ́ɔ pɔ́ gɔ́ áa wɔ táŋ‑mela.

³ O ke kāk ete, ńjʉ́ɔ ŋgʉɔ̄ʼ melaʼ mīi o ó si eshúŋɔ anu zá. O te ká á lekak ete ɛ́.

⁴ Táʼ, o wɛɛ̄ á taʼ alɔ́ʼ yīi, meŋ gɔ á eshúŋ wu, á gɔ́ á légɛ, o te zɛ́ ŋkɔ̄ŋɔ á gá páʼ, o lɛɛ́ ŋkɔŋɔ á gá épúp ɔ́.

⁵ Kímte ndéŋté yīi, o le tshí éwú, tɛ́ efhó éwú ŋgwhʉ̄ á esī. Ŋ́gɔ̄ nnɛ̄t ju, ŋ́gwáʼ atswhī tepɔŋ jú, ńcʉ́ʼɛ ŋghʉ̄ɛ áa mefaʼ mīi, o lɛɛ́ nzi ŋghʉ̄ɛ efʉʼ mvhɔ. Tɛ ŋgɔ́ te épúp ɔ́, mbɔ meŋ a shʉʼ shʉʼe, ékú á ajū mīi o tshíɛ á láam wu éwú. O gɔ́ te gɔ̄ nnɛ̄t ju, ŋ́gwáʼ atswhī tepɔŋ jú ú, mbɔ meŋ a shʉʼ eghʉ épúp.

⁶ Táʼ, ajū mīi meŋ á ké njʉ́ɔ ŋ́gɛ, o ó éwú nnɔŋ ŋghʉ̄ɛ á mbɔŋɔ́, á si ŋgɔ́ páʼ, ŋghʉʉ́‑menu epuɔ nnɔ yīi, mɛ́ tɔ́ŋɔ lɛ Nikolayit, é si mbékɛ á wú, páʼ é pékɛ á gá azá épúp.

⁷ Ŋiŋ a wiɛ metuúŋ á lelɔk njúʼ ejʉʼ, á júʼ ajū mīi, Azwakne Ndém á si ndʉ́ɛ́, á mbū melúŋ epuɔ Yɛɛ́so. Ŋiŋ yīi a á lʉɔ́ʼ tɛ njhʉ́, meŋ a shʉʼ eyá ntá athʉ́ zīi, é ghʉɛ mɛ́ gɔ́ɔ éwú, a ejhʉ́. Athʉ́ mɛ́t á tshií á ŋkāʼ ŋgālɛ Ndém, á athʉ́ lephū. »

Akɛtte zīi Yɛɛ́so a túɔ́ á mbū alúŋ epuɔ Yɛɛ́so á tésɔŋ Smiine

⁸ Tí á mbū cɔʼ Ndém yīi, a cʉtɛ alúŋ epuɔ Yɛɛ́so zīi, á tésɔŋ Smiine ŋ́gɛ: «Ŋiŋ yīi a á Nzií, ńzéŋ ŋgɔ́ Nzokó, á ŋiŋ yīi a le kwhʉ́ʉ̄, ḿbiŋ nzím ánɛ lewhʉ̄, a á si ndʉ́ɛ́ ŋ́gɛ:

⁹ Meŋ á si nzhɛ́ɛ ŋgʉɔ̄ʼ ju, ńnɔŋ nzhɛ́ɛ páʼ o ó ntē mbūŋ. Táʼ, o ké ŋgɔ́ á ŋgaŋ azō. Meŋ á si nzhɛ́ɛ nzɔ zīi, epuɔ pīi pɔ́ é si ŋ́gɛ, pɔ́ é epuɔ Yúda, ńdɔkɔ ntaŋá mela, é si ndɔ̄kɔ nzɔ̄ɔ á wú. Pɔ́ é si ŋgɔ́ nnɔ epuɔ pīi, pɔ́ wuʼtɛ á Sɛ́ta.

¹⁰ Ndɛ́ʼ o epɔ́k ŋgʉɔ̄ʼ zīi, o gʉɔ mé njʉ́ɔ. Júʼɔ́, Sɛ́ta a shʉʼ egɔ emɔ̄ʼ megaŋ nnɔ pɛ, émaʼte á wɔ́p á ŋgyā atʉɛ́, élɔkɔ etátɛ á wɛ́. Púp, pɛ enáŋ á ntē ŋgʉɔ̄ʼ eleʼé legēm. Pɛ eké efɛ́ nnɛ̄t ŋgyá áa mbū meŋ, tɛ ndáʼ ŋkwhʉ́. Pɛ ghʉɛ épúp, mbɔɔ pɛ e fú eta á lezēŋ Ndém.

