Mefaʼ Meziŋ-ntō 27 - Eka Eswhī

Mɛ́ é ega ntúɔ́ á Pɔ́ɔl á Lóma, á ntē ŋgɔŋ Itália

¹ Mɛ́ gɔ tɛ nzápa ŋ́gɛ, afʉʼ á kuʼ zīi, pek e kó á mɛtúa ntshi, égʉɔ mé ŋgɔŋ Itália. Mɛ́ tsékne á Pɔ́ɔl pɔ́ a emɔ̄ʼ megaŋ atʉɛ́ á mbū mmɔʼ mɔ́ tɛŋgyā ncu, lezēŋ tsí é gɔ́ lɛ Julius. Á pɔ́ŋ wɔ lʉɔ́ʼ‑ncu ajūɔ epuɔ ŋkhʉ ánɛ nnɔ ncu yīi, mɛ́ tɔ́ŋɔ lɛ, eyi ŋwɛ́t ŋgɔŋ Lóma.

² Pek ge ekó á ntē mɛtúa ntshi, á gɔ́ yīi a fhɔ́ɔ mé tésɔŋ Adlamit, á nɔŋ ŋgɔ̄ eziŋɛ etsiatɛ ánɛ metésɔŋ pīi, é akʉŋɛ́ ntshi á ntē apak ŋgɔŋ Azíi. Pek ge egʉɔ, pek a Alistáak ŋiŋ tésɔŋ Tesalonik á ntē apak ŋgɔŋ Maseduan, é gɔ́ nnɔ.

³ Páte aleʼé mɛ́t, pek kó á Sidɔŋ. Julius á wɛ ntē mbɔŋ ánɛ Pɔ́ɔl, ńcʉ́ʼ á gʉɔ ŋgúa mesoó pí, ńzhɛ́ ŋ́gɛ pɔ́ e kó eyá á yí ecū mīi, é ŋgɔ́ á mbū yí nnɔŋ ŋkíŋɛ.

⁴ Pek fhó ánɛ ewiɛ́ tésɔŋ ntó, ńnɔŋ ŋgʉ̄ɔ, fefwɛt á fhó mvhɔ mvhɔ, ńtɔ̄ʼ á wék á legʉɔ ndeŋ ndeŋ, pek egʉ́ŋne ŋgʉ̄ɔ. Ŋgɔŋ Shʉ́ple é nɔŋ ŋkʉ̄ŋɛ á wék.

⁵ Ŋ́gʉ̄ɔ épúp, ńtɔ́k á amaane‑ntshi zīi á ŋgʉŋne apak ŋgɔŋ Silisi, ńtɔ́k eyi é ŋgʉŋne apak ŋgɔŋ Pamfili, ńdɛ ŋkó á tésɔŋ Miila á ntē apak ŋgɔŋ Lisíi, ésóʼo.

⁶ Ŋ́kó éwú épúp, mɔ́ tɛŋgyā ncu á jʉ́ɔ mmɔʼ mɛtúa ntshi yīi, a fhɔ́ɔ á tésɔŋ Alɛkzaŋdli, ŋ́gʉ̄ɔ mé ŋgɔŋ Itália, ŋ́ghʉ̄ pek kó éwú ŋgʉ̄ɔ.

⁷ Pek elɔ̄ɔk meleʼé alāʼ tɛ nzá, ńchʉ́ nnɛ̄t nzīŋ mé nda mé nda, tɛ ndáʼ ŋgē ekó á tésɔŋ Kenīde, ńjʉ́ɔ ŋgʉɔ̄ʼ tɛʼ. Páʼ fefwɛt a á pú ntɔ̄ʼ á wék á legʉɔ ndeŋ ndeŋ lā, pek egʉ́ŋne ŋgʉ̄ɔ, ŋgɔŋ Klɛt é nɔŋ ŋkʉ̄ŋɛ á wék. Pek etɔ́k á ŋgʉŋne amɔ̄ʼ apak alāʼ mɛ́t, mɛ́ tɔ́ŋ lɛ Salmonɛ.

⁸ Ńzīŋ épúp ánɛ ŋgʉŋne ntshi ajʉʼ mɛ́t, ḿbú njʉ́ɔ ŋgʉɔ̄ʼ tɛʼ, tɛ́ ndáʼ ŋkó ánɛ amɔ̄ʼ ajʉʼ, mɛ́ tɔ́ŋ lɛ «Mepɔŋ Meŋkʉŋɛ́ ntshi», á páte á tésɔŋ Lazɛ.

