Mefaʼ Meziŋ-ntō 21 - Eka Eswhī

Pɔ́ɔl a á ega ŋgʉ̄ɔ mé Yelósalɛm

¹ Pek a Pɔ́ɔl é tshi epuɔ Efɛze nnéŋ épúp, ŋ́gɔ ŋkó á ntē mɛtúa ntshi, ŋgʉ̄ɔ ndeŋ ndeŋ mé Kɔ́ɔs. Njhʉ̄ é lá, pek zɛ́t nzīŋɛ á ntshi á ntshi, ŋgʉ̄ɔ mé Lode. Éshʉʼ efhó éwú ŋgʉ̄ɔ mé tésɔŋ Patala.

² Ŋ́kó éwú, ńjʉ́ɔ mmɔʼ mɛtúa ntshi yīi, a le nɔ̄ŋ ŋgʉ̄ɔ mé apak ŋgɔŋ Fenísia, ńdɛ nzíʼ ŋkó éwú, pek a pɔ́p é gʉɔ.

³ Ŋ́kó ŋgʉɔ tɛ ntshí nnɔŋ njʉ́ɔ á Shʉple, éfaka ndɔ̄k ŋkɔʼɔ́ apū ete, ńzīŋ á ntē ntshi, ŋgʉ̄ɔ mé apak ŋgɔŋ Sili, ŋ́gʉɔ tɛ ŋkó á tésɔŋ Tíi, mɛtúa ntshi á fók á tsitsi yīi, a á mbīʼ éwú.

⁴ Pek kó éwú, éfāʼ epuɔ Yɛɛ́so tɛ njʉ́ɔ, pek a pɔ́p é náŋ ntém á aleʼé. Azwakne Ndém á tshóne á wɔ́p, pɔ́ lé á mbū Pɔ́ɔl ŋ́gɛ, ndɛ́ʼ á zéŋ á Yelósalɛm ŋgʉ̄ɔ.

⁵ Ŋgap alāʼ mɛ́t é tɔ́k, pek nɔ̄ɔŋ ŋkɔ̄ŋɔ á lelɔk á leziŋ wek, ŋgʉ̄ɔ mé mvhɔ. Pɔ́ metsem, mbɔɔ mezwí pɔ́p pɔ́ a ewɔŋkhʉ̄ pɔ́p, é fhó á tésɔŋ tɛ ŋkó á nzem apɛ́, ńtsākne á wék á akʉŋɛ́ ntshi. Ŋ́kó éwú, pek a pɔ́p é pú ntswíʼte á esī metsem, éswíŋte á Ndém.

⁶ Pek a pɔ́p é laʼne épúp, éfākne, pek ge ezíʼ ekó á ntē mɛtúa ntshi, pɔ́ piŋ nzem mé memba mɔ́p.

⁷ Pek fhó á Tíi épúp, ŋ́gʉɔ tɛ ŋ́kó á Tolemayis, éfhó á ntē mɛtúa ntshi ntó, ŋ́gʉɔ efāʼ epɔ̄ memía, ńtsāʼte á wɔ́p. Pek a pɔ́p é piŋ nnáŋ á taʼ aleʼé alāʼ.

⁸ Njhʉ̄ é lá, pek egʉ̄ɔ, ŋ́kó á tésɔŋ Sezale, ŋ́kó éwú épúp, ŋ́gʉɔ nnáŋ á mba Fílíio. Á gɔ́ á ntswi‑ŋke mbɔŋ ánɛ Yɛɛ́so, ńzéŋ ŋgɔ́ mmɔʼ ŋiŋ á nnɔ epuɔ esambīa pīi, mɛ́ le tsɔ́ʼ á Yelósalɛm lā.

⁹ A le wɛ̄ epɔ̄ nzwí lekua, mbɔ pɔ́ la á ŋiŋ mbaŋa zhɛ́ ɛ́, mbɔ pɔ́ gɛ ntswīi ŋke Ndém.

