Mefaʼ Meziŋ-ntō 7 - Eka Eswhī

Etiɛn a á ega eshúŋnɛ á mbū wɔ sáʼ‑ŋgɔŋ

¹ Tɛŋgyā wɔ nɔŋ‑epɔʼ á zɛ́tte á Etiɛn ŋ́gɛ: «Menu mīi epuɔ puɔ é shúŋɔ lāa, é anuúnē e?»

² Etiɛn á pwɛt ndé ŋ́gɛ: «Memɔʼɔ́ pá, mbɔɔ epɔ̄ memía pá, pɛ ejúʼ á mbɔŋɔ́. Á lɛ afʉʼ zīi, maŋgānjʉʼ yímpɛ Ablaham, a le zɛ́t á ntē ŋgɔŋ Mezopotami, tɛ nzɛ́t té fhó éwú ŋgʉ̄ɔ nnáŋ á Kalaŋ, Ndém yīi a wɛɛ̄ mekuʼ, á tswi nnɛ̄t zi á mbū yí.

³ Ńdé á mbū yí ŋ́gɛ: “Tshi atseŋ ŋgyā jú nnéŋ, ńtó á ntē alāʼ pɛ, ŋgʉ̄ɔ mé alāʼ zīi, meŋ gɔ etswii á mbū wu lāa.”

⁴ Ablaham a lɛ efhó á ntē ŋgɔŋ Kaldeɛŋ mɛ́t, ńtó ŋgʉ̄ɔ ńnáŋ á ŋgɔŋ Kalaŋ. Mɔʼɔ́ yi á piŋ eshʉ̄ʼ ŋkwhʉ́, Ndém á ghʉ, á fhó á ntē ŋgɔŋ mɛ́t, ńtó eshʉʼ ńnáŋ á ŋgɔŋ ega yīi, ḿpɛ éwú tsetsɔŋɔ lāa.

⁵ A le náŋ épúp, Ndém á pú te á yí atsáʼ yá, tɛ tsɔ méŋ ajʉʼ. Tɛ́ mbɔ Ndém a le laʼnē á mbū yí ŋ́gɛ, yí e fú eyá ŋgɔŋ jʉɔ mɛ́t á mbū yí, e ecʉ́ʼ ezi, tɛ a efú ndɔ̄k nték nzwɛt zi. Á piŋ ŋgē egɔ́ afʉʼ mɛ́t épúp, Ablaham á zɛ́t té wɛ á mɔ́.

⁶ Ndém á zéŋ ndé á mbū yí ŋ́gɛ: “Nzwɛt ju e e shʉʼ egɔ́ mege ánɛ mmɔʼ ŋgɔŋ, écʉ́ʼ meŋkwa, mɛ́ egēne á wɔ́p ánɛ ŋguʼ ŋkhʉ lekua.

⁷ Táʼ, meŋ enéŋ ŋgʉɔ̄ʼ á athū ŋgɔŋ mɛ́t, éfhó éwú efók nzwɛt ju, pɔ́ eshʉʼ nnáŋ ega eswíŋte á gá.”

⁸ Ndém á kʉɔ́ʼ eka pɔ́ Ablaham épúp, ńzéŋ ŋgyá ayiŋne eka mɛ́t á mbū yí. Á gɔ́ lɛ, mɛ́ zhíɛ á mɔ́ mbaŋa, mɛ́ tém á yí. Púp, Ablaham á shʉʼ nzhí á méŋ yi Izak, á ge egɔ́ á taʼ ŋgap, á tém á yí. Izak á shʉʼ nzhí á méŋ yi Yakɔ́p, ńtém á yí, tɛ́ Yakɔ́p á shʉʼ nzéŋ ntém epí ewɔŋkhʉ̄ ntsɔp pīa mé legēm. Pɔ́ mé si ŋgɔ́ wɔ maŋgānjʉʼ pímpɛ.

⁹ Wɔ maŋgānjʉʼ pímpɛ puɔ mɛ́t, é shʉʼ nnáŋ tɛ eséŋ eshhʉ̄ ánɛ méŋ mɔ́ wɔp Yosɛ́p, ŋ́gɔ̄ á yí, éswīŋ á yí ŋ́gɛ, mɛ́ elɔ̄k á yí ŋgʉ̄ɔ mé Ejīpto, a ecʉ́ʼ ŋkwa éwú. Táʼ, Ndém á nɔŋ ŋké ŋkáptɛ á yí kápte.

