Mefaʼ Meziŋ-ntō 20 - Eka Eswhī

Pɔ́ɔl a á ega nzéŋɛ ŋgúa epuɔ Maseduan pɔ́ epuɔ Akayi

¹ Tákté yīi a á ŋgɔ́ á Efɛze, á mi páʼā. Pɔ́ɔl á cúʼte epuɔ Yɛɛ́so, éshúŋne ndɔk nték á wɔ́p, ḿbiŋ ndāʼne á wɔ́p, ŋ́gʉ̄ɔ mé apak ŋgɔŋ Maseduan.

² Ŋ́gē etɔ́k ánɛ apak ŋgɔŋ jʉɔ mɛ́t, ńziŋɛ eshúŋɔ menu tɛ nzáne, ńdɔkɔ ntswíʼtɛ epuɔ Yɛɛ́so, ḿbiŋ ŋgʉ̄ɔ mé Glɛs.

³ Ŋ́kó éwú, ńnáŋ mesaŋ métɛ́t. Ńnɔŋ efāʼa á lekō mɛtúa ntshi ŋgʉ̄ɔ mé apak ŋgɔŋ Sili, tɛ́ mbīŋ njúʼ páʼ, epuɔ Yúda é si ntáŋa menāŋ, éfāʼa á lezwhī á yí, ńdɛ nnéŋ á ntē yí, á lepiŋ nzem nzápa á Maseduan, ńdɛ ŋgʉ̄ɔ.

⁴ Pɔ́ a epuɔ puɔ é lɛ nnɔ: á Sopatɛɛ méŋ Piilus, ŋiŋ tésɔŋ Bele, ŋ́ghʉ̄ Alistáak pɔ́ Sekúndus, épuɔ Tesalonik. Ŋ́ghʉ̄ á Ŋgayus ŋiŋ Dɛlbe, ŋ́ghʉ̄ á Timotɛ, ŋ́ghʉ̄ á Tishik pɔ́ Tlofime, épuɔ apak ŋgɔŋ Azíi.

⁵ Epuɔ puɔ mɛ́t, é shʉʼ ŋgɔ́ mvhɔ, ḿbīk á Tloas, ńzwíʼte á wék a Pɔ́ɔl.

⁶ Pek é cʉ́ʼ azék, ńjhʉ́ lekāk mblɛ té levwi, tɛ́ éfhó á Fílíio, ŋkó á mɛtúa ntshi ŋgʉ̄ɔ. Ńdáʼ ŋgē etswɛ́tte á wɔ́p á Tloas, á gɔ́ eleʼé táa. Ŋ́kó éwú, pek a pɔ́p é náŋ á taʼ ŋgap.

Pɔ́ɔl a á ega ŋgúa epuɔ tésɔŋ Tloas

⁷ Á shʉʼ ŋgɔ́ mvhɔ aleʼé ánɛ ŋgap alāʼ, pek cúʼte, ŋ́gɔ̄ á mbwɔ́ʼte mblɛ páʼ Yɛɛ́so a le tswīi épúp. Á gɔ́ páʼ njhʉ̄ e é nnɔŋ ŋgɔ̄ elá, Pɔ́ɔl a egʉ̄ɔ lā, á lɛ nzī á leshūŋne á mbū epuɔ, ńdáʼ eshúŋne shuŋnée tɛ té‑etsōʼ á kuʼ.

⁸ Meláam é lɛ tɛ nzáa ánɛ ŋgyā zīi, pek é ncúʼte éwú ánɛ leleŋ athʉ́.

⁹ Mmɔʼ mɔ́ ŋgwɛso a lɛ á ŋgyā, lezēŋ tsí é gɔ́ lɛ Etik, ńnáŋ á ŋgʉŋte awíndu. Páʼ Pɔ́ɔl a á nzɛ́t ntswiʼnɛ eshúŋne shuŋné lā, lelɔ̄k á gɔ á mɔ́ ŋgwɛso mɛ́t, á lí, tɛ efhó ánɛ páte meleŋ ntɛ́t ŋgyā zīi, pek é ŋgɔ́ éwú, ésóʼo ŋgwhʉ̄ á esī. Mɛ́ shʉʼ ŋgē epʉ́ʼɛ á yí, mbɔ a á ndáʼ ŋkwhʉ́.

