Menjʉɔ te lí 19 - Eka Eswhī

Azɔp á lelɔk ŋkák

¹ Á tɔ́k épúp, meŋ zéŋ njúʼ mmɔʼ mía ŋghi, páʼ ŋghi atʉtʉ epuɔ lā, é gɔ́ á lephū ndʉ́ɛ́ ŋ́gɛ: «Alelúya, Ndém mé ghʉʉ̄, ŋiŋ á tswɛ́t. Awuʼte pɔ́ mete ntsem, e epú ŋgɔ́ á mbū Ndém yímpɛ.

² Melaʼ mīi, a lɔɔ̄k anuúnē pɔ́ ndeŋ ndeŋ, tɛ́ nzáʼ ntsaŋ. A á ghʉ, mía mía ŋgaŋ agā menzwí yīi, a lɛɛ́ ndɔkɔ agā mbōko esī atsetsáʼ ntsem, á lákne. Ŋgaŋ agā menzwí wuɔ mɛ́t, a le pfɛttē metshi megaŋ afaʼ Ndém, Ndém a á ké ntsɔ́ʼ epak ánɛ yí. »

³ Atʉtʉ epuɔ mɛ́t, á zéŋ ndé leswhī leswhī ŋ́gɛ: «Alelúya, páʼ tésɔŋ wuɔ mɛ́t, a á pú eshhʉ́ lā, ŋghī mmók e fú enáŋa efhɔ́ɔ éwú, ékɔ́ʼɔ á meŋguʼ meŋguʼ. »

⁴ Epɔ̄ melʉɛ ntsɔp lekua megēm mbīa, mbɔɔ mena lekua pwɔ̄, é tswíʼte, ŋ́ŋɔ́ʼne tɛ ethū tsɔ́p é pfeŋ esī, á mvhɔ Ndém páʼ a naáŋ ánɛ akɔʼ lefɔ, ŋ́gūʼte á yí ndé ŋ́gɛ: «Á épúp, Alelúya. »

Lekāk Mɔ́ Njʉnjhʉ

⁵ Mmɔʼ ŋghi é fhó ánɛ ajʉʼ akɔʼ lefɔ, ńdé ŋ́gɛ: «Pɛ metsem, megaŋ afaʼ Ndém, á wɛ́ pīi, pɛ juúʼ nchu yí, mémía epuɔ mbɔɔ epuɔ pīi é mɛɛ̄ emɛ ŋgɔ́, pɛ ewūʼte á Ndém yímpɛ. »

⁶ Meŋ zéŋ njúʼ mmɔʼ ŋghi, é gɔ́ páʼ ŋghi atʉtʉ epuɔ lā, ńnɔŋ nzwɛ̄nɛ páʼ amaane ntshi, mbɔɔ páʼ mía mía lefaŋ lā, ńdʉ́ɛ́ ŋ́gɛ: «Alelúya, Atsyapuɔ Ndém yímpɛ a á Atsyantsɔp, a á ghʉ mɛ́ jʉ́ɔ lefɔ tsí.

⁷ Ḿpɛ egáŋte ŋkák, ŋ́gyá mekuʼ á mbū Ndém melaʼ mīi, afʉʼ zīi Mɔ́ Njʉnjhʉ a gʉɔ mé ndaá ŋgyā, á kuʼ. Nzwí yi, a á ndáʼ ntswīŋ nnɛ̄t, tɛ nnɔ̄ŋ nzwíʼtɛ.

⁸ Mɛ́ é yá nzhó ŋ́gɛ, a emāʼ ánɛ yí, nzhó mɛ́t é nɔŋ ŋgwāŋnɛ lɛ sɛ́t, nchʉ́ é pú te éwú ú, mbɔ mɛ́ le lɔ̄k mmɔʼ ntií ndap, mɛ́ tɔ́ŋ lɛ lɛ́ɛŋ, tɛ́ mbáʼ. » Ntií nzhó jʉɔ mɛ́t, e é si ndɔk ŋgɔ́ á ayiŋne mefaʼ mbɔŋ epuɔ Ndém.

⁹ Taʼ cɔʼ Ndém, á lé mé meŋ ŋ́gɛ: «Tí ŋ́gɛ: Meshhʉ̄ mbɔŋ é si ŋgɔ́ epuɔ pīi, mɛ́ é tɔ́ŋ á wɔ́p ánɛ lekāk alaá‑ŋgyā Mɔ́ Njʉnjhʉ. » Ńzéŋ ndé á mbū meŋ ŋ́gɛ: «Meshuŋne muɔ, é si ŋgɔ́ meshuŋne, ńtúɔ́ á nchu Ndém. »

¹⁰ Meŋ ndɛ̄ɛ ntswíʼte á mekhu yí, ŋ́ŋɔ́ʼne tɛ athū á pfeŋ esī, ŋ́gɔ̄ á ŋguʼté á yí, tɛ́ á lé mé meŋ ŋ́gɛ: «Ndɛ́ʼ o eghʉ̄ épúp. Meŋ á azá ŋgaŋ afaʼ Ndém páʼ wu, mbɔɔ páʼ epɔ̄ memía pú pīi, pɔ́ ziŋɛ ánɛ mekhu Yɛɛ́so. Ndém tɛ́ o pɔŋteé á lewuʼte. » Anuúnē zīi Yɛɛ́so a le ziʼné epuɔ, aziɛ́ mé tshoneé á ŋiŋ á letswi ŋke yí.

