Mefaʼ Meziŋ-ntō 23 - Eka Eswhī

¹ Pɔ́ɔl á pʉ́ʼɛ menēk mí ntshí ánɛ wɔ sáʼ‑ŋgɔŋ epuɔ Yúda, ńdé mé pɔ́p ŋ́gɛ: «Epɔ̄ memía, ánɛ páʼ meŋ ndɔɔ̄k ŋgɔ́ azá á mvhɔ Ndém, amɔ̄ʼ azō á té á ntē meŋ ŋŋāka á gá á, tɛ ŋkó á ayáʼa á. »

² Ananias tɛŋgyā wɔ nɔŋ‑epɔʼ, á tswi á mbū epuɔ pīi, pɔ́ é ntshíte á lezēŋ Pɔ́ɔl ŋ́gɛ, pɔ́ etém mbū á metuúŋ yí.

³ Pɔ́ɔl á lɛ ndé á mbū Ananias mɛ́t ŋ́gɛ: «Ndém mé shʉʼ etswá á wú ajú, wu ŋgaŋ mepɔp. O naáŋ á esī ndɔ̄kɔ lepé ŋŋāka á gá, o ó piŋ ntswī ŋ́gɛ, mɛ́ etswá á gá, tɛ́ lepé é nɔŋ te nzɛ́ttɛ épúp ɔ́. »

⁴ Epuɔ pīi pɔ́ ntshíte á lezēŋ Pɔ́ɔl, é lé á mbū yí ŋ́gɛ: «Tɛŋgyā wɔ nɔŋ‑epɔʼ Ndém tɛ́ o zɔtɛ páʼā. »

⁵ Á pwɛt ŋ́gɛ: «Epɔ̄ memía, meŋ kaá nnɔŋ nzhɛ́ɛ á légɛ, a á tɛŋgyā wɔ nɔŋ‑epɔʼ ɔ́. Ńzi ŋgē egɔ́, aŋwaʼne Ndém á nɔŋ ndʉ́ɛ́ ŋ́gɛ: «Te shúŋne tépɔŋ ánɛ efɔ alāʼ wɛ. »

⁶ Á lɛ nnɔ wɔ sáʼ‑ŋgɔŋ mɛ́t, emɔ̄ʼ epuɔ é gɔ́ éwú, mɛ́ tɔ́ŋ á wɔ́p lɛ, epuɔ Falísia, emɔ̄ʼ é gɔ́ éwú, mɛ́ tɔ́ŋ á wɔ́p lɛ, epuɔ Sadúsia. Pɔ́ɔl á zhɛ́ épúp, ńdɛ ndé mé ŋghi teté ŋ́gɛ: «Epɔ̄ memía, meŋ á ŋiŋ nnɔ Falísia, ŋ́gɔ́ á méŋ ŋiŋ nnɔ Falísia, ńnɔŋ nnéŋɛ ntē, ńzwíʼte azá aleʼé zīi, Ndém a a shʉʼ eghʉ, mepfhō e ezím ánɛ lewhʉ̄. Mɛ́ é ega ŋŋāka á gá páʼa, melaʼ épúp. »

⁷ Pɔ́ɔl á shúŋne épúp, epuɔ Falísia pɔ́ epuɔ Sadúsia é tɔʼne ashuŋne mɛ́t tɔʼnee, tɛ acuʼte á gap nnɛ̄t nzhɛ epīa.

⁸ Pɔ́ tɔʼnɛ épúp melaʼ mīi, epuɔ Sadúsia é gɛ ndʉ́ɛ́ ŋ́gɛ, mepfhō é té fú ezím ánɛ lewhʉ̄ ɛ́, ŋ́gɛ mecɔʼ Ndém mbɔɔ mesī é té éwú ú. Epuɔ Falísia é piŋ nnɔ̄ŋ mvéŋɛ ŋ́gɛ, ecū muɔ mɛ́t tsīi, epuɔ Sadúsia é lʉʼɛ lāa, é éwú.

