Mefaʼ Meziŋ-ntō 28 - Eka Eswhī

Pɔ́ɔl a á ega á ntē ŋgɔŋ Málte

¹ Pek evūʼɔ épúp, mɛ́ shúŋ á wék ŋ́gɛ, ŋgɔŋ zīi pek é kó éwú, e é lɛ Málte.

² Epuɔ alāʼ mɛ́t é pú ŋkókne á wék á mbɔŋɔ́. Ńtswákne á mía mmók, pek eshʉ̄ʉʼ nzók, melaʼ mīi mbeŋ e le nɔ̄ŋ ndúu, efwɔ̄k é piŋ mbú nnɔŋ ŋkúu.

³ Pek enɔ̄ɔŋ nzóko épúp, Pɔ́ɔl á náŋ tɛ ŋwɛ̄t ntswīŋ, ŋ́gɔ̄ mmaʼ á mmók, mmɔʼ nnū zīi é ŋgɔ́ éwú, é júʼ azwɛ́t mmók, ńtó ntsók apū Pɔ́ɔl, tɛ ntsēŋne éwú.

⁴ Epuɔ alāʼ mɛ́t é jʉ́ɔ páʼ nnū e tseŋneé ánɛ apū Pɔ́ɔl, ńdé á tsetsɛlɛ pɔ́p ŋ́gɛ: «Mbaŋa wuɔ a á kwaʼ ŋiŋ yīi, a lé zwhí á ŋiŋ. A á tswɛ́t á lewhʉ̄ á ntē ntshi, ŋ́kɔ́ʼ tɛ ŋkó á ndo ŋgia, Mbʉʼɛ‑Anu yí méŋwɛ̄t á zéŋ te véŋ ŋ́gɛ, a egɔ́ éwú ú.

⁵ Táʼ, Pɔ́ɔl á ŋikte apū zí á ntē mmók, nnū é sóʼo ŋgwhʉ̄ éwú, azō á té Pɔ́ɔl ghʉ.

⁶ Epuɔ mɛ́t é nɔŋ nzwíʼtɛ ŋ́gɛ, pɔ́ e jʉ́ɔ apū zí a elū, ká ŋ́gɛ, a ewhʉ ŋkwhʉ́. Ḿbiŋ ndáʼ ńzwíʼte tɛ ŋká, ńjʉ́ɔ azō á té á yí ghʉ. Pɔ́ lɛ esɛ̄t ashuŋne, ńcʉ́ʼɛ ndʉ́ɛ́ ŋ́ghʉ̄ áa lɛ: «Ŋiŋ wuɔ, a gɔ́ áa mmɔʼ ndém. »

⁷ A lɛ á eshhʉ̄ ajʉʼ mɛ́t, etsáʼ kwaʼ mía ŋiŋ alāʼ mɛ́t, é gɔ́ éwú, lezēŋ tsí é gɔ́ lɛ Pibliwis. Á kókne á wék páʼ mesoó pí lā, pek náŋ á mba yí eleʼé tɛ́t.

⁸ Á ge egɔ́ épúp, mɔʼɔ́ Pibliwis á nɔŋ á ŋgyā ŋgɔ̄ɔ, nnɛ̄t é nɔŋ ŋkɔ́ʼɔ á yí, akuá á zéŋ nnɔ̄ŋ ŋghʉ̄ɛ á yí. Pɔ́ɔl á kó á ŋgyā á ncʉ̄te á yí, ńzápa mbū á athū yí, éswíŋte á Ndém, á te.

⁹ Á tɔ́k épúp, emɔ̄ʼ megaŋ agɔ ntsem á ntē ŋgɔŋ mɛ́t, e pú ntó azɔ́p eshʉ̄ʼ. Pɔ́ɔl á zéŋ ŋghʉ̄ pɔ́ te.

¹⁰ Epuɔ alāʼ mɛ́t é pú ŋgyá mekuʼ mék tɛʼ tɛʼ. Pek eshʉ̄ʉʼ nnáŋ tɛ ŋgē egʉɔ, pɔ́ pú ŋgyá á wék ecū mīi, é gɔ tswíte á wék ánɛ leziŋ wek.