Nzaʼ‑Ŋkhʉ a á jhʉ́ ncu

¹¹ Meŋ ndɛ̄ɛ njʉ́ɔ, lephū é tsɔ́ʼɔ ntshí, ńjʉ́ɔ á féfhɔ́ lʉ́ɔ́ á ŋwak, ŋiŋ yīi a naáŋ á ndo éwú, lezēŋ tsí é gɔ́ lɛ Te sɛt‑nzem, mbɔɔ lɛ Nziŋ‑ndeŋ ndeŋ, a lɔɔ̄k á ndeŋ ndeŋ tɛ́ ndʉɔ́ʼ ncu, ńzéŋ ndɔ̄k á ndeŋ ndeŋ tɛ nzáʼ ntsaŋ.

¹² Menēk ŋgaŋ, é gɔ́ páʼ melē mmók lā, mecɔʼ lefɔ tɛ nzáne é tɔʼte á athū yí, mmɔʼ lezēŋ é tíne ánɛ yí, ŋiŋ á nɔŋ te nzhɛ́ɛ ajū mīi, é lɔkɔ ndʉ́ɛ́ ɛ́, ńdaʼ yí.

¹³ Á maʼ nzhó efwɔ̄k ánɛ yí, mbɔ mɛ́ nnōʼ á ntē metshi. Lezēŋ tsīi mɛ́ lɔkɔ ntɔ́ŋɔ á yí é gɔ́ lɛ, Ashuŋne Ndém.

¹⁴ Wɔ lʉɔ́ʼ‑ncu pīi, pɔ́ é athʉ́ lephū, é gɔ́ á nzem nzhɛ̄nɛ á yí, ńnáŋte azɔ́p ánɛ meféfhɔ́ melʉ́ɔ́, ńzwík mefhɔ́ menzhó, mɛ́ lɔk á lɛ́ɛŋ tɛ́ ncūŋte, é láne lɛ kwɛ́t.

¹⁵ Mmɔʼ ŋŋí ncu é nɔŋ ntúɔ́ á nchu yí, ŋ́gɔ́ á swíswí, á lɔkɔ ŋgɔ̄ á ndʉɔ́ʼ ŋgɔŋ ntsem. A a lʉɔ́ʼ tɛ ejhʉ́, ésáʼ á wɔ́p, té ŋiŋ ŋŋíʼne á yí. Éneŋte á wɔ́p páʼ mɛ́ neŋtɛ ntá athʉ́, ńdɔkɔ ŋkíɛ́ meluʼ lā. Éghʉ épúp, é lɔkɔ tswi azāŋalɔ́ŋ Atsyantsɔp Ndém.

¹⁶ Mmɔʼ lezēŋ é tíne ánɛ nzhó efwɔ̄k zi, mbɔɔ ánɛ ntā yí, ŋ́gɔ́ lɛ: «Efɔ mefɔ, mbɔɔ lɛ Atsyantsɔp. »

¹⁷ Meŋ zéŋ njʉ́ɔ á taʼ cɔʼ Ndém, á tshí ánɛ lezēk nu, ńnɔŋ ŋgāʼtɛ mé ŋghi teté, á mbū meséŋ ntsem pīi, é nnɔŋ ŋghítɛ á tɛ athʉ́ lephū ŋ́gɛ: «Pɛ eshʉ̄ʼ, ńcúʼte, ńjhʉ́ á mía mía lekāk Ndém,

¹⁸ ḿpfɛ́t mbap nnɛ̄t mefɔ, mbɔɔ ezi wɔ tɛŋgyā memía mennɔ ncu, mbɔɔ ezi mete epuɔ, mbɔɔ ezi melʉ́ɔ́ pɔ́ epuɔ pīi, pɔ́ naŋteé á ndo éwú, mbɔɔ ezi epuɔ menɔŋ metsem, tɛ a láʼa ke gɔ́ á ŋiŋ yīi, a naáŋ á ŋga athū yí, tɛ a láʼa ke gɔ́ á ŋiŋ yīi, a á apuʼ, tɛ a láʼa ke gɔ́ mémía epuɔ ká epuɔ pīi é mɛɛ̄ emɛ ŋgɔ́.

¹⁹ Meŋ zéŋ jʉ́ɔ á na, mbɔɔ mefɔ ŋgɔŋ ntsem, ŋ́ghʉ̄ wɔ maʼ‑ncu pɔ́p, pɔ́ cúʼte ŋgɔ̄ á ndʉɔ́ʼ ŋiŋ yīi, a naáŋ ánɛ féfhɔ́ lʉ́ɔ́, ézéŋ elʉɔ́ʼ eyí nnɔ ncu.

²⁰ Mɛ́ gɔ á na, ńzéŋ ŋgɔ̄ á ntaŋ‑mela ŋ́gɛ, yí é ntswi‑ŋke Ndém. Mbɔ a le ghʉ̄ meŋkʉʼne menu, á mvhɔ na mɛ́t, ńdɔk ŋghʉ̄, epuɔ pīi pɔ́ le tswí ayiŋne na, ńnɔŋ ŋgūʼtɛ akeke zí, é fa nzhɛ. Mɛ́ gɔ á na, pɔ́ ntaŋ‑mela mɛ́t, ḿmāʼ á wɔ́p nte, á ntē mmók meka.

²¹ Ŋiŋ yīi a á nnáŋ ánɛ féfhɔ́ lʉ́ɔ́, á lɔk ŋŋí ncu zīi, e é nnɔŋ efhɔ́ɔ á nchu yí ntúɔ́, ńzwhíte nnɔ ncu na. Meséŋ ntsem, é shʉʼ mpfɛ́t mbap nnɛ̄t zɔp tɛ nzwɛ́t.