¹¹ Ŋiŋ a wiɛ metuúŋ á lelɔk njúʼ ejʉʼ, á júʼ ajū mīi, Azwakne Ndém á si ndʉ́ɛ́, á mbū melúŋ epuɔ Yɛɛ́so. Ŋiŋ yīi a á lʉɔ́ʼ tɛ njhʉ́, a te shʉʼ ekwhʉ́ ekó ezéŋ ekwhʉ́ ɛ́. »

Akɛtte zīi Yɛɛ́so a túɔ́ á mbū alúŋ epuɔ Yɛɛ́so, á tésɔŋ Pɛɛgam

¹² Tí á mbū cɔʼ Ndém yīi, a cʉtɛ alúŋ epuɔ Yɛɛ́so zīi, á tésɔŋ Pɛɛgam ŋ́gɛ: «Ŋiŋ yīi a wɛɛ̄ ŋŋí ncu é swíne, ńdó meshhʉ̄ mbīa, a á si ndʉ́ɛ́ ŋ́gɛ:

¹³ Meŋ á si nzhɛ́ɛ á ajʉʼ zīi, o naáŋ éwú. Á si ŋgɔ́ á ajʉʼ zīi, Sɛ́ta a náŋa éwú esáʼa lefɔ tsí. O naáŋ éwú épúp páʼā, ŋ́ké nzɛ́t ntswiʼnɛ ntsēŋnɛ áa ánɛ meŋ. O la néŋ té fɛ́ nnɛ̄t ŋgyá áa mbū meŋ ɛ́. Tɛ mbɔɔ ánɛ meleʼé mīi, mɛ́ le zwhí á Aŋtioas á alāʼ pɛ, á ajʉʼ zīi Sɛ́ta a naáŋ éwú lā. Aŋtioas wuɔ mɛ́t, a lɛ á ŋiŋ yīi a tswii á légɛ anu zá á anuúne.

¹⁴ Táʼ, o wɛɛ̄ á taʼ alɔ́ʼ yīi, meŋ gɔ á eshúŋ wu: emɔ̄ʼ epuɔ é nnɔ pɛ, ŋ́kúʼte anu zīi, Balam a zíʼnɛ epuɔ. Balam wuɔ mɛ́t, a le ték á efɔ Balak ŋ́gɛ, a etáte epuɔ Islaɛl, ńdɔkɔ efāʼa ŋ́gɛ, pɔ́ epfɛ́t mbap zīi, mɛ́ é lɔk ntsɔ́ʼ afɛʼ á mbū mesī, ńzéŋɛ ndɔkɔ efāʼa ŋ́gɛ, pɔ́ eghʉ̄ á agā.

¹⁵ Emɔ̄ʼ epuɔ é zeéŋ ŋgɔ́ á nnɔ pɛ, ńnɔŋ ŋkúʼtɛ anu zīi, epuɔ nnɔ Nikolayit é zíʼnɛ.

¹⁶ Ké ŋgɔ̄ nnɛ̄t ju, ŋ́gwáʼ atswhī tepɔŋ jú, tɛ ŋgɔ́ te épúp ɔ́, mbɔ meŋ te e náŋ á gá á leshʉʼ ndʉɔ́ʼ epuɔ puɔ mɛ́t, mé ŋŋí ncu zīi, e túɔ́ á nchu meŋ ɛ́.

¹⁷ Ŋiŋ a wiɛ metuúŋ á lelɔk njúʼ ejʉʼ, á júʼ ajū mīi, Azwakne Ndém á si ndʉ́ɛ́, á mbū melúŋ epuɔ Yɛɛ́so. Ŋiŋ yīi a á lʉɔ́ʼ tɛ njhʉ́, meŋ a shʉʼ eyá á yí etsō lejhʉ̄ tsīi, mɛ́ tɔ́ŋɔ lɛ máane, mbɔ mɛ́ le lʉ̄ɔ̄. Ézéŋ eyá á yí mmɔʼ fhɔ́ tɔ́, lezēŋ leswhī e egɔ́ nti tií éwú, lézēŋ tsīi ŋiŋ a te si nzhɛ́ɛ ɛ́, ńdaʼ ŋiŋ yīi, meŋ á yá á tɔ́ mɛ́t á mbū yí. »

Akɛtte zīi Yɛɛ́so a túɔ́ á mbū alúŋ epuɔ Yɛɛ́so á tésɔŋ Tiatii

¹⁸ Tí á mbū cɔʼ Ndém yīi a cʉtɛ alúŋ epuɔ Yɛɛ́so zīi, á tésɔŋ Tiatii ŋ́gɛ: «Méŋ Ndém, á ŋiŋ yīi menēk mí é kɛʼɛ̄ ejʉʼ páʼ melē mmók lā, mekhu mí é ŋwaŋne páʼ mmɔʼ ntií atʉɛ́ zīi, mɛ́ tok lā, a á si ndʉ́ɛ́ ŋ́gɛ:

¹⁹ Meŋ á si nzhɛ́ɛ mefaʼ mú. Ńnɔŋ nzhɛ́ɛ ŋkɔŋne zīi, o wɛ̄ɛ. Ńnɔŋ nzhɛ́ɛ páʼ o fɛɛ́ nnɛ̄t, ŋ́gyá á mbū meŋ épúp. Ńnɔŋ nzhɛ́ɛ mefaʼ mīi, o ghʉɛ ndɔ̄kɔ ntswítɛ epuɔ. Ńnɔŋ nzhɛ́ɛ páʼ, o kaāk ete épúp. Ńnɔŋ nzhɛ́ɛ á légɛ, mefaʼ mīi o ó si ŋghʉ̄ɛ tsetsɔŋɔ, é zaá ntɔ́k emi, o le zī á leghʉ.