Pɔ́ɔl a á ega ŋgɔ̄ ekó á tésɔŋ Lóma

¹¹ Pek le náŋ á Malte mesaŋ métɛ́t, éshʉʼ ncʉ́ʼ á legʉɔ, ŋ́kó mmɔʼ mɛtúa ntshi yīi, mɛ́ lɛɛ́ ntɔ́ŋɔ lɛ «Melém pīi é mefāk. » Mɛtúa ntshi mɛ́t, á gɔ́ mbɔ a le fhó a tésɔŋ Alɛkzaŋdli, ŋ́kó á ajʉʼ mɛ́t, tɛ́ afʉʼ mía afēm á kuʼ, ŋ́gɔ́ á afʉʼ zīi pɔ́ gɔ le zéŋ nzīŋ ɛ́.

¹² Pek egʉ̄ɔ tɛ ŋkó á tésɔŋ Silakwīze, ńnáŋ éwú eleʼé tɛ́t.

¹³ Efhó éwú, ńzéŋ nzīŋ á ŋgʉŋne ntshi tɛ ŋkó á tésɔŋ Lejio. Njhʉ̄ é lá, mmɔʼ fefwɛt á nɔŋ efhɔ́ɔ á mbuʼ ntsēŋ ntsīa, ńtswíte á wék, tɛ pek elɔ̄ɔk eleʼé pīa, ŋ́kó á tésɔŋ Puzɔl.

¹⁴ Ŋ́kó éwú, ńjʉ́ɔ mmɔʼ epɔ̄ memía, ŋ́gɔ́ epuɔ Yɛɛ́so. Pɔ́ swíŋte á wék ŋ́gɛ pek a pɔ́p e enáʼ nnáŋ. Pek véŋ, pek a pɔ́p é náŋ á taʼ ŋgap. Ewek legʉɔ tɛ ŋkó á tésɔŋ Lóma, a gɔ́ ŋgɔ́ ewuɔ páʼa.

¹⁵ Pek le kó á Puzɔl, epuɔ Yɛɛ́so pīi pɔ́ tésɔŋ Lóma, é tshí njúʼ á légɛ, pek é si eshʉ̄ʼɛ mé Lóma. Ńnáte eshʉʼ ńzáʼte á wék á mɛnzhɛ, pek a epi emɔ̄ʼ é pote á ndo esaá yīi, mɛ́ tɔ́ŋɔ lɛ «Apius. » Pek a epi emɔ̄ʼ é zéŋ ŋkó mbōte á amɔ̄ʼ ajʉʼ, mɛ́ tɔ́ŋ lɛ «Meŋgyā mege mɛ́ ntɛ́t. » Pɔ́ɔl á ziŋɛ njʉ́ɔ epɔ̄ memía épúp, ésyáknɛ á Ndém, ḿbiŋ ntswīʼne ŋkāk ete.

¹⁶ Pek kó a tésɔŋ Lóma épúp, mɛ́ véŋ ŋ́gɛ, Pɔ́ɔl a etswhi nnáŋ ezi mba, taʼ ndʉɔʼ‑ncu a enɔŋ mbípɛ á yí.

Pɔ́ɔl a á ega ntswīi ŋke Ndém á tésɔŋ Lóma

¹⁷ Á tɔ́k eleʼé tɛ́t, Pɔ́ɔl a tɔ́ŋ mekém epuɔ Yúda pīi, é naáŋ á tésɔŋ Lóma, á mba yí. Pɔ́ shʉʼ ncúʼte, ńnáŋ á esī, á lé á mbū pɔ́p ŋ́gɛ: «Epɔ̄ memía, meŋ ntshií páʼa, mbɔ meŋ nda eghʉ̄ amɔ̄ʼ anu tepɔŋ ánɛ alāʼ zímpɛ ɛ́, ḿbiŋ te fā amɔ̄ʼ anu ánɛ mɛt alāʼ, páʼ wɔ maŋgānjʉʼ pímpɛ é le zapá épúp ɔ́. Táʼ, a awuɔ yīi mɛ́ kʉʉ̄ŋ ŋgɔ̄ á gá á Yelósalɛm, ńnéŋ á mbū epuɔ Lóma lāa.