¹⁰ Ńnɔŋ ntswítɛ á yí ánɛ ŋgeŋge zīi, a á si njʉ́ɔ á ntē alāʼ mɛ́t. Ńzéŋ ŋgyá á yí azhɛ̄‑anu, tɛ Falaɔŋ, efɔ Ejīpto á kɔŋ á yí, ńchʉ́ á yí ŋ́gɛ, a esáʼ ŋgɔŋ, ńzéŋ esáʼ atseŋ ŋgyā efɔ.

¹¹ Afʉɔne á shʉʼ mbú ŋgwhʉ̄ á ntē ŋgɔŋ Ejīpto ntsem, tɛ ŋkó mbɔɔ á Kanaaŋ. Epuɔ menɔŋ é pú njʉ́ɔ ŋgʉɔ̄ʼ tɛʼ, wɔ maŋgānjʉʼ pímpɛ é té zéŋ ŋgwɛ̄ ajū mīi, pɔ́ e pfɛ́t ɛ́.

¹² Yakɔ́p á shʉʼ njúʼ á légɛ, etsō lejhʉ̄ é ŋgɔŋ Ejīpto, ḿbɛ́ ewɔŋkhʉ̄ pí, éwɔ maŋgānjʉʼ pímpɛ, ńtó á wɔ́p éwú ánɛ mvhɔ legʉɔ.

¹³ Pɔ́ shʉʼ ŋgē epiŋ éwú legʉɔ nzem, Yosɛ́p á ghʉ pɔ́ zhɛ́ á légɛ, yí é méŋ mɔ́ wɔp, tɛ́ Falaɔŋ á kó nzhɛ́ azí atseŋ ŋgyā Yosɛ́p.

¹⁴ Yosɛ́p á lɛ ntó epɔ̄ memía pí ŋ́gɛ, pɔ́ egʉɔ efāʼ á mɔʼɔ́ yi Yakɔ́p, ńdɔk eshʉ̄ʼ mbɔɔ atseŋ ŋgyā zí ntsem. Atseŋ ŋgyā zí mɛ́t á puú ncúʼte, ŋ́gɔ́ á ŋiŋnɔŋ ntsɔp táa megēm esambīa.

¹⁵ Yakɔ́p á shʉʼ mé Ejīpto, ŋ́kó éwú, ńdáʼ nnáŋ tɛ ŋkwhʉ́, mbɔɔ wɔ maŋgānjʉʼ pímpɛ, é shʉʼ nzéŋ ŋkwhʉ́te azɔ́p éwú.

¹⁶ Mɛ́ fú nnáŋ tɛ ŋkʉ̄ɛte epfhō tsɔ́p, ńdɔk ŋgʉ̄ɔ mé Sikɛm, ńnéŋ á ntē lesi tsīi, Ablaham a le láʼ efók ŋkāp, ńdɔk nzó á mbū epɔ̄ Amɔɔ.

¹⁷ Pɔ́ le zɛ́t á ŋgɔŋ Ejīpto, afʉʼ á nɔŋ mbátɛ, ázi anu zīi, Ndém a le laʼnē á mbū Ablaham, á gɔ á mbūɔ̄, epuɔ pímpɛ é pú ntswīʼne esá tɛʼ.

¹⁸ Afʉʼ mɛ́t, mmɔʼ efɔ eswhī á náŋ á aleŋ, ńnɔŋ te nzhɛ́ɛ á Yosɛ́p ɛ́.

¹⁹ Efɔ mɛ́t á pɔpte epuɔ pímpɛ, ŋ́gyá wɔ maŋgānjʉʼ pímpɛ ŋgeŋge, ńtshóne á wɔ́p ŋ́gɛ, pɔ́ ewáʼ epɔ̄ pɔ́p, pɔ́ ekwhʉ́te.

²⁰ Á lɛ afʉʼ mɛ́t, mbɔ mɛ́ ke zhí á Mɔɔ́sɛ, á gɔ́ á mɔ́, ḿbɔ̄ŋ tɛʼ, mɛ́ kɔ́ʼte á yí á ŋgyā mɔʼɔ́ yi mesaŋ métɛ́t,

²¹ tɛ́ ŋgwáʼ á yí. Méŋ Falaɔŋ eyi menzwí, á shʉʼ ŋkʉ̄ɛ á yí, ŋ́kɔ́ʼte páʼ mɔ́ nzhiɛ́ yi lā.

