Menjʉɔ te lí 16 - Eka Eswhī

Meŋgeŋge ntií esambīa

¹ Meŋ júʼ mmɔʼ ŋghi teté é fhó á ntē Mía Ŋgyā Ndém á lephū, ńtswī á mbū mecɔʼ Ndém esambīa ŋ́gɛ: «Pɛ egʉ̄ɔ á ŋgɔŋ esī atsetsáʼ, éfūʼte á ajū mīi, á tswii azāŋalɔ́ŋ Ndém zīi, á ntē mendɔ̄ŋ esambīa. »

² Mvhɔ cɔʼ Ndém á gʉɔ efūʼte ezi ndɔ̄ŋ á esī atsetsáʼ, metepɔŋ meféŋ, ńnɔŋ nzáŋa tɛʼ, é pú ŋkó á mbe nnɛ̄t epuɔ pīi, ayiŋne na á lɛ ánɛ pɔ́p. Épuɔ pīi pɔ́ lɛ si ŋgūʼtɛ á akeke na.

³ Páte mémpīa cɔʼ Ndém, á fuʼte ezi ndɔ̄ŋ á ntē mía ntshi. Ntshi, é sɛt nnɛ̄t, ńcʉ́ʼ páʼ metshi apfhō ŋiŋ lā. Ajūɔ tsem zīi, á ŋgɔ́ á ntē ntshi tɛ nnɔ̄ŋ ŋŋɛ̄nɛ, á pú ŋkwhʉ́.

⁴ Páte métɛ́t cɔʼ Ndém, á fuʼte ezi ndɔ̄ŋ, á ntē mentshi mendu, mbɔɔ ánɛ mesāʼ‑ntshi, ntshi é sɛt nnɛ̄t ncʉ́ʼ metshi.

⁵ Meŋ júʼ cɔʼ Ndém yīi, a pɔɔ́ŋ mete ánɛ mentshi, á lé á mbū Ndém ŋ́gɛ: «O ó Ndɔk‑ndeŋ ndeŋ ŋghʉ̄ menu, wu yīi, o éwú, mbɔ o le zī ŋgɔ́, wu mé ndaʼ Ndém, o ó tswi á légɛ, o ó ŋiŋ ndeŋ ndeŋ.

⁶ Páʼ, epuɔ menɔŋ é le pfɛttē metshi epuɔ pīi é epú, mbɔɔ emi metswi‑ŋke pú lā, o ó zéŋ ŋgyā á wɔ́p áa metshi, ŋ́gɛ pɔ́ enú. Á si ŋgɔ́ á apiŋ mefaʼ mɔ́p. »

⁷ Cɔʼ Ndém á lé épúp, meŋ zéŋ njúʼ mmɔʼ ŋghi, é fhó á ajʉʼ nnɔɔ̄ŋ‑epɔʼ ndé ŋ́gɛ: «Á épúp mé Atsyapuɔ Ndém, me Atsyantsɔp, o lɔɔ̄k anuúnē pɔ́ ndeŋ ndeŋ, tɛ́ nzáʼ ntsaŋ. »

⁸ Páte lekua cɔʼ Ndém, á fuʼte ezi ndɔ̄ŋ, ánɛ lezēk nu. Ndém á ghʉ, nu á lɔk mmók, ńtɔ̄ epuɔ menɔŋ.

⁹ Lezēk nu é pú ndō tɛʼ, ńtɔ̄ epuɔ menɔŋ épúp, pɔ́ ké te gɔ̄ nnɛ̄t zɔp, ŋ́gwáʼ atswhī tepɔŋ zɔ́p, ŋ́gūʼte á Ndém ɛ́. Pɔ́ zɔte á Ndém, tɛ́ yí mé ké mbɔ́ŋ mete, ánɛ ŋgeŋge jʉɔ mɛ́t.

¹⁰ Páte métáa cɔʼ Ndém, á fuʼte ezi ndɔ̄ŋ ánɛ akɔʼ lefɔ na, ajʉʼ zīi a á nnɔŋ esáʼa lefɔ éwú, á sɛt nnɛ̄t eséŋ lɛ pít. Epuɔ menɔŋ é zi á lepfɛ̄t mesɔŋ mɔ́p, melaʼ mía mía ŋgeŋge zīi, pɔ́ le nɔ̄ŋ njʉ́ɔɔ.

¹¹ Ńzɔ̄te á Ndém yīi a á lephū, melaʼ ŋgʉɔ̄ʼ zīi pɔ́ é si njʉ́ɔɔ, mbɔɔ melaʼ meféŋ mīi, é ánɛ pɔ́p. Táʼ, ŋ́ké te kɔ̄ŋ á wɔ́p á legɔ nnɛ̄t zɔp, ŋ́gwáʼ atswhī tepɔŋ zɔ́p, éfhó ánɛ memɛnzhɛ tepɔŋ ntó ɔ́.

