Filemɔŋ 1 - Eka Eswhī

Atsaʼte

¹ Meŋ Pɔ́ɔl, ŋ́gɔ́ á ŋgyā atʉɛ́ melaʼ mīi meŋ á ŋgaŋ afaʼ Yɛɛ́so Klísto, mé tíi akɛtte jʉɔ páʼa, pek Timotɛ méŋ mɔ́ yímpɛ. Ńtíi ŋgyáa á mbū wu Filemɔŋ, mbɔŋ esoó wek, ŋ́gɔ́ a esoó afaʼ wek.

² Mbɔɔ á mbū alúŋ epuɔ Yɛɛ́so zīi, á cuʼteé á ŋgyā wu lā. Ńtíi mbɔɔ á mbū Apfia, á méŋ mɔ́ yímpɛ eyi menzwí. Mbɔɔ á mbū Aashʉp, á ŋiŋ yīi, ḿpɛ a pɔ́p é pútɛ ndʉɔ́ʼɔ ánɛ mɛnzhɛ Ndém.

³ Ŋ́gɛ Mɔʼɔ́ yímpɛ Ndém, pɔ́ Atsyapuɔ Yɛɛ́so Klísto, e eghʉ̄ anu mbɔŋ té ndhʉ ánɛ pɛ, ŋ́ghʉ̄ pɛ enáŋ mé apwɛne.

Lesyākne á Ndém melaʼ lefɛ̄ nnɛ̄t Filemɔŋ mbɔɔ melaʼ ŋkɔŋne zīi, a wɛ̄ɛ

⁴ Filemɔŋ, meŋ nɔɔ̄ŋ eswíŋtɛ á Ndém efʉʼ akɔ̄ lɛ́, ŋ́kím lezēŋ cú, ésyákne á yí melaʼ mú.

⁵ Ŋ́ghʉ̄ɛ épúp melaʼ mīi, meŋ á si njúʼɔ mɛ́ shúŋɔ páʼ, o kɔɔ̄ŋ epuɔ Ndém metsem épúp, mbɔɔ páʼ, o fɛɛ́ nnɛ̄t ŋgyá mé Atsyapuɔ Yɛɛ́so épúp.

⁶ Meŋ á si ndɔ́ɔ ŋ́gɛ, Ndém a lɛ ŋghʉ̄, lefɛ̄ nnɛ̄t ŋgyá á mbū Yɛɛ́so yīi, o wɛɛ̄ ajú páʼ pek lā, a ezém ntá á mbū wu. A etsīa épúp, epuɔ e cuŋte nzhɛ́ etsō mbɔŋ tsīi, ŋiŋ a lɛtneē ánɛ Klísto páʼā, ŋ́kūʼ á leghʉ.

⁷ Méŋ mɔ́ ga, ŋkɔŋne zīi o wɛɛ̄ ánɛ epuɔ, e ke ghʉ̄ʉ̄, meŋ ewɛ á mía mía lekāk, ńzéŋ ŋghʉ̄, meŋ kāak ete melaʼ mīi, o ke swíte ntē epuɔ Ndém.

Pɔ́ɔl a á ega eswíŋtɛ ŋ́gɛ, Filemɔŋ a eghʉ̄ azō á mbū Onezim

⁸ Púp, tɛ mbɔɔ páʼ meŋ gɔ elɔ̄ɔk á legɔ̄ yīi, meŋ á nziŋ‑ntō Klísto, éshúŋ á wú té pɔ́k, ajū mīi o gɔ eghʉ̄ʉ lā,

⁹ meŋ á ké mbiŋ njʉ́ɔ ŋ́gɛ, meŋ a fhó áa ánɛ ŋkɔŋne mɛ́t, élɔ́ á wú á taʼ azō. Púp tɛ́ meŋ Pɔ́ɔl, ŋ́gɔ́ á nzwiŋ ŋiŋ, ńzéŋ ŋgɔ́ tsetsɔŋɔ, ŋ́gɔ́ á ŋgyā atʉɛ́ melaʼ mīi meŋ á ŋgaŋ afaʼ Yɛɛ́so Klísto,

¹⁰ meŋ á swíŋte á wú ŋ́gɛ, o elɛ ŋghʉ̄ azō á mbū méŋ ga Onezim. A le kó á ŋgyā atʉɛ́, ńzápa ánɛ Klísto, tɛ́ ncʉ́ʼ á méŋ ga.

¹¹ A kɛ amɔ̄ʼ afʉʼ, ńnɔŋ te ntswítɛ á wú ánɛ amɔ̄ʼ azō ɔ́, a piīŋ ŋgɔ́ tsetsɔŋɔ, ŋ́gɔ́ yīi a gɔ etswíte á gá, ńzéŋ ntswíte á wú.

¹² Meŋ á piŋne á yí, ŋ́gyá á mbū wu, a á si ŋgɔ́ ntē gá ntsem.

