Menjʉɔ te lí 18 - Eka Eswhī

Ndém a á ega ŋghʉ̄ɛ, tésɔŋ Babilɔn á pú ndáknɛ

¹ Meŋ zéŋ njʉ́ɔ, mmɔʼ cɔʼ Ndém á fhó á lephū esóʼo, ŋ́gwɛ̄ á mía mete. Shʉ́shɔ́k yi á pú ŋkɛ̄ʼɛ esī atsetsáʼ.

² Á gaʼte mé ŋghi teté, ńdé ŋ́gɛ: «Mía mía tésɔŋ Babilɔn a á pú ndákne, a á pú ndákne. A á pú ncʉ́ʼ lenaŋá mesī, ńcʉ́ʼ ŋka etsō tepɔŋ. Ŋ́gɔ́ ajʉʼ zīi, meséŋ nzhɛ, mbɔɔ [mena nzhɛ ntsem] pīi mɛ́ ŋyaŋnɛ, é naŋteé éwú.

³ Á épúp melaʼ mīi, agā á le pɔ̄ŋ á yí, páʼ meluʼ é pɔŋɔ epuɔ menɔŋ lā, á pú ndɔ̄k ḿbōk ŋgɔŋ ntsem. Pɔ́ a mefɔ esī atsetsáʼ, é ke ghʉ̄ agā. Megaŋ esaá ŋgɔŋ ntsem, é ke fhó ánɛ tsitsi tee nzwiŋ tésɔŋ wuɔ mɛ́t, ŋ́gúʼ. »

⁴ Meŋ zéŋ njúʼ mmɔʼ ŋghi ndɛʼɛ, é fhó á lephū, ńdé ŋ́gɛ: «Alāʼ zá lée. Pɛ efhó á ntē tésɔŋ wuɔ mɛ́t ntó, ḿbɔ́k á wɛ́ á lenēŋ azɛ́ apū, ánɛ mefa mɔ́p. Ḿbɔ́k ŋgʉɔ̄ʼ zīi, e gɔ egʉɔ á athū pɔ́p, á lekō á athū pɛ.

⁵ Mefa mɔ́p, é ke pú ncúʼɔ, ŋ́kɔ́ʼ tɛ mpfēŋ lephū. Ndém a á kímte mele anu mīi, pɔ́ gɛ efʉ̄ʼtɛ.

⁶ Mɛ́ eghʉ̄ ánɛ pɔ́p, ńdeŋ ndeŋ páʼ pɔ́ gɛ ŋghʉ̄ɛ ánɛ emɔ̄ʼ epuɔ épúp. Ŋgʉɔ̄ʼ zīi pɔ́ le néŋ á athū epuɔ, mɛ́ enéŋ á athū pɔ́p, tɛ e epú nzá ntɔ́k. A gɔ́ éyi pɔ́ le néŋ acɔkɔ́‑meluʼ, ánɛ taʼ ndɔ̄ŋ ŋgyá mé epuɔ, mɛ́ néŋ emɔ́p ndɔ̄ŋ pīa.

⁷ A gɔ́ éyi pɔ́ le náŋ á ntē lewūʼ, mbɔɔ á ntē lepɔŋ lɛ akɔ̄ lɛ́, mɛ́ zéŋ ŋghʉ̄ pɔ́ jʉ́ɔ ŋgʉɔ̄ʼ, mbɔɔ ŋgeŋge ndeŋ ndeŋ épúp. Mɛ́ eghʉ̄ épúp ánɛ tésɔŋ wuɔ mɛ́t, melaʼ mīi a á si ndʉ́ɛ́ á ntē yí ŋ́gɛ: “Meŋ naáŋ ánɛ akɔʼ lefɔ, ŋ́gɔ́ á mɛfɔ. Meŋ te á mpfók menzwí í, épīŋ le láʼ aleʼé ŋgɔ́ ánɛ lewhʉ̄ ɛ́.”

⁸ Melaʼ épúp tɛ́, ntií ntiī ŋgʉɔ̄ʼ jʉɔ páʼa, e shʉʼ etshí á taʼ aleʼé, épú eshʉʼ ánɛ yí: á lewhʉ̄, á lela, á afʉɔne. Mmók e epiŋ mbú ńtɔ̄ á yí. A shʉʼ egɔ́ épúp melaʼ mīi, Atsyapuɔ Ndém Ŋgaŋ mete ntsem mé zápa épúp. »

⁹ Mefɔ ŋgɔŋ ntsem e shʉʼ ejʉ́ɔ páʼ, tésɔŋ wuɔ mɛ́t, a á shhʉ́, tɛ ŋghī é nɔŋ ntúɔ́ éwú, égaʼte, éla mé ntseŋne. Pɔ́ a epuɔ tésɔŋ puɔ mɛ́t, é ke ghʉ̄ agā, ńnɔŋ nnáŋa á ntē lepɔŋ.

