Menjʉɔ te lí 14 - Eka Eswhī

Azɔp ntshi epuɔ pīi, Ndém a le cūʼ á wɔ́p

¹ Meŋ zɛ́t ncʉ̄te cʉte, ńjʉ́ɔ á Mɔ́ Njʉnjhʉ á tshí á ndo lekwɛ̄t tsīi, mɛ́ tɔ́ŋɔ lɛ Siɔŋ, pɔ́ a epuɔ ntsāʼ ŋkhʉ mé ntsāʼ ntsɔp lekua megēm lekua. Lezēŋ Mɔ́ Njʉnjhʉ, pɔ́ lezēŋ Mɔʼɔ́ yi é tíne á mvhɔ eshhʉ̄ pɔ́p.

² Meŋ júʼ mmɔʼ ŋghi é fhó á lephū, ńnɔŋ nzwɛ̄nɛ páʼ amaane ntshi lā. Ńnɔŋ nzwɛ̄nɛ páʼ mía mía lefaŋ lā. Ŋghi mɛ́t zīi, meŋ á nɔŋ njúʼu, é nɔŋ mbɔ̄ŋɔ páʼ ŋghi akékwɛlé zīi, wɔ púʼ‑akékwɛlé é si mbúʼu lā.

³ Epuɔ pwɔ̄, é nɔŋ nzɔ̄pɔ ntshi eswhī, á mvhɔ akɔʼ lefɔ, mbɔɔ á mvhɔ mena pwɔ̄ lekua, mbɔɔ á mvhɔ epɔ̄ melʉɛ. Ŋiŋ a le gɔ a á le kūʼ á lezɔp ntshi mɛ́t, té gɔ́ ánɛ nnɔ epuɔ ntsāʼ ŋkhʉ mé ntsāʼ ntsɔp lekua megēm lekua pwɔ̄ pīi, Ndém a le cūʼ á wɔ́p á ndo esī atsetsáʼ á.

⁴ Epuɔ puɔ mɛ́t, é si ŋgɔ́ epuɔ pīi, pɔ́ a wɔnzwí é lɛ te nɔ̄ɔŋ, pɔ́ lɛ te menzwí zhɛ́. Pɔ́ le nɔ̄ŋ nzhɛnɛ á Mɔ́ Njʉnjhʉ é ejʉʼ tsem yīi, a gʉɔ éwú. Ndém a le fhó á nnɔ epuɔ menɔŋ, ncūʼ á wɔ́p. Pɔ́ gɔ́ á mvhɔ yí mbɔɔ á mvhɔ Mɔ́ Njʉnjhʉ, ŋ́gɔ́ páʼ mvhɔ ecū mīi, é fhɔ́ɔ á ŋkāʼ lā.

⁵ Mbɔ mɛ́ la zī njúʼ, mela é tó á nchu pɔ́p ɔ́. Pɔ́ é si ŋgɔ́ epuɔ pīi, mɛ́ té si ndāʼa á wɔ́p ɔ́.

Mecɔʼ Ndém métɛ́t ega mbhʉ́ɛ á lezāʼ ntsaŋ

⁶ Meŋ zéŋ njʉ́ɔ mmɔʼ cɔʼ Ndém, á nɔŋ ŋghíɛ á tɛ athʉ́ lephū. Ŋ́gwɛ̄ ŋke mbɔŋ yīi, e náŋa náŋa. Ŋ́gɔ̄ á ntswiī á mbū epuɔ pīi, é naŋteé á ndo esī atsetsáʼ, ńdɔkɔ ndʉ́ɛ́ elāʼ ntsem, metseŋ ŋgyā ntsem, éwɔ shúŋ á ntií ntiī elāʼ, ŋgɔŋ ntsem.

