Menjʉɔ te lí 15 - Eka Eswhī

Mecɔʼ Ndém esambīa é ega ndɔ̄kɔ mezoknzem ŋgeŋge eshʉ̄ʼɛ

¹ Meŋ zéŋ njʉ́ɔ, amɔ̄ʼ ayiŋne á athʉ́ lephū, á fáŋ tɛʼ, ŋ́kʉ̄ʼne ejʉʼ tɛʼ. Ŋ́gɔ́ mecɔʼ Ndém esambīa, ŋ́gwɛ̄ ŋgeŋge ntií esambīa, é gɔ́ mezoknzem ŋgeŋge, melaʼ mīi e tɔ́k tɛ emii, Ndém ezáʼ á lezāŋ á lɔ́ŋ.

² Meŋ zéŋ njʉ́ɔ, mmɔʼ mía ntshi á ŋwaŋne páʼ ajʉɔ́‑eshhʉ̄ lā, mmók é swaŋte éwú. Epuɔ pīi pɔ́ le lʉɔ́ʼ á na tɛ njhʉ́, ńdʉ̄ʼ á lewuʼte akeke zí. Épuɔ pīi pɔ́ lɛ te véŋ ŋ́gɛ, mɛ́ etí nzwiŋ yīi, é lɔkɔ ŋghítɛ lezēŋ na ánɛ pɔ́p ɔ́, pɔ́ tshíte á ndo mía ntshi mɛ́t, ŋ́gwɛ̄te mekékwɛlé, mbɔ Ndém mé ŋgyá mé pɔ́p.

³ Pɔ́ nɔŋ nzɔ̄pɔ ntshi yīi, Mɔɔ́sɛ ŋgaŋ afaʼ Ndém a le zɔ̄pē. Ńzéŋ nɔŋ nzɔ̄pɔ ntshi yīi, Mɔ́ Njʉnjhʉ a le zɔ̄p azí. Pɔ́ nɔŋ nzɔ̄pɔ ndʉ́ɛ́ ŋ́gɛ: «Atsyapuɔ Ndém, Atsyantsɔp, mefaʼ mú é zánee, ḿbú mbɔ̄ŋ tɛʼ. Efɔ ŋgɔŋ ntsem, eju ntií leghʉ anu, e gɔ́ áa ndeŋ ndeŋ, ŋ́gɔ́ anuúne.

⁴ Atsyapuɔ, awɔ́ a gɔ ekūuʼ á lewāk á wú ú? Awɔ́ a gɔ enéŋ té yá mekuʼ á mbū wu ū? Wu ndaʼ mé si ŋgɔ́ á Ndém. Melāʼ ntsem e láʼ eshʉʼ etswíʼte á mvhɔ wu, éwuʼte á wú, melaʼ mīi, o ó tswi á wɔ́p, á ndeŋ ndeŋ menu mīi, o gɛ ŋghʉ̄ɛ. »

⁵ Meŋ zéŋ njʉ́ɔ, Mía Ŋgyā Ndém á athʉ́ lephū á tsɔ́ʼɔ, akʉp eka á tshí éwú, ńdɔkɔ ntswīi á légɛ, Ndém a á nnɔ epuɔ.

⁶ Mecɔʼ Ndém esambīa pīi, pɔ́ ŋgwɛ̄ ŋgeŋge ntií esambīa, é fhó á Mía Ŋgyā Ndém mɛ́t ntó. Mbɔ pɔ́ emāʼ menzhó, é fók lɛ púúú, mɛ́ lɔk mmɔʼ ntií ndap, mɛ́ tɔ́ŋ lɛ lɛ́ɛŋ tɛ́ ncūŋte. Ńcúŋ ekɔp á mbembéŋ pɔ́p, mbɔ mɛ́ le lɔ̄k á gɔ́ɔl tɛ ncūŋte.

⁷ Mmɔʼ na ánɛ mena pwɔ̄ lekua, á yá mendɔ̄ŋ esambīa, mɛ́ lɔk á gɔ́ɔl tɛ́ ncūŋte á mbū mecɔʼ Ndém esambīa, ajū mīi á tswii azāŋalɔ́ŋ Ndém yīi, a naáŋ meŋguʼ meŋguʼ, á gɔ́ á ntē éwú tɛ ndó.

⁸ Ŋghī mmók é kó, tɛ Mía Ŋgyā Ndém á athʉ́ lephū á ló, ńdɔkɔ ntswīi shʉ́shɔ́k Ndém pɔ́ mete mí. Ŋ́gɔ́ yīi ŋiŋ a le gɔ, a á le kūʼ á lekō á ntē Mía Ŋgyā Ndém, té gɔ́ yīi meŋgeŋge ntií esambīa mīi, mecɔʼ Ndém esambīa é ŋgwɛ̄te, é tɔ́k tɛ mmī í.