⁹ Pek ge ekó éwú épúp, mbɔ pek é pú nnáŋ á mɛnzhɛ tɛʼ, tɛ mía aleʼé lekāk lekɔŋ náŋ nzi epuɔ Yúda á tɔ́k, ńdɔkɔ ŋgɔ́ɔ afʉʼ alāʼ zīi, tepɔŋ afēm a gɛ ntúʼɔ á ndo ntshi. Pɔ́ɔl á yá ntekné á mbū wɔ faʼa á ntē mɛtúa ntshi ŋ́gɛ:

¹⁰ «Mesoó pá, meŋ á jʉ́ɔ azá ŋ́gɛ, ḿpɛ lɔkɔ á leziŋ wuɔ ŋgʉ̄ɔ mé mvhɔ, mbɔ ḿpɛ gʉɔ mé ntaáŋ mía pí, mɛtúa ntshi pɔ́ etsō esaá tsīi, é ntē éwú, é pú elákne. Ŋ́gɔ́ yīi ḿpɛ é gɔ ezéŋ ŋkwʉ́te. »

¹¹ Pɔ́ɔl á lé épúp, táʼ, mɔ́ tɛŋgyā wɔ lʉɔ́ʼ‑ncu á wák azí anu, ḿbiŋ njúʼ ndaʼ nchu ŋiŋ yīi, a sáʼa epuɔ pīi, é faʼa á ntē mɛtúa ntshi, mbɔɔ anu zīi, ŋgaŋ mɛtúa ntshi a á lé.

¹² É té ndaʼ épúp ɔ́, tésɔŋ yīi pɔ́ éwú, á ŋgʉŋne ntshi, á gɔ́ te ajʉʼ zīi, mɛ́ gɔ enáŋ éwú afʉʼ afēm ɛ́. Lelʉɛ epuɔ pīi é ŋgɔ́ á ntē mɛtúa ntshi, é lɛ mvéŋ ŋ́gɛ, mɛ́ efhó ajʉʼ mɛ́t ŋgʉ̄ɔ. Ńnɔŋ ndʉ́ɛ́ ŋ́gɛ, a kó ŋgyá eshhʉ̄, pɔ́ gʉɔ tɛ ŋkó á tésɔŋ Fenis. Éfaʼa á lenāŋ éwú, tɛ aziɛ́ afʉʼ tepɔŋ á tɔ́k. Fenis wuɔ mɛ́t, a lɛ mmɔʼ tésɔŋ yīi, a á ŋgʉŋne ntshi á ntē ŋgɔŋ Klɛt, ŋ́gɔ́ yīi, a gɔ ekʉŋɛ, tɛ afēm á le fhó á mbuʼ ŋkɔŋ kɛ́ á mbuʼ ntsēŋ, ńtúʼ á ntē ntshi ɛ́.

Mía mía afēm á ega ntúʼɔ á ntē ntshi

¹³ Méŋ fefwɛt á kó efhó á mbuʼ ntsēŋ, ńzī á letūʼ. Epuɔ pīi é cʉtɛ mɛtúa ntshi, pɔ́ kwaŋ ŋ́gɛ ajū mīi pɔ́ nnɔŋ ŋkɔ̄ŋɔ, á gɔ ezīiŋ. Ńdɛ ndɔ̄k á mɛtúa ntshi, ŋŋāʼ nnɛ̄t á esī, ńdɛ̄te á ŋgʉŋne ntshi Klɛt.

¹⁴ Táʼ, ńzɛ́t té ziŋ, mmɔʼ mía mía afēm, mɛ́ tɔ́ŋ lɛ Elakwilɔŋ á fhó á ndo mekwɛ̄t Klɛt, ḿbú ntúʼ.

¹⁵ Ńtshóne á mɛtúa ntshi ŋgyá á eshhʉ̄ ndɛʼɛ. Pek jʉ́ɔ kékáŋ, ńtshī á mɛtúa nnéŋ, afēm á lɔk á wék nzīŋ páʼ á kɔŋ.

¹⁶ Á shuŋne á wék, ńnɔŋ ndɔ̄kɔ ntsīa á lezēŋ mmɔʼ méŋ agáʼ ŋgɔŋ, mɛ́ tɔ́ŋ lɛ Kɔ́da. Méŋ agáʼ ŋgɔŋ mɛ́t é náʼ ŋkʉ̄ŋɛ afēm ánɛ mɛtúa ntshi, pek jhʉ́ apɛ, ŋ́kāk ete, éshūŋ akɛnūʼ zīi á ntsēŋne á nzem mɛtúa ntshi, ŋ́gɔ̄ nnéŋ á ntē éwú.