²² Púp, mɛ́ zíʼne á Mɔɔ́sɛ leghi epuɔ Ejīpto ntsem. Á tswhí, ŋ́gɔ́ á ŋiŋ, ashuŋne zí á wɛ shʉ́shɔ́k, á zéŋ nzhɛ́ á letɛ̄ne menu.

²³ Á shʉʼ ŋgwɛ̄ ŋguʼ megēm lekua, á pʉ́ʼɛ á ntē yí, á legʉɔ ntswɛ́tte epɔ̄ memía pí epuɔ Islaɛl.

²⁴ Ŋ́kó ŋgē eshʉʼe, ńjʉ́ɔ ŋiŋ Ejīpto á nɔŋ ntswáa á ŋiŋ Islaɛl, á tɔ́k nzem ŋiŋ Islaɛl, ńzwhí á ŋiŋ Ejīpto.

²⁵ Ńnɔŋ ŋkwāŋa ŋ́gɛ, epɔ̄ memía pí e jʉ́ɔ épúp, ézhɛ́ á légɛ, Ndém mé tó á yí ŋ́gɛ, a eshʉʼ efók á wɔ́p á ntē ŋgʉɔ̄ʼ, tɛ́ pɔ́ piŋ te épúp zhɛ́.

²⁶ Njhʉ̄ é lá, á zéŋ ŋgē eshʉʼe, ńjʉ́ɔ epuɔ Islaɛl mémpīa é nɔŋ ndhʉ̄ɛ, á zi lefakne á wɔ́p, ńdé á mbū pɔ́p ŋ́gɛ: “Mesoó pá, pɛ ejúʼ, pɛ é epɔ̄ memía, ḿbiŋ ŋgɔ́ ega nzéŋɛ ndhʉ̄ɛ akɔ̄?”

²⁷ Ŋiŋ yīi á nɔŋ ntswáa á méŋ mɔ́ yi, á tsɔ́ʼ tépɔŋ á mbū Mɔɔ́sɛ ŋ́gɛ: “Awɔ́ a á néŋ á wú ŋ́gɛ, o esáʼ á wék, ńzéŋ ŋŋāk menu mék é?

²⁸ O faʼa á lezwhī meŋ azá, páʼ o kɛ ezɔ́ nzwhí á ŋiŋ Ejīpto lā lɛ́?”

²⁹ Mɔɔ́sɛ á júʼ anu jʉɔ mɛ́t, ḿbɔ́k, éfhó á ntē ŋgɔŋ Ejīpto, ŋ́kʉ ŋgʉ̄ɔ mé ŋgɔŋ Madian nnáŋ, tɛ efú nzhí ewɔŋkhʉ̄ pí mémpīa éwú.

³⁰ Á ge etɔ́k ŋguʼ megēm lekua, Mɔɔ́sɛ á jʉ́ɔ cɔʼ Ndém, á ŋwak á ntē mmɔʼ mmók yīi, é le nɔ̄ŋ ŋkhʉ́ɛ ánɛ amɔ̄ʼ agapne athʉ́ á késáatswɛt, á ajʉʼ lekwɛ̄t Sinayi.

³¹ Mɔɔ́sɛ á jʉ́ɔ mmók mɛ́t, á kʉʼne á yí tɛʼ, á tshóte nnɛ̄t ŋgɔ̄ á njʉ́ɔ ajū mīi, á aziɛ́. Ńjúʼ ŋghi Atsyapuɔ Ndém é fhó éwú ndé ŋ́gɛ:

³² “A gɔ́ áa gá, á Ndém wɔ maŋgānjʉʼ pú, á Ndém Ablaham, ŋ́gɔ́ á Ndém Izak, ńzéŋ ŋgɔ́ á Ndém Yakɔ́p.” Mɔɔ́sɛ á lɛ ŋgē ejúʼ épúp, ńzī á levɛt, a te zéŋ ŋkɔ̄ŋ á yí á lecʉte ajʉʼ mɛ́t ɛ́.

³³ Atsyapuɔ Ndém á lɛ ndé á mbū yí ŋ́gɛ: “Sɔŋ meláŋ á mekhu wu. Ajʉʼ zīi, o tshií éwú lā, á ajʉʼ zá, meŋ Ndém.

