Mefaʼ Meziŋ-ntō 22 - Eka Eswhī

¹ «Epɔ̄ memía pá, memɔʼɔ́ pá, pɛ ejúʼ anu zīi, meŋ gʉɔ mé eshuúŋ pɛ tsetsɔŋɔ, élɔk elhʉ athū zá. »

² Pɔ́ júʼ páʼ a á lɔk ashuŋne epuɔ Yúda ńdé anu á mbū pɔ́p, ńdɛ mbwɛ́ne nnáŋ. Pɔ́ɔl á lɛ ndé á mbū pɔ́p ŋ́gɛ:

³ «Meŋ á ŋiŋ Yúda, mɛ́ zhí á gá á tésɔŋ Táase, á apak ŋgɔŋ Silisi. Mɛ́ le pīŋ ŋkɔ́ʼte á gá á tésɔŋ ega. Ŋgamaliɛl mé le ziʼné á gá á leziŋ ndeŋ ndeŋ, ánɛ mbé mīi memɔʼɔ́ pímpɛ é le néēŋ. Meŋ ndɛɛ́ ŋkɔŋɔ azá á Ndém tɛ mmāʼa afɛ̄, ńdeŋ ndeŋ páʼ pɛ é ayáʼa, ŋ́kɔ̄ŋɔ á yí épúp lā.

⁴ Meŋ nde lʉɔ́ʼ epuɔ pīi, pɔ́ ziŋɛ ánɛ mɛnzhɛ Yɛɛ́so, tɛ efāʼ á lezwhīte pɔ́p, ńnɔŋ ŋgɔ̄tɛ mbaŋa pɔ́ a wɔnzwí, ńnéŋtɛ á ŋgyā atʉɛ́.

⁵ Tɛŋgyā wɔ nɔŋ‑epɔʼ, mbɔɔ mekém alāʼ metsem, é gɔ echʉ́ nnɛ̄t eshúŋ á wɛ́, páʼ pɔ́ le yá mekɛtte á mbū meŋ, ńdɔk ntó á gá á tésɔŋ Damas ŋ́gɛ, meŋ egʉ̄ɔ éwú ŋgɔ̄te epɔ̄ memía pímpɛ pīi, pɔ́ ziŋɛ ánɛ mɛnzhɛ mɛ́t, ńdɔk eshʉ̄ʼ mé Yelósalɛm, mɛ́ egēne á wɔ́p melaʼ lepé.

Pɔ́ɔl a á ega eshúŋɔ páʼ Yɛɛ́so a le gɔ̄ á yí

⁶ «Meŋ nde kó á mɛnzhɛ, ńnɔŋ ŋgʉ̄ɔ, ńziŋ tɛ nnɔ̄ŋ mbátɛ á Damas, éfʉʼ táŋ‑azokó, ńdɛ ŋgē ejʉ́ɔ, mmɔʼ mía ŋkaʼ é fhó á lephū, ŋ́kɛ̄ʼɛ ánɛ meŋ,

⁷ meŋ ndɛ ntsɔ́ʼɔ ŋŋém á esī, ńjúʼ, ŋghi ŋiŋ é lé á mbū meŋ ŋ́gɛ: “Sɔ́ɔl, Sɔ́ɔl, o lʉɔ́ʼɔ á gá ntswí akɔ̄?”

⁸ Meŋ ezɛ́tte ŋ́gɛ: “O gɔ́ áa awɔ́ ŋkɔbé?” Ŋghi mɛ́t é pwɛt ŋ́gɛ: “Meŋ mé Yɛɛ́so ŋiŋ Naázalɛt yīi, o lʉɔ́ʼɔ á yí lā.”

⁹ Epuɔ pīi pek a pɔ́p é ŋgɔ́ nnɔ, é chʉ́ nnɛ̄t njʉ́ɔ ŋkaʼ, táʼ, ŋ́ké te júʼ ŋghi ŋiŋ zīi, e shúŋnɛ á mbū meŋ ɛ́.

¹⁰ Meŋ mbīiŋ nzɛ́tte ŋ́gɛ: “Meŋ á páʼa, épiŋ eghʉ lɛ akɔ̄, ŋkɔbé?” Atsyapuɔ Yɛɛ́so á pwɛt á mbū meŋ ŋ́gɛ: “Lu á esī, ŋgʉ̄ɔ mé tésɔŋ Damas, o o kó éwú, mɛ́ eshúŋ ajū mīi, Ndém a kɔŋɔ ŋ́gɛ, o eghʉ̄.”