¹⁷ Mɛ́ kɔ́ʼne akɛnūʼ mɛ́t tɛ nnéŋ éwú, megaŋ afaʼ mɛtúa ntshi, é lɔk meŋkhʉ nzémte á mɛtúa ntshi, ḿbɔ́k á lepwɔ̄ʼte. Páʼ pɔ́ lɛ si mbɔ́kɔ ŋ́gɛ ndɛ́ʼ afēm á tshóne á wɔ́p, pɔ́ gʉɔ ŋkó ánɛ asaŋasáŋá á ŋgʉŋne ŋgɔŋ Libi lā, tsitsi mɛtúa ntshi yīi, a á ntsēŋne mé athʉ́, pɔ́ sóʼne mé esī, ŋ́gɛ ndɛ́ʼ afēm á zéŋ ŋgákne ndɔ̄k á wɔ́p nzīŋ.

¹⁸ Njhʉ̄ é lá, afēm á zɛ́t ntswīʼnɛ ncʉ̄ʼnɛ á wék ménte cʉʼne. Á gɔ gɔɔ́, tɛ mɛ́ fók á tsitsi esaá mmāʼte á ntshi.

¹⁹ Ezi mmɔʼ njhʉ̄ é zéŋ ndá, megaŋ afaʼ mɛtúa ntshi pɔ́ méŋwɛ̄t é ŋwɛt á tsitsi mɛtúa ntshi, ŋ́gwáʼ á ntē ntshi.

²⁰ Á tɔ́k meleʼé tɛ nzáne, afēm á zɛ́t ntswīʼnɛ ntúʼ tuʼé, ŋiŋ a te pú nzéŋ lezēk nu njʉ́ɔ ɔ́, ḿbiŋ te mecɔʼ saŋ jʉ́ɔ. Á gɔ́ tɛ ŋiŋ wek a te zéŋ nzhɛ́ á légɛ, yí gɔ eshʉ̄ʼ ntswɛ́t ɛ́.

²¹ Á le gɔ́ mbɔ, epuɔ pīi é lɛ á ntē mɛtúa ntshi, é náŋ tɛ ŋgia é sak, té pfɛ́t azō. Pɔ́ɔl á lɛ ndū á esī ntshí á mvhɔ epuɔ metsem, ńdé ŋ́gɛ: «Mesoó pá, pɛ ke wíʼe njúʼ nchu gá, mbɔ pɛ kɛ te fhó á Klɛt, ŋ́gʉ̄ɔ á ajʉʼ ɛ́, mbɔ mɛtúa ntshi a kɛ te lákne, ḿpɛ pīiŋ te ewuɔ pí kó.

²² Táʼ, tsetsɔŋɔ wuɔ, meŋ á lé ŋ́gɛ, pɛ esēk ntē, tsɔ taʼ ŋiŋ wɛ, a puú ŋgɔ́ le kwhʉ́ ʉ́. Ḿpɛ e pí áa ndaʼ mɛtúa ntshi.

²³ Meŋ ndʉ́ɛ páʼa, melaʼ mīi á ŋgɔ́ ŋkɔʼɔ́‑atswɛt ayáʼa, Ndém yīi meŋ á ŋiŋ yi, ḿbiŋɛ ŋgūʼtɛ á yí, á tó á cɔʼ yi á mbū meŋ,

²⁴ á shʉʼ ndé á mbū meŋ ŋ́gɛ, ndɛ́ʼ meŋ mbɔ́k azō, ŋ́gɛ mɛ́ wɛɛ̄ ntsaŋ za zīi, mɛ́ gʉɔ mé mvhɔ ŋwɛ́t ŋgɔŋ Lóma á esáʼa. Ŋ́gɛ epuɔ pīi pek a pɔ́p é ntē mɛtúa ntshi lā, pɔ́ e jhʉ́ apɛ zá. Ŋ́gɛ Ndém a ghʉ, tsɔ taʼ ŋiŋ yímpɛ a á le kwhʉ́ ʉ́.

