Menjʉɔ te lí 12 - Eka Eswhī

Anu menzwí pɔ́ na ntap ntap

¹ Á tɔ́k épúp, amɔ̄ʼ ayiŋne á tó á lephū: ŋ́gɔ́ á menzwí, ḿmāʼ ezi nzhó, é gɔ́ áa lezēk nu. Lezēk saŋ é gɔ́ á atseŋ mekhu yí. Á tɔʼ acɔʼ lefɔ, mecɔʼ saŋ é gɔ́ éwú ntsɔp pīa mé legēm.

² Menzwí mɛ́t a lɛ ŋgɔ Ndém, mɔ́ á nɔŋ nzáŋa á yí, á nɔŋ ntswīɛ̄ ŋgɔ̄ á nzhíɛ.

³ Amɔ̄ʼ ayiŋne á zéŋ ntó á lephū, ŋ́gɔ́ á mía mía na ntap ntap, ḿbāŋ páʼ mmók lā. Ethū tsí é gɔ́ esambīa, mendɔ̄ŋ mí é gɔ́ legēm, acɔʼ lefɔ á tɔʼne ánɛ aziɛ́ athū lɛ́.

⁴ Mecɔʼ saŋ é gap nnɛ̄t nzhɛ tɛ́t. Á lɔk asáŋ zí, éfhó á lephū njɔ̄k á taʼ nzhɛ, ḿbwɛ̄t á esī atsetsáʼ. Ŋ́gʉɔ ntshí á mvhɔ menzwí yīi, a le nɔ̄ŋ ŋgɔ̄ á nzhíɛ lā, éfāʼa ŋ́gɛ mɔ́ a elɛ ŋgē etó, a lɛ esyɛ̄tte á yí mpfɛ́t.

⁵ Menzwí mɛ́t á zhí á taʼ mɔ́, á gɔ́ á mɔ́ mbaŋa. Mɔ́ mɛ́t mé pɔŋteé á lesāʼ elāʼ ntsem, té ŋiŋ ŋŋíʼne á yí. Á lɛ ŋgē ezhí, mɛ́ saʼ á mɔ́, ńdɔk ŋgʉ̄ɔ mé lezēŋ Ndém, á ajʉʼ akɔʼ Lefɔ Ndém.

⁶ Menzwí mɛ́t, á lɛ ŋkʉ̄ ŋgʉ̄ɔ mé késáatswɛt, á ajʉʼ zīi Ndém a ke cuŋtē éwú á mbū yí, ŋ́gɛ a egʉɔ nnáŋ éwú, mɛ́ ezék á yí, eleʼé alāʼ ntsāʼ mé ŋkhʉ pīa mé megēm ntokó.

⁷ Ncu é tó á lephū, Míshʉɛ, á tɛŋgyā mecɔʼ Ndém pɔ́ a mecɔʼ pí, é nɔŋ ndʉɔ́ʼɔ á na ntap ntap. Na ntap ntap pɔ́ a mecɔʼ pí é nɔŋ ndʉɔ́ʼɔ á wɔ́p azɔ́p.

⁸ Ŋ́ké te ánɛ pɔ́p kuʼ. Tɛ na ntap ntap mɛ́t pɔ́ a mecɔʼ pí é té zɛ́t ŋgwɛ̄ á ajʉʼ á lephū ɔ́.

⁹ Mishʉɛ pɔ́ a mecɔʼ pí é tshóne á na ntap ntap mɛ́t, ḿmāʼ á esī atsetsáʼ. Na ntap ntap mɛ́t mé si ŋgɔ́ nnū zīi, e le fhó tɛ efʉʼ mvhɔ, mɛ́ tɔ́ŋ á yí lɛ Sɛ́ta, mbɔɔ lɛ Ŋgaŋ Mbo. Yí mé pɔpteē epuɔ metsem á ndo esī atsetsáʼ. Mɛ́ le tshoné á wɔ́p a mecɔʼ pí mbwɛ̄t á esī atsetsáʼ.