¹¹ Meŋ gē egʉɔ, epuɔ pīi pek a pɔ́p é ŋgɔ́ nnɔ, é tséŋne apū zá, ńtsāŋ á gá melaʼ mīi, mía mía ŋkaʼ á le ghʉ̄ʉ̄, meŋ te zéŋ ejʉʼ njʉ́ɔ ɔ́. Ńtsāŋ á gá épúp, ńdɔ̄k á gá ŋgʉɔ tɛ ŋkó á Damas.

¹² «Mmɔʼ ŋiŋ á gɔ́ éwú, lezēŋ tsí é gɔ́ lɛ Ananias, á gɔ́ ŋiŋ, ńnáŋ páʼ Ndém a á si ŋkɔ̄ŋɔ, ńzéŋ nnɔ̄ŋ nzīŋɛ ánɛ lepé tsímpɛ, epuɔ Yúda metsem pīi é éwú, é kím lezēŋ tsí á mbɔŋɔ́ tɛʼ.

¹³ Á shʉʼ njʉ́ɔ á gá, ńdé á mbū meŋ ŋ́gɛ: “Sɔ́ɔl, méŋ mɔ́ ga, lɛ nzéŋ njʉ́ɔ ejʉʼ.” Meŋ ndɛ̄ɛ njʉ́ɔ ejʉʼ afʉʼ mɛ́t afʉʼ mɛ́t, ńjʉ́ɔ á yí.

¹⁴ Á lé ŋ́gɛ: “Ndém wɔ maŋgānjʉʼ pímpɛ, a á té njhʉ̄ ntsɔ́ʼ á wú, ŋ́gɛ o ezhɛ́ menu mīi, yí mé le té njhʉ̄ ŋkīa. Ŋ́gɛ o ejʉ́ɔ á Júʼɔ‑Mbū‑Ndém, ńjúʼ ŋghi zi méŋwɛ̄t.

¹⁵ Ńdɔk ŋ́gɛ, o egɔ́ á njhʉɛ‑njʉ́ɔ yi, éshúŋ á mbū epuɔ menɔŋ metsem, áju mīi ó njʉ́ɔ nzéŋ ńjúʼ.

¹⁶ Tsetsɔŋɔ, o ké nzɛ́t nzwíʼtɛ akɔ̄? Lu á esī, éswíŋte á kwaʼ ŋiŋ wuɔ mɛ́t, tɛ́ ŋghʉ̄ mɛ́ enōʼ á wú á ntshi, Ndém a esōk mefa mú.”

Pɔ́ɔl a á ega eshúŋɔ páʼ mɛ́ le tó á yí á mbū epuɔ pīi, é té epuɔ Yúda á

¹⁷ «Meŋ eshʉ̄ʉʼ mbīŋ nzem mé Yelósalɛm, ŋ́ghʉ ŋgɔ́ á ntē Mía Ŋgyā Ndém ŋghʉ̄ɛ aswiŋte, mmɔʼ njʉɔ te lí é shʉʼ á mbū meŋ.

¹⁸ Meŋ ejʉ́ɔ á Atsyapuɔ, á lé á mbū meŋ ŋ́gɛ: “Gáknɛ efhó á Yelósalɛm ega ntó, melaʼ mīi epuɔ tésɔŋ puɔ mɛ́t, é té si ŋgɔ̄ á mvéŋ anu zīi, o gɔ á eshúŋɔ ánɛ meŋ ɛ́.”

¹⁹ Meŋ mbwɛ̄ɛt ŋ́gɛ: “Atsyapuɔ, pɔ́ é si nzhɛ́ɛ á mbɔŋɔ́ páʼ, meŋ kɛɛ́ ŋkʉ́ʼnɛ ánɛ meŋgyā aswiŋte, ŋ́gɔ̄tɛ epuɔ pīi, pɔ́ fɛɛ́ nnɛ̄t, ŋ́gyá mé wu, ńnéŋtɛ á ŋgyā atʉɛ́, ḿbiŋɛ ntswīi mɛ́ tswáa á wɔ́p.

²⁰ Mɛ́ le gē ezwhí á Etiɛn, á ŋiŋ yīi a lɛɛ́ eshúŋɔ anu jú, meŋ gɔ́ azá éwú, ńnɔŋ ŋkɔ̄ŋtɛ ajū mīi pɔ́ ghʉɛ, ńtswí menzhó mɔ́p ŋgwɛ̄.”

²¹ Atsyapuɔ á zéŋ ndé á mbū meŋ ŋ́gɛ: “Ké efhó á tésɔŋ ega ntó tó, meŋ méŋwɛ̄t e tó á wú tɛ ŋgia e esāk, á mbū epuɔ pīi, é té epuɔ Yúda á.”»

