Menjʉɔ te lí 10 - Eka Eswhī

Anu cɔʼ Ndém, pɔ́ anu mɔ́ lepúʼ aŋwaʼne

¹ Meŋ zéŋ njʉ́ɔ mmɔʼ cɔʼ Ndém, á wɛ mete, ńnɔŋ efhɔ́ɔ á lephū esóʼo, ḿmāʼ nzhó ánɛ yí, é gɔ́ alɔ, nnū ŋgēm é kɛ́nne athū zí. Alá eshhʉ̄ zí á ŋwaŋne páʼ lezēk nu lā. Mekhu mí é gɔ́ páʼ melē mmók lā.

² Á wɛ á mɔ́ lepúʼ aŋwaʼne á mbū yí, á gɔ́ ŋkɛ́ʼte kɛ́ʼte. Ńtshí akhu ete zí á ndo mía ntshi, ńtshí akhu tswioɛ á ndo esī atsetsáʼ.

³ Ńnɔŋ ŋgāʼtɛ mé atʉɛ́ ŋghi, páʼ njʉnjhʉ meŋgēm e gaʼtɛ épúp lā. Ŋ́gāʼte épúp, lefaŋ é vɛ́tte ŋgʉɔ esambīa.

⁴ Lefaŋ é vɛ́tte ŋgʉɔ esambīa épúp, meŋ nɔ̄ɔŋ efāʼa á gá á letī ajū mīi, é vɛ́ttɛ ndʉ́ɛ́, ńjúʼ emɔ̄ʼ ŋghi é fhó á lephū, ńdé mé meŋ ŋ́gɛ: «Ŋke yīi lefaŋ é vɛ́tte ŋgʉɔ esambīa, ńdʉ́ɛ́ lā, féŋ á ntsem. Ndɛ́ʼ o etí. »

⁵ Cɔʼ Ndém yīi, meŋ á njʉ́ɔ á tshí á taʼ akhu á ndo mía ntshi, ńzéŋ ntshí amɔ̄ʼ á ndo esī atsetsáʼ lā, á kɔ́ʼne apū ete zí ŋgyá á lephū,

⁶ ndɔ̄k lezēŋ ŋiŋ yīi, a naáŋ meŋguʼ meŋguʼ, ŋ́kā. Á ŋiŋ yīi, a le ghʉ̄ lephū mbɔɔ ajūɔ tsem zīi, á éwú. Á ŋiŋ yīi, a le ghʉ̄ esī atsetsáʼ mbɔɔ ajūɔ tsem zīi á éwú. Á ŋiŋ yīi, a le ghʉ̄ á mía ntshi mbɔɔ ajūɔ tsem zīi á éwú. Ŋ́ka ndé ŋ́gɛ: «Emɔ̄ʼ njhʉ̄ zīi, mɛ́ e zéŋ ezwíʼte, e te zɛ́t. »

⁷ Meleʼé mīi mɛ́ e láʼ ejúʼ á cɔʼ Ndém mbáte esambīa á letɔ̄ŋ ezi ntaŋ, Ndém a eghʉ̄, ajū mīi a le kwaŋtē á ntē ntsem, a epō. Ḿbō páʼ a le tswī épúp, á mbū megaŋ afaʼ pí, métswi‑ŋke.

⁸ Ŋghi zīi meŋ á júʼ é fhó á lephū lā, é zéŋ ndé á mbū meŋ leswhī leswhī ŋ́gɛ: «Gʉɔ ntswí á mɔ́ lepúʼ aŋwaʼne ŋkɛ́ʼte kɛ́ʼte, á mbū cɔʼ Ndém yīi, a tshií akhu zí á ndo mía ntshi, ńtshí amɔ̄ʼ á ndo esī atsetsáʼ lā. »

⁹ Meŋ tshóte nnɛ̄t mé lezēŋ cɔʼ Ndém, éswíŋte á yí ŋ́gɛ, a eyá á mɔ́ lepúʼ aŋwaʼne mɛ́t mé meŋ. Á tsɔ́ʼ á mbū meŋ ŋ́gɛ: «Kɔ aŋwaʼne mɛ́t, ḿpfɛ́t. A gɔ́ á nchu wu, élete páʼ ŋŋwāʼ lā, épiŋ ekó á levem wu, éwhi whii. »

¹⁰ Meŋ fhó á mbū cɔʼ Ndém, ńtswí á mɔ́ lepúʼ aŋwaʼne mɛ́t, ḿpfɛ́t, á gɔ́ á nchu, ńdēte páʼ ŋŋwāʼ lā, meŋ mīi, á piŋ nzī á legwhi á levem meŋ.

¹¹ Mɛ́ lé mé meŋ ŋ́gɛ: «O pɔŋteé á lezēŋ ntswī ŋke Ndém, á mbū epuɔ elāʼ ntsem, á mbū ŋgɔŋ ŋgɔŋ, á mbū wɔ shúŋ á ntií ntiī alāʼ, mbɔɔ á mbū mefɔ tɛ nzáne. »