²⁵ Cɔʼ Ndém a á ndé á mbū meŋ épúp, meŋ mbīiŋ ŋgɔ́ á ŋiŋ, ńnéŋ ntē gá ánɛ Ndém. Melaʼ épúp, mesoó pá, pɛ esēk ntē. Akʉ̄ɛ akʉ̄ɛ zīi, a á ndé, á ké egɔ́ épúp.

²⁶ Á gɔ́ áa lɛ, afēm á gɔ etswíʼ á yímpɛ páʼā, tɛ emaʼ ánɛ amɔ̄ʼ ajʉʼ atsáʼ zīi, ntshi é lē ŋkɛ́ne nnéŋ á esɔŋ. »

²⁷ Á shʉʼ ŋkūʼ nzém ntsɔp lekua mé legēm, páʼ afēm á si ndɔ̄kɔ á wek nzīŋɛ á ntē amaane‑ntshi lā, á ghʉ ŋgɔ́ té‑etsōʼ, megaŋ afaʼ mɛtúa ntshi, é júʼ, á swhí páʼ pek a pɔ́p é gʉɔ, tɛ nnɔ̄ŋ mbátɛ amɔ̄ʼ ajʉʼ atsetsáʼ lā.

²⁸ Pɔ́ maʼ azō á ntshi ndɔ̄k efʉ̄ʼ, ńjʉ́ɔ páʼ ntshi é sɛɛ̄h épúp. Éfʉʼ njʉ́ɔ é sɛh memíta ntsɔp esambīa mé megēm ntɛ́t. Pɔ́ náʼ nzī nzīŋ, ŋ́kó á mvhɔ, ńzéŋ éfʉ̄ʼ, é sɛh memíta ntsɔp lefaá megēm mbīa.

²⁹ Pɔ́ nɔŋ mbɔ́kɔ páʼ mɛtúa ntshi, a gɔ etém ánɛ mentʉʉ́ mīi, é ntē ntshi, éfhó á nzem mɛtúa, ésóʼne memía meŋgupɔ mɛ́ lekua, ńnéŋ á ntshi, ŋ́gɛ ndɛ́ʼ mɛtúa á zéŋ nzīŋ, ḿbú nnɔŋ ntsáa ŋ́gɛ, njhʉ̄ e láʼa ndɛ ndá lɛ́.

³⁰ Mɛ́ piŋ nnáŋ tɛ njʉ́ɔ, megaŋ afaʼ mɛtúa ntshi, é sóʼne akɛnūʼ ntshí á ndo ntshi. Ḿbɔ̄pte epuɔ ŋ́gɛ, pɔ́ faʼa á lezāʼ mɛtúa ntshi á mvhɔ, ńnéŋ emɔ̄ʼ meŋgupɔ mɛ́t á ntshi. Ŋ́ghʉ̄ɛ épúp, ńdɔkɔ efāʼa á lekʉ.

³¹ Tɛ́ Pɔ́ɔl á zhɛ́, ńdé á mbū mɔ́ tɛŋgyā ncu pɔ́ a wɔ lʉɔ́ʼ‑ncu ŋ́gɛ: «Pɛ gɔ te tɔ̄ʼ epuɔ puɔ á lefhō á ntē mɛtúa ntó ɔ́, mbɔ pɛ gɔ le tswɛ́t. »

³² Wɔ lʉɔ́ʼ‑ncu é lɛ nzáʼte meŋkhʉ mīi mɛ́ ndɔk ntsēŋɛ akɛnūʼ ánɛ mɛtúa ntshi, ńtshī akɛnūʼ nnéŋ, ntshi é lɔk ŋgʉ̄ɔ.

³³ Mɛ́ ge ezwíʼte ŋ́gɛ njhʉ̄ e elá, Pɔ́ɔl á lɔk ashuŋne jʉɔ páʼa, ńtswíʼte epuɔ ŋ́gɛ, pɔ́ epfɛ́t á méŋ azō, ńdé ŋ́gɛ: «Á ayáʼa eleʼé ntsɔp lekua mé legēm, páʼ pɛ é si nzwíʼtɛ ŋ́gɛ, njhʉ̄ e epɔ̄ŋ, ŋ́gē nnáŋ épúp, ńnɔŋ te ntswhīɛ mpfɛ́tɛ azō ɔ́.