³⁴ Meŋ ke chʉ́ nnɛ̄t, ńjʉ́ɔ páʼ mɛ́ é ntē ŋgɔŋ Ejīpto ŋgyáa epuɔ pá ŋgeŋge épúp. Ńzéŋ njúʼ páʼ, pɔ́ é si nnɔŋ ntswīɛ̄ épúp, ḿbiŋɛ eshʉ̄ʼɛ páʼa, ŋ́gɔ̄ á efók pɔ́p á ntē ŋgʉɔ̄ʼ mɛ́t. Tsetsɔŋɔ, shʉʼɛ̄, meŋ etó á wú á ntē ŋgɔŋ Ejīpto.”

³⁵ Mɔɔ́sɛ wuɔ yīi, epuɔ Islaɛl é le láʼ ŋkʉŋne anu zí, ńzɛ́tte á yí ŋ́gɛ, awɔ́ a á tó á yí ŋ́gɛ, a eshʉʼ esáʼ á wɔ́p, ḿbiŋ ŋŋāk menu mɔ́p lɛ́, yí tɛ́ Ndém a le yá á lesāʼ ŋgɔŋ á mbū yí, ŋ́gɛ a eshʉʼ efók á wɔ́p á ntē ŋgʉɔ̄ʼ. Ndém a le tó á cɔʼ yi á mbū yí, á ntē mmók yīi, é le nɔ̄ŋ ŋkhʉ́ɛ ánɛ agapne athʉ́, tɛ́ á tswi ŋke mɛ́t.

³⁶ Mɔɔ́sɛ á lɛ ŋgʉ̄ɔ á ntē ŋgɔŋ Ejīpto, ŋ́ghʉ̄ meŋkʉʼne anu mbɔɔ emɔ̄ʼ ecū mīi, é tswii á légɛ, a wɛɛ̄ mete Ndém, tɛ́ efhó éwú, éfók epuɔ Islaɛl. Ńzéŋ ŋghʉ̄ emɔ̄ʼ á akʉŋɛ́ Mía Paŋ Ntshi. Ŋ́kó nzéŋ ŋghʉ̄ emɔ̄ʼ, á afʉʼ zīi pɔ́ le lɔ̄k nziŋ á késáatswɛt ŋguʼ megēm lekua.

³⁷ Mɔɔ́sɛ wuɔ mɛ́t mé lé á mbū epuɔ Islaɛl ŋ́gɛ: “Ndém a a shʉʼ etó mmɔʼ ntswi‑ŋke yi á mbū pɛ, ńdeŋ ndeŋ páʼ a le tó á gá lā. A a shʉʼ egɔ́ á ŋiŋ, étó á nnɔ pɛ.”

³⁸ A zeéŋ ŋgɔ́ áa yí Mɔɔ́sɛ yīi, pɔ́ cɔʼ Ndém é le shuŋné á ndo lekwɛ̄t Sinayi, á afʉʼ zīi wɔ maŋgānjʉʼ pímpɛ, é le cuʼté á késáatswɛt pɔ́ a alāʼ. Á tswí mbé Ndém á mbū yí, ŋ́gyá á mbū pímpɛ. Emiɛ́ mé ghʉʉ̄ ḿpɛ é gɔ́ éwú.

³⁹ Wɔ maŋgānjʉʼ pímpɛ, é shʉʼ nnáŋ tɛ pɔ́ té zéŋ ŋkɔ̄ŋ á lejūʼ nchu Mɔɔ́sɛ ɛ́, ńcʉ́ʼɛ ntshíɛ ntē wɔ́p áa lepiŋ nzem mé Ejīpto.

⁴⁰ Ńdɛ ndé á mbū Aalɔŋ ŋ́gɛ: “Pek ka zhɛ́ ajū mīi, á ŋkó á ndo lekwɛ̄t ŋghʉ̄ á Mɔɔ́sɛ ɛ́. Yí mé ke fhó á ntē ŋgɔŋ Ejīpto, efók á wék. Cuŋte melém pīi, é gɔ á ntswiī pek nzhɛ.”

⁴¹ Pɔ́ pɔ́ akeke ánɛ meleʼé mɛ́t, tɛ á gɔ́ páʼ mɔ́ efɔŋ lā, ńzwhí mena ńdɔk nnɔ̄ŋ epɔʼ á mbū yí, ḿbiŋ ŋkák ndɔk ŋgūʼte ajū mīi, pɔ́ é lɔk mbū mɔ́p ncūŋte.