²⁰ Táʼ, o wɛɛ̄ á taʼ alɔ́ʼ yīi, meŋ gɔ á eshúŋ wu: á gɔ́ lɛ̄ɛ, Jezabɛl a á si ŋghʉ̄ɛ akɔ̄ lɛ́, pɛ nɔ̄ɔŋ mvéŋ veéŋ. Menzwí wuɔ mɛ́t, a á si ndʉ́ɛ́ ŋ́gɛ, yí é si ŋgɔ́ á ntswi‑ŋke Ndém, ńzíʼnɛ wɔ júʼ‑nchu pá ŋ́gɛ, pɔ́ efhó ánɛ mɛnzhɛ mbɔŋ ntó, ńcʉ́ʼɛ ŋghʉ̄ɛ áa agā, ńzéŋ mpfɛ́t mbap zīi, mɛ́ lɔk ntsɔ́ʼ afɛʼ á mbū mesī.

²¹ Meŋ á yá á yí njhʉ̄ á lelɔk ŋgɔ̄ nnɛ̄t zi, ŋ́gwáʼ atswhī tepɔŋ zí, a piīŋ te si ŋkɔ̄ŋɔ á legɔ nnɛ̄t zi, ŋ́gwáʼ á yí á lezēŋ ŋghʉ̄ á agā á.

²² Awuɔ yīi meŋ gɔ á ntswíʼ yí emaʼ á ekó lā, a ejʉ́ɔ á tenté ŋgʉɔ̄ʼ, pɔ́ a epuɔ pīi pɔ́ ghʉɛ agā. Ńdaʼ éyi, epuɔ mɛ́t é gɔ nnɛ̄t zɔp, ŋ́gwáʼ mefaʼ tepɔŋ mīi, a zíʼnɛ á wɔ́p.

²³ Meŋ a shʉʼ eghʉʉ, ewɔŋkhʉ̄ pí e ekwhʉ́te, púp melúŋ epuɔ Yɛɛ́so ntsem e ezhɛ́ á légɛ, meŋ á si ŋgɔ́ á ŋiŋ yīi, a zhɛɛ́ ajū mīi, ŋiŋ a á ntē yí ŋkwāŋtɛ, ńzhɛ́ azi ŋiŋ a á si ntsáa. Meŋ a shʉʼ efhó ánɛ mefaʼ awiɛ́ awiɛ́ á nnɔ pɛ, tɛ́ ezápa azí anu á alá apū yí.

²⁴ «Ŋ́gɔ́ mé pɛ epuɔ Yɛɛ́so pīi, pɔ́ Tiatii, ńnɔŋ te nzīŋɛ ánɛ mɛnzhɛ yīi, Jezabɛl a zíʼnɛ ɛ́, ńnɔŋ te fāʼa á lezhɛ̄ ajū mīi, mɛ́ tɔ́ŋɔ lɛ̄ɛ, ntsem Sɛ́ta á, meŋ nɔ̄ɔŋ ndʉ́ɛ́ á mbū pɛ ŋ́gɛ, meŋ gɔ le tshí amɔ̄ʼ apiʼ ndɛʼɛ á athū pɛ ɛ́.

²⁵ Ńdaʼ ŋ́gɛ, lefɛ̄ nnɛ̄t yīi pɛ wɛɛ̄, pɛ ekúʼte tɛ a etē, tɛ meŋ ndáʼ mbīŋ nzem.

²⁶ «Meŋ a shʉʼ eyá mete á lelɔk esáʼ elāʼ elāʼ, á mbū ŋiŋ yīi, a á lʉɔ́ʼ tɛ njhʉ́. Á ŋiŋ yīi a á ghʉ mefaʼ mīi, meŋ á si ŋkɔ̄ŋɔ, tɛ ndáʼ nzōko.

²⁷ A elɔ̄k mete mɛ́t, ésáʼ epuɔ té ŋiŋ ŋŋíʼne á yí. Ŋ́kīne á wɔ́p, páʼ mɛ́ kinɛ ŋgwʉ́ŋ lā.

²⁸ Meŋ a shʉʼ eyá mete mɛ́t á mbū yí épúp, páʼ meŋ nde zī ŋgē ewɛ azá, Mɔʼɔ́ ga mé yá lā. Meŋ shʉʼ ezéŋ eyá á cɔʼ saŋ yīi, a phʉ́ɛ melanjhʉ̄ á mbū yí.

²⁹ «Ŋiŋ a wiɛ metuúŋ á lelɔk njúʼ ejʉʼ, á júʼ ajū mīi, Azwakne Ndém á si ndʉ́ɛ́, á mbū melúŋ epuɔ Yɛɛ́so. »