¹⁸ Pɔ́ ke ŋāk á gá, ḿbiŋ nnɔ̄ŋ ŋgɔ̄ á ntshiī meŋ néŋ, melaʼ mīi, pɔ́ faʼ, pɔ́ té jʉ́ɔ amɔ̄ʼ anu zīi, meŋ á ghʉ, tɛ ŋgɔ́ yīi mɛ́ gɔ ezwhí á gá zwhí ɛ́.

¹⁹ Pɔ́ lé épúp, táʼ, epuɔ Yúda é ké te véŋ. Meŋ te zéŋ nzhɛ́ páʼ meŋ a ghʉ épúp ɔ́, ńdɛ ŋgyá azá ntsaŋ á mvhɔ, á mbū ŋwɛ́t ŋgɔŋ Lóma. Ŋ́ké ŋghʉ̄ɛ épúp páʼā, ńdɔkɔ te ndāʼa epuɔ alāʼ pek ɛ́.

²⁰ Melaʼ épúp tɛ́ meŋ faʼa á lejʉ̄ɔ á wɛ́, ḿpɛ shúŋne. Éshʉʼ ánɛ meŋkhʉ atʉɛ́ mīi, pɛ jʉ́ɔ mbɔ mɛ́ ndɔk ŋkwɛ́t á gá la, mbɔ é melaʼ ŋiŋ yīi, epuɔ Islaɛl é gɛ nnáŋa nzwíʼtɛ, mé taʼ ntē. »

²¹ Mekém puɔ mɛ́t, é júʼ épúp, ńdé á mbū Pɔ́ɔl ŋ́gɛ: «Mɛ́ laá nzi efhó á Yudéa, ńtí amɔ̄ʼ akɛtte, ŋ́gyá á mbū pek ega, tɛ ŋkím lezēŋ cú ú. Tsɔ mmɔʼ méŋ mía, a la pīŋ efhó éwú eshʉ̄ʼ ega, tɛ mbɛ́te amɔ̄ʼ anu ánɛ wu, ká á lekīm lezēŋ cú tépɔŋ ɔ́.

²² Táʼ, pek é ké ŋkɔ̄ŋ ŋ́gɛ, o ekɛ́ʼte anu zīi á ntē wu, éshúŋ á wék. Pek lʉ́ɛ́ páʼa, nzi nnɔ̄ŋ nzhɛ́ɛ á légɛ, mɛ́ é tɛ mbɔɔ akɔ̄ ajʉʼ lɛ́, ŋ́kím nnɔ yīi, o ó éwú la té pɔŋ. »

²³ Mekém mɛ́t e lé épúp, pɔ́ a Pɔ́ɔl e táŋ aleʼé zīi, pɔ́ a pɔ́p e zéŋ epote. Á láʼ aleʼé mɛ́t, pɔ́ shʉʼ ntswɛ́tte á yí á mba yí. Ŋ́gē eshʉʼ tsetsɔŋɔ, ḿbú nzá tɛ ntɔ́k á aleʼé mvhɔ. Pɔ́ɔl á zi nzemɛ́nzēm, ŋ́kɛ́ʼte menu eshúŋ á wɔ́p tɛ ŋkó eseéŋ‑njhʉ̄. Éshúŋ á wɔ́p anu ánɛ Lefɔ Ndém. Ḿbiŋ ŋgē efaʼ eshhʉ̄ á leghʉ tɛ pɔ́ méŋwɛ̄t e evéŋ anu ánɛ Yɛɛ́so, éfók anu ánɛ lepé Mɔɔ́sɛ mbɔɔ á ntē aŋwaʼne metswi‑ŋke Ndém, tɛ́ eshúŋ á wɔ́p.