⁹ Epuɔ é pú nnɔ̄ŋ ntswiʼnɛ mbáknɛ ejʉʼ, emɔ̄ʼ wɔ kɛ́ʼte‑mbé Ndém ánɛ nnɔ epuɔ Falísia é lute á esī, ńtshíte á ajʉʼ, ńdʉ̄ʼ, ńdé mé ŋghi teté ŋ́gɛ: «Pek ka jʉ́ɔ́ mefa mīi, ŋiŋ wuɔ á ghʉ ɛ́. A gɔ́ mmɔʼ mbɔ, Azwakne Ndém kɛ́ mmɔʼ cɔʼ Ndém mé shúŋne á mbū yí. »

¹⁰ Metɔʼne é pú ŋgáʼ, menēk é paŋ, tɛ mía tɛŋgyā wɔ lʉɔ́ʼ‑ncu á pɔ́k ŋ́gɛ, ndɛ́ʼ mɛ́ wɛt á Pɔ́ɔl, ńdɛ ntswī á mbū wɔ lʉɔ́ʼ‑ncu ŋ́gɛ, pɔ́ egʉɔ efhó á nnɔ alāʼ, éfók á yí ndɔk mbīŋ nzem mé lenaŋá wɔ lʉɔ́ʼ‑ncu.

¹¹ Á kó ŋgɔ́ etsōʼ á aleʼé mɛ́t, Atsyapuɔ Yɛɛ́so á ŋwak á mvhɔ Pɔ́ɔl, ńdé á mbū yí ŋ́gɛ: «Ké ŋkāk áa ete, o ke eshʉ̄ʼ á Yelósalɛm ega, á eshúŋ epuɔ, á ŋiŋ yīi meŋ á ewiɛ́. O zeéŋ mbɔ́ŋte á legʉɔ á tésɔŋ Lóma, éshúŋ epuɔ, á ŋiŋ yīi meŋ á ewiɛ́. »

Mɛ́ é ega efāʼa á lezwhī Pɔ́ɔl

¹² Njhʉ̄ é lá, emɔ̄ʼ epuɔ Yúda é cúʼte, ńtáŋ menāŋ ánɛ Pɔ́ɔl, tɛ ŋkā meka ŋ́gɛ, pɔ́ cʉʉ́ʼ azō pfɛ́t ɛ́, épīŋ le zéŋ azō nnú ú, tɛ eláʼ ezwhí á yí.

¹³ Pɔ́ le tɔ́k azō ŋiŋnɔŋ megēm lekua.

¹⁴ Ŋ́gʉɔ njʉ́ɔ wɔ nɔŋ‑epɔʼ epi melʉɛ, pɔ́ mekém alāʼ, ńdé á mbū pɔ́p ŋ́gɛ: «Pek ke kā meka ŋ́gɛ, pek cʉʉ́ʼ azō ezwíʼ ɛ́, tɛ eláʼ ezwhí á Pɔ́ɔl.

¹⁵ Tsetsɔŋɔ wuɔ, pɛ a wɔ sáʼ‑ŋgɔŋ, é egʉɔ njʉ́ɔ á mía tɛŋgyā ncu epuɔ Lóma, ḿbɔ̄pte á yí ŋ́gɛ, pɛ é si ŋkɔ̄ŋɔ á lechʉ̄ nnɛ̄t, ńcʉ̄te ntsaŋ Pɔ́ɔl. Ŋ́gɛ mɛ́ elɔ̄k á yí eshʉ̄ʼ. Ḿbiŋ ŋgɔ́ mé pek, mbɔ pek é ndáʼ ncūŋte páʼ mɛ́ e lɔk á yí nnɔŋ eshʉʼɛ, pek etséŋte á yí, tɛ a ezī le shʉ̄ʼ tɛ ŋkó ega á. »

¹⁶ Táʼ, mmɔʼ mɔ́ mbaŋa, ŋ́gɔ́ á méŋ méŋ mɔ́ Pɔ́ɔl eyi menzwí, á júʼ azí páʼ mɛ́ táŋa menāŋ ánɛ Pɔ́ɔl, ńdɛ ŋgʉ̄ɔ ntɔ́k ŋ́kó á lenaŋá wɔ lʉɔ́ʼ‑ncu, ńjhʉ́ á zoʼ eshúŋ á Pɔ́ɔl.