¹⁰ Pek kó éwú épúp, ńnáŋ tsɔ eleʼé shɔ́ʼɔ́ lɛ́, mmɔʼ ŋiŋ, ŋ́gɔ́ á ntswi‑ŋke Ndém, á fhó á ŋgɔŋ epuɔ Yúda, éshʉ̄ʼ á mba yīi, pek naáŋ éwú, lezēŋ tsí é gɔ́ lɛ, Agabus.

¹¹ Á shʉʼ épúp, éfhó ánɛ Pɔ́ɔl, ŋ́kɛ́ʼɛ ŋkhʉ yīi a lɔkɔ ŋkúʼtɛ nzhó zi, ńdɔk ŋkwɛ́t mekhu mí yí méŋwɛ̄t pɔ́ mbū mí, ńdé ŋ́gɛ: «Ŋke yīi Azwakne Ndém á tswi, e ewuɔ páʼa: ŋiŋ yīi ŋkhʉ wuɔ é eyí, epuɔ Yúda e shʉʼ ekwɛ́t á yí á Yelósalɛm, páʼ pɛ é jʉ́ɔ lāa, énéŋ á yí á mbū epuɔ pīi, pɔ́ té epuɔ Yúda á. »

¹² Pek, mbɔɔ epuɔ pīi, é ŋgɔ́ á ajʉʼ mɛ́t, é júʼ épúp, ḿbúʼ mbū á mbū Pɔ́ɔl ŋ́gɛ, ndɛ́ʼ á zéŋ ŋgʉ̄ɔ á Yelósalɛm.

¹³ Á tsɔ́ʼ ŋ́gɛ: «Melaʼ akɔ̄, pɛ laa tɛ ŋgɔ́ yīi, meŋ gɔ ejúʼ ŋká á? Meŋ wuɔ, meŋ kuūʼ eyi mɛ́ gɔ le lɛ̄ ŋkwɛ́t á gá kwɛ́t ndaʼ á, meŋ gɔ ezéŋ ŋkwhʉ́ á Yelósalɛm, melaʼ Atsyapuɔ Yɛɛ́so. »

¹⁴ Páʼ pek lɛ te kūʼ á leshūŋ tɛ á júʼ á azék ɛ́ lā, pek te zéŋ á yí ndʉ̄tɛ ɛ́, ńcʉ́ʼɛ ndʉ́ɛ́ ŋghʉ̄ɛ áa lɛ, ajū mīi Atsyapuɔ a á kɔŋ, a egɔ́ ŋghʉ ghʉʉ.

¹⁵ Meleʼé mɛ́t é tɔ́k, pek pɛ́te á tsitsi wek, ŋ́gɔ̄ egʉɔ mé Yelósalɛm.

¹⁶ Ńnɔŋ ŋgʉ̄ɔ, emɔ̄ʼ epuɔ Yɛɛ́so á Sezale, é gʉɔ ntsākne á wék á Yelósalɛm á mba Menazɔŋ, ŋ́gɛ pek eláʼ éwú. Menazɔŋ wuɔ mɛ́t, a lɛ ŋiŋ Shʉple, ŋ́gɔ́ á ŋiŋ Yɛɛ́so tɛ efhó tɛ afʉʼ.

Pɔ́ɔl á ega ŋgúa á Jáak

¹⁷ Pek gʉ̄ɔ tɛ ŋkó á Yelósalɛm épúp, epɔ̄ memía é lɔk lekāk ntsāʼte á wék.

¹⁸ Njhʉ̄ é lá, pek a Pɔ́ɔl é gʉɔ mé mba Jáak. Ŋ́kó éwú, epɔ̄ melʉɛ ánɛ alúŋ epuɔ Yɛɛ́so, é shʉʼ azɔ́p, ńcúʼte éwú.