Pɔ́ɔl a á ega eshúŋɔ ŋ́gɛ, yí é ŋiŋ ŋgɔŋ Lóma

²² Alāʼ á zwíʼte anu zīi, Pɔ́ɔl a shúŋɔ, ńzwíʼte tɛ njúʼ á lé páʼa mɛ́t, pɔ́ lɛ nzī á lelē mé ŋghi teté ŋ́gɛ: «Mɛ́ ezwhí á ŋiŋ wuɔ zwhií, a te ŋiŋ yīi, mɛ́ gɔ etshi á yí nnéŋ, á gɔ́ éwú ú. »

²³ Ńtswiʼne ndéŋte ŋguŋ, ésɔ̄ŋte menzhó ánɛ pɔ́p, ńtúʼ avɔ́p mmāʼ á athʉ́.

²⁴ Mía tɛŋgyā wɔ lʉɔ́ʼ‑ncu epuɔ Lóma, á tswi ŋ́gɛ mɛ́ elɔ̄k á Pɔ́ɔl ntɔ́k mé lenaŋá wɔ lʉɔ́ʼ‑ncu, ńdɔ̄k ntɛ̄ ntswá á yí, a eshúŋ anu zīi, alāʼ á léŋɛ ŋguŋ á athū yí melaʼ épúp.

²⁵ Mɛ́ kwɛ́t á Pɔ́ɔl á mvhɔ mɔ́ tɛŋgyā wɔ lʉɔ́ʼ‑ncu, tɛ nnɔ̄ŋ ŋgɔ̄ á ntswá á yí, á lé á mbū tɛŋgyā ncu mɛ́t ŋ́gɛ: «Lepé é si mvéŋɛ ŋ́gɛ, o etswá á ŋiŋ ŋgɔŋ Lóma té gɔ́ yīi, mɛ́ é ŋak ntsaŋ zi i?»

²⁶ Mɔ́ tɛŋgyā ncu á lɛ ŋgē ejúʼ anu jʉɔ mɛ́t, ŋ́gʉɔ ndé á mbū mía tɛŋgyā wɔp ŋ́gɛ: «Tɛ o ó zhɛ́ ŋ́gɛ, anu á nɔŋ ŋgɔ̄ á ŋghʉʉ̄ wu u? Ŋiŋ wɔ̄, a á ŋiŋ ŋgɔŋ Lóma. »

²⁷ Á júʼ épúp, éshʉʼ nzɛ́tte á Pɔ́ɔl ŋ́gɛ: «Shúŋ á gá, o ó kwaʼ ŋiŋ ŋgɔŋ Lóma lɛ́?» Á véŋ.

²⁸ Á lé ŋ́gɛ: «Meŋ á páʼa, mbɔ meŋ nde gē ecʉ́ʼ á ŋiŋ ŋgɔŋ Lóma, ńzó, ŋ́gyá á mía ŋkāp. » Pɔ́ɔl á gɛ: «Meŋ mbīiŋ ŋgɔ́ ewiɛ́, tɛ efhó á nzhiɛ́. »

²⁹ Epuɔ pīi é nzi nnɔ̄ŋ ŋgɔ̄ á ntswá yí, tɛ́ á shúŋne, é lɛ efhó á lezēŋ yí ŋgʉ̄ɔte lɛ glɛ. Ecɔʼ é pú ŋgɔ̄ á mía tɛŋgyā ncu yí méŋwɛ̄t azí, páʼ mɛ́ ge elɔk meŋkhʉ atʉɛ́, ékwɛ́t á Pɔ́ɔl, á gɔ́ ŋiŋ ŋgɔŋ Lóma.

Pɔ́ɔl a á ega á mvhɔ wɔ sáʼ‑ŋgɔŋ epuɔ Yúda

³⁰ Mía tɛŋgyā ncu á nɔŋ efāʼa á lezhɛ̄ kwaʼ ajū mīi, epuɔ Yúda é swiŋɛ Pɔ́ɔl melaʼ épúp. Njhʉ̄ é lɛ ndá, á tswi, mɛ́ kɛ́ʼte meŋkhʉ atʉɛ́ ánɛ Pɔ́ɔl, ḿbiŋ ntswī á mbū wɔ nɔŋ‑epɔʼ epi melʉɛ, pɔ́ mvuʼ epɔ̄ melʉɛ, ŋ́gɛ pɔ́ ecúʼte. Pɔ́ cúʼte tɛ mmī, á tswi mɛ́ lɔk á Pɔ́ɔl eshʉ̄ʼ mé mvhɔ zɔp.