⁴² Ndém á jʉ́ɔ épúp, ńtém nzem zɔp, ńtshī á wɔ́p nnéŋ. Pɔ́ cʉ́ʼɛ ŋgūʼtɛ áa lezēk nu, mbɔɔ saŋ pɔ́ mecɔʼ saŋ, ńdeŋ ndeŋ páʼ mɛ́ le tí á ntē aŋwaʼne metswi‑ŋke Ndém ŋ́gɛ, Ndém a á lé ŋ́gɛ: “Pɛ epuɔ Islaɛl, pɛ ke zīŋ á késáatswɛt ŋguʼ megēm lekua péʼe, ńdáʼ nzwhí mena, ńdɔk nnɔ̄ŋ epɔʼ á mbū meŋ kɛ?

⁴³ Ŋgáŋ, pɛ ke wuʼtē áa mekeke mīi, pɛ ke lɔ̄k mbū mɛ́ ncūŋte. Ŋ́kʉ̄ɛ ntap ndém yīi mɛ́ tɔ́ŋɔ lɛ Molɔk. Ńzéŋ ŋkʉ̄ɛ á cɔʼ saŋ yīi pɛ le cuŋtēē, ńtɔ́ŋ lɛ ndém Lefáaŋ. Melaʼ épúp tɛ́, meŋ a shʉʼ ejuŋ á wɛ́, pɛ egʉɔ tɛ ntɔ́k ŋgɔŋ Babilɔn.”

⁴⁴ «Wɔ maŋgānjʉʼ pímpɛ é lɛ késáatswɛt, ŋ́gwɛ̄ ntap, ajū mīi a tswii á légɛ, pɔ́ a Ndém mé nnɔ, á gɔ́ á ntē éwú. Ndém a le tswīī, Mɔɔ́sɛ á cuŋte ntap mɛ́t, ńdeŋ ndeŋ páʼ a le jʉ́ɔ̄, ezi Ndém a le lɔ̄k ŋghíte á yí, é gɔ́ épúp.

⁴⁵ Ewɔŋkhʉ̄ pɔ́p é cʉ́ʼ ntswí á mbū wɔ maŋgānjʉʼ pímpɛ, ńdɔk eshʉ̄ʼ mé ega. Á lɛ épúp á afʉʼ zīi, Jozwie a le kú ŋgɔŋ jʉɔ, á mbū elāʼ tsīi é lɛɛ́ nnáŋa éwú. Ndém a lɛ mvhɔ, tɛ́ pɔ́ lɔk njūŋ melāʼ muɔ mɛ́t. Ntap mɛ́t é le láʼ ŋgɔ́ ega, tɛ ndáʼ ŋkó ŋguʼ Efɔ Ndavít.

⁴⁶ Efɔ Ndavít mɛ́t, a lɛ ŋiŋ, mbɔ Ndém a lē ntsokte apū zí. Á puʼ mbū ndɔ́ ŋ́gɛ, Ndém a evéŋ ŋ́gɛ, yí ekwɛ́t ŋgyā á mbū yí, á yí Ndém nzwɛt Yakɔ́p.

⁴⁷ Táʼ, méŋ yi Salomɔŋ mé le láʼ mbiŋ ŋkwɛ́t ŋgyā Ndém mɛ́t.

⁴⁸ Á zi ŋgē egɔ́ épúp, mbɔ Ndém, ŋ́gɔ́ á tɛ athʉ́ lephū, a gɛ te nnáŋa ánɛ ŋgyā zīi, epuɔ menɔŋ mé ndɔ̄k mbū ŋkwɛ́t ɛ́, ńdeŋ ndeŋ páʼ ntswi‑ŋke Ndém a le lé ŋ́gɛ:

⁴⁹ “Ndém á si ndʉ́ɛ́ ŋ́gɛ: Lephū é si ŋgɔ́ akɔʼ lefɔ zá, ndo esī atsetsáʼ é gɔ́ ajʉʼ zīi, meŋ tshiteé mekhu má éwú, ŋiŋnɔŋ a gɔ á ŋkwɛ́t eziɛ́ ntií ŋgyā á mbū meŋ ŋ̄? Meŋ gɔ enáŋ eziɛ́ ntií ajʉʼ ē?