⁷ Cɔʼ Ndém mɛ́t, á nɔŋ ndʉ́ɛ́ mé ŋghi teté ŋ́gɛ: «Pɛ eghʉ̄ mekuʼ Ndém, ŋ́gūʼte á yí, melaʼ mīi njhʉ̄ zīi, a gʉɔ mé nzaáʼ ntsaŋ ezɔp a epuɔ metsem, e é kuʼ. Pɛ etswíʼte, ŋ́ŋɔ́ʼne tɛ ethū tsɛ́ e epfēŋ esī á mvhɔ yí, yí mé le ghʉ̄ lephū, mbɔɔ esī atsetsáʼ. Á ŋiŋ yīi a le ghʉ̄ memía mentshi, mbɔɔ ejʉʼ tsīi, mentshi é sáʼa éwú. »

⁸ Mmɔʼ cɔʼ Ndém, á páte eyi mmɔʼ, ńdé ŋ́gɛ: «Mía mía tésɔŋ Babilɔn a á pú ndákne, a á pú ndákne. » Agā á le pɔ̄ŋ á yí páʼ meluʼ é pɔŋɔ epuɔ menɔŋ lā, á pú ndɔ̄k ḿbōk ŋgɔŋ ntsem. »

⁹ Mmɔʼ cɔʼ Ndém á zéŋ mbáte epi emɔ̄ʼ mémpīa, ńdé mé ŋghi teté ŋ́gɛ: «Ŋiŋ a etswíʼtɛ ŋŋɔ́ʼne tɛ athū zí á pfēŋ esī á mvhɔ na, mbɔɔ á mvhɔ akeke na mɛ́t, tɛ mɛ́ tshí á ayiŋne á mvhɔ eshhʉ̄ yí, ká á alá apū yí,

¹⁰ mbɔ Ndém a a záŋ á lɔ́ŋ á mbū yí, éték á whi, énéŋ á ntē ndɔ̄ŋ, a enú páʼ meluʼ lā. Ńjʉ́ɔ á mía mía ŋgʉɔ̄ʼ á ntē mmók meka, á mvhɔ mecɔʼ pīi, é epi Ndém, mbɔɔ á mvhɔ Mɔ́ Njʉnjhʉ.

¹¹ Ŋghī mmók, e efhɔ́ɔ á ntē mmók yīi pɔ́ é éwú njʉ́ɔ ŋgʉɔ̄ʼ, ŋ́kɔ́ɔʼ á meŋguʼ meŋguʼ. Á etsōʼ pɔ́ ezokó, ŋ́gɔ́ yīi pɔ́ gɔ le wɛ̄ njhʉ̄ á lelɔk nzwīte ɛ́. Mɛ́ lʉ́ɛ́ epuɔ pīi, pɔ́ é tswíʼte, ŋ́ŋɔ́ʼne tɛ athū á pfēŋ esī á mvhɔ na, mbɔɔ á mvhɔ akeke zí. Á ŋiŋ ntsem yīi, mɛ́ é tí lezēŋ na mɛ́t ánɛ yí. »

¹² Á páʼa ndɔkɔ ndʉ́ɛ́ ŋ́gɛ, ŋiŋ yīi a á ŋiŋ Ndém, á ŋiŋ ŋkúʼte lepé Ndém, éfɛ́ nnɛ̄t ŋgyá á mbū Yɛɛ́so, a ekāk ete.

¹³ Meŋ zéŋ njúʼ, mmɔʼ ŋghi é fhó á lephū, ńdé mé meŋ ŋ́gɛ: «Tí ŋ́gɛ: “Eshhʉ̄ mbɔŋ a á ŋiŋ yīi, a á ge ekwhʉ́ tsetsɔŋɔ, ńzɛ́t ndɛ̄tne áa ánɛ Atsyapuɔ.” “Á épúp, Azwakne Ndém á si ndʉ́ɛ́ ŋ́gɛ, pɔ́ ezwīte ánɛ ŋgʉɔ̄ʼ zīi, pɔ́ ke jʉ́ɔ̄, melaʼ mīi, Ndém a a shʉʼ etáŋ á wɔ́p, ánɛ mefaʼ mbɔŋ mɔ́p.” »

