Mefaʼ Meziŋ-ntō 24 - Eka Eswhī

Epuɔ Yúda é ega eswīŋɛ á Pɔ́ɔl á mvhɔ Ŋgɔpna Felísi

¹ Á tɔ́k eleʼé táa, Ananias tɛŋgyā wɔ nɔŋ‑epɔʼ, á shʉʼ á Sezale, pɔ́ a emɔ̄ʼ mekém alāʼ é gɔ́ nnɔ, mbɔɔ ntɔk‑nzem wɔp, lezēŋ tsí é gɔ́ lɛ, Tɛɛtulus. Pɔ́ shʉʼɛ épúp, á eswiīŋ Pɔ́ɔl á mbū Ŋgɔpna Felísi.

² Mɛ́ tswi, Pɔ́ɔl á shʉʼ. Tɛtulus á zi á leswiŋ á yí, ńdé ŋ́gɛ: «Mɛkwáŋ, pek é alāʼ ega, ńnáŋ té ntsaŋ páʼā, ńjhʉ́ɛ apɛ jú. Ecū mīi e kɛ alāʼ ega, ńnɔŋ te nzīŋɛ, o kʉʉ̄ŋ ndɔk azhɛ̄‑anu, ḿbʉ́ʼte tɛ pek é si mbúu nnáŋa mé apwɛne.

³ Pek é si njhʉ́ɛ apɛ menu mbɔŋ muɔ mɛ́t, éfʉʼ tsem mbɔɔ ajʉʼ tsem, ḿbiŋ nnɔ̄ŋ esyáknɛ á wú tɛʼ.

⁴ Meŋ ké te ezóko etsaŋnɛ ánɛ ashuŋne ɛ́. Púp tɛ́, meŋ á púʼ mbū ŋ́gɛ, o elɛ ndɔ̄k ntē mbɔŋ, ńzwíʼte anu zīi, pek gɔ á eshúŋɔ la.

⁵ Pek ke jʉ́ɔ ŋ́gɛ, ŋiŋ wuɔ, a á kwaʼ mbaŋ azō tepɔŋ. A á si mmāʼa atāk á nnɔ epuɔ Yúda, éjʉʼ tsem á ndo esī atsetsáʼ, ŋ́gɔ́ á tɛŋgyā nnɔ tepɔŋ yīi, mɛ́ tɔ́ŋɔ lɛ, nnɔ epuɔ Naázalɛt lā.

⁶ A ke nɔ̄ŋ efaʼa á letseŋte á Mía Ŋgyā Ndém. Melaʼ epúp tɛ́, pek ke gɔ̄ á yí. [Pek ke nɔ̄ŋ efaʼa á leŋak á yí ánɛ lepé alāʼ tsék,

⁷ tɛ́ Lizias, mía tɛŋgyā ncu, á tɔ́k nzem zi, ŋ́kú á yí á mbū pek.

⁸ Ḿbiŋ ntswī ŋ́gɛ, epuɔ pīi pɔ́ é swiŋ á yí, pɔ́ elɔ̄k ntsaŋ eshʉ̄ʼ mé mvhɔ ju.] Wu méŋwɛ̄t e eŋāk á yí, ńjʉ́ɔ páʼ menu mīi, pek swiŋɛ á yí melaʼ épúp, é gɔ́ áa anuúnē. »

⁹ Tɛtulus á lé épúp, epuɔ Yúda metsem é tswíʼte á yí, ńdé ŋ́gɛ, anu zīi a shúŋɔ, á ndeŋ ndeŋ épúp.

Pɔ́ɔl a á ega ndhʉ̄ɛ athū zí á mvhɔ Ŋgɔpna Felísi

¹⁰ Ŋgɔpna á tswi ŋ́gɛ Pɔ́ɔl a eshúŋne. Á lɛ ndé ŋ́gɛ: «Meŋ á zhɛ́ á légɛ, o ó sáʼ alāʼ jʉɔ ánɛ meŋguʼ tɛ nzáne. Púp, meŋ tshií á mvhɔ wu, ŋ́gɔ̄ á ndhʉɛ̄ athū zá páʼa, ńnɔŋ te mbɔ́kɔ.