¹⁹ Pɔ́ɔl á tsaʼte á wɔ́p, ḿbiŋ mbɛ́te á taʼ á taʼ eshúŋ á wɔ́p menu mīi, Ndém a ke tsīa ánɛ mbū mí, ŋ́ghʉ̄ á tsetsɛlɛ epuɔ pīi, é té epuɔ Yúda á.

²⁰ Pɔ́ júʼ anu zīi, a á lé tɛ á mi, ŋ́gūʼte á Ndém, tɛ mbīŋ ndé mé Pɔ́ɔl ŋ́gɛ: «Méŋ mɔ́ wek, o ka jʉ́ɔ kɛ, jʉ́ɔ páʼ atʉtʉ epuɔ Yúda, á cʉ́ʼ epuɔ Yɛɛ́so, ŋ́kúʼte lepé tsīi Mɔɔ́sɛ a le ziʼnéē, á mbɔŋɔ́.

²¹ Mɛ́ ke pīŋ eshúŋ á wɔ́p ŋ́gɛ, o ó si nzíʼnɛ epuɔ Yúda metsem pīi, é naŋteé ánɛ melāʼ ndɛʼɛ ŋ́gɛ, ndɛ́ʼ pɔ́ zéŋ nzīŋ ánɛ lepé mɛ́t, ńdɔkɔ ŋ́gɛ, ndɛ́ʼ pɔ́ ezéŋ ewɔŋkhʉ̄ pɔ́p ntém, ndɛ́ʼ pɔ́ ezéŋ nzīŋ ánɛ mɛt epuɔ Yúda.

²² Anu á gɔ́ páʼa, mɛ́ ghʉ páʼ lā? Pɔ́ e ké egaá lɛ́, ézhɛ́ á légɛ, o ó shʉʼ tɛ ŋgɔ́ ega.

²³ Páʼ á ké mbiŋ ŋgɔ́ páʼa lā, pek shúŋɔ á wú akɔ̄ lɛ́, o ghʉ̄ʉ épúp. Emɔ̄ʼ epuɔ lekua é ega pīi, pɔ́ ke ghʉ̄ alaʼne á mbū Ndém.

²⁴ Pɛ a pɔ́p egʉɔ ŋghʉ̄ anu, ńdɔk esōk epe ánɛ pɛ, o epiŋ ŋgyá etsɛ́ a pɔ́p ecū mīi, mɛ́ pɔŋteé á leyā. Púp mɛ́ ekɔ́ ethū tsɛ́. Á etsīa épúp, epuɔ metsem ejʉ́ɔ páʼ, o ó si ŋkúʼtɛ ajú lepé Mɔɔ́sɛ, tɛ́ ndɔkɔ nnáŋa, ńzhɛ́ á légɛ, anu zīi mɛ́ kɛɛ́ eshúŋɔ ánɛ wu lā, á kɛ áa mela.

²⁵ Ḿbiŋ ŋgɔ́ mé epuɔ pīi, é té epuɔ Yúda á, épi pɔ́ ke cʉ́ʼ epuɔ Yɛɛ́so, pek ke tí ndɔk mbé á wɔ́p ŋ́gɛ, ndɛ́ʼ pɔ́ ezéŋ mpfɛ́t evuʼ mbap tsīi, mɛ́ lɔk ntsɔ́ʼ afɛʼ á mbū mesī, ndɛ́ʼ pɔ́ ezéŋ mpfɛ́t metshi mbap, ndɛ́ʼ pɔ́ ezéŋ mpfɛ́t mbap na yīi, a á kwhʉ́ efem feém, ḿbiŋ mbá á agā. »

²⁶ Pɔ́ɔl á júʼ épúp, njhʉ̄ é lá, pɔ́ a epuɔ lekua pwɔ̄ é gʉɔ ŋghʉ̄ anu, ńdɔk nzī á lesok epe ánɛ pɔ́p. Pɔ́ɔl á gʉɔ ŋkó á Mía Ŋgyā Ndém, éshúŋ aleʼé zīi, pɔ́ gɔ emakne á lesok epe ánɛ pɔ́p, ńdɔkɔ ndʉ́ɛ́ aleʼé zīi, mɛ́ gɔ á nnɔɔ̄ŋ epɔʼ awíɛ awíɛ á nnɔ pɔ́p, á mvhɔ Ndém.