²⁴ Emɔ̄ʼ epuɔ á tsɛtsɛlɛ pɔ́p é júʼ anu zīi, Pɔ́ɔl a á lé, ḿvéŋ, epi emɔ̄ʼ é júʼ, pɔ́ té véŋ.

²⁵ Tákté á lɛ ŋkó á tsetsɛlɛ pɔ́p, tɛ pɔ́ láʼ ŋgē efakne, ntswi nchu á gɔ́ te á nnɔ pɔ́p ɔ́. Pɔ́ɔl á shúŋ anu jʉɔ á mbū pɔ́p, ńdé ŋ́gɛ: «Azwakne Ndém á le jʉ́ɔ á mbɔŋɔ́, tɛ́ ndɔ̄k nchu ntswi‑ŋke Ndém Izayi, éshúŋne á mbū wɔ maŋgānjʉʼ pɛ́.

²⁶ A le lé ŋ́gɛ: “Gʉɔ njʉ́ɔ epuɔ alāʼ puɔ, ńdé á mbū pɔ́p ŋ́gɛ: Pɛ e shʉʼ echʉ́ nnɛ̄t ezwíʼte ejʉʼ, éké le azō júʼ. Pɛ e shʉʼ echʉ́ nnɛ̄t ecʉte ejʉʼ, éké le azō jʉ́ɔ.

²⁷ Púp melaʼ mīi ntē epuɔ alāʼ puɔ, é kʉʉ̄ŋ nte páʼ metɔ́ lā. Pɛ kʉʉ̄ŋ nzeŋne metuúŋ mɛ́, ŋ́kápte menēk mɛ́, ŋ́gɛ pɛ gɔ le zéŋ ndɔ̄k metuúŋ mɛ́ njúʼ ejʉʼ ɛ́, ḿbīŋ le zéŋ ndɔ̄k menēk mɛ́ njʉ́ɔ ejʉʼ ɛ́. Ńdɔkɔ te ŋkɔ̄ŋɔ á lelɔk ntē wɛ́, ńtswí anu zīi mɛ́ é shúŋ á wɛ́ ɛ́. Ńdɔkɔ te ŋkɔ̄ŋɔ á lesɛt nnɛ̄t, éshʉʼ ntsé á nzem meŋ Ndém, tɛ meŋ eghʉ̄ʉ, pɛ ete ɛ́.”»

²⁸ Pɔ́ɔl á zéŋ ndé á mbū pɔ́p ŋ́gɛ: «Pɛ ezhɛ́ á mbɔŋɔ́ ŋ́gɛ, Ndém a le tó ŋke mbɔŋ yīi, é ghʉɛ mɛ́ tswɛ́tɛ, á mbū epuɔ pīi é té epuɔ Yúda á. Pɔ́ e shʉʼ ejúʼ azɔ́p ŋke mɛ́t. »

²⁹ [Á lé épúp, epuɔ Yúda é ge efhó ajʉʼ mɛ́t egʉɔ, ḿbú nziŋɛ ntɔ̄ʼnɛ anu mɛ́t ménte, á nnɔ pɔ́p.]

³⁰ Pɔ́ɔl á náŋ á Lóma ŋguʼ epīa, á mba yīi a le tswíī, ńnɔŋ mbíɛ́. A te pú ndʉ̄ʼ á légɛ, awɔ́ yīi a á kɔŋ á lejʉ̄ɔ á yí lɛ́, a eshʉ̄ʼ éwú njʉ́ɔ á yí, pɔ́ yí eshúŋne ɛ́.

³¹ Á nɔŋ eshúŋɔ anu ánɛ Lefɔ Ndém, ńnɔŋ nchʉ́ɛ nnɛ̄t nzíʼnɛ epuɔ té miʼte, á ŋiŋ yīi Atsyapuɔ Yɛɛ́so Klísto á ewiɛ́. Ŋiŋ á piŋ nnɔ̄ŋ te nzɛ́t mvɛ́nɛ á yí í.