¹⁰ Pɔ́ɔl á sóʼo azí, ńtswɛ́tte á yí á esī, ḿbáne ánɛ yí, ńtswíʼ á yí ŋgwɛ̄ á mbū yí, ńdé á mbū epuɔ ŋ́gɛ: «Ndɛ́ʼ pɛ ezéŋ mbɔ́k, a zɛɛ́t nte. »

¹¹ Pɔ́ɔl á ghʉ épúp, ńzéŋ eswáŋ nnɛ̄t mbē mé ŋgyā zīi, pek é ŋgɔ́ éwú, ḿbwɔ́ʼte mblɛ mɛ́t páʼ Yɛɛ́so a le tswī épúp, ŋ́gāpte, pek pfɛ́t. Á zéŋ ntswīʼne eshúŋne á mbū epuɔ tɛ ntshí é sak, tɛ ŋkó melanjhʉ̄, ńdɛ ŋgʉ̄ɔ.

¹² Epuɔ é cʉ́ʼ ŋgē elɔk á mɔ́ ŋgwɛso wɔ̄ egʉɔ, á gɔ́ nte. Ntē awíɛ awíɛ é lɛ eswíte.

¹³ Pɔ́ɔl á ge efhó á Tloas, ńjʉ́ɔ ŋ́gɛ, yí e ziŋ á esī tɛ́ egʉɔ mé tésɔŋ Asos. Pek lɛ ŋgɔ́ á mvhɔ, ŋ́kó á ntē mɛtúa ntshi, ḿbīk éwú, tɛ́ a eshʉ̄ʼ pek a pɔ́p e egʉ̄ɔ.

¹⁴ Á shʉʼ tɛ ntswɛ́tte á wék á Asos mɛ́t, ńzíʼ ŋkó á ntē mɛtúa ntshi, pek a pɔ́p é gʉɔ mé tésɔŋ Mitilɛ́ne.

¹⁵ Njhʉ̄ é lá, pek fhó éwú, ŋ́gʉ̄ɔ tɛ ŋkó á eshhʉ̄ Shío. Njhʉ̄ é kó nzéŋ ndá, pek kó á eshhʉ̄ Samos, ezi mmɔʼ njhʉ̄ é zéŋ ndá, pek lɛ ŋkó á tésɔŋ Milɛt.

¹⁶ Pek ziŋɛ páʼā, melaʼ mīi Pɔ́ɔl a le jʉ́ɔ ŋ́gɛ, yí té ezápa á tésɔŋ Efɛze ɛ́, ḿbɔ́k á yí á lekō á ntē apak ŋgɔŋ Azíi, ḿbí njhʉ̄. A lɛɛ́ ŋgáknɛ épúp, ŋ́gɛ eshhʉ̄ é túɔ́, yí gʉɔ tɛ njhʉ́ lekāk Paŋtekɔt á Yelósalɛm.

Pɔ́ɔl á ega eshúŋnɛ á mbū epɔ̄ melʉɛ ánɛ alúŋ epuɔ Yɛɛ́so, á Efɛze

¹⁷ Pɔ́ɔl á kó á tésɔŋ Milɛt, ńtó á mɛtúa ntshi, ńtó ŋke á mbū epɔ̄ melʉɛ ánɛ alúŋ epuɔ Yɛɛ́so á Efɛze, ŋ́gɛ pɔ́ eshʉ̄ʼ tɛ njʉ́ɔ á yí.

¹⁸ Pɔ́ shʉʼ tɛ ntswɛ́tte á yí, á lé á mbū pɔ́p ŋ́gɛ: «Pɛ é si nzhɛ́ɛ ntií atswhī zīi, meŋ ke wɛ̄ ánɛ pɛ, efʉʼ metsem, tɛ efhó á aleʼé zīi, meŋ nde tshí akhu zá á ntē apak ŋgɔŋ Azíi ega.

¹⁹ Meŋ ke lɔ̄k á lesōʼne nnɛ̄t za ŋgyá á esī, pɔ́ ntshi nnēk, ńdɔ̄k efāʼ á mbū Atsyapuɔ Yɛɛ́so. Epuɔ Yúda é zéŋɛ nnɔ̄ŋɔ ntáŋa menāŋ efʉʼ metsem ánɛ meŋ, ńnɔŋ nnéŋɛ ŋgeŋge á athū meŋ.

