Menjʉɔ te lí 11 - Eka Eswhī

Epuɔ mémpīa pīi, pɔ́ shúŋɔ anu zīi, pɔ́ é si nzhɛ́ɛ ánɛ anu Ndém

¹ Mɛ́ lé épúp, ŋ́gyá á taʼ akekaʼa á mbū meŋ, á gɔ́ páʼ akem ajū mīi, mɛ́ lɔkɔ mbíɛ́ efʉʼ azō lā. Ńdé mé meŋ ŋ́gɛ: «Lu á esī ŋgʉɔ efʉ̄ʼ á Mía Ŋgyā Ndém, ńzéŋ efʉ̄ʼ á ajʉʼ nnɔɔ́ŋ‑epɔʼ, ésáŋ epuɔ pīi pɔ́ éwú ŋgūʼtɛ á Ndém.

² Ŋ́gɔ́ mé atetá zīi, á kɛnneé á Mía Ŋgyā Ndém, tshiɛ nnéŋ, te fʉ̄ʉʼ, melaʼ mīi Ndém a le tsekné á atetá mɛ́t á mbū wɔ te zhɛ́‑Ndém. Epuɔ puɔ mɛ́t, é shʉʼ eswɛ́t á tésɔŋ Ndém swɛ́te, tɛ a egɔ́ mesaŋ ntsɔp pīa megēm lekua.

³ Meŋ a shʉʼ etó epuɔ mémpīa pīi, pɔ́ gɔ á eshúŋ ajū mīi, pɔ́ é si nzhɛ́ɛ ánɛ meŋ. Pɔ́ egʉɔ ntswī ŋke gá, tɛ á egɔ́ eleʼé alāʼ ntsāʼ mé ŋkhʉ epīa mé megēm ntokó. Ŋ́gē etswii, ńzwík aluŋɔ lewhʉ̄.

⁴ Epuɔ mémpīa mɛ́t pīi pɔ́ shúŋɔ ajū mīi, pɔ́ é si nzhɛ́ɛ ánɛ Ndém, pɔ́ tshiteé á mvhɔ Atsyapuɔ Esaʼ‑Ŋgɔŋ ntsem. Pɔ́ é si ŋgɔ́ methʉ́ Olive mɛ́mbīa, ńzéŋ ŋgɔ́ etsō tsɛ́pīa tsīi, mɛ́ tshítɛ meláam éwú.

⁵ Megaŋ mbo pɔ́p é nɔŋ efāʼa á leyā á wɔ́p ŋgʉɔ̄ʼ, mbɔ mmók e tó á nchu pɔ́p, épík megaŋ mbo pɔ́p mɛ́t. Á épúp, ŋiŋ a nɔŋ efāʼa á leyā á wɔ́p ŋgʉɔ̄ʼ, mbɔ ŋgaŋ a a kwhʉ́ páʼa mɛ́t.

⁶ Pɔ́ wɛɛ̄ mete, á lelɔk ŋkyɛ́t mbeŋ á lephū, tɛ e e le lú ánɛ afʉʼ zīi, pɔ́ lɔkɔ ntswīi ŋke Ndém ɛ́. Pɔ́ zeéŋ ŋgwɛ̄ mete, á lelɔk esɛ̄t ntshi, é cʉ́ʼ metshi. Ŋ́gwɛ̄ mete, á lelɔk mmāʼ á ntií ntiī ŋgʉɔ̄ʼ, á ndo esī atsetsáʼ páʼ pɔ́ é kɔŋ.

⁷ Pɔ́ e ké eshʉʼ emak á letswi ŋke yīi, Ndém a á ntsékne á mbū pɔ́p, na yīi a fhɔ́ɔ á apeŋte mbʉ̄ɛ̄, a elʉɔ́ʼ á wɔ́p ncu, ńjhʉ́ á wɔ́p, ŋ́ghʉ̄ pɔ́ ekwhʉ́te.

⁸ Epfhō tsɔ́p e shʉʼ esɛ́tte á esī, á ntē mía tésɔŋ, á tésɔŋ yīi, mɛ́ le kwɛtē á Atsyapuɔ wɔp, ánɛ mbaŋne paŋné éwú. Mɛ́ lɔɔ̄k akua‑anu, ńtɔ́ŋ á tésɔŋ wuɔ mɛ́t lɛ Sodɔm mbɔɔ lɛ Ejīpto.

⁹ Epuɔ e shʉʼ efhó elāʼ ntsem, éfhó ánɛ metseŋ ŋgyā ntsem, éwɔ shúŋ tɛ mbɔɔ aziɛ́ alāʼ lɛ́, éfhó á ŋgɔŋ ntsem, éshʉʼ ejʉ́ɔ epfhō tsɔ́p eleʼé tɛ́t mé atsém, épīŋ le véŋ tɛ ŋiŋ á néŋ á wɔ́p á lesi í.

¹⁰ Epuɔ pīi pɔ́ naáŋ á ndo esī atsetsáʼ, pɔ́ e shʉʼ ejʉ́ɔ epfhō tsɔ́p, é káke. Ntē wɔ́p e egáŋte, ŋiŋ etó azō ŋgyá á mbū ŋiŋ, mɛ́ ezéŋ ntó azí ŋgyá. Pɔ́ epú ŋkáka épúp melaʼ mīi, wɔ tswi‑ŋke mémpīa pwɔ̄, é le māʼ á mía ŋgʉɔ̄ʼ á athū epuɔ menɔŋ.