¹⁷ Pɔ́ɔl á lɛ ntɔ́ŋ mmɔʼ taʼ mɔ́ tɛŋgyā ncu, ńdé á mbū yí ŋ́gɛ: «Lɔk á mɔ́ wuɔ, ŋ́gʉɔ ntsékne á mbū mía tɛŋgyā ncu, a wɛɛ̄ anu zīi, a gʉɔ mé eshuúŋ yí. »

¹⁸ Mɔ́ tɛŋgyā ncu wɔ̄, á lɔk á yí ŋ́gʉɔ njʉ́ɔ á mía tɛŋgyā ncu, ńdé á mbū yí ŋ́gɛ: «Pɔ́ɔl ŋgaŋ atʉɛ́ mé tó á gá, ńtswī ŋ́gɛ, meŋ ndɔ̄k á mɔ́ ŋgwɛso wuɔ, éshʉʼ ntsékne á mbū wu, a wɛɛ̄ anu zīi, a gɔ á eshúŋ wu. »

¹⁹ Mía tɛŋgyā ncu á tséŋne apū mɔ́ ŋgwɛso wɔ̄, pɔ́ yí é gʉɔ ntsem, á zɛ́tte á yí ŋ́gɛ: «O wɛɛ̄ akɔ̄ zīi, o gɔ á eshúŋ meŋ ŋ̄?»

²⁰ Mɔ́ ŋgwɛso á lé ŋ́gɛ: «Emɔ̄ʼ epuɔ Yúda é gɔ́ á taʼ nchu, páʼ pɔ́ e shʉʼ epɔpte á wú, o eghʉ̄, Pɔ́ɔl a eshʉ̄ʼ á mvhɔ wɔ sáʼ‑ŋgɔŋ ezɔ́, pɔ́ elé ŋ́gɛ, pɔ́ gɔ echʉ́ nnɛ̄t ecʉte ntsaŋ zi.

²¹ Te shʉ̄ʉʼ mvéŋ anu zɔ́p, melaʼ mīi, ŋiŋnɔŋ tɛ ntɔ́k megēm lekua, a a shʉʼ enáŋ nzɔŋ á mɛnzhɛ, egɔ á ŋgɔɔ̄ á yí. Pɔ́ é ŋkā meka ŋ́gɛ, pɔ́ láʼa nzɛ́t té tséŋte á Pɔ́ɔl, pɔ́ le zéŋ azō mpfɛ́t ɛ́, ḿbīŋ le zéŋ nnú ú. Á tsetsɔŋɔ, mbɔ pɔ́ ndáʼ ŋkwɛ́t, tɛ ncʉ́ʼɛ nzwíʼtɛ áa nchu wú. »

²² Mía tɛŋgyā ncu mɛ́t, á júʼ épúp, ńdɛ ntswɛ̄te á mɔ́ ŋgwɛso mɛ́t ŋ́gɛ: «Pá á wú á leshūŋ mmɔʼ ŋiŋ ndɛʼɛ ŋ́gɛ, o ó shúŋ á gá anu jʉɔ mɛ́t. » Ńtswɛ̄te á yí épúp, ńdɛ ntswī á gʉɔ.

Mɛ́ é ega ntúɔ́ á Pɔ́ɔl, ŋ́gyá á mbū Ŋgɔpna Felísi

²³ Á tsia épúp, mía tɛŋgyā ncu á shʉʼ á nnɔ epɔ̄ metɛŋgyā ncu, ńtsɔ́ʼ epi mémpīa, ńtswī á mbū pɔ́p ŋ́gɛ: «Pɛ ecúʼte wɔ maʼ‑ncu, á ŋiŋnɔŋ ŋkhʉ epīa, ŋ́ghʉ̄ wɔ náŋ melʉ́ɔ́ á ŋiŋnɔŋ megēm esambīa, ŋ́ghʉ̄ wɔ wɛ mekɔŋ, á ŋiŋnɔŋ ŋkhʉ epīa. Epuɔ puɔ mɛ́t, e etshí mbíp páʼ, á kuʼ menu levuʼɔ́ etsōʼ, pɔ́ egʉ̄ɔ mé tésɔŋ Sezale.