⁵⁰ Meŋ méŋwɛ̄t mé lɛ te pú ncūŋte etsō mɛ́t ntsem ɛ́ lɛ̄? ” »

⁵¹ Etiɛn á pɛ́te épúp, ńdé á mbū pɔ́p ŋ́gɛ: «Pɛ teē athū tɛ á tsia. Pɛ megaŋ ntē tepɔŋ. Pɛ é si efʉ́ɛ́ metuúŋ ánɛ anu Ndém, páʼ wɔ te zhɛ́‑Ndém. Pɛ gɛ te njúʼɔ nchu Azwakne Ndém ɛ́, ḿbiŋ ŋgɔ́ si nnɔŋ ŋghʉ̄ɛ páʼ wɔ maŋgānjʉʼ pɛ́ lā.

⁵² Ewiɛ́ ntswi‑ŋke Ndém a á éwú yīi, wɔ maŋgānjʉʼ pɛ́ é lɛ te á yí lʉɔ́ʼ ē? Pɔ́ lɛɛ́ ŋgɔtɛ metswi‑ŋke Ndém, ńzwhí zwhií, pɔ́ ké ŋgɔ́ si eshúŋɔ á wɔ́p anuúnē ŋ́gɛ, Júʼɔ́‑Mbū‑Ndém, a a shʉʼ eshʉʼe. Yí tɛ́ a ke shʉ̄ʼ tsetsɔŋɔ, pɛ tshí ntāŋ zi, ŋ́gɔ̄ á yí nzwhí.

⁵³ Ndém a le tó á cɔʼ yi, á shʉʼ ŋgyá mbé mí mé pɛ, pɛ pwɔ̄ mé lʉʼ á lekīmne mbé mɛ́t. »

Mɛ́ é ega ndɔ̄kɔ metɔ́ ntémtɛ á Etiɛn

⁵⁴ Wɔ sáʼ‑ŋgɔŋ é júʼ anu zīi, Etiɛn a á lé, ntɔ̄ŋ wɔ́p é fuʼ. Pɔ́ záŋ á lɔ́ŋ á mbū yí.

⁵⁵ Ḿbiŋ ŋgɔ́ mé Etiɛn, Azwakne Ndém á ziɛ á ntē yí, á pʉ́ʼɛ menēk mí ndɔk ncʉ̄te lephū, ńjʉ́ɔ á shʉ́shɔ́k Ndém, ńzéŋ njʉ́ɔ páʼ Yɛɛ́so a tshií á ajʉʼ, á ŋkɔʼɔ́ apū ete Ndém.

⁵⁶ Etiɛn á lɛ mvēŋne, ńdé ŋ́gɛ: «Pɛ ecʉte njʉ́ɔ, meŋ á ega njʉ́ɔ mbɔ lephū é tsɔ́ʼɔ ntshí, Méŋ‑Ŋiŋnɔŋ á tshí á ŋkɔʼɔ́ apū ete Ndém. »

⁵⁷ Pɔ́ júʼ épúp, éfé metuúŋ mɔ́p, ńdéŋte meŋguŋ, ḿbú ndū á esī, ŋ́ghwʉ̄ ánɛ Etiɛn metsem,

⁵⁸ éshūŋne á yí, ńdɔk efhó á ntē tésɔŋ ntó mé nzem apɛ́, ńzī á lelɔk metɔ́ ntémte á yí. Epuɔ pīi, mɛ́ mmīk á wɔ́p ŋ́gɛ, pɔ́ eshʉʼ ntshí anu á athū Etiɛn, pɔ́ sɔŋ menzhó mɔ́p, ŋ́gyá á mbū mmɔʼ mɔ́ ŋgwɛso, lezēŋ tsí é gɔ́ lɛ Sɔ́ɔl, ŋ́gɛ a ekúʼte.

⁵⁹ Mɛ́ nɔŋ ntémtɛ á yí mé metɔ́ púp, á swíŋte á Ndém ndé ŋ́gɛ: «Atsyapuɔ Yɛɛ́so, lɛ ndɔ̄k agega zá mé lephū. »

⁶⁰ Ḿbiŋ ntswíʼte á esī, ŋ́gāʼte mé ŋghi teté ŋ́gɛ: «Atsyapuɔ, lɛ́ʼ o lɛ ncʉ̄te ajū mīi, epuɔ puɔ é ghʉɛ lāa. » Ŋ́gāʼte épúp, ńdɛ ŋkwhʉ́.