Mɛ́ é kyɛ́t á Pɔ́ɔl á ntē Mía Ŋgyā Ndém

²⁷ Meleʼé mɛ́t esambīa á lelɔk ntsékne anu jɔ̄ é nɔŋ ŋgɔ̄ á mmiī, emɔ̄ʼ epuɔ Yúda, éfhɔ́ɔ á ntē apak ŋgɔŋ Azíi, é jʉ́ɔ á Pɔ́ɔl á ntē Mía Ŋgyā Ndém, éswīte á alāʼ zīi, á ŋgɔ́ ajʉʼ mɛ́t, ŋ́gɔ̄ á yí,

²⁸ ńnɔŋ ndʉ́ɛ́ mé ŋghi teté ŋ́gɛ: «Epuɔ Islaɛl, pɛ eshʉ̄ʼ nnéŋ mbū lo. Ŋiŋ yīi a kʉ́ʼnɛ á ajʉʼ tsem, ńzíʼnɛ á mbū epuɔ metsem ŋ́gɛ, mɛ́ ewák á wɛ́, a awuɔ. A á si nzéŋɛ nzíʼnɛ ŋ́gɛ, mɛ́ ekʉ̄ŋne lepé tsīi Mɔɔ́sɛ a le ziʼnéē. Ńzéŋɛ ndʉ́ɛ́ ŋ́gɛ, ajʉʼ jʉɔ páʼa, á pú te ajūɔ ɔ́. Tɛ mbɔɔ tsetsɔŋɔ wuɔ, a á lɔk epuɔ pīi, é té epuɔ Yúda á, ŋ́kó á ntē Mía Ŋgyā Ndém, ńdɔkɔ ntsēŋtɛ ajʉʼ alɔ́ʼ jʉɔ mɛ́t. »

²⁹ Pɔ́ lɛɛ́ ndʉ́ɛ́ épúp, melaʼ mīi pɔ́ njʉ́ɔ Tlofime ŋiŋ Efɛze, pɔ́ a Pɔ́ɔl á tésɔŋ, ńnɔŋ ŋkwāŋa ŋ́gɛ, Pɔ́ɔl a á ŋghʉ̄ á kó á ntē Mía Ŋgyā Ndém.

³⁰ Tésɔŋ ntsem á pú ncʉ̄ʼne. Alāʼ á pú efhó á meshhʉ̄ meshhʉ̄, ńná eshʉ̄ʼ. Mɛ́ gɔ á Pɔ́ɔl, éshūŋne á yí ndɔk efhó á Mía Ŋgyā Ndém ńtó, mɛ́ lɛ ehā ntsɛ́tte menchu ŋgyā.

³¹ Ńnɔŋ efāʼa lezwhī á yí, mɛ́ gʉɔ eshúŋ á mía tɛŋgyā wɔ lʉɔ́ʼ‑ncu epuɔ Lóma ŋ́gɛ, tésɔŋ Yelósalɛm ntsem a á pákne tɛ mmī.

³² Á lɛ ehā ndū á esī, ńdɔ̄k wɔ lʉɔ́ʼ‑ncu pɔ́ epɔ̄ metɛŋgyā ncu, ńnáte ŋgʉ̄ɔ mé ajʉʼ zīi, alāʼ á mbú ŋgɔ́ éwú. Alāʼ á lɛ ŋgē ejʉ́ɔ á wɔ́p, ńtshī á letswā á yí nnéŋ.