¹¹ Táʼ, meleʼé alāʼ mɛ́ntɛ́t mé atsém mɛ́t, é etɔ́k, Ndém á tó Azwakne zīi, á ghʉɛ mɛ́ gɔ́ɔ éwú, a eshʉʼ ŋkó ánɛ epfhō cɔ̄, pɔ́ lɛ ndū á esī ntshíte á ajʉʼ. Mmɔʼ mía mía ecɔʼ, á epú njhʉ́ epuɔ pīi, pɔ́ nɔŋ ncʉ̄ʉ á wɔ́p.

¹² Wɔ tswi‑ŋke mémpīa mɛ́t, é júʼ mmɔʼ ŋghi teté, é fhó á lephū, ńdé mé pɔ́p ŋ́gɛ: «Pɛ ekɔ́ʼ eshʉ̄ʼ mé ega. » Pɔ́ gē ekɔ́ʼ mé lephū, alɔ á zémne á wɔ́p, megaŋ mbo pɔ́p é nɔŋ ncʉ̄ʉ á wɔ́p.

¹³ Afʉʼ mɛ́t afʉʼ mɛ́t, esī atsetsáʼ é pú ncʉ̄ʼne ménte ménte. Tésɔŋ á gap nnɛ̄t nzhɛ legēm, taʼ nzhɛ á kemɛ. Epuɔ ntsāʼ esambīa é pú ndákne, páʼ esī atsetsáʼ e é cʉʼne lā. Ecɔʼ é pú ŋgɔ̄ epuɔ pīi, pɔ́ vuʼu, pɔ́ zi á lewuʼte á Ndém Efɔ lephū.

¹⁴ Páte mémpīa ŋgʉɔ̄ʼ á lɔkɔ ntɔ́kɔ. Awuɔ yīi, páte métɛ́t ŋgʉɔ̄ʼ, a cʉ́ʼɛ eshʉʼ shʉʼe lāa.

Ŋghi ntaŋ mbáte esambīa

¹⁵ Cɔʼ Ndém mbáte esambīa á tɔ́ŋ ezi ntaŋ, mɛ́ júʼ meŋghi teté, é fhó á lephū ndé ŋ́gɛ: «Atsyapuɔ yímpɛ pɔ́ Nzaʼ‑Ŋkhʉ yi mé tsetseŋɔ, ḿbɔ́ŋte á lesāʼ ŋgɔŋ. Ésáʼ ŋgɔŋ mɛ́t á meŋguʼ meŋguʼ. »

¹⁶ Meŋghi mɛ́t é shúŋne épúp, epɔ̄ melʉɛ ntsɔp lekua mé megēm mbīa pīi, pɔ́ é nnáŋte ánɛ ekɔʼ lefɔ tsɔ́p, á mvhɔ Ndém, é tswíʼte, ŋ́ŋɔ́ʼne tɛ ethū tsɔ́p é pfeŋ esī, ńdɔkɔ ŋgūʼtɛ á Ndém,

¹⁷ ńnɔŋ ndʉ́ɛ́ ŋ́gɛ: «Pek é syákne á wú, á Atsyapuɔ Ndém ŋgaŋ mete ntsem. Á wú yīi, o ó éwú, mbɔ o le zī ŋgɔ́. Ésyákne á wú, melaʼ mīi o ó lɔk eju ntií á lelɔk esáʼ ŋgɔŋ, ńtswī á mía mía mete mú.

¹⁸ Epuɔ alāʼ ndɛʼɛ é ke záŋ á lɔ́ŋ á mbū wu, á piīŋ ŋgɔ́ tsetsɔŋɔ, wu mé nɔŋ nzáŋa á lɔ́ŋ á mbū pɔ́p. Njhʉ̄ á lelɔk nzáʼ ntsaŋ zɛ a mepfhō, e é kuʼ. Ŋ́gɔ́ njhʉ̄ zīi, o gʉɔ mé ntaáŋ metswi‑ŋke Ndém, mégaŋ afaʼ pú. Ńjhʉ̄ zīi, o gʉɔ mé ntaáŋ epuɔ pīi pɔ́ epú, épuɔ pīi pɔ́ juúʼ nchu wú, mémía epuɔ mbɔɔ epuɔ pīi é mɛɛ̄ emɛ ŋgɔ́. Ńjhʉ̄ zīi, o gʉɔ mé mbiík epuɔ pīi, pɔ́ píkɛ epuɔ menɔŋ á ndo esī atsetsáʼ. »

¹⁹ Ŋ́gūʼte á Ndém tɛ nzáʼ, Mía Ŋgyā Ndém á athʉ́ lephū á tsɔ́ʼɔ ntshí, akʉp eka á ŋwak á ntē éwú, mɛ́ lɛ njʉ́ɔ, meŋŋí mbeŋ é ŋwaŋ, ńjúʼ meŋghi, ńjúʼ lefaŋ á levɛ̄tte, esī atsetsáʼ é pú ncʉ̄ʼne, mewɛ tɛ nzáne é pú ŋgwhʉ̄.