²⁰ Meŋ kɛ te lʉ̄ɔ á wɛ́ amɔ̄ʼ ajū mīi, á mbɔŋ á mbū pɛ ɛ́. Meŋ ke shúŋ anu Ndém á mbū pɛ, ńzíʼne á wɛ́ á meŋgyā alúŋ epuɔ Yɛɛ́so, tɛ mbɔɔ ánɛ meŋgyā mɛ́.

²¹ Meŋ ke nɔ̄ŋ eshúŋɔ á taʼ azō á mbū epuɔ Yúda mbɔɔ á mbū epuɔ pīi, é té epuɔ Yúda á ŋ́gɛ: “Á anuúnē á légɛ, pɔ́ egɔ̄ nnɛ̄t zɔp, ŋ́gwáʼ atswhī tepɔŋ zɔ́p, ḿbīŋ nzem á mbū Ndém, ḿbiŋ efɛ́ nnɛ̄t ŋgyá á mbū Atsyapuɔ yímpɛ Yɛɛ́so.”

²² Tsetsɔŋɔ wuɔ, Azwakne Ndém á si ŋkōnɛ á gá ŋ́gɛ, meŋ egʉ̄ɔ á Yelósalɛm. Meŋ te si nzhɛ́ɛ ajū mīi, a kó éwú etɔ́k ánɛ meŋ ɛ́.

²³ Meŋ á si nzhɛ́ɛ áa ndaʼ á légɛ, Azwakne Ndém á shúŋ á gá ŋ́gɛ, meŋ nɔŋ ntɔ́kɔ ánɛ ewiɛ́ tésɔŋ lɛ́, mbɔ meŋ gɔ le néŋ té jʉ́ɔ ŋgʉɔ̄ʼ ɔ́, ḿbīŋ le néŋ té kó á atʉɛ́ ɛ́.

²⁴ Á ké ŋgɔ́ áa légɛ, gá legɔ̄ éwú, a te á mbū meŋ, ŋ́gɔ́ azō ɔ́. Mvhɔ, a á gá á leghʉ mefaʼ mīi, Atsyapuɔ Yɛɛ́so a le tsekné á mbū meŋ, tɛ ndáʼ nzōko. Meŋ mbɔɔ́ŋ á letswi ŋke mbɔŋ, ŋ́kʉɔ́ʼ ŋkwɛ ŋ́gɛ, á anuúnē á légɛ, Ndém a puú ŋgwɛ apɔŋɔ́ ntē te ndhʉ ánɛ epuɔ.

²⁵ «Ajū mīi meŋ á si ŋké nchʉ́ɛ nnɛ̄t nzhɛ́ɛ tsetsɔŋɔ wuɔ, á gɔ́ áa lɛ, ŋiŋ wɛ a cʉʉ́ʼ lezēk tsí ánɛ meŋ etshí ɛ́. Meŋ ke kʉʼné á tsetsɛlɛ pɛ metsem, ńtswī ŋke mbɔŋ mɛ́t ánɛ Lefɔ Ndém.

²⁶ Melaʼ épúp tɛ́, meŋ shúŋɔ á wɛ́ á ayáʼa ŋ́gɛ, ŋiŋ wɛ a nɔŋ mbíi, mbɔ alɔ́ʼ á té azá á.

²⁷ Meŋ ke tswī á wɛ́ té lʉɔ amɔ̄ʼ azō, á ajū mīi Ndém á si ŋkɔ̄ŋɔ ŋ́gɛ, mɛ́ eghʉ̄.

²⁸ Pɛ ecʉ́ʼ nchʉ́ nnɛ̄t ncʉ̄te athū nnɛ̄t zɛ́, ńzéŋ ńcʉ̄te memvhō Ndém mīi, Azwakne zí á ke tsekné ŋ́gɛ, pɛ epíp, álúŋ epuɔ Yɛɛ́so zīi, Ndém a le lɔ̄k á kwaʼ metshi mí ncūʼ.