¹³ Á ŋgɔ́ yīi a ke gɔ́, meŋ ekúʼte á yí á lezēŋ meŋ, á ghʉ afaʼ zīi, a ke gɔ́ wu mé ghʉ á mbū meŋ, á ŋgyā atʉɛ́ ega yīi, meŋ á éwú melaʼ ŋke mbɔŋ lā.

¹⁴ Meŋ ké ka kɔ̄ŋ á gá leghʉ azō, té pyákne á wú ú, ḿbɔ́k á legɔ̄ páʼ, mɛ́ é tshóne á wú tshóne, tɛ o eghʉ̄ʉ anu mbɔŋ jʉɔ mɛ́t, tɛ o te ghʉ̄ ánɛ lekɔŋ wu ú lā.

¹⁵ A gɔ́ amɔ̄ʼ, mbɔ Onezim a le fhó á lezēŋ wu ŋgʉ̄ɔ, áa ánɛ méŋ afʉʼ, tɛ́ afʉʼ zīi, a á piŋ mbīŋ nzem, pɛ yí e enáŋ á lemiʼɛ.

¹⁶ Pɛ yí e enáŋ épúp, a á le zɛ́t á mbū wu, ŋ́gɔ́ áa ŋkwa ndaʼ á. A egɔ́ á mbū wu, ḿbú ntɔ́k ŋkwa, ŋ́gɔ́ páʼ méŋ mɔ́ wu lā, á méŋ mɔ́ yīi, o chʉʉ́ nnɛ̄t ŋkɔ̄ŋ á yí. Meŋ chʉʉ́ nnɛ̄t ŋkɔ̄ŋ á yí, o pɔŋteé á lekɔŋ á yí ntɔ́k épúp. Ŋ́kɔ̄ŋ á yí melaʼ páʼ, a á azí á ŋiŋnɔŋ, mbɔɔ melaʼ páʼ, a á ŋiŋ Yɛɛ́so.

¹⁷ Páʼ o jʉɔ́ á gá páʼ méŋ mɔ́ wu, á nzem Klísto lā, lɛ ŋkókne á yí páʼ, o kóknɛ á gá lā.

¹⁸ Ḿbiŋ ŋgɔ́ éyi, a ke ghʉ̄ amɔ̄ʼ anu tepɔŋ á mbū wu, kɛ pɛ yí é wɛɛ̄ mmɔʼ njú lɛ́ɛ, mbɔ meŋ a shʉʼ etɔŋ njú mɛ́t, á mbū wu.

¹⁹ Meŋ méŋwɛ̄t Pɔ́ɔl, meŋ á lɔk apū zá ntí ajʉɔ ajʉʼ: meŋ mé shʉʼ etɔŋ njú mɛ́t, á mbū wu. Meŋ eké nzóko nzéŋɛ ŋkímtɛ á wú á légɛ, o wɛɛ̄ njú zīi, o o tɔŋ á mbū meŋ lɛ́? Njú mɛ́t, é gɔ́ athū nnɛ̄t jú.

²⁰ Á épúp me méŋ mɔ́ ga, lɛ nzápa ánɛ lezēŋ Atsyapuɔ páʼ pɔkɔ ghʉɛ afaʼ zí la, ŋ́ghʉ̄ anu jʉɔ mɛt, ŋ́gyá á mbū meŋ. Lɛ ŋghʉ̄ épúp, ńdɔk eswíte ntē gá, páʼ pɔkɔ lɛtneē ánɛ Klísto lā.

²¹ Meŋ tíi akɛtte jʉɔ páʼā, ńnɔŋ ncūŋtɛ nzhɛ́ɛ á légɛ, o o lɛ eghʉ ajū mīi, meŋ á si nzɛ́ttɛ á wú, éghʉ tɛ emaʼ á afɛ̄.

²² Amɔ̄ʼ azō á esī zīi, meŋ a zéŋ ezɛ́tte á wú. Lɛ ncūŋte á taʼ lewup ŋgyā yīi, meŋ a shʉʼ enáŋ éwú. Meŋ á kwaŋ ŋ́gɛ, Ndém a a júʼ meswiŋte mɛ́, éghʉ, mɛ́ efók á gá á ŋgyā atʉɛ́, meŋ eshʉʼ njʉ́ɔ á wɛ́.

Atsaʼte á lelɔk nzōko

²³ Pek Epaflas é ŋgyā atʉɛ́ melaʼ mīi pek é si ŋghʉ̄ɛ afaʼ Yɛɛ́so Klísto, a á si ntsāʼtɛ á wú.

²⁴ Málkúsi, mbɔɔ Alistáak, ŋ́ghʉ̄ á Demas pɔ́ Lúkási, mésoó afaʼ pá, é tsaʼte á wú azɔ́p.

²⁵ Ŋ́gɛ Atsyapuɔ yímpɛ Yɛɛ́so Klísto, a elɛ ŋghʉ̄ á anu mbɔŋ té ndhʉ, ánɛ pɛ.