²⁴ Ńzéŋ ncūŋte mmɔʼ melʉ́ɔ́ pīi, Pɔ́ɔl a ge eziŋ, énáŋ éwú, e elɔ̄k á yí nzīŋ lɛ lʉʉʉ, tɛ ŋkó á mvhɔ Ŋgɔpna Felísi, té esyɛtte esīa á yí. »

²⁵ Á lé épúp, ńdɛ ntí akɛtte, ńdé á ntē éwú ŋ́gɛ:

²⁶ «Meŋ, Klɔdius Lizias, á mbū Ŋgɔpna Felísi. Mɛkwáŋ, meŋ á tsaʼte.

²⁷ Epuɔ Yúda é ke gɔ̄ a ŋiŋ wuɔ yīi, meŋ túɔ́ ŋgyáa á mbū wu lāa, ńnɔŋ efāʼa á letsēŋte á yí, meŋ júʼ á légɛ, a á ŋiŋ Lóma, ńdɔ̄k wɔ lʉɔ́ʼ‑ncu, éshʉʼ ndhʉ̄ á athū zí, ŋ́kú á yí á mbū pɔ́p.

²⁸ Meŋ ke nɔ̄ŋ efaʼa á lezhɛ̄ ajū mīi, epuɔ Yúda é swiŋɛ á yí melaʼ épúp, ńdɔ̄k á yí ŋgʉ̄ɔ á mvhɔ wɔ sáʼ‑ŋgɔŋ pɔ́p.

²⁹ Ŋ́kó njʉ́ɔ, pɔ́ a pɔ́p é nɔŋ ntɔ̄ʼnɛ anu ánɛ lepé alāʼ tsɔ́p. Meŋ mbīiŋ te pú njʉ́ɔ amɔ̄ʼ anu zīi, a á fa tɛ ŋgɔ́ yīi, mɛ́ gɔ lɛ nzwhí á yí zwhí ɛ́, kɛ á lenēŋ á yí á ŋgyā atʉɛ́ lɛ́ɛ ɛ́.

³⁰ Mɛ́ jhʉ́ á zoʼ eshúŋ á gá, páʼ emɔ̄ʼ epuɔ Yúda é si ntáŋa menāŋ ánɛ yí épúp. Meŋ ndɛ̄ɛ nzápa á légɛ, meŋ a tó á yí, éyá á mbū wu. Meŋ á tswi á mbū epuɔ pīi, pɔ́ swiŋɛ á yí ŋ́gɛ, pɔ́ eshʉ̄ʼ á mbū wu, éshúŋ ajū mīi, pɔ́ tswíi á mbū yí. »

³¹ Wɔ lʉɔ́ʼ‑ncu é ghʉ ajū mīi mía tɛŋgyā wɔp, a á tswi mé pɔ́p, ńtswíʼ á Pɔ́ɔl, ńdɔ̄k á yí nzīŋ meté‑etsōʼ, tɛ ŋkó á tésɔŋ Aŋtioatli.

³² Njhʉ̄ é lá, wɔ lʉɔ́ʼ‑ncu pīi pɔ́ nnɔŋ nzīŋɛ mé mekhu, é ge epiŋ nzem mé lenaŋá tsɔ́p, megaŋ melʉ́ɔ́ é lɔk á Pɔ́ɔl ŋgʉ̄ɔ.

³³ Ŋ́gʉɔ tɛ ŋkó á Sezale, megaŋ melʉ́ɔ́ é yá akɛtte á mbū Ŋgɔpna Felísi, ńnéŋ á Pɔ́ɔl ánɛ mbū mí.

³⁴ Ŋgɔpna mɛ́t á tɔ́ŋ akɛtte, ńzɛ́tte á Pɔ́ɔl ŋ́gɛ: «O ó ŋiŋ aziɛ́ apak ŋgɔŋ Lóma ā?» Á gɛ, yí ŋiŋ Silísi.

³⁵ Á lé á mbū yí ŋ́gɛ: «Meŋ a shʉʼ eŋak ntsaŋ ju, áfʉʼ zīi epuɔ pīi pɔ́ swiŋɛ á wú, é shʉʼ tɛ ŋgɔ́ á esī. » Ńdé épúp, ńtswī ŋ́gɛ, mɛ́ enéŋ á Pɔ́ɔl á mba Elōde, ńnɔŋ mbípɛ á yí.