Menjʉɔ te lí 13 - Eka Eswhī

Anu ánɛ mena mémpīa

¹ Meŋ zéŋ njʉ́ɔ, mmɔʼ ŋkʉʼne na á fhó á ntē mía ntshi ntó, mendɔ̄ŋ mí é gɔ́ legēm, ethū tsí é gɔ́ esambīa, eziɛ́ ndɔ̄ŋ lɛ́ é pɔ́ŋ acɔʼ lefɔ, menzēŋ á lelɔk nzɔ̄te á Ndém, é tíne ánɛ aziɛ́ athū lɛ́.

² Na mɛ́t yīi meŋ á jʉ́ɔ lā, á swhí á na nzwi, mekhu mí é gɔ́ páʼ emi alakʉp lā, nchu yí é gɔ́ páʼ eyi njhʉnjhʉ meŋgēm lā. Na ntap ntap á yá mete mí á mbū yí, ŋ́gyá akɔʼ lefɔ zí pɔ́ lesāʼ epuɔ á mbū yí.

³ Amɔ̄ʼ athū na mɛ́t, á gɔ́ páʼ mɛ́ nzáʼ tɛ á cʉ́ʼɛ ŋgɔ̄ áa ŋgwhʉɛ́ lā. Táʼ, mɛ́ lɛ mbɛ́t á mía mía eféŋ mɛ́t tɛ é te. Epuɔ metsem á ndo esī atsetsáʼ, é jʉ́ɔ épúp, á pɔŋ á wɔ́p tɛʼ, pɔ́ pú ntsé á nzem na mɛ́t.

⁴ Ńtswíʼte, ŋ́ŋɔ́ʼne tɛ ethū tsɔ́p é pfeŋ esī, ŋ́gūʼte á na ntap ntap, melaʼ mīi a á yá mete á mbū na mɛ́t. Ńzéŋ ntswíʼte, ŋ́ŋɔ́ʼne tɛ ethū tsɔ́p é pfeŋ esī, ŋ́gūʼte á na mɛ́t, ńnɔŋ ndʉ́ɛ́ ŋ́gɛ: «Awɔ́ a wɛɛ̄ mete, páʼ na wuɔ la ā? Awɔ́ a gɔ elʉɔ́ʼ á yí í?»

⁵ Mɛ́ tswi á mbū na mɛ́t ŋ́gɛ, a eshúŋ meshuŋne lefāŋ, ńzɔ̄te á Ndém. Mɛ́ yá á yí mete á lelɔk ŋghʉ̄ épúp, tɛ á gɔ́ mesaŋ ntsɔp pīa mé megēm lekua.

⁶ Á shúŋne ndɔk nzɔ̄te á Ndém, éshúŋne té pɔŋ ánɛ lezēŋ tsí, éshúŋne té pɔŋ ánɛ ntap mbotɛ́‑Ndém, ńzéŋ nzɔ̄te epuɔ pīi, pɔ́ naŋteé á athʉ́ lephū.

⁷ Mɛ́ cʉ́ʼ, á lʉɔ́ʼ epuɔ Ndém, ńjhʉ́ á wɔ́p. Mɛ́ zéŋ ntswī á mbū yí ŋ́gɛ, a esáʼ metseŋ ŋgyā ntsem, ésáʼ elāʼ tsem, ésáʼ wɔ shúŋ á ntií ntiī elāʼ, ḿbú esáʼ ŋgɔŋ ntsem.

⁸ Epuɔ metsem pīi, pɔ́ é ndo esī atsetsáʼ, pɔ́ tswíʼte, ŋ́ŋɔ́ʼne tɛ ethū tsɔ́p é pfeŋ esī, ŋ́gūʼte á yí, épuɔ metsem pīi Mɔ́ Njhʉnjhʉ, páʼ mɛ́ le zwhí lā, a lɛ te tí nzēŋ mɔ́p tɛ efhó anɔŋɔ́‑ŋgɔŋ, á ntē aŋwaʼne nzēŋ epuɔ pīi, é wɛɛ̄ lenāŋ leswhī ɛ́.

⁹ Ŋiŋ a wiɛ metuúŋ á lelɔk njúʼ ejʉʼ, á júʼ.