¹⁰ Mefɔ mɛ́t, e shʉʼ ejʉ́ɔ ŋgʉɔ̄ʼ zīi, tésɔŋ wuɔ mɛ́t a jʉ́ɔɔ, énɔŋ ecɔʼɔ, étshí á ndeŋɛ ndéŋɛ́, élé egɛ: «Mía mía tésɔŋ Babilɔn, á tésɔŋ, ḿbɔ́ŋ mete, a á eshhʉ̄ tepɔŋ, a á kwaʼ eshhʉ̄ tepɔŋ. Ndém a á lɛ ndɔ̄k áa taʼ leleŋ njhʉ̄, ŋ́ghʉ̄ á lákne. »

¹¹ Megaŋ esaá ŋgɔŋ ntsem é si ŋgaʼtɛ ndāa melaʼ tésɔŋ mɛ́t, melaʼ mīi ŋiŋ yīi, a a zéŋ ezó á tsitsi esaá wɔp, a te zɛ́t.

¹² Á tsitsi esaá páʼ gɔ́ɔl, páʼ atʉɛ́ ŋkāp, páʼ metɔ́ tee nzwiŋ, páʼ etók tshī lā. Ázō páʼ menzhó mīi, mɛ́ lɔɔ̄k mmɔʼ ntií ndap, mɛ́ tɔ́ŋ lɛ lɛ́ɛŋ tɛ́ mbáʼ, páʼ menzhó lefɔ, páʼ emɔ̄ʼ mepɔŋ menzhó, páʼ mmɔʼ ntií menzhó, ḿbāŋ lɛ gʉp lā. Ázō páʼ mmɔʼ ntií methʉ́ zīi, mɛ́ té gákne njʉ́ɔ ɔ́, páʼ ecū mīi mɛ́ lɔɔ̄k lesɔŋ eshʉ̄ɔ́ tɛ́ ncūŋte, páʼ methʉ́ mīi é teē nzwiŋ lā. Ázō páʼ mmɔʼ ntií atʉɛ́, páʼ atʉɛ́, páʼ mmɔʼ ntií metɔ́ lā.

¹³ Écū mīi mɛ́ tɔɔ̄, é lemtɛ azík mbɔŋ, páʼ kanɛl mbɔɔ amɔm, mbɔɔ míi, mbɔɔ aŋsaŋ lā, ŋ́ghʉ̄ emɔ̄ʼ melamńda. Ázō páʼ meluʼ, páʼ mevɛ̄t, páʼ afalíin, páʼ mvem etsō lā. Azō páʼ mefɔŋ, páʼ memvhō, páʼ melʉ́ɔ́, páʼ mekéléek lā. Ázō páʼ epuʼ, mbɔɔ páʼ epuʼ ncu lā.

¹⁴ Megaŋ esaá, e elé ánɛ tésɔŋ wuɔ mɛ́t gɛ: «Ajūɔ tsem zīi, o ke nɔ̄ŋ eshʉ́ɛ́ á lewɛ, á pú mmī tɛ ndaʼ. Lewūʼ cú pɔ́ lepɔŋ cú ntsem, é pú mmī, tɛ mɛ́ té láʼ ezéŋ lezēk éwú tshí ɛ́. »

¹⁵ Megaŋ esaá pīi, pɔ́ le táŋ esaá á tésɔŋ mɛ́t ndɔk ŋgúʼ, é shʉʼ ejʉ́ɔ ŋgʉɔ̄ʼ zīi, tésɔŋ wuɔ mɛ́t, a á jʉ́ɔ, énɔŋ ecɔʼɔ, étshí á ndeŋɛ ndéŋɛ́, égaʼte ela.

¹⁶ Énɔŋ elʉ́ɛ́ égɛ: «Mía mía tésɔŋ wuɔ a á eshhʉ̄ tepɔŋ, a á kwaʼ eshhʉ̄ tepɔŋ. Á tésɔŋ yīi mɛ́ le lɔ̄k menzhó lɛ́ɛŋ, mbɔɔ menzhó lefɔ, mbɔɔ mepaŋ menzhó, ńtswīŋ. Ńzéŋ ndɔ̄k emɔ̄ʼ ecū mīi, mɛ́ lɔɔ̄k á gɔ́ɔl, mbɔɔ metɔ́ pīi é teē nzwiŋ, mbɔɔ etók tshī, ńtswīŋ.