¹² Páte ntokó cɔʼ Ndém, á fuʼte ezi ndɔ̄ŋ, á ntē mía ntshi yīi, mɛ́ tɔ́ŋɔ lɛ Eflat. Ntshi é pú nzó, ńdɔk ntsɔ́ʼ á mɛnzhɛ á mbū mefɔ pīi, pɔ́ fhɔ́ɔ á mbuʼ esaáʼ‑nu.

¹³ Meŋ zéŋ njʉ́ɔ mesī mɛ́ntɛ́t, é gɔ́ páʼ ewioé lā, taʼ á fhó á nchu na ntap ntap ntó, ezimɔʼ é fhó á nchu na ntó, ezimɔʼ é fhó á nchu ntaŋ‑mela ŋ́gɛ, yí é ntswi‑ŋke Ndém ntó.

¹⁴ Pɔ́ métɛ́t é si ŋgɔ́ mesī, ńnɔŋ ŋghʉ̄ɛ meŋkʉʼne menu. Pɔ́ gʉɔ njʉ́ɔ mefɔ ŋgɔŋ ntsem, ŋ́gɔ̄ á ncúʼte á pɔ́p, pɔ́ elʉɔ́ʼ á Atsyantsɔp Ndém, ánɛ mía aleʼé zīi, a záʼa ntsaŋ.

¹⁵ Táʼ, Atsyapuɔ á lé ŋ́gɛ: «Awuɔ yīi meŋ á si shʉ̄ʼɛ páʼ ntsɔ́ŋ la. Eshhʉ̄ mbɔŋ a á si ŋgɔ́ á ŋiŋ yīi, meŋ a ge eshʉʼe, a enɔ̄ŋ le ndí í. Á ŋiŋ yīi menzhó é zɛɛ́t á mbe nnɛ̄t yí, á lɔkɔ te ŋkɔ̄ŋɔ á yí á leziŋ atseŋ te nzhó ɔ́, ḿbɔ́k á mɛ́ lejʉ̄ɔ á yí, esē é kú á yí. »

¹⁶ Mesī mwɔ̄ é cúʼte mefɔ, á amɔ̄ʼ ajʉʼ zīi, mɛ́ tɔɔ́ŋ mé ashuŋne epuɔ Eble lɛ Aamagedɔŋ.

¹⁷ Cɔʼ Ndém mbáte esambīa, á fuʼte ezi ndɔ̄ŋ ánɛ efwɔ̄k, mmɔʼ ŋghi teté é fhó á Mía Ŋgyā Ndém á lephū, mé ajʉʼ akɔʼ lefɔ, ńdé ŋ́gɛ: «Á pú nzōko. »

¹⁸ Meŋŋí mbeŋ é lɛ ŋŋwāŋ, mɛ́ júʼ meŋghi epuɔ, lefaŋ é pú mvɛ́tte, esī atsetsáʼ é pú ncʉ̄ʼne cʉʼnee, tɛ mbɔ e laá nzi ncʉ̄ʼne épúp ɔ́, tɛ efhó páʼ Ndém a le pɔ́ á ŋiŋnɔŋ, á ndo esī atsetsáʼ.

¹⁹ Esī atsetsáʼ é cʉʼne épúp, mía mía tésɔŋ á kemɛ, ŋ́gāp nnɛ̄t nzhɛ tɛ́t, metésɔŋ elāʼ ntsem é pú ŋkēmɛ. Ndém á kímte á mía mía tésɔŋ Babilɔn, ŋ́gyá á yí á whi yīi, a á nték nnéŋ á ntē ndɔ̄ŋ, tɛ́ á nɔŋ efūʼu páʼ meluʼ lā, ŋ́gɛ a enú.

²⁰ Esī atsetsáʼ é cʉʼne páʼā, elāʼ ntsem tsīi, ntshi é kɛnneé nnéŋ á esɔŋ, é pú ncú ŋ́kó á ntshi, mekwɛ̄t é pú mmī.

²¹ Emɔ̄ʼ memía mewɛ, ńzɛ̄t tɛ́ʼ, tɛ taʼ mbaŋ á nɔŋ ŋkūʼɔ ajūɔ mekílo megēm lekua, é fhó á lephū esóʼo, ŋ́gwhʉ̄te ánɛ epuɔ menɔŋ. Pɔ́ zi á lezɔte á Ndém, melaʼ ŋgʉɔ̄ʼ jʉɔ zīi, mewɛ é néŋɛ ánɛ pɔ́p lā. Ńzɔ̄te á yí épúp, éfhɔ́ɔ ánɛ ntií zīi, ŋgʉɔ̄ʼ jʉɔ mɛ́t e le pú ntswhī efáŋ épúp.