Menjʉɔ te lí 1 - Eka Eswhī

Nzií

¹ Menu mīi é ntē aŋwaʼne jʉɔ, é si ŋgɔ́ menu mīi é lʉɔneē, mbɔ Yɛɛ́so Klísto a le tswī á mbū wɔ júʼ‑nchu Ndém. Ndém a le yá menu muɔ mɛ́t á mbū yí ŋ́gɛ, a elɔk ntswī á wɔ́p mecū mīi, é cʉ́ʼɛ eshʉʼ shʉʼe. Yɛɛ́so Klísto a le tó á cɔʼ yi, ŋ́gɛ a egʉɔ ntswī menu mɛ́t, á mbū ŋgaŋ afaʼ yi Jáaŋ.

² Jáaŋ a lɛ si eshúŋɔ epuɔ ŋ́gɛ, ŋkwa menu mīi yí le jʉ́ɔ̄, é si ŋgɔ́ ashuŋne Ndém, Yɛɛ́so Klísto mé tswi á légɛ é anuúne.

³ Eshhʉ̄ mbɔŋ a á si ŋgɔ́ á ŋiŋ yīi, a á tɔ́ŋ aŋwaʼne jʉɔ. Meshhʉ̄ mbɔŋ é si ŋgɔ́ epuɔ pīi, pɔ́ juúʼ anu zīi, á tó á nchu Ndém, ḿbiŋ nzīŋ páʼ á si ndʉ́ɛ́, melaʼ mīi afʉʼ zīi, menu mɛ́t é gʉɔ mé ntɔ́kɔ, á tshóne tɛ mbáte.

Jáaŋ a á ega ntsāʼtɛ alúŋ epuɔ Yɛɛ́so ánɛ mejʉʼ esambīa

⁴ Meŋ Jáaŋ, meŋ tíi akɛtte jʉɔ páʼa, á mbū meŋgyā alúŋ epuɔ Yɛɛ́so esambīa mīi, é apak ŋgɔŋ Azíi. Ŋ́gɛ Ndém yīi a á éwú, mbɔ a le zī ŋgɔ́ éwú, éláʼ ezéŋ eshʉʼe, a eghʉ̄ anu mbɔŋ té ndhʉ ánɛ pɛ, ńnéŋ apwɛne á ntē pɛ. Ŋ́gɛ ezwakne esambīa tsīi, é faʼa á mbū Ndém, ńtshíte á mvhɔ akɔʼ Lefɔ Ndém, e eghʉ̄ anu mbɔŋ té ndhʉ ánɛ pɛ, ńnéŋ apwɛne á ntē pɛ.

⁵ Yɛɛ́so Klísto a á si ŋgɔ́ á ŋiŋ yīi, a tswiī á légɛ anu Ndém á anuúne. Ŋ́gɛ a eghʉ̄ anu mbɔŋ té ndhʉ ánɛ pɛ, ńnéŋ apwɛne á ntē pɛ. A á si ŋgɔ́ mvhɔ ŋiŋ yīi, Ndém a le ghʉ̄ á zím ánɛ lewhʉ̄. Ŋ́gɔ́ á efɔ mefɔ á esī atsetsáʼ. Á kɔɔ̄ŋ á yímpɛ, a le lɔ̄k metshi mí, ésōk mefa mímpɛ.

⁶ Ŋ́ghʉ̄ ŋ́gɛ, ḿpɛ a pɔ́p e epúte esáʼ ŋgɔŋ, ŋ́gɔ́ wɔ nɔŋ‑epɔʼ, ŋ́ghʉ̄ afaʼ á mbū Ndém Mɔʼɔ́ yi. Awuʼte pɔ́ mete e egɔ́ á mbū yí á meŋguʼ meŋguʼ. Á épúp.

⁷ Awuɔ yīi a á si eshʉʼɛ á ntē alɔ lāa, tɛ ŋiŋ ntsem a ejʉ́ɔ á yí mé menēk, tɛ mbɔɔ epuɔ pīi, é le zōʼ lekyɛ́t mbɛ tsí. Epuɔ metsem á ndo esī atsetsáʼ, e shʉʼ epú ela, melaʼ mí. Ŋŋ, a shʉʼ etɔ́k épúp anuúnē. Á épúp.

⁸ Atsyapuɔ Ndém a leé ŋ́gɛ: «Meŋ á si ŋgɔ́ á Alfa, ŋ́gɔ́ á Omega, ńdɔkɔ ndʉ́ɛ́ nzií, ńzéŋ ŋgɔ́ nzokó. Ŋ́gɔ́ ŋiŋ yīi a á éwú mbɔ a le zī ŋgɔ́ éwú, éláʼ ezéŋ eshʉʼe. Ŋ́gɔ́ á Atsyantsɔp.