¹¹ Anu zīi, meŋ gɔ á eshúŋɔ la, wu méŋwɛ̄t, o gɔ ezéeŋ efāʼ tɛ njʉ́ɔ atseŋ. Á ayáʼa páʼa, tɛ́ ndɔkɔ ŋgɔ́ nzém ntsɔp pīa mé legēm, páʼ meŋ ke gʉ̄ɔ á Yelósalɛm á ŋguʼtē Ndém.

¹² Meŋ kɛ te kó éwú, mɛ́ piŋ njʉ́ɔ pek ŋiŋ, é nɔŋ ntɔ̄ʼnɛ amɔ̄ʼ azō á ntē Mía Ŋgyā Ndém ɛ́, mɛ́ té jʉ́ɔ, meŋ nɔ̄ɔŋ eswītɛ alāʼ éwú ú, mɛ́ té jʉ́ɔ, meŋ nɔ̄ɔŋ ŋghʉ̄ɛ ecʉɔ etsō mɛ́t, á ntē meŋgyā aswiŋte, ká á ntē tésɔŋ ɔ́.

¹³ Ńdɔkɔ ŋ́gɛ, epuɔ puɔ é gɔ́ le shúŋ ajū mīi, pɔ́ tshíɛ menu muɔ á athū meŋ tsetsɔŋɔ, melaʼ épúp ɔ́.

¹⁴ Táʼ, meŋ gɔ etshí á mvhɔ wu ega, ḿvéŋ á taʼ azō. Meŋ á si nziŋɛ azá ánɛ mɛnzhɛ yīi, Yɛɛ́so a ke kīā. Á piŋ ncʉ́ʼ á mbū pɔ́p, ŋ́gɔ́ áa yīi, meŋ kʉʉ̄ŋ ŋkó ánɛ nnɔ tepɔŋ. Meŋ ké nzɛ́t ŋgūʼtɛ á Ndém yīi, wɔ maŋgānjʉʼ pék é kɛɛ́ ŋguʼtɛ. Ńzɛ́t mvéŋɛ anu zīi, mɛ́ le tí á ntē aŋwaʼne lepé, mbɔɔ á ntē aŋwaʼne metswi‑ŋke Ndém.

¹⁵ Amɔ̄ʼ azō á éwú zīi, meŋ á si nzwíʼtɛ mé taʼ ntē, á mbū Ndém, epuɔ puɔ mɛ́t, é zéŋ nnɔ̄ŋ nzwíʼtɛ azɔ́p azō mɛ́t. Azō mɛ́t á gɔ́ lɛ, Ndém a a láʼ eghʉ, epuɔ metsem e ezím ánɛ lewhʉ̄, épuɔ ndeŋ ndeŋ mbɔɔ megaŋ ŋgɛ́tté.

¹⁶ Melaʼ épúp tɛ́, meŋ kaāk ete efʉʼ metsem, á legɔ̄ ndeŋ ndeŋ á mvhɔ Ndém, mbɔɔ á mvhɔ epuɔ menɔŋ.

¹⁷ Meŋ ke náŋ á apɛ́ ŋguʼ tɛ nzáne, ḿbiŋ eshʉ̄ʼ mbīŋ nzem á Yelósalɛm, á ŋgyá ŋkāp, élɔk etswíte epuɔ alāʼ pék, ékó enɔŋ epɔʼ á mbū Ndém.

¹⁸ Meŋ nde nɔ̄ŋ ntɛ́nɛ ajʉɔ anu mɛ́t á ntē Mía Ŋgyā Ndém, tɛ́ mɛ́ nóʼ á gá éwú, ŋ́gē etswɛ́tte á gá, mbɔ meŋ kʉʉ̄ŋ ndáʼ ŋ́ghʉ̄ ajū mīi, meŋ ndɔkɔ esōko epe, á athū meŋ, á mvhɔ Ndém. Meŋ nde gē eghʉ anu jʉɔ mɛ́t, alāʼ á té ajʉʼ mɛ́t cúʼte, mmɔʼ tákté ndɛʼɛ, á piŋ te á esī í.

¹⁹ Táʼ, emɔ̄ʼ ntaʼné epuɔ Yúda pīi, é fhɔ́ɔ á ntē ŋgɔŋ Azíi, é lɛ éwú. Epuɔ puɔ mɛ́t, é ke wíʼe ŋgwɛ̄ ajū mīi, pɔ́ gɔ elɔ̄ɔk eswīŋ á gá, mbɔ pɔ́ mé tshií á mvhɔ wu ega, éswīŋɛ á gá.