Afʉʼ lezāʼ ntsaŋ á si ŋgɔ́ páʼ, afʉʼ lefaʼ etsō lā

¹⁴ Meŋ zɛ́t ncʉ̄ cʉʉ, ńjʉ́ɔ féfhɔ́ alɔ, ŋiŋ á náŋ éwú ŋgɔ́ páʼ Méŋ‑Ŋiŋnɔŋ lā, ńtɔ̄ʼ acɔʼ lefɔ á athū yí, mbɔ mɛ́ ndɔ̄k atʉɛ́ gɔ́ɔl tɛ́ ncūŋte. Ŋ́gwɛ̄ mmɔʼ ntií ŋŋí zīi, mɛ́ lɔkɔ efāʼa etsō á ŋkāʼ, á mbū yí, é ló tɛʼ.

¹⁵ Mmɔʼ cɔʼ Ndém, á zéŋ efhó á ntē Mía Ŋgyā Ndém á lephū, ŋ́gāʼte mé ŋghi teté, á mbū ŋiŋ yīi, a á nnáŋ ánɛ alɔ ŋ́gɛ: «Pɛ́ ŋŋí ju, ńdɔk efāʼ etsō. Njhʉ̄ lefaʼ etsō e é kuʼ. Etsō é tswhí á ndo esī atsetsáʼ, tɛ ŋkūʼ á lefaʼ. »

¹⁶ Ńdé épúp, ŋiŋ yīi a á nnáŋ ánɛ alɔ, á lɛ mmāʼ ŋŋí zi á ndo esī atsetsáʼ, ńdɔk mbú éfāʼ etsō.

¹⁷ Mmɔʼ cɔʼ Ndém, á zéŋ efhó á ntē Mía Ŋgyā Ndém á athʉ́ lephū ntó, ŋ́gwɛ̄ azí, ntií ŋŋí zīi, mɛ lɔkɔ efāʼa etsō á ŋkāʼ, é ló tɛʼ.

¹⁸ Mmɔʼ cɔʼ Ndém, ḿbɔ́ŋ mete ánɛ mmók, á zéŋ efhó á ajʉʼ nnɔɔ̄ŋ‑epɔʼ ntó, ŋ́gāʼte mé ŋghi teté á mbū ŋiŋ yīi, a á ŋgwɛ̄ ŋŋí é ló tɛʼ lā ŋ́gɛ: «Pɛ́ ŋŋí ju, páʼ e loó tɛʼ lā, ńdɔk nzáʼ atsaŋné ntá methʉ́ zīi, mɛ́ lɔkɔ ncūŋtɛ meluʼ lā, á ndo esī atsetsáʼ, melaʼ mīi ntá athʉ́ mɛ́t, é ndáʼ mbāŋ. »

¹⁹ Cɔʼ Ndém á maʼ ŋŋí zi á ndo esī atsetsáʼ, ńdɔk nzáʼ atsaŋné ntá methʉ́, ḿmāʼ á ntē mía ajū mīi, mɛ́ tsóʼo ntá éwú, ńdɔkɔ ŋgwīɛ̄ meluʼ, ńdeŋ ndeŋ páʼ Ndém a a láʼ etsóʼ epuɔ tepɔŋ épúp, élɔkɔ etswii azāŋalɔ́ŋ zí.

²⁰ Mɛ́ tsóʼ ntá athʉ́ á nzem apɛ́ tésɔŋ, ánɛ ajʉʼ zí, metshi é tó ŋkúŋ, ánɛ ajūɔ mekílo ŋkhʉ tɛ́t, ésɛh tɛ ŋgɔ́ yīi, lʉ́ɔ́ a tshíɛ éwú, é kɔ́ʼ tɛ nɔŋ mbátɛ mezhō mí.