³³ Mía tɛŋgyā wɔ lʉɔ́ʼ‑ncu, á lɛ ntshóte nnɛ̄t, éshʉ̄ʼ mé lezēŋ Pɔ́ɔl, ńtswī mɛ́ gɔ á yí, ńdɔ̄k meŋkhʉ atʉɛ́ mɛ́mbīa, ŋ́kwɛ́t á yí. Tɛŋgyā á zɛ́tte ŋ́gɛ: «A á páʼa ŋgɔ́ awɔ́?» Ńzéŋ nzɛ́tte ŋ́gɛ: «A á ghʉ á lā?»

³⁴ Táʼ, menchu menchu á gɔ́ á nnɔ alāʼ, emɔ̄ʼ epuɔ é gɔ́ ega, ńzwɛnnɛ ndʉ́ɛ́ ajʉɔ anu, emɔ̄ʼ epuɔ é gɔ́ ege, ńdʉ́ɛ́ azi ndɛʼɛ. Tɛŋgyā ncu á pú te kūʼ á lezhɛ̄ kwaʼ anuúnē á ntē mbákné mɛ́t ɛ́, ńtswī ŋ́gɛ, mɛ́ elɔ̄k á Pɔ́ɔl, ńdɔk ŋgʉ̄ɔ mé lenaŋá wɔ lʉɔ́ʼ‑ncu.

^35-36 Mɛ́ nɔŋ ndɔ̄kɔ á yí ŋgʉ̄ɔ, alāʼ á gɔ́ nzem nzhɛ̄nɛ, ńnɔŋ ndʉ́ɛ́ mé ŋghi teté ŋ́gɛ: «Mɛ́ eké nzwhí á yí zwhí. » Pɔ́ a pɔ́p é gʉɔ tɛ ŋkó ajʉʼ mesitɔ́ɔp, alāʼ á pú efók mbʉʼ, tɛ wɔ lʉɔ́ʼ‑ncu é léŋne á Pɔ́ɔl, ńdɔk ŋkɔ́ʼ.

Pɔ́ɔl a á ega nzɔ̄ŋɔ athū zí á mvhɔ epuɔ Yelósalɛm

³⁷ Á kuʼ afʉʼ zīi, mɛ́ nnɔŋ ŋgɔ̄ á nnéŋ Pɔ́ɔl á ntē lenaŋá wɔ lʉɔ́ʼ‑ncu, á lé á mbū mía tɛŋgyā wɔ lʉɔ́ʼ‑ncu ŋ́gɛ: «Élɛ o gɔ ecʉ́ʼ, meŋ ndé á taʼ anu á mbū wu u?» Tɛŋgyā á túŋte á yí ŋ́gɛ: «O zhɛɛ́ ashuŋne epuɔ Glɛk páʼa lɛ́?

³⁸ O lɔkɔ te ŋgɔ́ɔ á ŋiŋ Ejīpto, éyi a ke māʼ á tákté á tésɔŋ, ńdɔ̄k menzɔŋ ntsāʼ lekua, ńtsé á késáatswɛt ɛ́ lɛ̄?»

³⁹ Pɔ́ɔl á gɛ: «Meŋ á ŋiŋ Yúda, mɛ́ zhí á gá ánɛ apak ŋgɔŋ Silisi, á ntē tésɔŋ Táase. Meŋ á ŋiŋ tésɔŋ wuɔ mɛ́t, éyi mɛ́ gɔ le wák. Tsɔ́ʼɔtsɔ̄ʼ, lɛ́ ncʉ́ʼ meŋ eshúŋne á mbū alāʼ jʉɔ. »

⁴⁰ Á lɛ mvéŋ. Pɔ́ɔl á tshí á ndo mesitɔ́ɔp, ńtsɛ̄tte apū zí, alāʼ á láŋte, á lɔk alāʼ epuɔ Yúda eshúŋne á mbū pɔ́p, ńdé ŋ́gɛ: