Menjʉɔ te lí 17 - Eka Eswhī

Anu mía mía ŋgaŋ agā menzwí

¹ Á tɔ́k épúp, taʼ cɔʼ Ndém ánɛ mecɔʼ Ndém esambīa pwɔ̄ pīi, pɔ́ le wɛ̄ mendɔ̄ŋ esambīa á mbū pɔ́p lā, á tshóte nnɛ̄t, ńdé mé meŋ ŋ́gɛ: «Shʉʼɛ̄, meŋ etswī á wú páʼ, Ndém a a záʼ ntsaŋ mía mía ŋgaŋ agā menzwí épúp. Á mía mía tésɔŋ yīi, mɛ́ le kwɛ́t á legʉ̄ŋ amaane ntshi.

² Pɔ́ a mefɔ á esī atsetsáʼ, é ke ghʉ̄ agā. Agā mɛ́t á pú njhʉ́ epuɔ menɔŋ á ndo esī atsetsáʼ, páʼ meluʼ é jhʉ́ɛ á ŋiŋ lā. »

³ Azwakne Ndém á shʉʼ ŋkó ánɛ meŋ, cɔʼ Ndém á tswíʼ á gá, ńdɔk ŋgʉ̄ɔ mé késáatswɛt. Meŋ jʉ́ɔ taʼ menzwí á náŋ ánɛ na, na mɛ́t á paŋ lɛ gʉp, ethū tsí é gɔ́ esambīa, mendɔ̄ŋ é gɔ́ éwú legēm. Menzēŋ á lelɔk nzɔ̄te á Ndém, é tíne ánɛ yí.

⁴ Menzwí mɛ́t á maʼ memía menzhó, é paŋ lɛ gʉp. Ecū mīi a lɔɔ̄k ntswiŋ nnɛ̄t zi, é gɔ́ mbɔ mɛ́ le lɔ̄k á gɔ́ɔl, mbɔɔ metɔ́ tee nzwiŋ, mbɔɔ atók tshī tɛ́ ncūŋte. Á wɛ ndɔ̄ŋ á apū yí, mbɔ mɛ́ le lɔ̄k á gɔ́ɔl tɛ́ ncūŋte. Meyiŋne ntií ntiī epe yīi, é fhɔ́ɔ ánɛ agā zīi a ghʉɛ, é gɔ́ éwú tɛ ndó.

⁵ Mbɔ mɛ́ le tí mmɔʼ lezēŋ á mvhɔ eshhʉ̄ yí, ŋ́gɔ́ yīi ŋiŋ a gɔ le zhɛ́ ajū mīi, é lɔkɔ ndʉ́ɛ́, lezēŋ mɛ́t é gɔ́ lɛ: «Babilɔn mía mía tésɔŋ, mía megaŋ agā wɔnzwí, mía wɔ fʉʼ á ntií ntiī mele anu á ndo esī atsetsáʼ. »

⁶ Meŋ jʉ́ɔ á menzwí mɛ́t, mbɔ a á nnú metshi epuɔ tɛ mbía, métshi epuɔ Ndém, épuɔ pīi, pɔ́ shúŋɔ á ŋiŋ yīi, Yɛɛ́so a á ewiɛ́. Meŋ jʉ́ɔ á yí épúp, á pú ntsyā á gá tɛʼ.

⁷ Cɔʼ Ndém á lɛ ndé á mé meŋ ŋ́gɛ: «Akɔ̄ á tsyaa á wú ú? Meŋ a kɛ́ʼte eshúŋ á wú á ajū mīi, menzwí wuɔ mɛ́t, mbɔɔ na yīi, a naáŋ á ndo éwú lā, á lɔkɔ ndʉ́ɛ́. Á na wɔ̄ yīi, ethū tsí é esambīa, mendɔ̄ŋ mí é gɔ́ legēm lā.

⁸ Na yīi o ó jʉ́ɔ lā, a lɛ éwú, táʼ, a piīŋ te zɛ́t. A a shʉʼ efhó á ntē apeŋte, épe, Ndém a eghʉ̄ a elákne. Epuɔ menɔŋ á ndo esī atsetsáʼ pīi, Ndém a laá ntií nzēŋ mɔ́p á ntē aŋwaʼne nzēŋ epuɔ pīi, pɔ́ wɛɛ̄ lenāŋ leswhī, tɛ efhó páʼ, a le nɔ̄ŋ ŋgɔŋ ɔ́, e shʉʼ ejʉ́ɔ á na mɛ́t, anu a etsyā á wɔ́p, melaʼ mīi a lɛ éwú, éshʉʼ ŋkwhʉ́, a a fú ezéŋ eshʉʼe. »

⁹ Cɔʼ Ndém á tswiʼne ndé ŋ́gɛ: «Ajʉɔ ajʉʼ á si nzɛ́ttɛ ŋ́gɛ, ŋiŋ a ewɛ̄ leghi pɔ́ azhɛ̄‑anu, tɛ́ ndɔk njúʼ. Ethū na cɔ̄ esambīa, é si ŋgɔ́ mekwɛ̄t esambīa mīi, menzwí wɔ̄ a naáŋ éwú, ńzéŋ ŋgɔ́ mefɔ esambīa.

¹⁰ Epi métáa á nnɔ pɔ́p é té zɛ́t, taʼ á náŋ ánɛ akɔʼ lefɔ, mmɔʼ taʼ á zɛ́t té shʉʼ. A a ké eshʉʼ shʉʼe, énáŋ ánɛ akɔʼ lefɔ, áa méŋ afʉʼ lɛ̄ɛ.

¹¹ Na yīi a lɛ éwú, á piīŋ te zɛ́t lā, a á si ŋgɔ́ á efɔ mbáte lefaá. A á azí, á nnɔ epi emɔ̄ʼ mefɔ esambīa. A a shʉʼ epiŋ nzem, Ndém a eghʉ̄ a elákne.

¹² «Ŋ́gɔ́ mé mendɔ̄ŋ legēm mīi, o ó jʉ́ɔ lā, mbɔ é si ŋgɔ́ mefɔ legēm pīi, pɔ́ zɛɛ́t te zi á lesāʼ lefɔ. Táʼ, pɔ́ a na é ké epúte esáʼ lefɔ, ánɛ taʼ leleŋ njhʉ̄.

¹³ Mefɔ puɔ mɛ́t legēm, é pú ŋgwɛ̄ áa taʼ akwaŋte. Á gɔ́ á lelɔk mete pɔ́ mbʉʼ zɔp, éfāʼ á mbū na.

¹⁴ Pɔ́ e shʉʼ elʉɔ́ʼ á Mɔ́ Njʉnjhʉ, a eké njhʉ́ á wɔ́p, melaʼ mīi, a á Atsyantsɔp, ŋ́gɔ́ á Efɔ mefɔ. Pɔ́ a epuɔ pīi, a le tɔ́ŋ á wɔ́p, ŋ́kāŋ á wɔ́p, épuɔ pīi pɔ́ juúʼ nchu yí té sɛt, mé epú njhʉ́ɛ á wɔ́p épúp. »

¹⁵ Cɔʼ Ndém á zéŋ ntswīʼne ndé mé meŋ ŋ́gɛ: «Amaane ntshi zīi o ó jʉ́ɔ, ájʉʼ zīi ŋgaŋ agā menzwí a naáŋ éwú, é si ŋgɔ́ á mía nnɔ, ŋ́gɔ́ epuɔ pīi, é shúŋɔ tɛ mbɔɔ aziɛ́ alāʼ lɛ́, épuɔ elāʼ ntsem, épuɔ ŋgɔŋ ntsem.

¹⁶ Mendɔ̄ŋ legēm mīi, o ó jʉ́ɔ, mbɔɔ na, pɔ́ e shʉʼ epa á ŋgaŋ agā menzwí, ékú á tsitsi yi, tɛ a ecʉ́ʼ mbū ŋiké. Pɔ́ epfɛ́t mbap nnɛ̄t zi, ńtɔ̄ á avuʼ á mmók.

¹⁷ Éghʉ épúp melaʼ mīi, Ndém á le néŋ á taʼ akwaŋte á ntē pɔ́p, á gɔ́ á wɔ́p á leghʉ ajū mīi, yí Ndém a á si ŋkwāŋtɛ, á gɔ́ á lesāʼ lefɔ, páʼ na a á si ŋkɔ̄ŋɔ, tɛ Ndém a eláʼ ŋghʉ̄, ashuŋne zí méŋwɛ̄t a epō.

¹⁸ «Menzwí yīi o ó jʉ́ɔ lā, a á si ŋgɔ́ á mía mía tésɔŋ yīi, a sáʼa mefɔ á ndo esī atsetsáʼ. »