²⁰ Ŋ́ké te épúp ɔ́, mbɔ a gɔ́ éyi, mɛ́ é ŋŋāk á gá á mvhɔ wɔ sáʼ‑ŋgɔŋ epuɔ Yúda páʼā, ńjʉ́ɔ amɔ̄ʼ anu zīi meŋ á fa, epuɔ puɔ páʼa, é shúŋ.

²¹ Meŋ kɛ te tswhī ŋghʉ̄ amɔ̄ʼ azō ɔ́, ńdaʼ páʼ, á lɛ aleʼé mɛ́t, meŋ etshí á mvhɔ asāʼ, ńdé mé ŋghi teté ŋ́gɛ: “Meŋ á véŋ ŋ́gɛ, Ndém a a shʉʼ eghʉ, mepfhō e ezím ánɛ lewhʉ̄, melaʼ anu jʉɔ mɛ́t, tɛ́ mɛ́ ŋaka á gá ayáʼa.”»

²² Á ge egɔ́ épúp, mbɔ Ŋgɔpna Felísi a lē ndáʼ nzhɛ́ menu ánɛ mɛnzhɛ Yɛɛ́so, ńdɛ ntsɔ́ʼte aleʼé ntsaŋ, ńdé ŋ́gɛ, Lizias, mía tɛŋgyā ncu, a gɔ ŋké ndáʼ éshʉ̄ʼ eséŋɛ́ lɛ́, yí záʼ ntsaŋ zɔp.

²³ Ḿbiŋ ntswī á mbū mɔ́ tɛŋgyā ncu ŋ́gɛ, a elɔ̄k á Pɔ́ɔl mbīŋ nzem mé ŋgyā atʉɛ́, ḿbíp á yí, ndɛ́ʼ á ké ŋkwɛ́t á yí, ndɛ́ʼ á vɛ́ne mesoó pí á leshʉʼ ncʉ̄te á yí.

Felísi pɔ́ nzwí yi é ega njúʼɔ anu Pɔ́ɔl

²⁴ Á tɔ́k eleʼé shɔ́ʼɔ́ lɛ́, Ŋgɔpna Felísi pɔ́ nzwí yi Dlisil é gɔ́ á esī, Dlisil wuɔ mɛ́t á lɛ mɔ́ Yúda. Ŋgɔpna á tswi mɛ́ tɔ́ŋ á Pɔ́ɔl, á shʉʼ, ńzī á leshūŋ menu ánɛ lefɛ̄ nnɛ̄t ŋgyá á mbū Yɛɛ́so Klísto. Ŋgɔpna mɛ́t á nɔŋ njúʼɔ.

²⁵ Á zéŋ ŋkɛ́ʼte éshúŋ ntií páʼ, ŋiŋ a náŋa épúp, á pɔŋ á Ndém, ŋ́kɛ́ʼte eshúŋ páʼ ŋiŋ a gɔ ekúʼte nnɛ̄t zi épúp, ńzéŋ eshúŋ páʼ Ndém a a fú esáʼ epuɔ metsem. Á júʼ, ńcʉ́ʼɛ ncɔ̄ʼ cɔʼe, ńdɛ ndé mé yí ŋ́gɛ: «Ajʉɔ á kuʼ páʼa ayáʼa. O gɔ eké ŋgʉ̄ɔ. Meŋ a shʉʼ ejʉ́ɔ afʉʼ, tɛ́ zéŋ etɔ́ŋ á wú. »

²⁶ Ŋgɔpna a le nɔ̄ŋ ŋkwāŋa ŋ́gɛ, Pɔ́ɔl a a yá á yí ŋkāp. Melaʼ épúp tɛ́, a lɛɛ́ ntɔ́ŋɔ á yí efʉʼ metsem ŋ́gɛ, pɔ́ yí e eshúŋne.

²⁷ Ŋgɔpna á ghʉ épúp, tɛ á ge etɔ́k ŋguʼ epīa, mɛ́ lɔk á Ŋgɔpna Pɔɔsius Fɛstus, ŋ́kúmne á yí. Ŋgɔpna Felísi a le gē egʉɔ, ńtshī á Pɔ́ɔl á ŋgyā atʉɛ́ néŋ, ńdɔkɔ efāʼa á yí á lewɛ lezēŋ lembɔŋ á mbū epuɔ Yúda.