¹⁰ A gɔ́ éyi, Ndém a le lé ŋ́gɛ, ŋiŋ a eláʼ ŋgɔ́ á apuʼ ncu, mbɔ ŋgaŋ a a láʼ egɔ́ áa aziɛ́. Ŋ́gɔ́ éyi Ndém a le lé ŋ́gɛ, mɛ́ e láʼ ezwhí á ŋiŋ mé ŋŋí ncu, mbɔ ŋgaŋ a a láʼ ekwhʉ́ áa eziɛ́. Melaʼ épúp tɛ́, epuɔ Ndém e ekāk ete, éfɛ́ nnɛ̄t ŋgyá á mbū Ndém.

¹¹ Meŋ zéŋ njʉ́ɔ emɔ̄ʼ ŋkʉʼne na, á fhó á ntē esī ntó, mendɔ̄ŋ mí é gɔ́ mɛ́mbīa páʼ emi mɔ́ njʉnjhʉ lā, ńnɔŋ eshúŋnɛ páʼ na ntap ntap lā.

¹² Ŋ́gwɛ̄ mete páʼ mvhɔ na wɔ̄ yīi, a le fhó á ntshi ntó lā, á lelɔk esáʼ epuɔ. Ŋ́gē esáʼe, mvhɔ na á tshí á ajʉʼ, ńnɔŋ njʉ́ɔɔ. Á ghʉ, wɔ náŋ á ndo esī atsetsáʼ metsem, é tswíʼte, ŋ́ŋɔ́ʼne tɛ ethū tsɔ́p é pfeŋ esī, ŋ́gūʼte mvhɔ na. Á na wɔ̄ yīi, mɛ́ mbɛ́t á mía mía eféŋ yi, tɛ é te lā.

¹³ Páte mémpīa na wuɔ mɛ́t, á ghʉ memía meŋkʉʼne menu, tɛ ŋghʉ̄, mmók é fhó á lephū esóʼo á esī atsetsáʼ, á mvhɔ epuɔ menɔŋ metsem.

¹⁴ Á lɔk meŋkʉʼne menu mīi, mɛ́ é yá á yí mete á lelɔk ŋghʉ̄, á mvhɔ mvhɔ na lā, ḿbɔ̄pte wɔ náŋ á ndo esī atsetsáʼ. Ńtshóne á wɔ́p á lekɔ̄ akeke, ńdɔk ŋghʉ̄ mekuʼ na wɔ̄ yīi, mɛ́ le lɔ̄k ŋŋí ncu, ńnéŋ á mía mía eféŋ ánɛ yí, mɛ́ zéŋ mbɛ́t tɛ é te lā.

¹⁵ Mɛ́ cʉ́ʼ, páte mémpīa na mɛ́t á ghʉ, akeke mvhɔ na, á cʉ́ʼ nte tɛ eshúŋne, ńzwhí á ŋiŋ ntsem yīi, a ka tswíʼte ŋŋɔ́ʼne tɛ athū zí á pfeŋ esī, ŋ́gūʼte á yí í.

¹⁶ Akeke mɛ́t á lɔk mbʉʼ, nnéŋ á yiŋne ánɛ apū ete ŋiŋ ntsem, ká á mvhɔ eshhʉ̄ yí. Tɛ é láʼa ŋgɔ́ mémía epuɔ ká epuɔ pīi é mɛɛ̄ emɛ ŋgɔ́. Tɛ a láʼa ŋgɔ́ á ŋgaŋ azō, ká á te kuʼ ánɛ azō. Tɛ a láʼa ŋgɔ́ ŋkwa, ká á ŋiŋ yīi, a naáŋ á ŋga athū yí.

¹⁷ Ŋiŋ a le gɔ le zó azō ká á leswiŋ, té gɔ́ yīi, ayiŋne mɛ́t ánɛ yí í. Ńdɔkɔ ndʉ́ɛ́ lezēŋ na mɛ́t ká nzwiŋ yīi, lezēŋ tsí é lɔkɔ ndʉ́ɛ́.

¹⁸ Tsetsɔŋɔ a á si ŋgɔ́ á afʉʼ zīi, awíɛ awíɛ a a fhʉte á mbɔŋɔ́. Ŋiŋ yīi a wɛɛ̄ leghi, a efaʼ tɛ nzhɛ́ lezēŋ tsīi, nzwiŋ na wuɔ mɛ́t é lɔkɔ ndʉ́ɛ́. Lezēŋ mɛ́t é si ŋgɔ́ lezēŋ ŋiŋnɔŋ. Nzwiŋ yí é gɔ́ ŋkhʉ ntokó mé ntsɔp ntokó mé megēm ntokó.