Jáaŋ a á jʉ́ɔ á Klísto á ntē njʉ́ɔ te lí

⁹ Meŋ Jáaŋ méŋ mɔ́ wɛ, ńdɛ̄tne ánɛ Yɛɛ́so páʼ pɛ lā, meŋ á si njʉ́ɔ azá ŋgʉɔ̄ʼ páʼ pɛ lā, ńnɔŋ ŋŋíŋɛ azá á ntē Lefɔ Ndém. Mɛ́ le lɔ̄k á gá ŋgʉ̄ɔ mé Patmos, álāʼ, ntshi é kɛ́nne nnéŋ á esɔŋ, ńdɔ̄kɔ á gá ŋgʉɔ épúp, melaʼ ashuŋne Ndém zīi, meŋ kuʼtéē, mbɔɔ melaʼ anu Yɛɛ́so zīi, meŋ shúŋɔ.

¹⁰ Á lɛ amɔ̄ʼ aleʼé alāʼ Atsyapuɔ, Azwakne Ndém á shʉʼ ŋkó ánɛ meŋ, meŋ júʼ mmɔʼ ntenté ŋghi, páʼ ŋghi ntaŋ lā, é gɔ́ á nzem meŋ eshúŋnɛ.

¹¹ Ńnɔŋ ndʉ́ɛ́ ŋ́gɛ: «Ajū mīi o ó si njʉ́ɔ, tí á ntē aŋwaʼne, ńtó ŋgyá á meŋgyā alúŋ epuɔ Yɛɛ́so esambīa. Ńdɔkɔ ndʉ́ɛ́ ánɛ metésɔŋ Efɛze, Smiine, Pɛɛgam, Tiatii, Saadɛs, Filadɛlfi mbɔɔ Laodisɛ. »

¹² Meŋ mbēkne nnɛ̄t, ŋ́gɔ̄ á njʉ́ɔ á ŋiŋ yīi a shúŋnɛ á mbū meŋ. Ḿbēkne nnɛ̄t épúp, ńjʉ́ɔ ecū mīi mɛ́ tshíɛ meláam éwú. Etsō mɛ́t é tshíte á esī esambīa, mbɔ mɛ́ le lɔ̄k á gɔ́ɔl tɛ́ ncūŋte, meláam é tshíte éwú.

¹³ Meŋ jʉ́ɔ mmɔʼ ŋiŋ á tshí á tsetsɛlɛ meláam mɛ́t, ŋ́gɔ́ páʼ Méŋ‑Ŋiŋnɔŋ lā. Ḿmāʼ á sisia nzhó, ńzwík ekɔp á agaŋne yí, mbɔ mɛ́ le lɔ̄k á gɔ́ɔl tɛ́ ncūŋte.

¹⁴ Ntsɔʼ zi é fók lɛ púú páʼ mewɛ lā. Éfók páʼ menɔŋ njʉnjhʉ lā. Menēk mí é nɔŋ ŋkɛ̄ʼɛ ejʉʼ páʼ melē mmók lā.

¹⁵ Mekhu mí é ŋwaŋne páʼ, mmɔʼ ntií atʉɛ́ zīi, mɛ́ é tɔ á mmók, ńtōk lā. Ŋghi zi é nɔŋ nzwɛ̄nɛ páʼ amaane‑ntshi lā.

¹⁶ Á kúʼte mecɔʼ saŋ esambīa á apū ete yí. Mmɔʼ ŋŋí ncu é nɔŋ ntúɔ́ á nchu yí, éswíne, ńdó meshhʉ̄ mbīa. Eshhʉ̄ yí é nɔŋ ŋŋwāʼnɛ páʼ lezēk nu é ŋwaŋnɛ táŋ‑azokó lā.

¹⁷ Meŋ nde jʉ́ɔ á yí épúp, ńdɛ ŋgwhʉ̄ á mekhu yí, páʼ apfhō azō lā. Á zápa apū ete zí ánɛ meŋ, ńdé ŋ́gɛ: «Te zéŋ mbɔ́k, meŋ á si ŋgɔ́ Nzií, ńzéŋ ŋgɔ́ Nzokó.

¹⁸ Ŋ́gɔ́ nte. Meŋ nde kwhʉ́ʉ̄, ńzím ánɛ lewhʉ̄, tɛ awuɔ yīi, meŋ mbiīŋ ŋgɔ́ nte á meŋguʼ meŋguʼ lāa. Meŋ nde tsyā á lewhʉ̄, ḿbɔ́ŋ mete ánɛ alāʼ mepfhō.

¹⁹ Púp, tí ajū mīi o ó jʉ́ɔ, mbɔɔ ajū mīi, á si ntɔ́kɔ tsetsɔŋɔ, mbɔɔ azi a páte.

²⁰ Ŋ́gɔ́ mé anu zīi, mecɔʼ saŋ esambīa pīi, o ó jʉ́ɔ meŋ ŋgwɛ ánɛ apū ete zá, mbɔɔ ecū mīi, mɛ́ le lɔ̄k á gɔ́ɔl ncūŋte, mɛ́ tshíɛ meláam éwú lā, é lɔkɔ ndʉ́ɛ́, mbɔ mecɔʼ saŋ esambīa é páʼā, ŋ́gɔ́ mecɔʼ Ndém pīi, é cʉtɛ meŋgyā alúŋ epuɔ Yɛɛ́so esambīa. Metsō esambīa mīi mɛ́ tshíɛ meláam éwú, é gɔ́ meŋgyā alúŋ epuɔ Yɛɛ́so esambīa.