¹⁷ Ndém a á lɔk á taʼ leleŋ njhʉ̄, ńdɔk mbú ḿbík atʉtʉ lewūʼ mɛ́t. » Wɔ shuŋɔ‑mɛtúa ntshi, mbɔɔ epuɔ metsem pīi, pɔ́ lɔkɔ akɛnūʼ nzīŋɛ á mejʉʼ mejʉʼ, ńtáŋa esaá, ŋ́ghʉ̄ wɔ ghʉ afaʼ á ntē akɛnūʼ, mbɔɔ epuɔ metsem pīi, pɔ́ ghʉɛ afaʼ á ntē ntshi, ńdɔkɔ ŋgɔ́ɔ éwú, pɔ́ tshií azɔ́p á ndeŋɛ ndéŋɛ́,

¹⁸ ńnɔŋ njʉ́ɔ páʼ mía mía tésɔŋ, a á shhʉ́ tɛ ŋghī é nɔŋ ŋkɔ́ʼɔ, ŋ́gāʼte ndé ŋ́gɛ: «Nɔ́ŋ ntɔ́ŋɔ ŋ́gɛ, mmɔʼ mía mía tésɔŋ a lɛ te éwú, tɛ ntɔ́k á tésɔŋ wuɔ mɛ́t ɛ́. »

¹⁹ Ŋ́gē elé épúp, ńnɔŋ mbōko avhō, ŋ́gaʼtɛ ntshɔ́ɔ ntshi nnēk, ńdaa ndʉ́ɛ́ ŋ́gɛ: «Mía mía tésɔŋ wuɔ, á eshhʉ̄ tepɔŋ, a á kwaʼ eshhʉ̄ tepɔŋ. Mía mía tésɔŋ wuɔ mɛ́t, a ke lɔ̄k á tsitsi lewūʼ yi, ŋ́ghʉ̄, epuɔ metsem pīi, pɔ́ wɛɛ̄ mɛtúa ntshi, é wúʼ. Ndém a á lɔk á taʼ leleŋ njhʉ̄, ńdɔk mbú ḿbík. »

²⁰ Ajūɔ tsem zīi, á lephū, a egɔ́ á ntē lekāk, páʼ tésɔŋ wuɔ a á lákne lā. Pɛ azɛ́, épuɔ Ndém, mbɔɔ meziŋ‑ntō, mbɔɔ metswi‑ŋke Ndém, e ekák azɛ́, páʼ Ndém a á tswá epuɔ tésɔŋ mɛ́t, ánɛ menu mīi pɔ́ gɛ nzóko efʉ̄ʼtɛ, ánɛ pɛ.

²¹ Taʼ cɔʼ Ndém, ŋ́gwɛ̄ mete, á lɛ ŋŋāʼ á tɔ́, á gɔ́ páʼ mía aluŋne lā, ŋ́gē emaʼ á ntē mía ntshi, ńnɔŋ ndʉ́ɛ́ ŋ́gɛ: «Á páʼa tɛ́, mɛ́ e láʼ ezéŋ emaʼ á mía mía tésɔŋ Babilɔn á ntē mía ntshi, tɛ mɛ́ le láʼ nzéŋ á yí njʉ́ɔ ɔ́.

²² Púp, mɛ́ le zéŋ njúʼ azɔp wɔ púʼ‑akékwɛlé, mbɔɔ wɔ zɔp‑azō ɔ́. Mɛ́ le zéŋ njúʼ azɔp wɔ tɔ́ŋ‑ndendɔ̄ŋ, mbɔɔ wɔ tɔ́ŋ‑ntaŋ á tésɔŋ mɛ́t ɛ́. Mɛ́ le zéŋ tsɔ taʼ ŋgaŋ levho, á tésɔŋ mɛ́t njʉ́ɔ ɔ́. Mɛ́ le zéŋ njúʼ á ŋiŋ á legɔʼ azō ɔ́.

²³ Mmók láam, é le zéŋ á tésɔŋ ega mɛ́t ŋkɛ̄ʼ ɛ́. Mɛ́ le zéŋ njúʼ ŋghi tɛnzwí ŋge, pɔ́ nzwí yi á tésɔŋ ega mɛ́t ɛ́. A egɔ́ épúp melaʼ mīi, wɔ táŋ‑esaá é lɛ á tésɔŋ ega mɛ́t, ŋ́gɔ́ memía epuɔ á ndo esī atsetsáʼ. Á lɔk mekaŋ mí ŋghʉ̄, elāʼ elāʼ é fa nzhɛ. »

²⁴ Mɛ́ é jʉ́ɔ metshi metswi‑ŋke Ndém, mbɔɔ emi epuɔ Ndém, ŋ́ghʉ̄ emi epuɔ metsem pīi, mɛ́ le zwhí á wɔ́p á ndo esī atsetsáʼ, éwú.