¹⁰ Meŋ júʼ emɔ̄ʼ ŋghi teté, é fhó á lephū ndé ŋ́gɛ: «Afʉʼ zīi Ndém yímpɛ, a ghʉɛ mɛ́ tswɛ́tɛ á kuʼ, áfʉʼ zīi a tswii mete mí, áfʉʼ zīi a sáʼa ŋgɔŋ, áfʉʼ zīi a yáa mete á mbū Nzaʼ‑Ŋkhʉ yi. Afʉʼ mɛ́t á kuʼ páʼa, melaʼ mīi mɛ́ é fhó á lephū, ńjūŋ á ŋgaŋ mbo epɔ̄ memía pímpɛ. Á ŋiŋ yīi a lɛɛ́ eswiŋɛ á wɔ́p, á mvhɔ Ndém yímpɛ, étsōʼ pɔ́ ezokó.

¹¹ Epɔ̄ memía pímpɛ mɛ́t, é ge ejhʉ́ á yí épúp, á gɔ́ melaʼ mīi, Mɔ́ Njʉnjhʉ a le lɔ̄k metshi mí nzó á athū zɔ́p, mbɔɔ melaʼ ashuŋne Ndém páʼ, pɔ́ lɛ si ŋkúʼtɛ, eshúŋɔ ŋ́gɛ, á anuúnē. Pɔ́ lɛ te kɔ̄ŋ ethū nnɛ̄t tsɔ́p, tɛ mbɔ́k á wɔ́p á lekwhʉ̄ ɛ́.

¹² Púp, lephū ntsem é epú ŋkák, épuɔ metsem pīi, pɔ́ naŋteé éwú. Ḿbiŋ ŋgɔ́ á mbū pɛ pīi, pɛ naŋteé á ndo esī atsetsáʼ, mbɔɔ á ntē mía ntshi, pɛ é wɔ eshhʉ̄ tepɔŋ, melaʼ mīi, ŋgaŋ mbo a á sóʼo ntswɛ́tte á wɛ́, ńnɔŋ nzáŋa á lɔ́ŋ tɛʼ, páʼ a á si nzhɛ́ɛ á légɛ, yi zɛɛ́t ŋgwɛ áa méŋ agáʼ njhʉ̄. »

¹³ Na ntap ntap, á jʉ́ɔ páʼ mɛ́ efhó á athʉ́ lephū ntshóne á yí, ḿmāʼ á esī atsetsáʼ lā, ńtsé á nzem menzwí wɔ̄, páʼ a le zhí á mɔ́ mbaŋa lā, ńzī á lenā á yí.

¹⁴ Mɛ́ yá membap mɛ́mbīa á mbū menzwí mɛ́t, é gɔ́ páʼ membap mía mía gó nzwi lā, ŋ́gɛ a elɔk ŋghí ŋgʉ̄ɔ mé késáatswɛt, ájʉʼ zīi Ndém a le cuŋtē éwú á mbū yí, ŋ́gɛ a enáŋ éwú, mɛ́ ezék á yí ŋguʼ tɛ́t mé atsém, ájʉʼ zīi nnū e gɔ le zéŋ á yí njʉ́ɔ ɔ́.

¹⁵ Nnū é lɛ efhó á nchu yí, ńzáʼne ntshi á nzem menzwí mɛ́t, é záne páʼ mía ntshi lā, ńnɔŋ efāʼa ŋ́gɛ, e ekɔ́ʼ ndɔ̄k á yí.

¹⁶ Táʼ, esī atsetsáʼ é tswíte á menzwí mɛ́t, ŋ́ŋáʼa nnɛ̄t, mía ntshi yīi na ntap ntap a á záʼne lā, á kó éwú.

¹⁷ Na ntap ntap, á zɛ́t nzáŋ á lɔ́ŋ á mbū menzwí mɛ́t záŋ. Ésɛ̄t, ńcʉ́ʼɛ ndʉɔ́ʼɔ áa avuʼ ndhu zi, épuɔ pīi pɔ́ kuʼteé mbé Ndém tɛ́ ndɔk nnáŋ, épuɔ pīi pɔ́ é efʉʼ metsem, éshúŋ á ŋiŋ yīi Yɛɛ́so a á ewiɛ́.

¹⁸ Na ntap ntap mɛ́t, á gʉɔ ntshí ánɛ asaŋasáŋá, á legʉ̄ŋ mía ntshi.