³⁴ Púp tɛ́, meŋ tswii ŋ́gɛ, pɛ epfɛ́t azō. Pɛ gɔ te azō pfɛ́t, mbɔ pɛ te vuʼɔ ɔ́. Ndɛ́ʼ pɛ epɔ́k, azō á té ghʉ á wɛ́ ɛ́, tɛ mbɔɔ lenɔŋ ntsɔʼ, é gɔ le fhó á athū pɛ tɛ mbí í. »

³⁵ Pɔ́ɔl á shúŋne épúp, ńdɛ mbɛ́ mblɛ, ésyákne á Ndém á mvhɔ epuɔ metsem, ḿbwɔ́ʼte, ńzī á lepfɛ̄t.

³⁶ Epuɔ metsem é sek ntē, awíɛ awíɛ á lɛ mpfɛ́t á azí azō.

³⁷ Pek le pú ŋgɔ́ á ntē mɛtúa ntshi, á ŋiŋnɔŋ ŋkhʉ epīa mé ntsɔp ntokó megēm esambīa.

³⁸ Mɛ́ pfɛ́t tɛ nzwɛ́t, ńnɔŋ efāʼa ŋ́gɛ mɛtúa ntshi a enáʼ nzāŋne, éfók mbɛmbɛ afalíin, ḿmāʼte á ntē ntshi.

Mɛtúa ntshi a á ega mbɔ a á pwɔ́ʼte, epuɔ metsem é vuʼɔ

³⁹ Njhʉ̄ é náŋ tɛ ndá, megaŋ afaʼ mɛtúa ntshi, pɔ́ jʉ́ɔ a amɔ̄ʼ ajʉʼ atsáʼ, pɔ́ té yiŋ, ḿbiŋ njʉ́ɔ amɔ̄ʼ ajʉʼ ntshi, á swakne ŋkó ánɛ atsáʼ, asaŋasáŋá á gɔ́ éwú, ŋ́gɔ́ ajʉʼ zīi, mɛ́ gɔ etshí éwú. Ńdɛ nzápa ŋ́gɛ, mɛ́ efāʼ eshhʉ̄, kɛ mɛ́ gɔ elɔ̄k á mɛtúa ntshi, ŋ́gʉɔ tɛ ŋkó á ajʉʼ mɛ́t lɛ́ɛ.

⁴⁰ Nzápa épúp, ńdɛ ŋkɛ́ʼte meŋgupɔ ŋgwáʼ á ntshi. Ńzéŋ ŋ́kɛ́ʼte mbɔɔ meŋkhʉ mīi, mɛ́ lɔkɔ ŋkwɛ́tɛ ajū mīi á ghʉɛ mɛtúa á ziŋɛ. Ḿbiŋ ndɛ̄ ŋ́kɔ́ʼne mmɔʼ nzhó mɛtúa á mvhɔ, ńtɛ̄t ŋ́gɛ, fefwɛt a elɛ ŋkó á ntē éwú, ńtshóne á mɛtúa ńdɔ̄k mé akʉŋɛ́ ntshi.

⁴¹ Táʼ, ńnɔŋ ŋgʉ̄ɔ, mɛtúa ntshi á tɔ́k ŋkó á ntē asaŋasáŋá zīi, menē ntshi é le tshoné nnɔŋ, ḿbú ntā, tɛ letō á pú te zɛ́t éwú ú. Ntshi é lɔk mbʉʼ ntswá nzem mɛtúa, tɛ á pú mbwɔ́ʼte.

⁴² Wɔ lʉɔ́ʼ‑ncu é gɔ́ taʼ nchu ŋ́gɛ, mɛ́ ezwhíte megaŋ atʉɛ́, ḿbɔ́k á wɔ́p á lezɔ̄ʼ ntshi, ŋ́kʉ̄.

⁴³ Táʼ, tɛŋgyā wɔp á piŋ nnɔ̄ŋ te ŋkɔ̄ŋɔ á lezwhī Pɔ́ɔl ɔ́, ńdɛ ntɔ̄ʼ á wɔ́p á lefʉʼ ajʉɔ anu. Ḿbiŋ ntswīi á mbū epuɔ pīi pɔ́ zhɛɛ́ á wɔ́p á lezɔ̄ʼ ntshi ŋ́gɛ, pɔ́ ezī á ntshi á lekō, ŋ́gʉɔ mé ndo ŋgia.

⁴⁴ Epi emɔ̄ʼ epuɔ é tseŋne ánɛ epeláŋ mbɔɔ ánɛ ecū mīi, é pwɔ́ʼte ánɛ mɛtúa ntshi, ńdɔk ntó azɔ́p. Á páʼa tɛ́, epuɔ metsem é le pú efhó á ntshi ntó, té esyɛtte esīa á ŋiŋ.