²⁹ Meŋ á zhɛ́ á légɛ, meŋ a fhó á tsetsɛlɛ pɛ egʉɔ, epuɔ menɔŋ, ŋ́gɔ́ páʼ memía metsho lā, e eshʉʼ ŋkó á nnɔ pɛ, ŋ́gɔ̄te emɔ̄ʼ epuɔ.

³⁰ Tɛ mbɔɔ á nnɔ pɛ pwɔ̄, emɔ̄ʼ epuɔ e shʉʼ elu á esī éwú, étáŋ mela, élɔk ezɔ́pte emɔ̄ʼ epuɔ Yɛɛ́so, énéŋ á nzem pɔ́p.

³¹ Tɛ́ mbɔ, pɛ epíp, ńnɔŋ ŋkímtɛ páʼ, meŋ ke náŋ á tsetsɛlɛ pɛ ŋguʼ tɛ́t, ńnɔŋ ntswɛ̄tɛ á awíɛ awíɛ mé ntshi nnēk, é táŋ‑azokó pɔ́ etsōʼ.

³² Tsetsɔŋɔ wuɔ, meŋ á tsékne á wɛ́ á mbū Ndém, ńnɔŋ ndʉ́ɛ́ ŋ́gɛ, pɛ́ etshí á ashuŋne zí á mvhɔ, aziɛ́ mé si ntswīi páʼ a wɛɛ̄ ŋkɔŋ te ndhʉ ánɛ pímpɛ épúp. Aziɛ́ mé zéŋ ŋkūʼ á leghʉ, pɛ tēte ánɛ lefɛ̄ nnɛ̄t ŋgyá mé yí, éfú ŋkó ánɛ lepɔŋ te mi tsīi, a le féŋ á mbū epuɔ pīi, é epí, tɛ ntsékne.

³³ Pɛ é si nzhɛ́ɛ páʼ meŋ kɛ épúp á tsetsɛlɛ pɛ, meŋ kɛ te kegʉɔʼ ánɛ ŋkāp ŋiŋ wɛ̄ɛ, meŋ te kegʉɔʼ ánɛ gɔ́ɔl ŋiŋ wɛ̄ɛ, ḿbiŋ te wɛ̄ɛ ánɛ nzhó ŋiŋ ɛ́.

³⁴ Pɛ méŋwɛ̄t é si nzéŋɛ nzhɛ́ɛ á mbɔŋɔ́, páʼ meŋ ke lɔ̄k mbū má muɔ, tɛ́ ŋghʉ̄ afaʼ, ńdɔk ŋgɔ́ éwú, ńzéŋ ndɔk ntswíte epuɔ pīi, pek a pɔ́p é ziŋɛ.

³⁵ Ajūɔ tsem zīi, meŋ ndɛɛ́ ŋghʉɛ, meŋ ndɛɛ́ ŋghʉɛ ńdɔkɔ ntswīi á wɛ́ á leghʉ afaʼ, tɛ́ ŋgwɛ̄ azō, ŋ́kó ndɔk ntswíte mepūŋ, ḿbiŋ nzéŋ nnɔŋ ŋkímtɛ ashuŋne jʉɔ zīi, Atsyapuɔ Yɛɛ́so yí méŋwɛ̄t a le lé la, ŋ́gɛ: “Eshhʉ̄ mbɔŋ a á ŋiŋ yīi, a yaá á ŋiŋ azō, ńtɔ́k á ŋiŋ yīi, mɛ́ yáa á yí.”»

³⁶ Pɔ́ɔl á shúŋne épúp, pɔ́ a pɔ́p é pú ntswíʼte á esī metsem, á swíŋte á Ndém á athū pɔ́p.

³⁷ Pɔ́ metsem é pú ndɔ̄k ntshi nnēk, ŋ́gwhʉ̄ ánɛ yí, ésēŋte á yí, ńnɔŋ ndāʼnɛ á yí.

³⁸ Pɔ́ le pú nnɔŋ mmēkɛ á lelʉɛ páʼ, Pɔ́ɔl a á lé ŋ́gɛ, pɔ́ té láʼ ezéŋ lezēk tsɔ́p ánɛ yí tshí ɛ́, ńdɛ ndɔ̄k á yí ŋgʉɔ ntsākne á ntē mɛtúa ntshi.